Кызьы тынад нимыд?

Роман Илья Петя Лёня

Котькуд адямилэн вань аслаз нимыз. Мынам семьям вань Зинок (Зинаида), Семён, Нина, Пётр, Михаил, Екатерина, Юбер. Адямилэн нимызъя,пе, тодыны луэ солэн сямыз, аспӧртэмлыкез сярысь. Но туннэ мынам тодматэме потэ Кияса ёросысь Салья гуртысь ним тырон сямъёсын.

Нимъёсын верад ке, сюрозы Лудкеч Гирша, Зырет Витя, Бия Натоль, Турпуз Шурик, Пузась Бӧдёк, Эзель Тоня, Сюкась Илья, Пиртэш Педот, Бигер Геня, Быле Юрка, Узбек Парас но трос со выллем. Валады, луоз, со кушем нимъёс.

Вань на огшоры нимъёс: Микон Сергей, Падей Аркаш, Гир га Сеня, Одэ Вася, Идок Коля, Муктӥ Петя но трос со выллем нимъёс. Таосыз выжыосынызы герӟаськемын.

Вань гуртамы Роман Илья Петя Лёня нимо воргорон, паспортэзъя со - Леонид Петрович Ильин. Вань улонзэ гуртын ортчытӥз, ужаз колхозын, котькуд йӧно пиосмурт сямен ик армие ветлӥз. Кышнояськиз, нылпиоссы будо. Но малы ке но гуртамы нокинэ но озьы кузь нимын уг верало. Юано кариськи, кин сое озьы нимаз.

– Егит дыръям мынам Агей нимо эше вал. Тӥни солэн йыраз лыктэм пересь атаезлэн верамез, соя ик ниманы кутскизы. Мынам нимы Лёня, нош атае – Петя, солэн атаез – Илья (фамилия но басьтэм Ильин), Ильялэн атаез – Роман (Романов вылэм).

Улон азьлань мынэ. Роман Илья Петя Лёнялэн вордӥськиз Вова пиез. Кызьы нимало сое шуоды? Бен, бен, Роман Илья Петя Лёня Вова шуо. Со бадӟым будӥз но но городэ улыны кошкиз. Аслаз кык пиез будэ. Гуртын ке улысал, соос одно ик азьланьтысалзы атай нимзылэсь люкетсэ. Туж жаль, соос уг но тодо, кыӵе тунсыко адямиослэсь нимзэс соос уретӥзы. Огшоры ним кадь, нош кыӵе трос тодон-валан сётыны быгатэ со. Школаын дышетскыкум паймисько вал сыӵе кузь нимъёсын адямиослы. Сыӵе нимез вашкала адямиос гинэ нулло кожалляй. Кылсярысь, быдэс дуннелы тодмо философ но тодосчи Абу Ибн Сина.