Николаев Георгий Фёдорович

Материал из Воршуда
Версия от 14:42, 6 февраля 2015; Admin (обсуждение | вклад) (1 версия импортирована)
(разн.) ← Предыдущая | Текущая версия (разн.) | Следующая → (разн.)
Перейти к навигацииПерейти к поиску

Юн инъетлэн пушъетэз ӟеч[править]

Николаев Г.Ф., Николаева В. И.

Анай-атай нылпизылы бадӟым саклык висъяло ке, солэн улон сюресэз чаклам визылъя радъяське. Соин зэмос дышетӥсьёс вань кужыменызы тыршо мур тодон-валан сётыны, пиналъёслэн мумы-бубыосынызы оскымон но матысь кусыпъёс тупатыны. Россиын азьланьтӥське Дышетӥсьлэн арез. Соин тодматэммы потэ синмаськымон но азинлыко дышетӥсьёсын Валентина Игнатьевна но Георгий Фёдорович Николаевъёсын.

Кузпалъёслэн ужан интызы - Можга ёросысь Вылын Юриысь укмыс классъем школа. Туэ дышетон удысын тыршемзылы куамын ар тырме. Тодон-валан дуннеын вань мылкыдзэс сётыса ужамзы пусъемын Можга ёросысь дышетонъя управленилэн дипломъёсыныз, республикаысьтымы Наукая но дышетонъя министерстволэн Данъян грамотаосыныз. Валентина Игнатьевна - Россия Федерациысь дышетон удысысь дано ужась.


Кизнерысь азьветлӥсь

Ӝӧк вылысь чильпам ӝӧккышетлэн пумъёсыз музозь ик ошиськемын. Со улын пичи нылаш понна мукет дунне усьтӥське. Азяз сылӥсь пичи пукон - со парта. Со вылын кык тетрадь но кык карандаш. Огез дышетскисьлэн, мукетыз дышетӥсьлэн. Вить аресъем Валя кыксэ ик ролез ачиз шудэ.

Валялэн вордскем интыез - Кизнер ёросысь Ямушан-Ключи гурт. Но пичи дыръяз ик нылок дуннеез котыръя. Атайзэ Игнатий Гавриловичез лэзё Можгала трактористэ дышетскыны, собере келяло Оренбург улосысь «Буруктольский» совхозэ. Татын Валя куинь классэз йылпумъя.

1967-тӥ арын Алексеевъёслэн семьязы берен Кизнер палъёсы бертэ. Ямушан-Ключиын Валя одӥг ар дышетске на. Макем гажа дышетӥсьсэ Татьяна Кузьминична Каратаеваез. Но витетӥ классэ вамыштоно луэ ни Балдейка школае. Татын нылаш ваньзэсты дышетсконын азьпалтэ. Эшъёсыз математикаен задача лыдӟо гинэ ай, нош Вали валэктонзэ тодэ ини. Паймытъя туж шаплы лыдӟиськеменыз. Оскисьтэмъёсыз юромо пуштроссэ но выжыято. Нылаш ваньзэ шонер вера. Школаын со котьку азьпалан: пионер отрядлэн валтӥсез, дружиналэн советэзлэн тӧроез, комсомол организацилэн секретарез, КВН командалэн капитанэз. Эшшо математикаен но физикаен йырыз зол ужа. Огпол, районысь олимпиадаын вормыса, республикае мынэ. Таиз йыр сынан ортчиз Глазысь пединститутын. Нылаш туж синмаськиз институтлэн выль юртэзлы но выль общежитиезлы. Вот татын дышетскысал, малпаз понназ.

Дышетӥсьёсыз но Глазысь пединститутэ сюрес сӥзё. Нош Казаньын улӥсь ӵыжы-выжыосыз татысь университетэ ӧтё. Таӵе вераськонъёс нылмуртлэсь йырзэ сурало ни. Но кыстаськонлы пум понӥз Кизнерын пумиськон.

- Валя, роноысь направление басьтӥд-а ни? - юаз школалэн директорез Тамара Васильевна Мамаева. Валэктонзэ возьматэк, китӥз кутыса, пыртӥз роное. Озьы нылаш Глазэ кошкиз, пыриз физикая но математикая факультетэ. Сӥзьыл дышетскыны лыктэмез бере тодӥз: декан сое физикая люкетэ гожтэм.


Алнашысь шӧртчи

Алнаш ёросысь Улын Сырьезьын Николаевъёслэн семьяязы вить пинал будӥз: куинь вын но кык сузэр. Гера - кыкетӥез. Атаез - шахтёр, анаез пӧртэм удысын тырше. Можга ёросын Лудӟи-Шудӟи гуртын из поттон карьер вал. Николаевъёслэн семьязы огвакытэ со гуртын улӥз. Гералы тямыс арес дыръя Николаевъёс берен вуо Улын Сырьезе. Соку та гуртын но из поттыны кутскизы. Витетӥ классын дышетскись Гера атаезлы юрттӥське ни. Нош 7-тӥ классэ ветлӥсь пияш, атаез висьыку, чылкак огназ та ужен выре. Со сяна, тырше Ильич нимо колхозын. Нуназе сузэрезлы скалъёсты кыскыны юрттэ.

Гера умой дышетске, яратоно урокъёсыз - физика но математика. Районын физикаен олимпиадаосы пыриськылэ. Школа бере Гера сурон сапег кутчаз. Озьы ке но тодон-валан люкан мылкыдзэ ӧз ышты. 1974-тӥ арын Глазысь пединститутэ вамыштӥз. Бырйиз физикая но математикая факультетэз, бӧрысь выжиз физикая люкетэ.


Мыйыко визь люк

Нырысьсэ адӟиськемзэс Николаевъёс али но серекъяса тодазы ваё. Валентина Игнатьевна вера:

- Аудиторие пыре кык пи. Йырсиоссы кузесь, клёш брюкиоссы паськытэсь. Огезлэн йырсиез - тӧдьыалэс, мукетыз - сьӧд, вылаз ик, мыйыко, пеймыт очкиен. Малпай: кыӵе шӧтэм пиос!

Но кыӵе вылэм ай та сьӧд мыйыко студент! Физикаен задачаосты котькинлэсь шаплы лэсьтэ. Кыкетӥ курсын кутско лабораторной ужъёс. Татын нылъёслы шуг йӧтэ ни. Мыйыко визь люклы ӵем вазиськылӥзы. Ма кызьы уд юртты? Чагыр синъёс выйытӥзы.

Ньылетӥ курсын Георгиен Валентиналы, тужгес усто дышетскисьёслы шуыса, кураторзы ӵектӥз научно-практической уж дасяны. Студентъёс ӟеч прибор пӧрмытӥзы. Та уженызы Урал округын нырысетӥ интые потӥзы но коньдон премия утӥзы. Азьланяз та уксёзы туж ӟеч юрттэт луиз. Уго витетӥ курсын Валя но Гера кузпалъяськизы.


Ӧс интые - укно

1980-тӥ арын, институтэз йылпумъяса, кузпалъёс направлениея вуизы Можга ёросысь Вылын Юри гуртэ. Татын соослы вуж школалэн юртаз улон сэрег висъязы. Тямыс классъем школаын Валентина Игнатьевналы сётӥзы 7-тӥ классэн кивалтонэз, вылаз ватсазы математикая урокъёсты, пионервожатойлэсь но интернатын воспитательлэсь ужзэ. Георгий Фёдоровичлы оскизы физикаен но математикаен дышетыны, 8-тӥ классэн кивалтыны.

Валентина Игнатьевна тодаз вае:

- Нырысетӥ нуналаз милемлы возьматӥзы ужан кабинетэз. Котыр зӧк тузон кылле. Отын но татын вуж книгаос куямын. Ми Гераен кема утялтыны вырим классэз. Нокинлэн куараез но уг кылӥськы ни. Потыны ӧдъямы но - ӧсъёс ворсамын. Солань-талань ветлыса, нырысетӥ этаже ваським но укноетӥ потӥм. Ӵуказеяз завуч шуэ: «Озьыен, тӥледлы школаын ужаны кылдэмын».

Егит дышетӥсьёслы капчи ӧз йӧты. Но Георгий Фёдоровичлэн дышетскисез нырысетӥ араз ик ёросын физикая олимпиадаын вылӥ инты басьтӥз. Ар ортчыса, нош ик солэн дышетскисез районын но шаерысь гурт школаос пӧлын олимпиадаын нырысетӥ интыосты утӥз. Визьнодасьсы сярысь пиналъёс шумпотыса шуылӥзы: милемлы удалтӥз - Георгий Фёдорович задачаосысь валамтэ интыоссэ удмурт сямен но валэктэ, нош Валентина Игнатьевна кык-куинь удмурт кыл сяна уг тоды. Соин нылкышнолэн классысьтыз пиос азязы ужпум пукто: дышетӥсьмес дышетоно удмурт кыллы. Ар ортчыса, Валентина Игнатьевна удмуртоме ни.

Валентина Николаева вера:

- Со дырысен асме удмурт адямиен шӧдыны кутски. Витетӥ классэ вуыса, гуртысь нылпи умой уг тоды на ӟуч кылэз. Задачаосысь вань кылъёсты уггес валало на, соин, урокын ӝеган медам луы шуыса, «предыдущий», «последовательность», «в порядке возрастания» выллем кылъёсты удмурт сямен валэктӥсько. Озьы аслым но ужаны капчигес луиз.


Кивалтон ныпъет но быдэстымтэ вамыш

Ар ортчыса, Николаевъёслэн нылзы вордске. Но егит анай дораз кема пукыны уг чида. Ужаны потэмез бере Валентина Игнатьевналы завучлэсь ужзэ оско ни. Нош 1983-тӥ арын Георгий Фёдорович луэ Можга ёросын нырысетӥез егит директор. Огпол сое дышетскыны келязы Можгала. Толэзьлы люкиськон быдэс ар кадь потӥз кышноезлы. Уго огдыре со директорлэсь но, завучлэсь но ужзэс быдэсъяз. Георгий Фёдоровичлы кивалтон удысын нырысетӥ вамышъёсыз капчи ӧз сётске. Школаез эстон-шунтон янгышен радъямын вал. Толалтэ гумыосысь ву, бультыр карыса, вия школа азе - юртэ пырон азьын быдэс йӧ гурезь кылдэ. Кызьы меда тае тупатоно? Визь-кенеш юаса, Георгий Фёдорович Можга ёросысь школаостӥ ортче.

Валамон, нырысь кочегаркаысь пуртыосты вошъяно. Талы коньдон ӧвӧл.

- Тодӥ, Можгалась Восточный посёлоке газ пыртӥллям. Тӥни отысь кык пурты шедьтӥ. Табере бадӟым температураез чидась кирпич кулэ. Ронолэн кивалтӥсез шуиз: тӥ воргорон, шедьтоды. Озьы, отысь но татысь утчаськыса, сюризы кирпич, насосъёс, подшипникъёс. «Пычасский» совхозлэн кивалтӥсез Николай Тарасов коньдон висъяз на, - тодаз вае Георгий Фёдорович. Сыӵе ини директорлэн ужез: дышетон но, завхоз интыын бызьылон но, школаез шунтон но, пиналъёсты сюдон но, интернат понна кыл кутон но.

Нош выль дышетӥсез ӧтиськод ке, солы улон инты но висъяны пӧрмыты. Озьы, совхозэн валче кариськыса, квартира пуктыны ӧдъязы. Собере роно пыр но юрт ӝутӥзы. Таӵе ужъёсты вормизы бере, оло, выль школа но ӝутӥськоз?

Но малпанъёс ӝыныё кылизы. Выльдӥськон вуэмен, лэсьтӥськон дугдӥз. Школалэн ӝыныё ӝутэм юртэз тус-тас луиз.

Юрт кузё

Таӵе югдур директорлэсь мылкыдзэ сапкиз. Николаевъёслэн семьяязы куинь нылпизы ни. Пичи коркан улыны ӟоскыт. Уждунзы ӧжыт. Дас арлэсь ятыр директорлэсь удыссэ валтыса, Георгий Фёдорович возэзлэсь мозмытскыны малпаз. Удысэзлэсь куштӥськон понна кык толэзь бызьылӥз. Николаевез ӧтизы пӧртэм интыосы, но яратоно ужез, гурт улон, нылпиосызлэн вордскем интызы сое татчы ик кельтӥзы. Георгий Фёдорович школалэсь палэнэ ӧз кошкы - соглаш луиз физикалы дышетыны, висказ корка пуктыны кутскиз. Тазэ ужез коньдонтэк уд быдэсты. Соин дышетӥсьёслэн пудо-животсы йылӥз, бакчазы паськытаз.

Валентина Игнатьевна вера:

- Мыным огвакытэ химия но биология урокъёсты нуоно луиз. Школа бакчаын ужаны ӵектӥзы. Георгий Фёдорович дэмлаз, чыры-пыры емыш сяна, тросгес картошка, кубиста, помидор мерттыны. Кубиста но помидор удъёслы нимысьтыз инты лэсьтӥмы. Макем зол удалтӥз бакча сиёнмы! Сое вузаса, школалы коньдон поттӥм. Со дырысен усьтӥськиз ужбергатонэ сюрес. Ӝоген Можга ёросысь школаос пӧлын вылын юриос висъяськыны кутскизы трос картошка будэтэменызы.

Кузпалъёс доразы но ужаны кутскизы школаын сямен. Воргорон ужбергатон удысэ кыткиськиз.

Георгий Фёдорович маде:

- Машинаен котыръяй Можга, Грак, Вавож, Кизнер ёросъёсты. Сӥль, чечы, бакча сиён басьяй. Собере Иже базаре вузаны нуллӥ. Совхоз музъемъёсты пайлы люкылыны ӧдъямзы бере Георгий Фёдорович муэн ужан борды басьтӥське. Но 10 гектар бусыосты маин ке гыроно-кизёно. Иське, техника кулэ. Люкам уксёез Т-40 тракторлы тырмиз. Будэтэм картошказэ вузаса, Т-25 трактор басьтӥз. Руль сьӧры ачиз ик пуксиз. Табере дас гектар вылын будэтэ картошка, кубиста, гордкушман, ӵужкушман. Бусы ужъёссэс ас семьяенызы быдэсъяны вормо.


Пиналлэн интыяз

Школаын но Николаевъёслэн ужгурзы пӧзе. Дышетскисьёссы ӵем пыриськыло математикая но физикая олимпиадаосы. Котьку ик утыло вылӥ интыос.

Валентина Игнатьевна 1996-тӥ аръёсы кык ар кивалтӥз Можга ёросысь математикая дышетӥсьёслэн огазеяськонэнызы. Кузпалъёс-дышетӥсьёс тыршо котькуд темалэсь пуштроссэ нылпилы паськыт усьтыны. Георгий Фёдоровичлэн физикая урокъёсаз пиналъёс мыло-кыдо мыно - тодо: татын туж тунсыко луоз. Задачаос сяна, дышетскисьёсты возьмало практикая но лабораторной ужъёс. Бере кылись нылпиосты дышетӥсьёс ас доразы ӧтьыло, нимысьтыз урокъёс радъяло.

Валентина Игнатьевна шуэ:

- Витетӥ классын нылпиос возьдаськисесь, востэмесь, ӟуч сямен шуген верасько. Пиналэз доска доры ӧтьыкум, медаз кепыра шуыса, вӧзаз уг сылӥськы, солэн интыяз пукисько. Дышетскись парта сьӧрын ке, со вӧзы интыяськисько. Озьы каньылля дышиськомы ог-огмылы.

Шумпотӥсько, пиналлэн синъёсыз чиляло ке. Иське, валаз темаез. Ваньзы тодо, сямы юн шуыса. Отметкаосты туж чурыт пуктылӥсько. Яратоно дышетскисьёсы вань ке но, уг висъяськы. Ляб пиналлэсь трос уг куриськы. Дышетскисьёслэсь тунсыкъяськонзэс, быгатонлыкъёссэс лыдэ басьтӥсько. Анай-атайёсынызы ӟеч кусыпъёс возьыны турттӥсько. Озьы гинэ пинал улонын аслыз шонер сюрес шедьтыны быгатэ.

Кылсярысь, Витя Крюковлэн шӧдӥськиз ужрадъёсты ортчытъяны быгатонлыкез. Кури одӥг ужрад дасяны. Ачим но юрттӥ. Но ӝытэз нылпиос асьсэ кужыменызы ортчытӥзы. Табере Витя дышетске Ижысь педучилищеын. Серёжа Ивановлэн кивалтон сямыз потылӥз, тур-пар вераськись. Выпускной ӝытэз нуыны ӵектӥ. Пӧрмытӥз. Али со Новосибирскысь военной институтын дышетске.

Валентина Игнатьевна пиналъёс азе ужпум пуктэ: нокыӵе задачалэсь кышкано ӧвӧл. Тодын возёно таӵе кылъёсты: мон адӟисько, мон тодӥсько, мон быгато.

Николаевъёслэн доразы ӝӧк вылысьтызы бадӟым блокнотэз синйылтӥ: «Ӟечкыланъёс, сӥзёнъёс» гожтэмын. Татын нылпиослэн, мумы-бубыослэн тау каронъёссы. Шумпотымон, дышетӥсьлэн ужез тазьы дунъямын ке.


Ӟеч выжы

Кузпалъёс адӟем карымон луо асьсэлэн нылпиоссылы но. Николаевъёслэн Наталья нылзы яратӥз лыдъян-чотанэз. Районысь математикая олимпиадаосын нырысетӥ интыосты утылӥз. Йылпумъяз Ижысь гурт удысъя академиысь экономикая факультетэз, ужа Ижысь огаз фирмаын бухгалтер луыса.

Руслан чылкак мукет. Огпол фольклор ансамблен Иже нылпи фестивале вуылыса, улонэз чутрак воштӥськиз. Пияшлы дэмлазы республикаысь усточиослэн школа-интернатазы дышетскыны. Кырӟаз пиослэн «Ингур» ансамблязы. Собере тодон-валан люказ республикаысь крезьгуръя колледжын. Кык ар кырӟаз «Танок» кун ансамбльын. Солы сюрес усьтӥськиз Россиысь Гнесинъёслэсь нимзэс нуллӥсь академие. Москваын Руслан, дышетскем сяна, мыло-кыдо ужаз-утчаськиз. Группаысьтызы пиосын коллектив кылдытӥзы. Россиысь фольклор фестивальын витьтон коллектив пӧлын пиос нырысетӥ интыез утӥзы. Руслан али но Москваын - дышетэ отысь крезьгуръя училищеын.

Николаевъёслэн шумес пыдэссы - Илья - атаезлэн пытьыетӥз кошкиз. Таиз, семаез сямен, куада физикая но математикая задачаосты. Вормылӥз олимпиадаосын, экзаменъёстэк пыриз Ижысь техникая кун университетысь прибор лэсьтонъя факультетэ. Дышетсконзэ йылпумъяса, армие кошкиз.


* * *

Куамын ар ӵоже дышетон удысын тыршыса, Валентина Игнатьевна но Георгий Фёдорович одӥг малпанэн уло: нылпиез яратыны кулэ. Ялан сюлмаськоно визь песьтэрдэ узырмытон сярысь, соку пинал но гажалоз тонэ.

Кылем арын Вылын Юриын усьтӥськиз выль школа-сад. Туала нылпиослэн луонлыксы вань ӟеч школаын тодон-валан люканы. Татын тросгес медло на вал техникая тӥрлык. Нош Николаевъёс тодо: нылпи яратӥз ке ужез, гажалоз дышетсконэз но.


Источник:

Николаев Г. Ф. Юн инъетлэн пушъетэз ӟеч / Г. Ф. Николаев, В. И. Николаева ; записала Ю. Кузьмина // Удмурт дунне. - 2010. - 26 февр. - С. 6, 11. - (Удмурт кизилиос).


За предоставление материала выражаем огромную благодарность редакции газеты "Удмурт дунне"