Донды-батыр сярысь пересьёслэн верамъёссы

Валляна аръёсы улэм, пе, Солдырьын Донды, батыр. Кытысь вуэмез тодмо ӧвӧл, нош лыктэм со татчы Идна но Гуръя пиосыныа. Татын вордскиллям на солэн Весья но Зуй пиосыз.

Дыр ортчемъя улыны люкыт луэм но, Донды Иднакарысь кошконо кариськем. Покчи пиосыныз шур кузя ог дас вить иськеме вылэгес тубем. Тубоно шурзэ но улыны интыяськем карзэ солэн нимыныз вераны кутскиллям.

Бадӟым пиез Идна вуж улон интыязы ик кылем, Чупчи кузя выллане тубем. Та интыосын кузё луыса кутскемзы бере, батыръёс пӧртэм уж удысэз кутоно луиллям. Гуръя нюлэсэз сайкыса гырыны-кизьыны кутскем, Идна ӵыжы-выжы калыкезлы кӧттырет пӧйшураса шедьтоз вылэм. Нош пересь Донды, музъем ужзэ вунэтытэк, вуз карон но корт ӵыжатон-дурон киужез азинтэм.

Та выль быръем интыяз кема гинэ улыса, Донды одӥгезлы пиезлы чебер Эбгаез кышно ваем. Кензэ мусо каремез но мукетъёсыз пӧлысь висъямез понна, пиосыз, кенэныз улэ шуыса, югдурез умой-умой чаклаллямтэ ни. Атаеныз ваче вуиллям но мукет азе кошконо кариськиллям. Котькудӥз аслыз ачиз кар лэсьтэм. Карлы тупано гурезь шедьтымтэ дыръязы, пе, вырйылэз, киынызы кутыса, гурезь луытозяз ӝутозы вылэм. Каръёссы котырын батыръёс пӧйшураса, музъем ужаса, корт ӵыжатыса улӥллям.

Вакытэн-вакытэн батыръёслэн ваче пумит вуон дырзы но луылэм. Соку соос коръёсты но быгылес корт кивалтосъёсты, шудэм улсын кадь, карысен каре лэзьяло, пе, вылэм. Гуръякар батыръёс Весьякар батыръёсын вожме усьылӥллям, иднакаръёс — сепычкаръёсын. Нош селтакаръёслэн Иднакарысь батыръёслы кужымзэс возьматэмзы потылэм. Гуръякаръёс, пе, Весьякар вылэ кор лэзьялозы вылэм, нош Иднакар вылэ — ог 40 пудъем корт кивалтосъёссэс. Толалтэ Селтакар батыръёс азвесь куас вылын ветлӥллям. Карйылозь 20 иськемез тӧлпери кадь ӝог ортчо, пе, вылэм.

Литература

.