Ившин Владимир Георгиевич
Семьяын - куинь юрист[править]
Владимир Георгиевич Ившин - Удмурт Республикаысь дано юрист, юридической наукаосъя кандидат.
Вордскиз 1960-тӥ арын 14-тӥ феврале Пермь областьын.
Дышетскемез: Удмурт кун университет, Свердловскысь юридической академиысь аспирантура.
Ужан книжкаяз пусъемын одӥг инты - Удмурт кун университет. Нырысь татын студент дыръяз азбар ӵужиз. Табере кивалтэ университетысь Правоя, социальной управлениея но кышкытлыклэсь утиськонъя институтэн.
- 1972-тӥ арын атайме Георгий Егоровичез ужаны ыстӥзы «Кезский» совхозэ, партия удысъя. Озьы ми та ёросэ выжы лэзим. Анае Раиса Андреевна санэпидемстанциын врач луыса тыршиз. Алигес 70 арессэ пусйим. Шумпотӥсько, муми но буби кыкназы улэпесь шуыса. Бубилэн уженыз валче трос вал партилы, праволы сӥзем литератураез. Нош мон, лыдӟиськонэ выем маке, ваньзэ сое дугдылытэк бугыръяй. Школаысен ик тодӥ: мыно юристэ дышетскыны. Зэм, серемпыр шуылӥ: луо ёрос прокурор, кышно каро дояркаез. Но малпанъёсы ӧз быдэсме, выйи наукае. Университетын бадӟым курсъёсын дышетскыкум, пыриськылӥ Союзын ортчись олимпиадаосы, 1982-тӥ арын командаен вормимы страналэн олимпиадаяз. Соин валче вузысь монэ лэземзы ӧз поты. Эшшо горд дипломен пусйизы. Кыль татчы, дышетскод но, ужалод но, шуылӥзы.
- Одӥг интыын, 30 арлэсь кема ужаса, уг акыльты-а?
- Уг, мон данъяськисько гинэ соин. Ужан интыеным мон кык арлы люкиськылӥ ик, Свердловскысь аспирантурае кошкыса. Нош ужан книжкаям одӥг инты - университет. 2-тӥ курсын дышетскыкум, общежитие дорысь азбарез ӵужи. Куинь арзэ ӵужонэн шонаськи. Аспирантура бере ассистентын ужаны кутски. Собере - дышетӥсьын. 1997-тӥ арын юридической факультетлэн деканэзлэн воштӥсез луи. Со аре ик факультет интые кылдытӥм институт. 2002-тӥ арын монэ директоре бырйизы. Валля арын эшшо 5 арлы интыям кельтӥзы на.
Мон туж данъяськисько, факультетысь институт пӧрмытыны быгатӥмы шуыса. Уго табере ми, юристъёсты сяна, пӧртэм ужасьёсты дасяны быгатӥськом: кун но муниципал чиновникъёсты, ивор утён удысысь специалистъёсты. Дышетскыны лыктӥсьёс уно. Милесьтым тросгес студентъёсты куто экономикая факультетэ гинэ. Институтамы 5 сюрс мурт тодон-валан люка. Ӵошатон вылысь: быдэс университетын - 25 сюрс. Озьыен, ми вузлэн 5-тӥ люкетэз луиськом.
Вылӥ тодон-валан сётэм сяна, дышетӥськом шор ёзо специальностьлы. Трос милям заочной амалэн визь люкасьёсмы. Пусйыны кулэ: институтмы УдГУ-ын нырысетӥосыз пӧлын кутскиз выль амалъя тодон-валан сётыны. Тани, шуом, студент нырысь пырпотэ колледжез, собере ортче бакалавриатэз, бӧрысь - магистратураез. Озьыен, милям сётэм тодон-валанмы тупа дуннеысь вань куронъёслы.
- Уже интыянъя службаын арысь аре кышкато абитуриентъёсты: юристъёс лачак, диплом басьтыса но, уж уг шедьто. Озьы ке но институтэ пырон конкурс пичигес уг луы. Кылем арын воксё кӧшкемыт ӵошатскон вал. Кун но муниципал служащий луон понна одӥг интые 58 мурт вожвылъяськиз.
- Татын ужпум мукетыз бордын. Та специальностья дунтэк дышетскон инты 6 муртлы гинэ висъяськиз. Нош мылкыд кариз 400. Юрист луыны дасяськисьёс уг кулэсмо. Бен, юристъёс берло дыре трос луизы. Ужпум соиз бордын. Али таӵе специальностьлы дышето пӧртэм вузъёс. Макем мур тодон-валан сёто соос студентъёслы - рос-прос чаклась ӧвӧл. Соин пӧяськытэк верало: милям дасям юристъёсынымы соослы вожвылъяськыны шуг. Республикаямы уг тырмо усто юристъёс. Дӥням ӵемысь вазисько тодмоосы, соослэн эшъёссы: кинэ ӵектысалыд, юало. Тани каль жингыртӥз Кияса муниципал кылдытэтлэн йырыз Александр Максимов: администрацие, пе, юрист кулэ, нимысьтыз ставка вань.
- Институтын дунын дышетскон араз ог 50 сюрс манет сылэ. Валамон, гуртоос сомында тырыны уз быгатэ.
- Нырысетӥ курсэ кутӥськомы ог 150 студентэз. Со пӧлысь 50-эз визь люка, уксё тырыса. Пыдлось гуртысь пиналъёс юристэ дышетско шуэме уг луы. Ёрос центрысь студентъёс вань. Шуом, Кезысь, Можгалась, Эгралась. Нош гуртъёсысь визьмо пиналъёслы шуг ӵошатскыны городысь нылпиосын. Тани вуоно абитуриентъёс пӧлын ортчытъяськом кунсьӧр кылъя олимпиада. Артэ пуктыны уг луы Кез школаысь пиез но Ижысь 41-тӥ лицейысь экеез. Уго та лицейысь пиналъёс берло куинь арзэ ини шаерамы англи кылъя олимпиадаын вормисе пото.
Озьы ке но удмурт филологияя но журналистикая факультетъёс бере милям институтмы гуртысь пиналъёслы тодон-валан сётонъя 3-тӥ интыын мынэ.
- Кызьы учкиськоды огъя кун экзамен шоры? Луэ-а вуоно юристъёслэсь тодон-валанзэс дунъяны тест амалэн?
- Огласянь, ЕГЭ-эз пыӵатэмен валче кулэсмизы вузъёсын кузьым курон-басьтон учыръёс. Табере кузьмаськон выжиз улӥгес тубатэ. Мукет ласянь, огъя кун экзаменын люкам баллъёсын пырыны луэ мукет тупась удысъёсы. Экзаменъёслы дасяськыса, курадӟоно уг луы ни. Но талэн урод палыз но вань. Кылсярысь, кылем арын огез абитуриент «рекорд» пуктӥз: документсэ 24 пӧртэм специальносте сётӥз. Иське, солы дунне, кытчы пыроз. Мед гинэ студент луоз. Мон малпасько, анай-атайёс нылпиоссэс таӵе вамышъёслэсь утьыны кулэ.
Оглом мон шуысал: ЕГЭ-эн валче пиналъёс визьмогес ӧз луэ. Капчигес луиз дышетскыны кутӥсь комиссиослы. Табере пиналлэсь баллъёссэ гинэ лыдъяськом на. Окме - кутӥськом.
- Институтты туж узыр дышетӥсьёслэн вылӥ нимъёсынызы. Наукая 53 кандидат, 13 доктор. Нош асьтэос кандидатын ветлӥськоды. Малы?
- Котьмалэн аслаз дырыз. Мон ас вакытаз ӧй вуы. Вырим институтэз кылдытонэн, сое пыд йылаз султытонэн. Но тэк уг пукиськы, ӝоген быдэсто ини доктор ужме.
- Али вузъёсы егит дышетӥсьёс мед кылёзы шуыса, уждунзы борды ватсэтъёс малпамын. Наукая кандидатъёслы 3 сюрс манет, докторъёслы - 7 сюрс.
- Озьы ке но вузын ужась юристэз но практика нуисьсэ уждунзыя нокызьы уд ӵошаты. Кылсярысь, мон кышноелэсь - судьялэсь - ичигес коньдон басьтӥсько.
Юрист, практика нуыса, тросгес уксё поттэ. Егитъёс али аспирантураын дышетско, азьланьзэ малпаса. Оло, кандидат ним соослы юрттоз ӟеч карьера лэсьтыны. Институтысь дышетӥсьёс тросэз мукет интыосын но тыршо. Мон ачим но 90-тӥ аръёсы адвокат вал. Коньдонэн секыт югдур дыръя со юрттӥз улыны но, тодон-валан но люкаськиз. Малпасько, вуоно юристъёсты дышетӥсь муртлэн аслаз ӟеч практикаез одно ик луыны кулэ.
- Семьяяды куинь юрист. Шулдыр-а? - Мон дышетӥсь. Кышное Ольга Гаевна - Вылӥ судысь судья. Кирилл пимы - Кун Кенешысь Правоя управлениын специалист. Мон вань ужъёсме но сюлэмшугъяськонъёсме кабинетам кельтӥсько. Кышнолэн уж дурысьтыз иворъёссэ верамез потэ. Али судын уголовной ужъёсъя ужа бере, ужан висказ жингыръя, аслэсьтыз малпанзэ вера, мынэсьтым визь-кенеш куре. Озьы юалляськемез туж шумпоттэ монэ, маин ке юрттыны быгатӥсько, иське. Нош Кирилл мынэсьтым уг юаськы. Солэн ужан интыяз туж визьмо, тодӥсь-валась дышетӥсьёсыз вань.
- Улонын тӥледлы ваньмыз витьымтэ шорысь вуэ-а яке котьку пӧсям ву потытозь ужано луэ-а?
- Кӧня ке ар талэсь азьло Кезысь культурая юртэ анайме пумиськонэ ӧтиллям. Отчы люкаллям ёросысьтымы адӟем карымон адямиослэсь мумы-бубыоссэс. Юаллям: кызьы сыӵе пинал будэтоно. Но анае шуэ: мон номырин ӧй юртты, улонэ сюрес гинэ возьматӥ, отӥяз со ачиз ваньзэ радъяз. Малпасько, инмысь номыр уг усьы. Ваньмыз понна трос пӧсяно.
- Удмурт луэмдэс ватӥськоды-а яке шара вераськоды-а?
- Гаде мыжгаса, мон удмурт шуыса, кесяськыны кулэез ӧвӧл. Монэ ӵемысь пыкыло: малы уд пыриськиськы удмурт движенилэн ужаз. Нош мыным сотэк но окме калык син азьын луон. Кин ке туж шара улэ, мон шыпытгес. Удмурт луэме вылын карьера лэсьтыны ӧй выры. Но мон удмурт. Тусы лякемын, фамилие но удмурт.
- Кема дыр ӵоже ини тӥ Кун Кенешысь судьяослэн квалификацияя коллегиязы пыриськоды.
- Туэ сӥзьыл нош отчы бырйизы. Татын юнматӥськом республикаысь судьяосты. Пӧртэм юанъёсты сэрттӥськом-пертчиськом. Калык пӧлын нуоно уж тырме.
- 90-тӥ аръёсы тӥ нимысьтыз эскеронъёс нуиды удмурт пиосъёс асьсэды быдтэм пумысен.
- 1995-тӥ арын Медициная академиысь ужасен, наукаосъя докторен Владимир Парашютинэн ӵош эскеримы та ужпумез. Кӧня ке статья но печатламы. Кылсярысь, бигер пиос ас мылкыдзыя улонысь уггес кошко. Ватсаны кулэ: асьсэды быдтон пумысен уг малпасько Кавказын улӥсь воргоронъёс но. Малы? Отын ӵемысь луэ кыӵе ке вир кисьтон. Озьыен, пиосмурт ожын бырыны быгатэ ке, малы со йырзэ кыӵесэ донгоз?
Нош асьмелэн удмурт пиосъёсмы улонзылы пум пукто асьсэос. Солэн выжыез кузь: вина юон, коньдонтэк улон, ужлы ёрмон. Кылсярысь, вуиськод Кезэ. Вокзал, магазин котырын ӵукна ик люкаськемын пиосъёс. Малпасько ини, кызьы нуналэз ортчытоно. Зэм, вань ужзэс но улонзэс тып-тып радъясьёс. Озьыен, астэ быдтон меӵак герӟаськемын ӧвӧл коньдонлы ёрмонэн. Асьме удмурт пиос уг быгато нюръяськыны. Нош кин ке мыным пумит шуоз: ошиськон яке ыбиськон понна уть ай ма быдӟа кужым кулэ! Таӵе сюлэмшугъяськытӥсь югдуре шедё шоро-куспо арлыдъем воргоронъёс. Берло аръёсы лыдпусъёс сокем кӧшкемытэсь ӧвӧл ни ке но, гуртын асьсэды быдтӥсьёс вань.
- Кыӵе малпанэн улон сюрес кузя вамышъяськоды?
- Дзержинскийлэн верамезъя: юристлэн медло пӧсь сюлэмыз, чылкыт киосыз но сазь йырыз.
Источник:
За предоставление материала выражаем огромную благодарность редакции газеты "Удмурт дунне"
