Владыкина Татьяна Григорьевна

Вакытъёсты герӟась

Владыкина Т. Г.

Татьяна Григорьевна Владыкина (Перевозчикова) – филология наукаосъя доктор, Удмурт Республикаысь наука удысысь дано ужась, Удмурт Республикалэн гимнэзлэн одӥгез авторез.

Татьяна Григорьевна вордӥськиз Дэри ёросысь Вуж Кены гуртын. Якшур шор ёзо школаез но Удмурт кун университетэз йылпумъяз. 1975-тӥ – 1978-тӥ аръёсы Эстониысь Тарту университетысь аспирантураын фольклор удысъя дышетскиз но, диссертациоссэ утьыса, 1980-тӥ арын кандидат, нош 1990 арын доктор луиз.

1978-тӥ арысен Татьяна Григорьевна Россиысь Наукаосъя академилэн Урал люкетысьтыз Историяя, кылъя но литературая Удмурт институтын ужа, 15 ар ӵоже литература но фольклор ёзэн кивалтӥз, али – валтӥсь научной ужась.

Институтын 25 ар ӵоже ужатозяз, Татьяна Григорьевна калык кылос гожъямъёсын, сое эскерон-чакламъёсын 4 книга но «Зарни крезь» сузьетысь 5 книга поттӥз.

Татьяна Григорьевналэн туэ сентябре юбилеез вал – 50 арес тырмиз. Тодосчиен пумиськыны августэ ик малпасько вал ини, нокызьы дыр ӧз шедьты. Я со кытын ке командировкаын, я ӝегатонтэм ужъёсыныз бызьылэ, я студентъёсыныз ужа, я вордӥськем гуртаз бертоно луэ.

Татьяна Григорьевнаен вераськыны уж дораз пыри. Кыӵе ке егит кышномуртэн пуко. Кыкназылэн ик мылкыдзы шумпотонэн пачылмемын.

- Тани, тодматске, - шуиз Татьяна Григорьевна. – Выль тодосчимы вордӥськиз - Галина Анатольевна Глухова. Али гинэ Архангельскысь егит фольклористъёслэн дышетскон школаязы ветлыса бертӥ. Москваысь фольклор удысын кандидат луэмъёслэсь ӵыжак выль 3 дипломзэс ваи. Туж шумпотӥсько, соос пӧлысь одӥгез удмурт шуыса.

- Ӟучъёсын но ужаськоды шат?

- Бен. Мон ведь куинетӥ арзэ ини диссертациосты утёнъя кенешлэн тӧроез. Со туж бадӟым сюлмаськон но дан. Таӵе кенешъёс Москваын, Петербургын, Казаньын вань. Сыӵе кенеш аспирантъёслэсь гожтэм диссертациоссэс аслаз нимыныз утьыны быгатэ. Та дырозь кандидат ним басьтӥз вал ини 4 мурт. Кыкез Удмуртиысь ӟучъёс. Ужзы асьме дорысь ӟучъёслэн сямъёсынызы герӟаськемын. Одӥгез Архангельск областьысь, мукетыз – Нижний Новгородысь. Нош али Ижысь но Йошкар-Олаысь ӟучъёслэсь дипломъёссэс ваи на. Шумпотӥсько: аспирантураям удмуртъёс гинэ уг кыстӥсько. Озьыен, мыным оско. Ноку но ӧй малпалля, филология наукаосъя кандидатъёслэн дипломазы мынам но кинюртэме луоз шуыса.

- Тӥляд со кенешты кыӵе-о удысъя?

- Фольклоръя гинэ. Аспирантурае но вань на. Аспирантура усьто докторъёс гинэ. Но мыным со удыс сётэмын вал филологияя кандидат дыръям ик. Улон азьланьске, сое эскерон но азинске. Соин ик удмурт калык кылосэз дуннелы котыр ласянь возьматыны кулэ. Асьмелэн тодосчиосмы та удысын ӧжыт на, соин ик мукетъёсызлэсь бере кылиськом. Ужанъям валай: ваньзэ огнам лэсьтыса уг вуы. Тодон-валанме сётэме потыны кутскиз. Наукае кыстӥськись адямилэсь быгатонлыксэ, визьзэ ӧръяны, солы юрттыны вакытаз кулэ.

- Нош асьтэос кызьы фольклор удысэ вуиды?

- Малпамтэ шорысь. Анай но, атай но дышетӥсьёс бере, пичиысен ик дышетӥсь луон сярысь гинэ малпалляй. Удмурт кун университетын Михаил Атамановен ӵош дышетски. Со соку ик ини наукаын ужан сярысь малпаськылӥз, Удмурт научно-исследовательской институтэн кусып возиз. Отын солэсь юаллям, кинэ, пе, фольклор удысъя аспирантурае ӵектысалыд. Со малы ке мынэсьтым нимме верам. Мон пайми. Бертыса со сярысь анай-атайёслы верай. Соос пумит ӧз луэ. Мамаелэн пичиысен ик веранэз одӥг вал: «Лыдӟиськы… Дышетскы…» Со ачиз туж курадӟыса но дышетскиз. Мамаелэн аиз но дышетӥсь вал. Атаелэн но аиз кӧня ке дышетэм.

Озьы малпамтэ шорысь Эстониысь Тарту городэ вуи. Отын кылчиостыгес дасяло вал, фольклор удысъя мон аспирантураын нырысетӥез луи. Диссертациме 1980-тӥ арын Москваысь Горький нимо Дунне литературая институтын ути. Ужме вылӥ дунъязы. Туж шумпотымон но дан вал соиз: мынэсьтым, удмурт ныллэсь ужзэ, мукет аспирантъёслы адӟем карытӥзы, сое ӟеченыз висъязы.

- Татьяна Григорьевна, тӥ Удмурт кун университетын аттестацияя кун комиссилэн тӧроез но луиськоды на.

- Бен, быдэн кык арен куинь пол-а, ньыль пол-а вал ини. Та дыр куспын мон пыртӥ ог 400 пала студентъёс потӥзы. Кун экзаменъёсын соосты кылзӥськи, котькудӥзлэн дипломазы кинюртэме вань.

- Кызь вить ар ӵоже тӥ удмурт калык визьбурын бугыръяськиськоды ни. Кыӵеен адӟисько асьме песянай-песятайёсмы?

- Мыным татын «бугыръяськон» кыл уг тупа кадь потэ. Дӥськут пӧлын бугыръяськем кадь кылӥське. Мон калык визьбурез сэрттӥсько-пертчисько, эскерисько, радъясько но нош ик калыклы берыктӥсько. Калыклэн дауръёс ӵоже люкам визьлюкез со. Люк гинэ ӧвӧл – быдэс гурезь.

Песянай-песятайёсмы, нырысь ик, туж сабырлы, гань-гань, асэнызы но дуннеен тупасен, калыкен но, инкуазен но огъя кыл шедьтыны быгатӥсен адӟисько. Соос сыӵе ӧй ке луысалзы, оло, асьмеос али удмурт кылын ӧй но вераськысалмы. Калык дуннеын аслэсьтыз интызэ шедьтэ ке, соку солэн выжыез уг чигиськы. Нош со ассэ но, мукетъёссэ но гажамысь дугдэ ке, ичиёме, быре.

Алигес кыӵе ке газетысь лыдӟи калыкез лыдъян-чотан ужрадлэн берло лыдпусъёсыз сярысь. Отын удмурт калык, оло, 100 сюрслы кулэсмем. Кӧты ӝож луиз асьме калык понна. Асьмемыз асьмеос гажамтэысь троссэ ыштӥськом. Но ведь астэ ачид гажан но асэныд данъяськон маин ке герӟаськемын луыны кулэ. Тросэз потэ ас калыкедлэсь историзэ, кылоссэ тодымтэысь но. Нош куке тон соин тунсыкъяськыны кутскиськод, зарни-азвесь узырлыкен шыкысэз усьтӥськод кадь. Сое валам, гажам потыны кутске.

Калыкез лыдъян-чотан ужрадысь лыдпусъёс но, оло, шонер ӧвӧл. Монэн таӵе учыр вал. Выль паспортме сумкаеным ӵош лушказы. Ышиз, шуод ини. Отын али национальность уг гожтӥськы. Нош паспорт басьтыку, РОВД-ысь бумагаын национальность сярысь верано луэ. Кыктэтӥзэ «выль» паспорт басьтыкум, дыртэменым валче, мыным со бумагаез компьютерен нылаш лэсьтӥз. Национальностьме ӟуч гожтэм. «Мон ӟуч ӧвӧл», – шуисько. Нылаш тупатыны пумит луиз, милемлы, пе, ваньзэ ӟуч гожтыны косэмын. Пайми: кызьы, кин озьы карыны косэм?

Ужея гуртъёстӥ ӵем ветлоно луисько. Гужем кепырасагес ветлӥсько, ужтэм мурт кадь потӥсько. Гуртын соку тужгес кысык вакыт ук. Но паймемысь уг дугдӥськы гурт калыклэн ӟечезлы, чидамезлы. Пичи Пурга ёросысь Норьялан вал таче учыр. Ульчаетӥ чакласькыса ветлӥськом, кин доры гинэ, пӧй, пыроно вал. Адӟиськом: одӥг семья турын пыртылэ. Соос доры вамыштӥм, верамы лыктэм мугмес. Кырӟаны курим. Чик керӟегъяськытэк, ужзэс куспетӥ каризы но кырӟазы. Куддыръя пересьёс нылпиоссы азьын кырӟаны-вераны кепырало. Сыӵе дыръя вакытсэ шедьтыны тыршиськом. Туэ гужем Гыяын вал кадь со. Одӥг песянайлы азьвыл ик верам, дорад, пӧй, лыктом. Со милемыз празднике сямен чебер воштӥськыса пумитаз.

- Кин со сыӵе тодосчи, кыӵе солэн лулпуш дуннеез? Малы, шуом, котькудӥз писатель, художник яке композитор тодосчи луыны уг быгаты?

- Нош кулэ меда со? Писатель, художник, композитор – творческой адямиос ук. Соослэн мылкыдзы но, мылкыдзэс усьтыны быгатонлыксы но чылкак мукет Дуннеез ас сямен шӧдонэнызы мукет. Со Инмарен сётӥське, ужаны быгатэмез кулэ каре ке но. Соосын ӵошатыса, тодосчи – кӧсытгес адями, дыр. Со нырысь чакла, лыдӟе-пертче, радъяны, валэктыны выре. Йырсазьзэ нырысь интые пуктэ, шуод-а, мар-а. Искусстволы валэктон кулэ ӧвӧл. Со – мынам валамея – эркын лобаны быгатон, астэ дуннеын шӧдон но возьматыны быгатон. Кызьы шуиз вал одӥг тодмо адями, творческой адямиос туж ӝог вӧсь луо. “Вӧсь луон” лёгетсы соослэн туж улӥын, пе. Мукет ласянь, чаклано ке, куд-ог тодосчиос но творчестволэн пӧртэм удысъёсаз пырисько. Оло, соин но научной ужъёссы кӧсэсь ӧвӧл.

- Нош дуннеысь мукет выжы калык пӧлын маин асьмеос пӧртэмгес кадь?

- Одӥг кадез тросгес ик. Нош висъяське чидаменыз, сабырлыкеныз, востэменыз. Тани мон асме дӥсьтӥсь шуисько ке но, ӵемысь удмурт сямы потылэ. Ужлы кулэ луэмысь но адямиез вӧсь карыны кышкасько. Куддыръя, оло, ӝотрак, чурыт кыл веран дыръёсы но луыло, но берло туж ӧпкелисько, курадӟисько. Янгыш луыкум но нырысь вамыш лэсьтыны тыршисько. Адямиен лекъяськеме, сое ултӥяме уг поты, асме мукет муртлэн интыяз пуктыны тыршисько.

- Таӵе сям туала политикъёслы уггес тырмы кадь потэ мыным.

- Но со чылкак мукет удыс ук. Вае матысез сярысь ик вераськом. Асьмелэн сюлэм бӧрдонъёсмы сярысь. Калыкмы сярысь. Удмурт луэммы сярысь. Тани басьтом удмурт отделениысь студентъёсты. Соослы маке лэсьтыны косӥськод ке, ой, мон сое уг быгаты, шуо. Уж борды со ӧз но кутскы на, ассэ отын ӧз но эскеры, нош кужымезлы осконэз ӧвӧл ни. Вожъяськыны, вогъяськыны, куатаськыны кужым кулэ ӧвӧл угось. Соин ик ӵемысь пӧлысьтызы висъяськись ӟеч дышетскисез серекъямзы, ултӥямзы потэ. Тон вормы астэ ачид, тыршы, эскеры. Асьмеос ум быгатӥське ӝог малпаськыны, ӝог лэсьтыны. Нош улон весь азьлань кошке. Милемыз уг возьма. Асьмелы, ӟеч сямъёсмес бордамы кельтыса, уродзэ палэнтыса, мукетгес луыны кулэ ини. Сотэк туала улон сюрес урдсы сэрпалтыса кельтоз.

- Калык визьбурез тодэмды тӥледлы кужым но дӥсьтон сётӥз, луоз, Удмурт Республикалэсь гимнлэсь кылзэ но гожтыны?

- Гимнлэсь кылзэ гожтон югдур мыным аслым но паймымон но шӧдтэк шорысь луиз кадь потэ. Ӵошатсконэ тодмо кылбурчиос но пыриськизы ук. Мон, оло, ӧй но басьтӥськысал но, Алексей Шепталин дорам лыктӥз но шуиз: «Ойдолэ, Татьяна Григорьевна, асьмеос гимн гожтом. Гожтом вормон вылысь». «Ӟуч бере, ӟуч!» – малпай ас поннам. Но солэн дӥсьтэмез мыным тунсыко потӥз. Аслам дӥсьтонэлы пайми ке но, аслым ачим шуи: пӧрмыто ке, пӧрмыто, ӧй ке, уг – номыре но уг ыштӥськы. Кема курадӟоно луиз, куштӥськон калэ но вуылӥ. Ужамелы туж шумпотӥсько: кылмылэсь аспӧртэмлыксэ эшшо ӟечгес шӧдӥ, валай. Асьмеос солэсь узырлыксэ быдэсак ум кутӥське на кадь.

- Кылбуръёс гожъяськоды вал кадь ук.

- Ас поннам гинэ. Мон асме ноку но кылбурчи уг шуиськы. Кин бен егит дыръяз уг гожъя. Сюлэм чигиськыку гожъям чуръёс со. Одӥг-кыкез, ваньмыз-ӧвӧлэз шуод ини, «Кенеш» журналэ вуылӥз ик. Со но Людмила Кутяновалэн куремезъя. Со сяна, уго, со чуръёс сярысь нокин но, ноку но ӧз тодылы.

- Кыӵеен адӟиськоды асьме калыкмылэсь азьлань улон сюрессэ?

- Котьмар ке но, асьмеос вань али. Асэнымы данъяськыны, асьмеды гажаны дышетсконо. Мон улонам одӥгзэ, кыксэ, дассэ удмуртъёсты утьыны быгатӥ ке, шумпото ини. Со понна ик тыршисько аспирантураын но.

- 1998-тӥ арын потэм «Удмурт фольклор» книгадылэн беркылаз зарни кобыен вуюись сярысь мадёсэз вераськоды но шуиськоды: «Мыным со утчаськон секыт ужам трос шумпотон но… бадӟым юан пус кузьмаз. Одӥг гинэ ӧз». Со юанъёслы валэктон утчандылэн пумыз-йылыз адӟиське ини-а?

- Уг, уг адӟиськы. Соин ик тыршисько тросгес кивоштӥсьёс дасяны. Аслэсьтым малпанъёсме, валанме мед азинтозы, азьлане кыдёкегес мед вамыштозы.

- Ваньмыз мумы-бубы, вордӥськем инты, вордӥськем музъем бордысен кутске. Юн-а, оскымон-а инъет соос тӥледлы сётӥзы?

- Анай-атай вӧзын мыным котьку но шуныт-небыт вал, соос мынам утисьёсы. Соос ванен, кужыме но вань на. Котькуд шутэтскон нуналъёсы доразы Якшуре бертылӥсько. Атае Григорий Карпович гуртлэн историезъя музей кылдытӥз, али но отын юрттӥське на. Анае Софья Григорьевна – математикалы дышетӥз. Со визьмо, кужмо кышномурт. Со трос юрттӥз атаелы дышетскыны но, ужын ассэ шедьтыны но. Анай но, атай но кемалась пенсиын ини.

- Кинлы оскиськоды: Инмарлы-а, политикъёслы-а, асьтэлы-а?

- Аслым. Но Инмарлы вазиськымтэ адямиос вань шат?

- Кинлы, малы «йыбыртъяськоды»?

- Нокинлы но, номырлы но уг йыбыръяськы. Но йыбырттӥсько кошкем ӵыжы-выжыосылы. Ваньмызлы, кин мыным та дунне вылэ кылдыны луонлык сётӥз.

- Кыӵе воршудысь тӥ?

- Песянае – Шаркан ёросысь Сосновкаысь, Бӧня воршудысь, ӵужанаелэсь воршудзэ уг тодӥськы. Со Ува ёросэ Юкаменск ёросысь басьтэмын вылэм. Табере ваньмыз сураськемын ни. Но оскисько: котькуд анай-атайлэн сямен ик, воршудлэн но утись-вордӥсь кужымез вань.

- Кин шуг-секыт вакытады буйгатӥсьты?

- Анае но, кузпалы но. Соос ванен шуг-секытъёс сокем вормонтэмесь уг пото.

- Кузпалды, Владимир Емельянович Владыкин, тӥ кадь ик йӧно, визьмо мурт. Музъемез кык шунды уг шунты, нош тӥ кык шундыос коркадэс кызьы шунтӥськоды?

- Мон Толэзь гинэ. Шундые – кузпалы.

- Кин азьын чебергес, визьмогес, мусогес луэмды потэ?

- Со азьын. Маке понна керӟегъяськыны кутскисько ке, каньылэн гинэ вазе: «Сокем эн керӟегъяськы, шӧтэм адӟиськиськод». Кинлэн-о бен шӧтэм луэмез потоз ини, буйгатскыны тыршисько. Нош визьмогес адӟиськеме потэ дышетскисьёсы азьын.

- Кырӟанъёс, выжыкылъёс, мадёсъёс, лэчыт веранъёс, куриськонъёс, юриськонъёс сяна, калыклэсь чакланъёссэ, индылонъёссэ но люкаськоды. Асьтэос соослы оскиськоды-а?

- Соос одӥгез но юнме кылдэмын ӧвӧл. Инкуазь но адями кусыпъёсты сӧронтэм вылысь, калык соосты валаса радъяз. Али сямен вашкалаосмы инкуазез арам ӧз каре, пӧйшуръёсты но, будосъёсты но юнме ӧз быдтылэ. Ваньмызлэн радыз вал. Со радэз утён вылысь кылдэмын вал индылон-косонъёс но. Соос тросэз вылӥ кужымъёслы осконэн герӟаськемын. Вылӥ кужымъёс вань шуыса, мон но оскисько.

- Арестэс шӧдӥськоды-а?

- Куд-ог дыръя тазалык шӧдытэ ик. Мылкыды гинэ медаз пересьмы на вылэм.

- Ваньмон дырды луэ ке, мар бордаз кыске?

- Та юандэс кылыса, ӧжытак сереме потӥз. «Ваньмон» кыллэн пуштросэз пӧртэм пумо. Одӥгез – «шутэтскон» шуэм луэ, мукетыз – «кулон». Соин ик шуиллям, вылды: адямилэн ужез, пе, кулэмез бере но куиньмойлы кылёз на. Мон сярысь но верамын, дыр, со. Адями быгатыкуз ужаны кулэ. Куддыръя сюлэмы сэректэ: таяз но уг вуиськы, созэ но лэсьтыны дыр уг тырмы. Со понна шумпотоно. Тынад вань яратоно ужед. Ма, котькуд ужез ӟеч мылкыдын быдэстыны кулэ. Тани басьтом тусьты-пуньы миськонэз ик. Огшоры гинэ кадь со, мылкыдтэк басьтӥськиськод. Собере ӧраз пыриськод но шумпотӥськод чылкыт каремлы. Мукет ужын но озьы ик. Ужлэсь уг палэнскиськы: гуртын будыса, котьмалы дышемын. Инмар тыныд улон сётэм бере, со юнме ӧвӧл. Собере, адямилы малы ке но, мугор сяна, йырсазь но, лул-сюлэм но сётэмын. Соосты огазеяны быгатӥськод ке, ӟеч ини.

Источник:

Владыкина Т. Г. Вакытъёсты герӟась / Т. Г. Владыкина ; записала Г. Романова // Удмурт дунне. - 2003. - 5 дек. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"