Широбокова-Монако Лариса Владимировна

Материал из Воршуда
Версия от 10:36, 25 сентября 2019; Ladamiri (обсуждение | вклад)
(разн.) ← Предыдущая | Текущая версия (разн.) | Следующая → (разн.)
Перейти к навигацииПерейти к поиску

Яратонлэн кылыз[править]

Широбокова-Монако Л. В.

Лариса Широбокова-Монакоез дунне адями шуыны луоз: вордскемын Удмуртиын, дышетскемын Венгриын, быземын Италие, али улэ Чехиын. «БиЛингв» проектсэ кылдытыса, пӧртэм кунъёсысь анайёсты-атайёсты визьнода, кызьы нылпиосты 2 (яке тросгес) кылъёслы дышетоно. Италиын поттыны кутскиз билингвизмлы, озьы ик туризмлы сӥзем «Мама в Италии» журналзэ. Лариса Широбокова — философия наукаосъя доктор, финно-угроведение, социолингвистика, психолингвистика удысъёсъя одӥгез кужмоез тодосчи. Венгер литератураез удмурт но ӟуч кылъёсы берыктэ. Анай кылыныз сяна, вольыт вераське 4 кылъёсын.

— Лариса, улонэд кыл котыр берга, шуыны луоз: сое эскериськод, солы дышетӥськод, кылысь кылэ берыктӥськод, пӧртэм кылын вераськисьёсты ас котырад огазеяськод. Тон пичи дыръяд ик кыллы усто вал ни?

— Мон Шаркан ёросысь Мувыр гуртын чылк-чылк удмурт семьяын вордӥськи. Нылпи садэ ветлэмын ӧвӧл, будӥ ӵужмамае но пересь бабуше бордын. Соосын вераськисько вылэм, нош ульчае потӥсько ке, ымам ву ӟузем кадь, пе — нокинлы пал кыл но уг вазиськы. Озьы мон гуртоосын-бускельёсын 7 арескозь вераськытэк улэмын. Со удмурт сям — возьдаськон — вал, дыр. Таӵезэ синйылтӥсько 6 аресъем Кристиан пие бордысь но: муртъёсын со чик уз вераськы, нырысь учкоз-чакласькоз, собере дышиз ке, верамзэ куспетӥ карыны уд быгаты ни — итальян сямыз потыны кутске. Соос угось вань мылкыдъёссэс-малпанъёссэс шара потто, пушказы уг возё. Нош малы мон кепыранзэ удмурт сям шуисько, пиеным угось пӧртэм кунъёсы вуылӥськом, отын со пӧртэм выжыысь ачиз кадь ик нылпиосын тодматске, эшъяське. Соослэн анай-атайёссы но, воспитательёс но мыным ӵем шуо: пиды кадь возьдаськись нылпиез адӟеммы ӧвӧл на.

Учконо ке, анай-атаелэн удысъёссы кылтодонлэсь воксё кыдёкын. Мамае Татьяна Леонидовна дышетскемезъя эмъясь сузэр, нылпи садэн но кивалтӥз, кадръёсын ужась специалистлы дышетскиз но, пенсие потытозяз, та удысын тыршиз. Али но тэк уг пукы, та удысаз ик кӧня ке арлы ужаны ӧтизы на. Папае Владимир Александрович кема аръёс ӵоже гуртын водитель луыса тыршемын, ужбергатонзэ но усьялляз: магазин, столярной мастерской возиз. Дышетскем-лыдӟиськем потон мылкыдме соос котьку лӧпкытъяса возизы. Юртъер котырысь ужез быдэстэм интые, книга сьӧрын пукисько шуыса, одӥг пол но пыкылэмзы ӧвӧл.

Нош кытысь кылдӥз пӧртэм кылъёсын тунсыкъяськонэ? Ушъяськем кадь медаз луы, но мыным кылъёс туж капчиен сётӥсько. Инмар таӵе быгатонлык сётэм, вылды. Одӥгез борды басьтӥськисько но, отын ик мукетсэ дышетэм потэ ни! Книга ӝажыосы тырмытэмын венгер, итальян, фин, англи, немец кылъёсын книгаосын. Соосты лыдӟыса, выль кылъёсты дышетыса, уен-нуналэн пукысал. Но ас поннад гинэ вераськыны уд дышы. Кулэ практика, кинэн ке улэп вераськон. Та ласянь туж кельше кылъёсъя курсъёсы пыриськыны. Отын ог-огеныд кенешыса, кылдэ волятӥськод.

Мон понна мукет пайдаез но вань на: ачим дышетӥсь бере, чакласько курсъёсты нуисьлэсь методиказэ. Кыӵе амалъёсыз тужгес но пайдаё, кызьы тунсыкогес кароно дышетонэз — тае ваньзэ аслым гожъяса кельтӥсько. Озьы та чакланъёсы юрттӥзы «БиЛингв» проект кылдытыны. Тазэ улон куриз, шуыны луоз. Туала егитъёс угось одӥг интыязы уг пуко, кунгожъёс усьтӥськемын, озьы тросгес но тросгес суро-пожо семьяос кылдо. Асьсэлэсь анай кылзэс гажась мумыос но, бубыос но тыршо вордскем кылзэс утьыны, пиналзылы пыӵатыны. Урод шат, семьяын кӧня ке кыл чузъяське ке. Тодосчиос кемалась шараязы ни: кык-куинь кыл пушкын будӥсь нылпиослэн визьзы но тросгес, котыр улон шоры учконзы но паськытгес. Со сяна, улонын но таӵеос асьсэды ӝоггес шедьто, калыкен капчиенгес кусып тупато.

— «Удмурт Кенеш» огазеяськон кичӧлтэмъя, таӵе нимын ик проект — «Билингва» — пыӵа Удмурт шаерын но: отчы пырисько нылпиоссэс удмурт но мукет кылъёслы дышетон сярысь сюлмаськисьёс. Тынад проектэд маин висъяське?

— Мон но мылысь-кыдысь пыриськисько «Удмурт Кенеш» огазеяськонлэн та проектаз: Удмуртие бертакум, та центре ветлӥсь анай-атайёсын пумиськылӥсько, билингвизмлы сӥзем лекциос лыдӟисько. «Билингва» — туж ӟеч но пайдаё кичӧлтон, вылаз ик, туж дыраз. Угось гуртъёсысь удмурт егитъёс туала вакытэ шоркаре кыстӥсько, татын уксё поттыны но, семьядэ сюдыны но луонлыкъёс паськытэсьгес. Нош анай кылэз утьыны секытгес. Та ласянь та проект удмурт семьяослы юрттыны кулэ.

Нош мынам «БиЛингв» проектэ кылдӥз ар талэсь азьло — аръёсын тымиськем-люкаськем опытэ озьы ӧръяськиз, шуыны луоз. Малы ке шуоно, Италиын улыкумы ай, ужай Римысь ӟуч культурая школаын: отын мыло-кыдоосты дышетӥ ӟуч кыллы. Соку тодматски уно адямиосын, кудъёсыз семьяосазы 2 но, 3 но кылъёсын верасько. Озьы соосты дышетонъям шыкысэ узырмиз. «БиЛингв» проектме мон паськытгес нуисько социальной сетьёсын, но луонлык кылдэ ке, лекциосыным пӧртэм ужрадъёсы но вуылӥсько.

Али «БиЛингв» группаям 900-лэсь ятыр анайёс-атайёс ни. Соос дуннелэн пӧртэм сэрегъёсысьтыз. Нунал куспын мыным соослэсь сомында вазиськонъёс вуо! Шуом, кузпалъёс пӧртэм кылын верасько ке, яралоз-а али вордскем нылпиен 2 кылын ик вераськыны, кызьы пиналлы ӟечгес пыӵатоно англи кылэз, кыӵе методикаос тужгес но пайдаё но трос та выллем. Куд-огез шуоз, вань ук Интернет, отысь ваньзэ шедьтод! Малы одно кыӵе ке группалы вазиськонэз! Зэм, вотэсын ивор туж трос — та бордын ик солэн шекез. Ивор зарезьын анай-атай ыштӥське, уг вала ни, кинлы осконо. Нош мон котькуд учырез, котькуд семьяез нимаз учкисько, соослы тупась амал бырйисько, визь-нод сётӥсько. Озьы «БиЛингв» проект улсам кылдытӥ на нимаз бамъёсме: книгаосын шыкыс — отчы пыртэмын али вордскем нылпилы 1 аресозяз лыдӟыны тупамон книгаос, озьы ик анайлы сӥзем сэрегме нуисько но трос мукет.

Учконо ке, Римын ӧжыт ӧвӧл билингвизм ужпумъёсын вырись школаос. Мар ватонэз, соос туж ик ӧз шумпотэ проектэлы. Анай-атайёс угось, соослы вазиськем интые, монэн кусып возьыны кутскизы. Но уноезлэн таӵе школаослэн методикаоссы вужмемынгес ни, шуыны луоз. Табере отысь дышетӥсьёс мыным асьсэос гожъяло, визь-кенешен юрттыны куро.

«БиЛингв» проектме нуонъям ик тодматски Италие мукет кунъёсысь вуэм но пиналъёсынызы пукись анайёсын. Мылкыды кылдӥз соослэсь улэм-вылэмзэс возьматыны, пиналъёссэс пӧртэм кылъёслы дышетон амалъёсынызы тодматыны — озьы поттыны кутски «Мама в Италии» журнал. Потӥз ай одӥг номерез гинэ, но та кичӧлтонме аналтыны уг малпаськы. Дась ини кыкетӥ номерез но. Табере Италиысь анайёс мыным асьсэос вазисько, семьязы, ужбергатонзы сярысь гожтыны курыса. Азьланяз, малпасько, та журнал котыре огазеяны быгато трос тунсыко адямиосты. Со пособие выллем луоз, юрттоз Россиысь вуэм адямиослы но мурт кунын асьсэды шедьтыны. Венгриын улӥсь эшъёсы но вазиськизы ни: ойдо, пе, Венгриын но таӵе журнал поттомы.

Малпанъёсы трос. Тани Кристиан пиеным арлы быдэ гужем бертылӥсько вордскем Мувыр гуртам. Солы отын ваньмыз выль. Алигес юа: малы, пе, удмуртъёс гондырез гондыр шуиллям? Кытысь потэм таӵе кыл? Мон шуак мар вазьыны ик пайми. Озьы кылдӥз эшшо одӥг кичӧлтонэ: «Покчитурист» нимаське. Со чакламын Удмуртие вуись покчиослы: удмурт кылъёсын-пужыосын пужыятэм песьтэре интыямын Удмуртиен тодматӥсь арбериос. Кылсярысь, басмалэсь мунё, буяны чаклам открыткаос, удмурт выжыкылъёсысь геройёсын открыткаос, удмурт мадёсъёсын пичи книгаос, чечым сиёнъёс. Котькудӥз вылын валэктон гожъямын удмурт но ӟуч кылъёсын. Шумпотӥсько, Удмуртиысь эшъёсыным ӵош та кичӧлтонэ быдэсмиз: песьтэръёс дасесь ни. Шумпотымон мукетыз но: Удмурт шаерын берло дыре туризм азинскыны кутскиз.

— Кылъёсты дышетон амалъёстэ эскериськод, луоз, Кристиан пиед вылын: со ӟеч тодо итальян, англи, ӟуч кылъёсты. Удмурт сямен но вераське-а?

— Пие Италиын вордскиз бере, котыраз ӵемгес чузъяськиз итальян кыл. Соин ӵош ик пыӵатыны турттӥмы ӟуч кылэз. Нош удмурт кыллы дышетыны малпай 3 аресысеныз. Но нылпилэсь психологизэ санэ ӧй басьты: ӵапак 3 аресысен кутскиз «ачимъяськон» вакытыз. Удмуртэзлы дышетыны кутски но, со шуиз: кытын мон соин вераськом? Римын? Ӵыжы-выжыосыным, эшъёсыным телефон, скайп пыр удмурт сямен вераськылӥ ке но, пайдаез сокем ӧз луы. Но пумен солэн удмуртэныз тунсыкъяськонэз будыны ӧдъяз. Али вераськыны выре ни. Соингес но мон сое гужемлы быдэ Мувырам вайылӥсько. Ӵужмамаеныз удмурт сямен лабыртэ.

Тани кемалась ик ӧвӧл садиказ дорысь уж сётӥзы: лыктоно, пе, кыӵе ке калык дӥсен. Со малпаськиз но шуэ: мама, мар каромы табере? Ӝыны мугорам итальян дӥсь дӥсялом, мукет палаз — ӟуч, нош удмурт дӥсез кытчы дӥсялом?

— Вӧлмемын веран: нылпиез, пе, вордскем дырысеныз 2-3 кыллы дышетыны кутскиськод ке, со сураське, бер вераськыны кутске…

— Мон таин соглаш ӧвӧл. Басьтом Римысь ӟуч школаез: отчы 200-лэсь ятыр пинал ветлэ. Ваньзы итальян, ӟуч, англи кылъёсын верасько. Со сяна, тросэз тодо анайзылэсь яке атайзылэсь кылъёссэс: шуом, молдаван, грузин, бурят, армян. Чакламея та пиналъёс дырыз дыръя вераськыны кутскемын, кылъёсты соос уг сурало.

Но татын валэктыны кулэ бадӟым но пичи кылъёс сярысь. Бадӟым кыл — со котырысь кыл, кудӥныз тросэз верасько, кудзэ нылпи нуналлы быдэ котырысьтыз кылэ. Пичи кыл нылпилэн улоназ шергес кутӥське, шергес чузъяське. Кылсярысь, Удмурт шаерын бадӟым кыл луэ ӟуч, нош пичиез — удмурт. Семья тёп-тёп удмурт ке, 2-3 аресозь удмурт кыл гинэ луыны кулэ, талэсь кышкано ӧвӧл. Урамын, школаын яке, шуом, Иже куное вуылыкуз со ӟуч кылэз кылытэк уз кыльы, ӟуч кыллы ӝог дышоз. Соин ик мон малпасько, 3 арескозь нылпилэн котыраз 80 процентлы пичи кыл гинэ чузъяськыны кулэ. Мукет югдур, шуом, атай ӟуч, нош анай удмурт ке. Соку атай ӟуч сямен гинэ вераськыны кулэ, анай — удмурт кылын. Но одно ик кулэ та 2 кылэз огдыре пыӵатыны.

Семинаръёсам вуылӥсьёс таӵе юанэн ӵем вазисько: анай-атай удмуртъёс, уло городын, пиналзы удмурт сямен вераськемзэс кылэ но вала, нош вераськыны уг быгаты. Та учырын дорын гинэ чузъяськись кыл тырмыт ӧвӧл ни. Озьыен, пичи кылэз нылпи палэнын но кылыны кулэ. Соку солэн авторитетэз будоз, нылпи валалоз, та кылэз палэнын но кутыны луэ вылэм шуыса. Та учырын туж умой луысал, шуом, удмурт пиналъёсты люкаса, шудонъёс ортчытъяны, кытчы ке экскурсие ветлыны. Угось пичи кылэз утьыны анай-атайлэн гинэ кужымзы уг тырмы ни, кулэ юрттӥсь. Ӵапак та бордын ик, мон малпасько, «Удмурт Кенеш» огазеяськонлэн «Билингва» центрезлэн кужымез: пиналъёслэн син азязы удмурт кыллэсь данзэ ӝутон, сое тунсыко амалъёс пыр пыӵатон. Нялтас вераса, кунгож сьӧрын вӧлмемын кыӵе ке кыллы дышетӥсь няняез ӧтчан. Ӵыжы-выжыос уз тупалэ, угось нылпи соосын дышем кылыныз вераськоз. Нош няня ужез понна уксё басьтэ, нылпи азе чурытгес куронъёс пуктэ. — Тон выриськод кылысь кылэ берыктон ужен, куд-ог венгер произведениосты удмурт кылэ берыктӥд. Ма бордын выриськод берло дыре?

— Италиын, зэмзэ вераса, туж секыт вырыны берыктон ужен. Со понна угось быдэс дуннелэсь пытсаськоно но произведение пушкы выёно. Одӥг кылын, переводэн вырон понна интроверт луоно. Нош итальян адямиос мылкыдъёссэс шара верало кужмо куараен. Нуналлы быдэ ог-огзылы сю пол жингыръяло, ӵем пумиськыло, бадӟым ӝӧк сьӧры люкаськыса, ӵош сисько. Мон шуисько: кинлэн итальянлы быземез потэ, дась луоно «бызьыны» ӵыжы-выжыосызлы, эшъёсызлы. Улӥмы бадӟым итальян семьяен: одӥг липет улын кузпалылэн анай-атаез но, солэн апай-вынъёсызлэн семьяоссы, пиналъёссы. Соин ик, Римын улыкумы, та ужен рос-прос вырыны ӧй пӧрмыты. Но Маркоэз туэ Чехиысь Прага городэ ужаны ыстӥзы, ми отчы улыны выжимы быдэс семьяен. Татын шыпытгес, берыктон ужме азинтыны малпасько.

Берыктон уж борды басьтӥськи Венгриысь Б. Баллинт нимо университетын дышетскеме бере. Утӥ кылысь кылэ берыктонъя стипендия. Одӥг ар куспын Венгриысь тодмо писательёсын но поэтъёсын тодматски, соослэсь ужъёссэс удмурт кылэ берыктӥ. Тужгес но кельшизы Лазар Эрвинлэн ужъёсыз, солэсь одӥгзэ произведенизэ «Сизьым йыро вуныл» нимын удмурт кылын поттӥ. Со дипломной уже луиз, нимаз книгаен потӥз. Берыктӥ на Эржебет Галгоцилэсь ужъёссэ: соосты но нимаз книгаен поттыны чакласько.

Берло берыктэм ужъёсы пӧлын — дуннеысь тодмо психоаналитиклэн Зигмунд Фрейдлэн дышетскисезлэн Шандор Ференцилэн ужъёсыз. Куд-ог ужпумъёсъя со З. Фрейдэз но ортчиз, шуыны луоз. Ш. Ференец Венгриысь вал, гожъяськиз немец кылын. Но куд-ог ужъёссэ венгер кылын гожтыса кельтэм. Соос та дырозь ӟуч кылэ берыктэмын вылымтэ на. Озьы Россиысь одӥгез издательство куриз гожъямъёссэ ӟуче берыктыны. Та уж борды басьтӥськимы Историяя, кылъя но литературая Удмурт институтысь филологияя наукаосъя кандидатэн Александр Егоровен ӵош. Озьы берыктэм ужмы 2 нимаз книгаен потӥз. Вузаськиз со Россиысь книга вузась бадӟым магазинъёс пыр.

— Возьдаськись удмурт нылаш но пӧзись мылкыдо, шаплы итальян пияш — кызьы ог-огдэс шедьтӥды?

— Кылъёсты дышетон мылкыдылы луыса ик, шуыны луоз. Венгриысь Э. Лоранд нимо университетысь аспирантураын 2 ар ӵоже дышетскыкум, вуылӥ Хельсинкиысь университетэ. Отысь фин-угор кафедраын ӝыны ар удмурт кылъя урокъёсты нуи. Нош Марко со вакытэ ик Италилэн Хельсинкиысь посольствояз стажировказэ ортче вылэм. Со но, мон но одӥг общежитие улыны тупамы. Огнуналэ коридорын ваче кымыс шуккиськимы. Со мыным вазиськиз: дышеты, пе, монэ ӟуч кыллы. Озьы одӥг, кык пол пумиськимы, синмаськимы. Бӧрысь мон Венгрие кошки, Марко — Риме. Но ог-огмес яратыны иськемъёс ӧз люкетэ: Марко 2 ар ӵоже шутэтскон нуналъёсаз дорам, Будапештэ, лобаз. Собере сюанмы вал, мон Риме улыны выжи. Сюлэмме ас палаз берыктӥз мон понна сюлмаськеменыз, котьку утьыны тыршеменыз. Общежитиын улыкумы но, ма, али но кыӵе но сиёнъёсын уг паймы со монэ. Книгаос сьӧрын пукыса-лыдӟиськыса, весь сютэм улӥсько кожа, ялан маин ке ческытэныз сюдыны тырше.

Тодматскеммылэсь азьло Марколэн удмуртъёс сярысь кылэмез ик ӧй вал. Ма, ӵыжы-выжыосыз али ке но уг валало, удмуртъёс — нимаз калык шуыса. Соос малпало, удмурт кыл — со ӟуч кыллэн диалектэз.

Удмуртиын Марколы туж кельше. Мувырысь Иже потоно луэ ке, пумитъяське: мон, пе, резина сапег кутчаса, пудо-живот котырын берганы малпасько. Марко ассэ удмурт эмеспиен шӧдэ ни. Турнаны но дышетскиз, удмурт кылэз но дышетӥз. Тон мынэсьтым анай кылме дышетӥд ук, мыным но, пе, дышетоно.

Источник:

Широбокова-Монако Л. В. Яратонлэн кылыз / Лариса Широбокова-Монако ; вераськиз Елена Тугашова // Удмурт дунне. - 2019. - 26 июля. - С. 10, 15 : фот. - (Тӧр шорын)

За предоставление материала выражаем огромную благодарность редакции газеты "Удмурт дунне"