Гурт – шаермылэн кӧкыез. Нош кин ӝутоз сое?

Сюлмаськытӥсь ужпумъёс ӧй ке лусалзы, мон сямен, шуг йӧтысал азьлань вамыштыны. Улонмы озьы кылдытэмын: адями шуг-секытъёс пыр потыны кулэ.

Ӟуч литературая урокъёсын ваньмы лыдӟимы И. С. Тургеневлэсь «Отцы и дети» романзэ. Аслаз визьмо произведенияз писатель вераны тырше: улон, адямиос сямен ик, воштӥське, бугор сямен сэрттӥське.

Ма бен тужгес но паймытэ но сюлэмшугъяськытэ монэ туала улонын? Нырысь ик, гуртмылэн син куспын «сылмемез». Малы туала арын гуртын улӥсьёс городэ кӧчо? Гуртсылэсь безӥзы яке азьтэм луизы-а? Мон гуртын улӥсько бере, со туж син шоры йӧтэ. Нош куке но школаямы дышетскисьёс быдэс классъёсын гуртэ кылё вылэм, со сярысь мон кылӥ туэ шор ёзо школамылы 25 ар тырмон юбилее люкаськемъёслэсь. Соку, пе, колхозын ужась аслаз уждунэныз машина басьтыны быгатэ вылэм ини. Нош али ма воштӥськиз гурт улонын? Гуртоос туж ӧжыт уксё потто, нош со кулэ дӥськут басьтыны, сиськыны, юртъер котырез выльдыны…

Ваньзэ вераса но уд быдты.

Асьме шаермылэн кузь сюресаз пӧртэм вакытъёс вал ини. Тани ма вералляз песянае:

— Мон секыт вакытэ вордскемын но будэмын. Егит дырмы Быдӟым Отечественной война вакытэ ортчиз. Мыным 12 арес вал, мӧйыосын ӵош бусыез сюрлоен арамы. Али но уг вунэтӥськы: бригадирмы, фронтысь сӧсырмыса бертэм Иван Васильевич Одинцов, вань калык азьын монэ ушъяз: «Вот, нылы, аресэд но 12, арам ӟегед но 12 сота. Молодец!»

Война вакытэ будэм егитъёс кузпалтэк кылизы. Милям гуртысьтымы 216 фронтовик ӧз берытскы ини. Соос пӧлын — песятае Николай Максимович Вахитов. Пересь анае сое ивортэк бырем кожа вал. Алигес атае Кияса военкоматлэн архиваз бугыръяськем но тодэм: песятаймы быремын Смоленск улосысь Велиж ёросысь Бабуры гурт дорын «братской могилаын». Атае соку ик гожтэт ыстӥз Велиж ёросэ, шедьтэм документъёссэ ыстӥз. Озьы песятаймылэсь нимтулзэ та ватэм интые гожтӥзы.

Туж жаль, со сярысь пересь анаймы Мария Федосеевна ӧз тоды ни. Нош кыӵе но шуг-секытъёсты адӟыны ӧз кылды соослы, со вакытысь нылпиослы. Сииллям пот нянь, нин пуппылэсь кумельзэ кораллям, кынмем картошкалэсь крахмал поттӥллям. Мынам песянаелэн Зинаида Николаевна Вахитовалэн синъёсыз нюромо. Петя вынзэ тодаз вайыкуз. Солэн сюлмыз висе вылэм, уйёсы бӧрдыса курылэм: «Нэнэ, сием потэ!» Озьы кема курадӟемез бере выныз дас одӥг аресаз кулэм. Со тодэ ваёнъёс сюлэмез весь сюпсё.

Бен, со вакытэ улон мукет вал, песянае шуэ:

— Осто, Инмаре, милесьтым адӟеммес будӥсь нылпиосмы медаз ни адӟе ноку но.

Озьыен, котькуд вакытлэн аслаз дырыз, аслаз шуг-секытъёсыз. Песянаелэсь юано кариськи:

— Нош ку шутэтскиськоды вал?

— Егитъёс со егитъёс ини. Туж жадьыса но бертӥськом ке но, огазе люкаськыса керттӥськиськом, кырӟаськом вал. Толалтэ гинэ ужъёс капчияло, нош гужем адямилы шокчыны дыр ӧй вал.

Мон улӥсько ХХI-тӥ даурын. Та даур калыкъёслэн улоназы трос выльзэ, азьвыл кылылымтэзэ, адӟымтэзэ ваёз. Со понна шумпотоно. Уно коркаосын вань ини компьютеръёс. Соос егитъёслы бадӟымесь луонлыкъёс сёто тодон-валан дуннее йыг-йыг вамышъяны. Но та даурлэн вань аслаз сэрттымтэ ужпумъёсыз: наркомания, терроризм, СПИД но мукет выль висёнъёс, соосты туала медицина эмъяны уг на быгаты. Но мон оскисько: дуннеын улӥсьёс ог-огенызы юнгес кусыпъёс возьыны кутскозы, ог-огзылы юрттыса улозы. Калыкъёс валалозы: дунне вылын тупаса, эшъяськыса гинэ улоно.

Мынэсьтым сюлэмме вӧсь каре но нумыр сямен сӥсъя юан: малы гуртын улыны секыт луиз но ма кароно та югдурысь потон понна? Анай-атаймы лэсьтӥзы коммунизм, нош вуизы капитализме. Капитализмлэн аслаз куронъёсыз, аслаз улон радлыкез. Туннэ тон миллионер, нош ӵуказе — уж утчась. Социализм вакытэ кылдытэм колхозъёс выль вакытлы уг тупало ни. Гуртын но кулэ туала улонлы тупась радлык кылдытыны. Кин со борды кутскоз? Мон малпасько — егитъёс, соос уго анай-атайёслэн кивоштӥсьёссы. Но вань на-а туала вакытэ тодмо удмурт писательлэн Геннадий Красильниковлэн Алёша Курбатов кадь геройёсыз? Дасесь-а егитъёс асьсэлэсь ужзэс усьтыны вордскем гуртазы? Магазинъёс сяна, милям гуртамы номыр но ӧвӧл. Соослэн кузёоссы вузъёсты дунтэмен басьто но гурт калыклы дуноен вузало, озьы асьсэлы трос коньдон потто. Мон валасько: кузёлы коньдон жильдоно. Нош малы усьтонтэм мукет ужбергатон удысъёсты?

Удмуртъёслэн верамзыя, котькуд адями писпу мерттыны, корка пуктыны но нылпи будэтыны кулэ, нош кыӵе адями тон луид, ӟеч пытьы кельтӥд-а та дунне вылэ, со сярысь вералоз тынад пиедлэн пиез.

Гуртын улӥсь висъяське улон шоры чуртак мукет сямен учконэныз. Пӧлысьтызы тужгес визьмооссэ но котьма ужез быгатӥсьёссэ Дунне адями шуылӥзы. Соос туж гажазы инкуазез, соин тупаса, одӥг кыл шедьтыса улӥзы. Гуртын улӥсьлы котькуд ужлы аслаз мерттэтэз. Дауръёсын улыса, соос кылдытӥзы аспӧртэмлыко фольклор: мадёсъёс, визькылъёс, сюлме пырись кырӟанъёс… Со визьбурез лыдӟыса, асьмеос валаськом: нырысь интыын котьку но вал уж.

Удмуртъёс ужлэсь ӟечсэ пичиысен валаны дышетӥзы асьсэлэсь нылпиоссэс. Уж адямиез дышетэ, визьма, буйгатэ но. Удмурт калык котьку но лэсьтӥз ӵош, огазьын. Соин ик удмуртъёслэн туж трос ӵыжы-выжы нимъёссы: ӵужкенак, ӵужмурт, ӵужанай, кырси, бусён, туклячи, кудо, эмеспи но трос со выллем мукет кылъёс. Огазьын луэмзэс верало таӵе кылъёс но: веме, бӧляк, сэбед.

Туала адямиосты улон люке байёслы но куанеръёслы. Кылдо лэчыт ужпумъёс. Гуртын улӥсьёс асьсэос но нылпиоссылы шуо: «Ми чидамы, улӥмы. Тӥ табере умой мед улоды. Мынэ городэ, асьтэлэсь шудбурдэс шедьтэлэ». Одӥг ласянь валаны луэ кадь анай-атайёсты: соослэн потэ асьсэлэсь нылпиоссэс шудо-буро каремзы, секытъёслэсь палэнтэмзы. Нош мукет ласянь: ваньмыз егитъёс городэ кошкизы ке, кин кылёз на гуртэ? Дышетскыны пыремъёсты мон валасько. Нош кин нокытын дышетскытэк ужаны кутске грузчикын, огшоры ужась луыса? Улон инты но ваньмызлы уг шедьы, кин кытын века. Мон сямен, город — со мукет цивилизация, солэн аслаз куронъёсыз. Ваньмыз ик гуртоос отын асьсэды шедьтыны уз быгатэ.

Али трос верасько гурт хозяйствоез ӝутон, азинтон сярысь. Бадӟым осконэн уло ужбергатӥсьёслы. Озьы бере, кулэ, дыр, школаосын но пӧртэм курсъёс кылдытъяны. Гуртын улӥсь будэтэ пудо, солэн вань сад-бакчаез. Туала улонын отысь пайда поттон сярысь малпаськоно. Та ужез азинтон борды кулэ, дыр, кутскыны школаысен. Пиналъёсты парта сьӧрысен ик дасяно сыӵе уже. Одӥгез удыс ӧз ке кельшы, мукетыз борды басьтӥськоно. Но солы дышетскыны кулэ. Городын ужбергатон зол азинскемын ини, нош гуртын улӥсь ӧз шӧды на солэсь пайдазэ.

Алигес дорамы вуылӥз киросагае, со улэ городын. Мынам сюлмам ик пыриз верамез:

— Мон одӥг нунал но ӧй улысал городын, уг кельшы отысь омыр. Городэ вуон азям ик йыры пороме. Гуртамы умой ужан инты шедьысал ке, туннэ ик бертысал.

Син азьын гуртмы пересьме, мӧйыос гинэ кылё на. Егитъёс дышетскыны пыро но гуртэ уг ни берто. Кин азьланьтоз гурт улонэз? Ма кароно, мед бертозы но Кузё мед луозы шуыса? Та ужпумез шара верано ивор вӧлмытон ёзъёс пыр, со сярысь мед тодозы вылӥ кивалтӥсьёс. Шаплыгес кариськоно асьсэлы но гуртын улӥсьёслы. Гырлы ӧм ке жуге, кин кылоз асьмелэсь висёнъёсмес? Вань асьмелэн калыкен быръем депутатъёсмы, вань Правительствомы, Президентмы.

Малы асьмеос нырысь ваньзэ куашкатӥськом, собере малпаськиськом. Гурт быриз ке, Россия но быроз. Гурт — со асьме шаермылэн кӧкыез. Гуртысь потто улонэз валась, визьмо адямиос, гуртъёсын возиське асьме калыкмылэн йылолъёсыз, сямъёсыз, зэмос культура.

Троссэ гуртоосты, нылпи садъёсты, культура юртъёсын, школаосын ужасьёсты, азьпанан возьма ужтэк кылён. Егитъёс кошкемен, нылпиос ӧжыт луэиен, шор ёзо школаосты 9 классъем кельтыны малпало, начальной классъёс ворсасько. Нош гуртын школа ворсаське ке, гурт быре. Ма кароно таӵе дыръя? Туннэ нуналлы кулэ бадӟым кенеш, кулэ гуртын улӥсьёслы юрттэт. Гуртъёсмы быризы ке, удмуртъёс но бырозы.

Кызьы но ма кароно асьмелы гуртъёсмес утён вылысь, та пумысен ӵош кариськыса кенешоно. Оло, та сюлмаськонъёсы пумысен валэктон сётозы республикаысьтымы кивалтӥсьёс? .