Волкова Люция Аполлосовна
Сюлмы кыске калык пӧлы[править]
Этнограф, история наукаосъя кандидат, Глазовысь В. Короленко нимо пединститутысь Россилэн историезъя кафедраысь профессор, Удмуртиысь наука удысысь дано ужась Люция Волкова трос дырзэ, кужымзэ сётӥз удмуртъёслэсь улон-вылонзэс, культуразэс эскеронлы. Со 200-лэсь ятыр ужъёслэн авторзы. Калыклы но шаертодонлы сӥзем одӥгез дышетон программаез Россиын устоеныз лыдъямын. Та нуналъёсы Люция Аполлосовна пусйиз юбилейзэ. Но тусызъя но, мылкыдызъя но – егит! Азьланезлы малпанъёсыз пӧзё.
- 50 аресэ тырмыку, туж секыт вал, – шуэ Люция Волкова, – дауре ортче кадь потӥз. Табере пенсие потыны кулэ ни, нош ужъёс, малпанъёс тымиськемын. Глазовысь пединститутэн 2014-тӥ арозь контрактэ гожтэмын на, озьыен, матысь кык арзэ студентъёслэсь уг люкиськы, малпасько. Кафедрае туж дуно мыным, соин огвакытэ кивалтӥ но. Татын ик удмурт калыклэн улэм-вылэмезлы сӥзем пичияк музеймы вань. Малпасько, ужамысь дугдӥ ке но, мӧзмыны дыр уз шедьы. Огез племянницае шуэ: Люда апай, пе, азьло кошкиз Ижевске, собере вуылӥз Москвае, выльысь берытскиз Иже, собере малы ке вуиз Глазове. Кылиз на гуртэ гинэ выжыны. Кин тодэ, улон кытчы вуттоз ай. Но гурт улонлэсь уг кышкаськы. Балезино ёросын Коротай гурт вал, али со Глазов ёросэ пыре ни. Отын вордски. Гуртмы пичи ик ӧвӧл, уйпал ёрос понна бадӟым но шуыны луоз – 100-лэсь ятыр коркаез. Татын улӥсьёслэн асьсэлы гинэ тупась сямзы: лушкемесь, ас малпанзы вылын сылыны быгатӥсесь, йӧн-йӧнэсь, музъем борды ӝабыр-ӝабыр кырмиськемын.
Гуртмылэн ортчем сюресэз но туж тунсыко. Интызэ но вошъямын, но быронлы сётскымтэ. Нырысь со интыяськемын вылэм Нюлсы шур дуре. Но талэсь кыдёкын ӧвӧл ортче паськыт сюрес. Отӥ, пе, ветлӥзы «сильнойёс», пересьёс армиысь пегӟемъёсты («ссыльнойёсты») озьы шуо вал, малпасько. Соослэсь палэнскыны турттыса, тубиллям вылланегес, вырйылэ. Отысь ошмесэз синйылтӥллям. Нырысетӥ куинь корка со дуре пуксемын. Кылемъёсыз асьсэлы колодча копаллям ни. 1717-тӥ арысь документэз шедьтӥ, отын гожтэмын, гуртмылы ним сётэм кураськись Яков Коротаев. Сое гуртамы вордосэ басьтӥллям. Ӟуч-а со вылэм, удмурт-а – тодмо ӧвӧл.
Гуртмылэн историеныз тунсыкъяськон мылкыд пыӵатӥз атае. Со ӵемысь мачкылӥз вашкалаосмылэн улэм-вылэмзы сярысь. Ачиз но бен, мӧйы ӧй вал ай, но пересьёс дортӥ юалляськыса ветлэ вылэм.
- Атайдылэн нимысьтыз дышетскемез вал-а?
- Архивысь шедьтӥ материал: Курег гуртын церковно-приходской школа вылэм. Отын закон божийлы дышетэм Аполлос Григорьевич Волков. Соя ик песятае пиезлы Аполлос ним понэм – дышетскемез мед луоз шуыса. Нош фамилизы одӥг кадь, атай нимыз но Григорьевич ик луоз – туж тупа! Зэм, атае историк ӧвӧл, быдэс улонзэ сӥзиз гурт хозяйстволы. Огвакытэ кивалтӥз Балезино ёросысь «Большевик» колхозэн, собере – «Дружбаен». Бӧрысь, кӧня ке пичи колхозъёсты огазеяса, «Большевик» совхоз кылдытӥзы. Отын автомеханик но, управляющий но вал. Пенсие потон азяз кивалтӥз Курег сельсоветэн.
Атаелэн нырысь дышетскемез 7 класс гинэ вылэм. Но техникуме пыроно на шуыса, 8-тӥ классэз бӧрысь йылпумъяз. Зӧкеныз (бадӟыменыз) сузэреным одӥг классын дышетскиз, озьы школае атаенымы ӵош кошкиськом вал. Собере ини Горькийысь техникумын дышетскиз. Отысь бертэмзэ возьмаса, укно азьын пукылӥсько вал, ӧз вуы шуыса, бӧрдылэме но вань.
Мамае кемаласьгес кошкиз ни улонысь. Пырись-пырак ужамын колхозын-совхозын. Тодэм-валамез 4 класс гинэ вал, соин ик туж вожъяськылӥз дышетскем муртъёслы. Война дыръя дышетӥсьсы фронтэ кошкем, бертымтэ ни. Нош ож бере анаелы 15 арес тырмем, атаез зӧк ни, ужано шуэм. Соин ик туж шумпотӥз, пиналъёсызлэн дышетскыны луонлыксы вань шуыса. Ангелина сузэре пырись-пырак ужаз Глазовысь тылпу кысӥсьёслэн депоязы кадровик луыса.
- Нош тӥ вамыштӥды Удмурт кун университетэ…
- Атае туж шумпотысал, дыр, Ижысь гурт хозяйствоя институтэ (али академие) мынысал ке. Малпанъёсыз вал кадь, мон гуртэ ик берто шуыса. Нош мон дышетӥсьлэсь ужзэ сяна мукет номыре ӧй адӟылы. Бен, бырйиськи на, Глазов пединститутысь кылъя но литературая ёзэ яке УдГУ-ысь историяя факультетэ вамыштоно. Угось туж яратӥсько лыдӟиськыны. Но шаертодонэн тунсыкъяськонэ вормиз. Милям Карсовай школаямы дышетӥсьёс туж золэсь вал, отчы мон 9-тӥ-10-тӥ классъёсы ветлӥ. Ма, али но со школа ляб ӧвӧл, шаерысьтымы трос тодмо адямиос отысь потэмын. Покчи классъёсты пырпотӥ гуртысьтымы ик школаын, 8-тӥ классозь дышетски Курег гуртын. Отын но дышетӥсьёс туж быгатӥсесь вал.
- Университетын нимдэс воштыны дэмласьёс но вылэм, шуо.
- Дышетӥсьёсмы пӧлысь одӥгез шуиӟ кызьы тӥледлы нылпиос вазиськылозы, Люция Аполлосовна – туж секыт ук! Коть Людмила Александровна, пе, гожтӥське. Мыным сокем вӧсь луиз. Кызьы атай нимме воштом, мон сое туж яратӥсько ук! Бен, 10-тӥ классын дышетскыкум, тетрадьёсы вылэ асме Людмила гожъялляй ай. Люция шуылэмзы ӧз яралля.
Табере нимтулы туж яраське, мыным со аспӧртэмгес луыны кужым но сётэ кадь. Кытын-о вань на ай мукет Люция Аполлосовнаос? Мон одӥг сыӵе! Кыӵе сямъёсы аслым ярасько? Вылезлэсь уг кышкаськы. Бен, котькуд удмуртъёслэн сямен ик, возьдаськон сямы люкетылэ, но сое вормыны тыршисько. Ас пушкам пыран сямы вань. Туж азьтэм мон ӧвӧл. Мар ке уж вань ке, рос-прос, пумозяз лэсьтыны турттӥсько – таиз туж ӟеч удмурт сям.
- Озьы ке но, Люция Аполлосовна, тӥ интыдэс ӵем вошъямын…
- Школа бере нырысетӥ араз университетэ пырыны ӧй быгаты – ӝыны баллэ ӧз тырмы. Соин одӥг арзэ Карсовай школаямы ик пионервожатой луыса ужай. Эшшо 4-тӥ классын историяя урокъёсты нуи. Нош университет бере келязы вал Кез ёросысь Чепца школае. Но Владимир Владыкинтодосчи дорын этнографияя тодон-валанме будэтӥ бере, со ялан индылӥӟ Люся, тыныд музее мыноно. Кузебай Герд нимо национальной музее ӧтизы вуоно араз. Озьы этнография ласянь киросатае Владимир Владыкин луиз ке, музей ужын – Серафима Лебедева. Музейын куать ар ужам аръёслэсь ортчемзэс валаса ӧй вутты. Кӧня гуртъёсы экспедициен потамы! Удмуртие сяна, вуылӥм Татарстанэ, Башкирие, Пермь, Киров улосъёсы. Кыӵе но учыръёс ӧй вал. Нуназезэ гуртэ кылё песянайёс гинэ. Соос, милемыз адӟыса, бакча бертӥзы пегӟо – тодмотэмъёслэсь кышкало. Киров улосэ потакумы, ӝимдӥм: адямиос строен гинэ ветло – паллянэ но, бур пала но кошкемзы уг луы. Кыдёкын ӧвӧл тюрьма вылэм. Соку ужелэсь ӟечсэ уката валай: эркын экспедициостӥ ветлыны быгатӥсько!
Музейлэн фондаз возисько дуно уксётӥрлыкъёс. Соослы проба лэсьтон понна ветлоно вал Свердловске. Ачим егит, киям огшоры басмалэсь вурем сумка – син шоры со медаз йӧты. Нош пушказ – дуно изъёс, азвесьёс. Огполаз келяськись ӵектӥзы, пыдъёсыз висё вылэм, мон сьӧры вамышъяса уг вутты. Свердловскысь вокзалэ кельтоно луиз. Мукетъят музейысь куд-ог экспонатъёсты нуи Краснотурьинскысь адӟытонэ. Келяськисе ӟамыртӥз, милицие сюриз. Огнам берытсконо луи. Олокыӵе но вакытъёс вал – Инмар утиз, лэся, шуге-леке вуэмлэсь.
Кин тодэ, кӧня ужасал на меда музейын, но одӥг пол жингыртэ Историяя, кылъя но литературая институтлэн кивалтӥсез К. Куликов, шуэ: Москваын аспирантурае инты вань, мынод-а? Мыно! Малпай, Владимир Емельяновичен соос кенешизы луоз. Озьы вуылӥ Москвае! Тодон-валанме будэтӥ этнографияя кафедраын. Отысь музее ӧй берытскы ни, Кузьма Куликовлэн институтаз вуи. Чидай… быдэс ар.
- Мар сокем ӝог пегӟиды?
- Кузьма Иванович ёрмиз ик вал, малы кошкеме потэ шуыса. Но туж ӧз яраськы ӟоскыт кабинетын, бумагаос пӧлын бугыръяськыны. Сюлмы калык пӧлы кыскиз. Шуӥ тодон-валанъёсме студентъёслы сётэме потэ! Вуылӥ Глазовысь пединститутэ, отысь проректор Геннадий Антонович Поздеев, бӧрысь кема ужаз на ректор луыса, коть али ик лыкты шуиз, улон интыен но, пе, юрттом. Бен, отчы выжемелэсь азьло гужемзэ Владимир Емельяновичен ӵош Грак ёросэ экспедицие потай на.
Глазове выжеме сярысь чик уг жаляськы. Со город пырись-пырак мыным яраськылӥз. Пичи дыръямы анаймы милемыз отчы мороженой сиыны нуллэ вал, 1-тӥ сентябрь азьын дӥськут октылӥм. Кыӵе чебересь пото вал городысь нылъёс: тӧдьы бантъёсын, тӧдьы гольфикъёсын. Нош ми гуртоос востэм гинэ пӧрмемын…
- Люция Аполлосовна, трос ужъёсты сӥземын удмуртъёслэн музъем бордын ужамзылы. Малы одно та ужпумез сэрттоно-пертчоно кариськиды?
- Кандидат диссертацие талы сӥземын вал. Вашкалаосмылэсь музъем бордын ужамзэс тыро-пыдо эскерон понна тросгес пуконо луиз Кировысь архивын. Революцилэсь азьло потэм тросаз изданиосын гожтэмын, удмурт калык – пӧйшурась калык шуыса. Нош мон аслым мукетсэ валай: со пырись-пырак яратэ музъемез. Нош ик гуртэлэсь историзэ верало. 1877-тӥ арын Коротайысь кӧня ке семья яна потэм – Бектыш починка кылдэм. Гуртысьтымы воргоронъёс ӝожтӥськон дасяллям: малы яна потэмъёслы тросгес музъем висъямын? Ведь милям со гырон-кизён интыосмы! Удмуртъёс котькыӵе амалэн тросгес музъем басьтыны туртто вылэм, угось оско вал, соос сое ӟечгес утялтозы шуыса. Вань сыӵе веран: удмурт ватэ, ӟуч дасез вылын пӧраны яратэ. Ватыны – иське, азьланез сярысь малпаськыны. Ӵуказе сярысь малпаськыса ик, удмуртъёс нюлэсэз сайкылӥзы. Нырысетӥ араз писпуосты кораллязы, вуоно араз отысь жуг-жагез сутылӥзы но отчы кизьылӥзы. 10-15 ар ортчыса, нош ик выль инты сайкылӥзы – музъем угось жадиз. Нош ӟучъёс со бушам интыосы лыктылӥзы но дасяз кизьылӥзы. Архивысь документъёсын та ваньмыз адӟиське. Трос шедьтӥ сыӵе но документъёсты: гуртэ ӟучъёс вуо ке, удмуртъёс отысь выль интые кошкыны туртто.
Угось валамтэос кылдыны кутско. Ӟучъёс ас ланязы (палазы) валасесь, нош удмуртъёс пӧртэм ужпумъёсты быдэс гуртэн сэрттыны-пертчыны дышемын. Шуом, колхозъёсты быдтыны кутскем бере кинъёслэн хозяйствооссы куашканлы ӧз сётске? Удмуртъёслэн. Бен, соиз но вань: удмуртъёс оломамында скирдаос люкаллязы, соосты шыръёс но йырйыны кутскиллям ни. Но уг луы-а вал соосты вузаны, коньдон поттыны? Но мар сётэмын удмуртлы, со сётэмын: ужаны быгатӥськом, асьмемыз возьматыны, пайда поттыны – умгес.
- Кызьы малпаськоды, тӥляд студентъёсты асьсэды возьматыны быгато-а?
- Пединститутын 20 арлэсь ятыр ужатозям, одӥгзэ шӧдӥ: вазен студентъёс азе чурытэсь куронъёс пуктӥсько вал. Али небӟигес. Опытэ люкаськемъя валай, егитъёс дышетӥсьёс мында тодыны кулэ но ӧвӧл. Мед быгатозы утчаськыны, ужаны, выльзэ тодыны мылкыдзы мед луоз – тани мае пыӵатыны кулэ соослы. Нош кулэ луиз ке, тодон-валанзэс будэтыны соос котьку быгатозы.
Мон шуысал: милям студентъёсмы туж кужмоесь, школаосы соосты мыло-кыдо басьто. Угось пединститутын бадӟым саклык висъяське методикалы, университетын мукетэсьгес куронъёс. Соин ик отысь студентъёс пӧлысь туж ӧжытэз мынэ дышетон удысэ, милямъёсыз – туж дӥсьтыса. Мар веранэз, мон ачим но университетэз йылпумъямын бере, методикае лябгес вал.
Тодон-валанъёсы тырмыт, нош кызьы соосты вуттоно студентъёс доры – ӧйгес валалля. Ӧй тодылы, маин висъясько семинаръёс но лекциос. Кутски татын этнологилы дышетыны. Туж тунсыко предмет, но секыт. Ӝыны ар куспын быдэс дуннеысь калыкъёслэсь пӧртэмлыкъёссэс эскерыса-мачкыса вуттоно. Соин ик студентъёсын трос дырмес быдтылӥм занятиос бере но. Тыршылӥ, соос тодэм-валамзылы анализ лэсьтыны мед быгатозы шуыса. Вераськыны но вуоно дышетӥсьёслы быгатоно.
Ужаны кутскон аръёсам шуггес вал методической пособиосын. Али милям кафедрамы ачиз та бордын ужа. Мынам но тросэз ужъёсы студентъёс пӧлын киысь кие ветло. Ужъёсы, книгаосын сяна, электрон амалэн но поттэмын.
Шумпотӥсько, дышетэм егитъёсы пӧлысь тросэз шаерамы туж зӧк адямиос луэмын. Куд-огез пединститутэ ик кылемын, кылсярысь, али ректормы Алексей Анатольевич Мирошниченко – туж визьмо, туж быгатӥсь.
Али дасяны кутским бакалавръёсты но магистръёсты. Малпасько, уката но тунсыко ужаны луоз магистратурае кылемъёсын – соос дасесь ни наукаен вырыны. Бен, али милям соос трос ӧвӧл на, оскисько, азьланяз данакез та сюресэз быръёзы.
- Люция Аполлосовна, тодӥсько, тӥляд кузпалды но историк шуыса.
- Бен, со но Удмурт кун университетэз йылпумъямын. Но Алексей Леонидович Корепановен ми бер пумиським, Глазове вуэме бере ни. Мон этнограф, со археолог. Историлы дышетэмын школаын но, училищеын но. Али пединститутын кышкытлыклэсь утиськонъя инженер луэ. Но шаертодонэн тунсыкъяськонэз ӧз быры, статьяос но гожъя. Пиналъёсмы ӧвӧл. Отӥыз ваньмыз калыклэн кадь.
- Огшоры юан: ваньмон дырдэс кызьы ортчытӥськоды?
- Гужемез ортчытӥсько сад-бакчаын, сяськаосты туж яратӥсько. Толалтэзэ куас вылэ султылӥсько. Турттӥсько таза улонэн эшъяськыны.
- Со ик, оло, юрттэ тӥледлы егит возиськыны – 45 арес но уд сёты.
- Мон шуысал, егит возиськыны юртто студентъёс. Малы ке шуоно куддыр йыр но висе, нош лекцие мыноно. Студентъёс азьын уд ойгеты ук, астэ возёно, нокин медаз вала, кыӵе али тыныд урод. Турттӥськод – озьы висёнэд ас понназ вунэ, ӧй но вал кадь со.
- Дӥсяськиськоды но туж валаса…
- Куке-соку модалэсь кылеме уг поты вал, уката но егит дыръям. Йырсиосмес но бабылляса, химия лэсьтыса ветлӥськом вал. Али мылкыдъёсы воштӥсько ни – йырси лач-лач пукыны кулэ. Мон троссэ адӟем карисько вал Людмила Степановна Христолюбовалэсь. Дӥсяськон манеръя гинэ ӧвӧл, астэ калык пӧлын возёнъя, улон шоры учконъя но. УдНИИ-ын ужакум, одӥг кабинетын пуким соин. Марысь мар ке, солэсь визь-кенеш юасько вал. Одӥгез веранэз йырам туж кылиз кандидат-а тон, доктор-а – тынад ужъёсыд йӧн-йӧн дасямын мед луозы, соосты дунъясьёс мед шедёзы. Доктор ужме гожтоно кариськи ик вал, но анае висьыны усиз. Али тодӥсько, талы тодон-валанъёсы, опытэ тырмыт, дыры но вань кадь, но выльысь бугыръяськеме уг поты ни. Мон сотэк но шудо. Удалтэ мыным ӟеч калыкен. Вань кинлэсь адӟем карыны, кинлэсь дышетскыны. Но шудэ аслам киыным лэсьтэмын, визьмыным басьтэмын.
За предоставление материала выражаем огромную благодарность редакции газеты "Удмурт дунне"
