Куно пумитан мадь

Кинъёс, кинъёс, кинъёс, кинъёс лыктӥллям?

- Кинъёс, кинъёс, кинъёс, кинъёс лыктӥллям?

— Ватка нылъёс, Ватка нылъёс лыктӥллям.

— Кытӥ, кытӥ, кытӥ, кытӥ лыктӥллям?

— Чупчи кузя, Чупчи кузя лыктӥллям.

— Кытын, кытын, кытын, кытын кӧлӥллям?

— Кабан урдсын, кабан урдсын кӧлӥллям.

— Маин, маин, маин, маин пласькиллям?

— Ӵукна усем, ӵукна усем лысвуэн.

— Маин, маин, маин, маин ӵушкиллям?

— Бадяр куарен, бадяр куарен ӵушкиллям.

— Малы, малы, малы, малы лыктӥллям?

— Сины-юны, сины-юны лыктӥллям.

— Маин, маин, маин, маин сюдӥллям?

— Толло ӝукен, толло ӝукен сюдӥллям.

— Маин, маин, маин, маин секталлям?

— Чырс сюкасен, чырс сюкасен секталлям.

— Кытӥ, кытӥ, кытӥ, кытӥ бертозы?

— Чупчи кузя, Чупчи кузя бертозы.

— Маин, маин, маин, маин кошкозы?

— Дас кык пыжен, гӧрд полысэн полсаса.