Кривошеев Леонтий Николаевич
Физик но, лирик но[править]
Грак ёросысь Бадӟым Вожой гуртысь Леонтий Кривошеев 33 ар ӵоже нылпиосты физикаен, математикаен но историен визьнодаз. Ӟеч тыршемез пусъемын Россиысь «Дышетон удысысь отличник» нимын. Леонтий Николаевич – 6 книгаослэн авторзы, «Удмурт дунне» газетлэн туэ «Гурт адями» вожвылъяськоназ «Выжыоссэ утись» номинациын вормисе потэм мурт. Та нуналъёсы Леонтий Николаевич 80 арессэ пусйиз.
– Леонтий Николаевич, «Гурт адями» вожвылъяськонын нырысетӥ интые потэмдыя валано, гурт калык тӥледыз гажа – куаразэ котькинлэсь трос сётӥз.
– Сыӵе дунъет сётэмзылы шумпотӥ. Тау шуэме но вань ӟечсэ гинэ сӥземе потэ гурт калыкелы. Уката ик библиотекарьмылы Галина Фёдоровна Бахтиналы. Со быдэс гуртэтӥ, мон понна куара бичаса, ветлэм. Кызьы шум уд поты, сыӵе ӟеч калыкен артэ улӥськод шуыса.
Вожойын вордӥськи, та гуртын ик пересьмон калэ вуи. Шонерзэ ке верано, анае монэ дунне вылэ 1-тӥ мае вордэм. Вож дыръям ик со монэ сьӧрло, Мешер гуртысь черке, пылатыны нуллэм. Но со нуналэ бачко интыяз тупамтэ. Нылпиез пылатыны огнад уд мыны ук, сьӧрад киросатаез но киросанаез нуоно на. Вылаз ик, кизён дыр тупам на. Озьы соос кыкетӥзэ черке мынӥллямтэ ни. Анае сельсоветэ метрика басьтыны 3-тӥ инвожое гинэ ветлэм. Соин валлин мон быдэс толэзь вордӥськем нуналме пусъёно луисько. Ма, тани туэ юбилейме но быдэс куартолэзез ортчытӥсько ини. Нуналлы быдэ сямен дорамы куноос вуыло.
Черкын пылатымтэысь ик, дыр, мон мӧйымыса но Инмарлы ӧй оскы ни, атеист луи. Гуртысь нокытчы ӧй кошкылы шуэмысь, егит дыръям, 7 классэз йылпумъяса, Елабугае медучилищее ветлӥ. Шонерзэ вераса, мынам, сютэм но секыт война аръёсы будэм пияшлэн, кин луон сярысь малпанэ ик ӧй вал. Соку кызьы ке кӧтэз гинэ тырыны кулэ вал. Медучилищее куриськонме гожтыны гожтӥ ик, но экзаменъёсы мыныны кышкай – конкурс туж бадӟым вал. Малпасько, мон отчы уг сюры.
Ярам, гуртысьтымы пиосын ӵош нюлэсчие дышетскыны Татарстанысь Лубянске кошким. Со ми дорысен ог 25 иськемын сяна уз луы. Ватка дуре, чебер азе интыяськемын. Куриськонамы таксатор луэммы потэ шуыса гожтӥм. Нош асьмеос, мар со сыӵе, ум ик валаське. Ма, мыным со удыс али ке но валантэм. Та учырез малпаса, сереме али но потэ на. Огзэ, кыксэ экзаменмес сётӥмы. Берпуметӥяз, математикаын, пукисько, доска азе потыны дасяськисько. Со вискын олокытысь-мар эшъёсы ӧсэз усьтӥзы но шуо: ми доре бертӥськом. Сыӵе дыръя интыяд пукыны чидалод на шат? Дышетӥсьлы басьтэ билетме шуыса, сьӧразы пуля сямен потыны дасяськисько. Эшшо юаны дӥсьтӥсько на: кытысь но кызьы мыным документъёсме басьтоно. Дышетскыны уд ни-а, мар-а пыры шуыса, дышетӥселэн синъёсыз ик кымес вылаз тубо вал.
Доре бертӥ но, армие басьтӥзы. Военкомат нырысь ик Калугае дышетскыны келяз, собере Московской военной округе сюри. Ар пала тодон-валан люкаса, служить карыны Москва улосысь пичи гинэ Звенигородэ келязы, отделенилэн командирез луи. 3 ар но 3 толэзь служить кари. Армиысь бертыса, Сарапулысь электромеханикая техникумын тодон-валанме будэтӥ. Со бере монэ ужаны келязы Ижысь радиозаводэ. Кык ар отын тырши. Со вакытэ кузпалъяськыса, Володя пимы но вордскиз ни вал. Улон интылы ёрмеменымы, берен гуртэ бертӥмы. Ужаны школае интыяськи, физика но математика предметъёсты нуи. Со дыре ик заочно амалэн дышетскыны пыри Удмурт кун университетысь физико-математической факультетэ. Парта сьӧрын пукись нылпиосын ӵош ачим но тодон-валан люкай. Но та предметъёс малы ке сюлэмам ӧз биниське – монэ бордаз кыскиз пичи дырысеным бичатыса возись история. Та удысъя мылысь-кыдысь ужаны кутски.
– Таӵе йӧно но визьмо воргоронлы кивалтӥсьлэсь биньгозызэ но ӵектылӥзы, дыр?
– Директоре пуксьыны косыса, ёртыса ик возизы. Но мон малпай, нылкышно коллективен кивалтэме уз поты шуыса. Озьы ке но 3 арзэ завучын пуки ик. Ужай мылысь-кыдысь, коллективен тупаса но вань сюлэм шунытме сётыса. Собере, 12 ар школаын ужаса, монэ колхозэ, партийной секретаре, басьтӥзы.
Малпасько, егит дыръя отын но, татын но кужымез эскероно. Парткомын ужаме 3 толэзьтэк 5 ар луиз. Отын кыӵе но шуг-секытъёсын пумиськылоно ӧз луылы. Нырысь ик ужась калыкен одӥг кыл шедьтыны кулэ вал. Нуназе колхоз ужын тыршиськом, ӝытсэ ваньмы ӵош клубе кыстӥськиськом – репетициосы потаськом, сцена вылын кырӟаськом. Концертъёсын сьӧрлось гуртъёсы вуылӥськом.
– Кивалтон удысын амалтэк олокыӵе но сямъёс кыре-буре пото, дыр?
– О-о, вал мынам сыӵе учыръёсы. Небыт сямо гинэ луоно ӧвӧл – чырты сьӧры пуксёзы. Одӥгзэ гинэ маскара учырез вераме потэ. 1982-тӥ арын гудырикошкон толэзе милемыз, ёросысь но колхоз-совхозъёсысь партийной секретарьёсты, кык нуналлы Иже совещание бичазы. Ужрадмы нырысетӥ нуналаз Металлургъёслэн дворецазы ортчиз. Ӵуказеяз ваньмес «Ижмаш» заводэ нуизы. Предприятилэн улэм-вылэменыз но ужасьёсыныз тодматыса, пӧртэм цехъёстӥ нуллӥзы. Бӧрысь, ваньмес огинэ бичаса, отын ик эшшо кенешон ортчытӥзы на. Трос кузя люкаським. Вылӥ кивалтӥсьёс но милемын ӵош вал. Обкомлэн 1-тӥ секретарез Валерий Марисов но пукиз. Ужаммы сярысь кылмес юаны кутскизы. Заводъёс, пе, ваньзэ дыраз лэсьто, нош гуртоос продовольственной программаез ӝегато... Мон, тае кылыса, ӧй чида ни, пештырски, интыысьтым султӥ но малпанме ваньзы азьын шара вераны дӥсьтӥ. Кема возьмано луоз, шуисько. Тӥляд, городын но заводъёсын ужасьёслэн, ваньмыз липет улын, шуныт азьын, соин ик тӥ планъёстэс но капчиен быдэстыны быгатӥськоды. Тӥ мынэ но учке ай милесьтым ужан условиосмес. Техникамы кырын, зор но лымы улын. Адямилы отын ужано ук. Кызьы гуртысь ужез тӥлядэныз ӵошатод? Шӧдтэк шорысь синъёсы ёросысьтымы эшъёсы вылэ усизы. Райкомысьтымы 2-тӥ секретарьмы Николай Колесников (со милям делегациенымы кивалтӥсе пуктэмын вал) пӧсектыса ик пуке, сыӵе ик куалекъямез-курдамез адӟиське. Ну, сюроз ке сюроз ини милемлы шуыса, малпа, лэся. Монэ дугдытыны нокин уг быгаты ни. Заводысь потӥм гинэ но, «Родина» колхозысь парткоммы Юрий Рожин мыным серекъяса шуэ: ну, Николаевич, сётӥд ке сётӥд, эсьмаса, вань малпандэ кисьтыса куштӥд. Та учыр бере милемыз туж зол пыжозы, дыр, кожамы вал. Но пӧсекъяса вераськеме иназ мынӥз, лэся, нокин нокытчы ӧз ӧтча. Тӥни сыӵе мынам сямы, тырмымтэосты меӵак синмазы вераса куштӥсько.
– Вылӥ кивалтӥсьёслы, уката ик совето вакытэ, пумит вераны дӥсьтонды тырмем бере, иське, тӥ пичи дыръяды но туж шаян пияш вал, дыр?
– Вал, дыр, вал. Котьмаиз вал. Тани одӥг учырез верало на. 6-тӥ классын дышетскыкумы, Галя нимо чебер нылашмылэн зуч-зуч ик кык пунэто йырсиез вал. Солэн йырсиосыз, парта сьӧры пуксьыкуз, мынамез вылэ усьылӥзы. Огпол ӧй чида ни: кыксэ ик пунэтъёсты кутӥ но кырмыса возисько. Со вискын Галяез дышетӥсь доска доры ӧтиз. Нылаш кырмем йырсиосыныз валлин интыысьтыз султыны ӧз быгаты. Мазэ-созэ валатскиз, но кема малпаськыса ӧз улы, кутӥз но мынам йырам ручкаезлэн йылсо палыныз бышкалтӥз. Йырысьтым соку ик ву сямен вир вияны кутскиз. Вӧсь луэменым ачим зар гинэ бӧрдыны ӧдъяй, сумкаме кутыса, доре бертӥ. Огкылын вераса, ерпечка вал мон. Алама ласянь гинэ ӧвӧл, котьмар но тунсыко потылӥз.
– Сыӵе сямдылы луыса ик, дыр, школаяды шаертодонъя музей но кылдытӥды?
– Пиналъёсын ӵош гуртмылэсь историзэ но отын улэм-вылэм адямиос сярысь материал бичаны кутскимы. Сыӵе со тунсыко вылэм. Со гинэ ӧжыт луиз – Бадӟым Вожой котырысь бускель гуртъёсы но потаны ӧдъямы. Гурт калыклэсь юалляськимы, архивъёсын бугыръяськыса но мар кема гинэ пукылоно луылӥз. Арысь аре бичам материалмы узыр но узыр луиз, трос люкаськиз. 1987-тӥ арын школаямы шаертодонъя музей кылдытӥ. Мон соин 20 ар пала кивалтӥ. Шутэтскыны потыса но, ас киосыным бичам-лэсьтэм ужме тус-тас каронтэм вылысь, лэся, кошкыны ӧй ӵыды, эшшо кӧня ке арзэ тырши на. Та дыре музеен кивалтэ Анатолий Кобелев. Уг ке но ужаськы ни, музее но, школае но шумпотыса ветлӥсько, дышетӥсьёсын ӟеч кусып возисько. Ма, соос асьсэос но монэ доразы ӵем гинэ ӧтчалляло. Библиотекае но нуналлы быдэ сямен вуылӥсько, лыдӟиськытэк уг чидаськы, выль книгаосын тодматскисько.
– Асьтэос но книга гожъяны кутскиды? Со бичетъёсын тодматсконъёс гуртысьтыды культура юртын, вань гурт калыкен ӵош, пе, ортчыло.
– Соиз зэм. Ваньзэ музее гинэ уд тэрыты ук. Бадӟым Вожой котырысь гуртъёслы сӥзьыса, «Штрихи к истории деревни» книга поттыны малпай. Та ужме йылпумъяме бере вылез борды басьтӥськи – Быдӟым оже 8 гуртъёсысь – Йырашйыл, Таллы, Улын Йыраш, Тыло, Мешер, Вынлуд, Пангурт но Бадӟым Вожой – бырем солдатъёс сярысь «Зов мирных полей» книга дасяй. Таиз но уже сюлмыя но пайдаё пӧрмиз кадь. Та гуртъёсысь «Книга памятие» 251 адями сяна пыртэмын ӧй вал. Мыным та лыдпус туж ӧжыт потӥз, соизлэн я таизлэн ӵыжы-выжыез шедемын ӧй вал кадь, йӧтӥз. Выльысь гуртысь гуртэтӥ ветлӥ, пересьёслэсь юалляськи но архивъёсын бугыръяськи, озьы ож лудэ кошкемъёслэн лыдзы 563 адями луиз. Соос пӧлысь доразы бертыны 148-лы шуд усиз, нош весяклы ож лудэ 415 адями кылиз. Бӧрысь эшшо мукет уж борды кутски на – Грак котырысь удмуртъёслэсь сям-йылолъёссэс люкаса-бичаса, «Улон выжыос» книга поттӥ. Мон котькудзэ книгаме, гурт калыкен кенешыса, дэмлан-ӵектонъёссэс лыдэ басьтыса, лэсьтӥсько. Шумпотыса вераны быгатӥсько: будӥсь нылпиос, та ужъёсме лыдӟыса, ӟеч тодозы гуртсылэсь историзэ.
– Тӥляд кылбуръёсын но бичетъёсты вань ини. Кемалась-а кылбур дуннеен эшъяськиськоды? Мар сярысь гожъяны кельше?
– Кылбуръёсын 4 книгае потӥз ини. Нырысетӥез «Гуртысь салам» шуыса нимаське. Кыкетӥез – «Покчи гужеме сюрес». Куинетӥез – «Пӧзе на ошмесэ», нош берпуметӥез воксё пӧсь ай – нимаське «Шунды эктыса шудэ». Таяз пичи дырысь тодэ ваёнъёс но пыризы. Кылбуръёсыя кырӟанъёсы но кылдӥзы ини. Соослы чебер крезьгур гожтӥз школаысьтымы крезьгуръя дышетӥсь но культура юртамы ужась Алексей Лукин. Кылбур гожъяны кутсконэлэн мугез таӵе: дышетӥсьёс куспын «Турындыка» стенгазет поттылӥмы. Ми отын котькуд праздниклы ог-огмылы пышкылонъёс, ӵектонъёс но ӟечкыланъёс гожъяллямы. Г ожъямъёсме дышетӥсьёс умой пӧрме шуылӥзы. Со бордысен кутски, лэся, кылбур чуръёс пӧрмытъяны. Пумен-пумен аслым но кельшыны ӧдъязы. Со куен тӥни кылбур дунне монэ ас ӧраз кыскиз. Соосты кин кызьы лыдӟе-вала, дыр, но сюлэмысьтым потэм чуръёс со. Уйшор уйин но, нуназе куазен но йыре лыкто, кӧлыны маза уг сёто. Пӧртэм темалы гожъясько – отын ик яратон но, инкуазь но, адямиез гажан но. Кыксэ книгаме «Удмурт дунне» газетлэн редакцияз поттӥ. Соослы тау шуэме потэ.
– Историен тунсыкъяськиськоды бере, тодӥськоды, дыр, кытысь тӥляд аспӧртэмлыко Кривошеев фамилиды кылдэмын?
– Анаелэн нимтулыз Ольга Фёдоровна вал. Фёдорова фамилиен ветлӥз. Со, шутэтскыны потытозяз, колхозын рядовой луыса ужаз. Монэ со атайтэк будэтӥз. Егит дыръяз атай луонэ, уг тодӥськы малызэ, анайме кышно басьтымтэ. Но бездетность понна налог тыроно медаз луы шуыса, со воргорон монэ ас вылаз гожтыны косэм – Кривошеев карем. Тазьы верамзэс кылэме вань: солэн матысь ӵыжы-выжыез кырыж чыртыё вылэм. Солы луыса фамилия но соослы сыӵе ик сётӥллям. Выжыея чын-чын удмурт луисько.
– Выжыдэс азинтӥсьёс сярысь но тодэм потэ вылэм.
– Кузпалы Мария Васильевна асьме ёросысь ик – Пуклё гуртысь. Шутэтскыны потытозяз, «Россия» колхозын пӧртэм ужъёсты быдэсъяз. Ми соин ныл но пи будэтӥмы. Ленамы Бадӟым Вожой муниципал кылдытэтын специалист луыса тырше. Со Ижысь гурт хозяйствоя институтэз йылпумъяз, экономист луиз. Леналэн кык пиосыз будо. Андрей Казаньысь авиационной институтлэсь Елабугаысь филиалзэ йылпумъяз. Вова анаезлэсь сюрессэ бырйиз – али Ижысь гурт удысъя академиын дышетске. Володя пимы Ижысь монтажной техникумын дышетскиз вал. Но жаляса верано, 7 ар со ми пӧлын ӧвӧл ни, висеменыз 47 аресаз улонысь кошкиз. Солэн но пиналъёсыз быдэ вуизы ини. Алёша пиез, училищеез йылпумъяса, автомеханикын ужа. Нош Люда нылыз Санкт-Петербургын журналистэ дышетскиз, отын ик улэ но ужа. Анайзы Вотка карын улэ.
– Леонтий Николаевич, тӥ тэк пуконэз чик валасьтэм адями. Азьланяз маин паймытыны малпаськоды на?
– Мон ачим оскись ӧвӧл ке но, адямиос верамъя, созэ Инмар гинэ тодэ ини. Мылкыд, конешно, котьмарлы вань. Трос аръёс ӵоже улонлы шумпотыны но калыкез шумпоттыны мед кылдоз на.
– Озьыен, тыпы кадь юн тазалык тӥледлы!
Источник:
За предоставление материала выражаем огромную благодарность редакции газеты "Удмурт дунне"
