Никонова Евгения Петровна
Улонзэ сӥзиз наукалы[править]
Евгения Петровна Никонова - история наукаосъя кандидат, доцент, УАССР-ысь культура удысысь дано ужась, Удмурт Республикалэн кун премиезлэн лауреатэз (2014). Пусъемын уно таукаронъёсын но синпель кузьымъёсын, «Дети войны» медален.
- Евгения Петровна, кыӵе ужды понна вылӥ премиез басьтыны шуд усиз?
- Шаерысьтымы культура удысын ужасьёслы сӥзьыса, 2012-тй арын «Удмуртская Республика: культура и искусство» энциклопедия потӥз. Сое дасян борды кутскемын вал ай 2000-тӥ аръёс котырын. Соку УдНИИен кивалтӥз Куликов Кузьма Иванович. Со ик мыным вазиськиз но вал: тон тодосчи, историк - чик юнме дорад пукиськод, тыныд ужаны кулэ! Со лӧпкытъямен, уж борды кыткиськи. Энциклопедиез дасян понна юри отдел усьтэмын вал. Нырысь-валысь отын 3 кузя ужамы, кивалтӥз история наукаосъя доктор Людмила Николаевна Бехтерева. Конечно, капчи уж ӧй вал со, архитектура ласянь гинэ но трос утчаськонъёс, бугыръяськонъёс луизы. Бӧрысь Анетта Петровна Сидорова дорамы вуиз, со театръёсын но артистъёсын ужаз ини. Мон отын 2007-тӥ арозь ужай на. 2012-тӥ арын институтэн кивалтэ ни вал Загребин Алексей Егорович. Но энциклопедиез дасян бордын азьло аръёсы ужамъёсты но ӧз вунэтэ - ваньмес вылӥ дунъязы. Пичиысен яратӥсько вал пӧртэм книгаосын бугыръяськыны. Та сямы юрттӥз, энциклопедия бордын ужакум но.
- Кытын вордскиды? Кыӵе семьяын будӥды?
- Вордӥськи мон туж чебер интыын, Шаркан ёросысь пичи гинэ Дэдэ гуртын. Ма, бен мон вордскон вакытэ со сокем пичи ӧй вал, калыкез лачак отын улӥз, коркалы быдэ шальтыр-шальтыр нылпи вайылӥзы. Гуртмы «Ким» колхозэ пырылӥз, ужась калык отын улӥз. Гурт шорамы ик тыметмы вал. Шулдыр ортчиз пинал дырмы! Гужемзэ тыметын пыласькиськом, толалтэзэ конькиен нискыласьком. Нош кӧня узы-боры но губи бичаллямы! Берло вакытэ, со понна туж сюлэм висе, егитъёс гуртэ улыны уг ни кылё, уж ӧвӧлэн райцентръёсы но городъёсы кошко. Соин сэрен гуртын пересьёс сяна уг ни кылё.
Тятяе Пётр Егорович колхозын конюх луыса ужаз, Быдӟым ож кутскыса, сое трудармие басьтӥзы, собере фронтэ нуизы. Отысь солы бертыны ӧз кылды ни, 1943-тӥ арын бырыны шедиз шуыса похоронка вуиз. Тятямы Украинаысь Запорожьее ватэмын. Мамамы Анна Николаевна пересьмытозяз колхозын пӧртэм ужъёсты быдэсъяз. Со 75 аресозяз улӥз.
Мумы-бубымылэн ми 5 кузя вал, мон - ньылетӥез. Виталий агае улонысь вазь кошкиз, 33 арес гинэ вал ай солы. Колхозамы валтӥсь зоотехник луыса ужаз. Кронидмы лэсьтӥськон удысын тыршиз. Земфира эмъян удысын ужаз. Жаляса верано, огзы но соос ми вӧзын ӧвӧл ни. Мон бӧрсьы Маша сузэре вань на.
Алигес Ашальчи Оки сярысь книга потӥз. Мон, отысь ӵужектэм туспуктэмез адӟыса, пайми: ма, мал- пасько, кытысь ке но мынам тае адӟеме вань. Зэм ик но, туспуктэм вылын тятямылэн Кузьма агаез вылэм.
Ашальчи Оки Казаньын эмчилы дышетскон вакытэ со но отын ветврачлы дышетскем. Иське, Удмуртиысь егитъёсын ӵош огинэ люкаськыло вылэм, вылды, соос. Та туспуктэмез адӟыса, нош йыре ортчем аръёс чилектэм кадь лыктӥзы. Кузя агаймылэн пиналъёсыз вылӥллямтэ, Нина кузпалэныз ӵош гинэ улӥллям. Соин ик соос монэ, пичи мае ке, вордыны басьтӥллям, улыны доразы Иже нуиллям. Соку гинэ бӧтьыртыны кутскись нылаш, ӟуч сямен вераськыны кутскисько ни вылэм. Но мамаелы туж жаль потӥськем, аслаз вордэм нуныез ук, городэ лыктэм но монэ берен гуртэ басьтэм. Быдэ вуыса ини, Иже дышетскыны лыктыса, мон та матысь ӵыжы-выжыосы дорын кунокуаын улӥ. Ярато вал соос монэ, асьсэлэсь нылзэс кадь карылӥзы.
- Пичиысен ик дышетӥсь луон сярысь малпаськоды вал, дыр?
- Бен, гуртын вазен дышетӥсьлэсь но врачлэсь ужзэ сяна тодоно ӧй вал. Эмьясь луэме ӧз поты. Соин ик, школаын дышетскыкум ик, зэмзэ но, тодӥсько ни вал: дышетӥсь луо. Покчи классъёсын бускель Вортчапочинка гуртын дышетски. Данъяськыса вераны быгатӥсько: со гуртын вордскемын кылбурчи Степан Широбоков но трос мукет тодмо адямиос. 5-тӥ но 6-тӥ классъёсы 4 иськеме Шегъян гуртэ ветлӥм ини. 7-тӥ классэ берен Вортчапочинкае бертӥ, со аре отысь школаез 7 классъем каризы. Школаын ӟеч дышетски, Похвальной грамотаен сое быдтӥ. Ижысь педучилищее мыныны ӧдъямме тодыса, школаен кивалтӥсьмы меӵак шуиз: педучилищее пырыны уд быгаты, дыр. Угось гуртысь нылпиослэн тодонлыкъёссы соку, городын дышетскисьёсын ӵошатыса, улӥын лыдъяськылӥзы. Но мон дышетӥселэсь верам кылъёсызлэсь ӧй кышка, ачимъя лэсьтӥ, тодон-валанме люканы Иже кошки.
Педучилищеын дышетскон туж тунсыко потӥз. Отысен тодматским вуоно тодосчиен Христолюбова Людмила Степановна. Милемын ӵош дышетскыны пыремын вал Ломагин Кирилл. Но солы училищеез йылпумъяны ӧз кылды - армие басьтӥзы. Дышетӥсьёсмы туж визьмоесь но сабырлыесь вал - Евгений Самсонов писатель удмурт литературалы, нош тодосчи Глафира Никольская удмурт кыллы дышетӥзы. Соос кыкназы ик егитэсь, соку гинэ ужаны кутско вал ай, туж умой дышетӥзы. Одӥг пол Пушкинлэн «Евгений Онегин» кылбуръёсын романэзъя сочинение гожтӥськом. Катя Протопоповамы - визьнодасьёсмес сокем зол яратӥськом вылэм - Онегин интые Самсонов гожтэм.
3-тӥ курсын дышетскыкумы, дорамы Москваысь 2 чебер гимнасткаосты вайизы. Соос милемыз чеберлыкез валаны но бальной эктонъёсты эктыны дышетӥзы. Милемыз актовой залэ пырто но, параен-параен султытыса, эктыны дышето вал. Ми, гуртысь вуэм нылъёс но пиос, гордэктытозь ик соослэсь возьдаськылӥмы. Отын скрипкаен но шудыны дышетӥзы. Милемын Альберт Артамонов но дышетскиз, бӧрысь со тодмо журналист луиз. Туж шулдыр улӥмы, кӧня тодон-валан басьтӥмы. Но 4-тӥ курсэ потыса, улонмы чутрак воштӥськиз - мӧзмыт учыр луиз. Шаерамы училищеос трос шуыса, 1954-тӥ арын милесьтымзэ пытсазы, ӝынызэ Можгае, ӝынызэ Глазкаре выжтӥзы. Мон Глазове шеди, нош Люда Христолюбова Можгае кошкиз.
Глазовысь училищеез милемын ӵош йылпумъяз Пимен Касаткин, бӧрысь со Удмурт радиоысь диктор луиз. Дышетсконме йылпумъякум, дышетӥсьёсы монэ пырыны косо вал Глазовысь ик В. Короленко нимо пединститутэ: тынэсьтыд, пе, умой математик пӧрмоз, отчы экзаменъёстэк ик кутозы. Но мон чутрак пумит луи, валэктӥ: математикаез уг яратӥськы. Собере монэ ужаны ыстӥзы Кез ёросысь Выль Унтэм нылпи юртэ старшой пионервожатое. Али кадь ик тодӥсько на отчы мынэмме - Кезозь поездэн, отӥяз грузовой машиналэн кузоваз. Нырысь-валысь нылпи юртын улӥсь пиналъёс монэ асьсэ кадь ик воспитанница кожаллям. Лыктон нуналам угось соос пӧлын кӧлӥ, ӵапак тырттэм кроватьсы вылэм. Ӵукна сайкаме бере мон доры воспитатель пыриз но шуэ: Евгения Петровна, тӥ табере директор доры мынэ. Нылпиос воксё абдразы, синъёссы ик маке быдӟа усьтӥськизы - ма, кыӵе-сыӵе, пе, со Евгения Петровна луоз ини. Угось мон интернатын дышетскись нылъёс кадь ик чиед, пичи мугоро, кышкась но туж востэм вал. Училищеын дышетӥсьёсы шорам «маленькая, беленькая» шуыса гинэ вазиськылӥзы. Директор монэ умой пумитаз, нылпи юртын дышетон но ужан сярысь вераськиз. Скрипкаен шудыны быгатэмме тодыса, оркестр кылдытом шуиз. Татын но мон «уг быгаты» шуыса пыкъяськыны кутски вал, но со мынэсьтым мылкыдме бурдъяз, юрттом шуиз. Озьы 9-12 адямилэсь оркестр кылдытӥм. Домбраен но шудӥськом вал. Мон нылпиослы гаммаосты валэктылӥ. Таосыныз сямен ик, нылпи юртысь музон нылпиосын но кылы тупаз, котькыӵе ужез тыро-пыдо, тупаса лэсьтылӥмы. Куинь группаен ужано луиз: покчиосын, шоро-куспо но бадӟым классъёсын дышетскисьёсын.
Уже каньылля мынэ ни вал, каллен-каллен ӧраз пырыны кутски. Но улонам мар ке уг тырмы кадь, малпасько: ужаны вуо ай, али мыным тодон-валанме будэтоно, дышетскыны пыроно. Интернатын кык ар ужаме бере документъёсме Ижысь пединститутысь историко-филологической факультетлэн удмурт отделенияз нуи, экзаменъёсме умой сётъяй. Татын ми нош ик Людмила Христолюбоваен пумиським, одӥг группае дышетскыны кемдӥм. Жаляса верано, кылем сӥзьыл со улонысь кошкиз. Но ми соин люконтэм матысь эшъёс вал.
- Одӥг группаын ӵош дышетскем эшъёсты сярысь туж данъяськыса вераськоды. Кинъёс соос луизы?
- Группаямы ӝыныез нылъёс, ӝыныез пиос дышетскимы - ваньмыз визьмоесь, тросэз тодон-валанзэс педучилищеосын будэтэмын ни вал. Милемыз преподавательёс ӟеч дышескеммы понна ушъяллязы, тӥ, пе, ӟуч студентъёслэсь номырин уд висъяськиське, ай соослэсь, оло, визьмоесь но. Али ке но тау кариськом дышетӥсьёсмылы Даниил Яшинлы, Яшина Роза, Тараканов Иван Васильевич, Надежда Качалиналы но мукетъёсызлы. Соос милям улонамы югдытӥсьёс вал. Одӥг группаын дышетским журналистэн Виктор Ивашкинэн, музейын ужасен Лебедева Серафима Христофоровна, Маша Михайловаен (Уткина Надежда анаез, со улонысь егитэн кошкиз), тележурналистэн Евгений Михайловен, тодосчиен Александр Байметовен, фотокорреспондентэн Александр Кузнецовен. Пӧлысьтымы тросэз эшъёсмы Россиысь но Удмуртиысь дано дышетӥсьёс луизы.
- Зэм ик, синмаськымон адямиосын ӵош дышетскиллямды. Кызьы радъяськиз тӥляд ужан сюресты?
- Кык ар пала Вотка ёросысь комсомоллэн райкомаз школьной отделын ужай. Егит, чупрес, котькытчы мыныны дась, котькыӵе ужез лэсьтыны быгатӥсь - сыӵе луоно ук егит дыръя. Соку Шаркан но Вотка ёросъёс огинын вал. Гуртъёстӥ, школаостӥ, собраниос ортчытъяса, ветлӥ, гужемзэ лагерьёсын дыры бырылӥз. Калыкен ужаны комсомол ужын мон дыши. Одӥг пол пединститутысь КПСС-лэн историезъя кафедралэсь кивалтӥсьсэ Александра Алексеевна Бабинцеваез пумитай. Тон, пе, дышетӥсь адями, мар Воткинскын кариськод, гуртъёстӥ командировкаостӥ ветлӥськод. Давай, лыкты ай, шуэ, милям кафедраямы, уж шедёз. Александра Алексеевна удмурт кадръёсты будэтон сярысь сюлмаськылӥз. Со монэ соку ик общественной наукаосъя кабинетэн кивалтыны пуктӥз. Кӧня ке дыр ортчыса, мыным семинаръёсты нуыны оскизы, но лекциос ӧз сётъялэ. Наукае югыт сюрес возьматӥсе мынам Александра Алексеевна луэ. Солы сяна, тау кареме потэ на профессорлы Агафон Николаевич Вахрушевлы. Со монэ лӧпкытъяз, аспирантурае пырыны направление сётӥз. Куинь арзэ Москваысь Н. Крупская нимо областной пединститутын дышетски. Диссертацие Удмурт Республикаысь 1950-тӥ–1960-тӥ аръёсы партийной организациослэн ужамзылы сӥземын вал. Диссертациме утьыса, берен Иже бертӥ, ужаны кафедраям ик интыяськи. Монэ старшой преподавателе пуктӥзы, кӧня ке улыса, доцент луи. Александра Алексеевна шутэтскыны кошкем бере кивалтӥсьмы воштӥськиз, со интые мукетыз пуксиз. 1964-тӥ арысен 1992-тӥ арозь студентъёсты КПСС-лэн историезлы дышетӥ. Уно ветлоно луиз пӧртэм городъёсын ортчылӥсь тодон-валанэз будэтонъя семинаръёсы. Берло аръёссэ, Борис Ельцин переворот лэсьтэм бере, кафедрамес быдтӥзы. Дышетыны секыт луиз, нимысьтыз дышетон методичкаос ӧй вал. Мар со социалистическо-политической история? Улонэз кызьы валаськом, ас сяменымы адӟеммыя студентъёсты дышетыны выриськом вал. Соку дышетӥсьёсты тышкаськыны кутскизы. Мар кароно? Кызьы дышетоно? Ярам, ӵапак со огыр-бугыр вакытэ мынам шутэтскыны кошкон дыры тупаз.
- Туала арын историез дышетон шоры кызьы учкиськоды?
- Сюлэмы шуг луыса. Дышетэмзэс кылыса, мылкыды гинэ куашка. Котькытын пӧясько, шонерзэ уг верало, туннэ тазьы шуо, ӵуказеяз мукет сямен дышето кадь потэ. Оломалы вылысьтыз вылаз воштӥськонъёс ортчытъяло. Троссэ огазеяло, факультет интые институт каро. Со мыным валантэм. Совето вакытэ таӵе улон ӧй вал.
- Евгения Петровна, мугорды пичи, чиед ке но, сямды юн, шӧдске.
- Классамы эшшо одӥг Женямы вал на - со матысь ӵыжы-выжые Евгений Никонов. Пиосмурт нимын ветлӥсько шуыса, туж куректылӥ. Оло, со но юн луыны дышетӥз. Собере нимылы дыши, туж чебер потэ.
- Улондэс быдэсак наукалы сётӥды кадь уг поты-а? Семья кылдытон сярысь ноку ӧд малпаськылэ-а?
- Ма, мон асме быдэсак наукае выемын ӧй шуысал. Но кылдэмез озьы вал, дыр. Егит дыръям, тросэз нылъёс сямен ик, бырйиськи, луоз. Собере, дыр-даур ортчемъя, бер луэ ини семья сярысь малпаськыны. Вал курасьёсы, но соос сюлэмыя ӧй вал, лэся. Одӥг пол, мон со вакытэ ӵапак мама доры бертӥ вал, дорамы анаеныз егит пи лыктэм. Мама соосты утялтэ, куно каре. Э, валатски но, соку ик дорысьтызы пегӟи, мыным со кулэ ӧвӧл, малпай. Нош улон кошке, сое шӧдыса ик вуттоно ӧвӧл, аръёс туж ӝог ортчо вылэм. Ми Маша сузэреным ӵошеннамы улӥськом, алигес ӵыжак-выль квартира басьтӥмы. Малы ке Маша но семья ӧз кылдыты. Мамае мыным ялан сюлмаськыса вералляз: нылы, ку семья кылдытод ини? Ку пинал ваёд? Тырмоз огнад ветлыны. Нош Витя агае меӵак вералляз: Женя, кӧня дышетскод на, воксё уд ужаськы ук, тырмоз книга бордын пукыны. Зэм ик но, трос дыры кошкиз дышетсконлы. Со шӧдӥськиз, пенсие потыку но - дышет- скем аръёсы 12-ез стажам ӧз пыре.
Аслам пиналъёсы ӧвӧл шуыса, уг куректӥськы, агайёсылэн нылпиоссылэн нылпиоссы табере быдэ вуо ини. Соос милям туж трос. Городэ дышетскыны лыкто ке, ми соосты одно ик дорамы возиськом. Виталий агаелэн кык пиосыз кылизы. Олегез черкогуртысь муниципал кылдытэтэн кивалтэ. Нош Сергей пиез Вотка карын улэ. Кыкназылэн ик семьяосынызы ӟеч кусып возиськом. Ми Машаен соосты ваньзэс чакласа возиськом.
Источник
За предоставление материала выражаем огромную благодарность редакции газеты "Удмурт дунне"
