Виноградова Елена

Материал из Воршуда
Версия от 11:22, 9 февраля 2015; Admin (обсуждение | вклад) (1 версия импортирована)
(разн.) ← Предыдущая | Текущая версия (разн.) | Следующая → (разн.)
Перейти к навигацииПерейти к поиску

Елена Марковна Виноградова - удмурт кылбурчи, журналист.

Vinogradova1.jpg

Улон сюресэз[править]

Елена Виноградова вордскемын Алнаш ёросысь Актэмыр гуртын 1967-тӥ арын 27-тӥ толшоре. Дышетскиз шор ёзо Байтэрек школаын. [1]

7-тӥ классозь Еленалэн удмурт кылын но литератураен дышетӥсь луэмез потылӥз. Нош 9-тӥ классын та малпанэз воштӥськиз. Удмурт кыллы но литературалы дышетӥсез Е. Т. Багратионова гожъяськыны мылкыд сётӥз, анай кылэз яратыны дышетӥз.

1983-тӥ арын школазэ быдтэм бераз нылаш пыриз дышетскыны Удмурт университетысь филологияя факультетэ. Гожъяськон мылкыдыз уката пуромиз. [2] Университетэз йылпумъяса, Елена Марковна 19891992-тӥ аръёсы Кияса ёросысь Лутохинской шор ёзо школаын пиналъёсты удмурт кыллы но литературалы дышетӥз. Отӥяз вордскем палъёсаз, Алнаше бертӥз. «Алнаш колхозник» газетын кылысь кылэ берыктӥсь, корреспондент луыса ужаз. Но 1992-тӥ арын «Удмурт дунне» редакцие культура ёзэтэ литсотрудник луыса кутэмын. Озьы улонзэ герӟаз журналистикаен. Кема дыр ӵоже "Удмурт дунне" газетын ужаз. Елена Виноградовалэн очеркъёсызлэн геройёсыз – элькунысьтымы дано, творческой адямиос. Соослэн ужзы шаермес азьлань валтэ, вылӥе ӝутэ. Ваньзэ сое быгатса возьматӥз журналист. Удмуртлык понна сюлмаськись, пӧсь мылкыдыз Еленалы тэк пукыны маза ӧз сётэ. Со мылысь-кыдысь пыриськылӥз «Дэмен» но «Удмурт кенеш» огазеяськонъёслэн ужазы. [3]

Финн культурая М. А. Кастрен огазеяськон 1997-тӥ арысен ини пусйылэ финн-угор выжыосысь калыкъёслэсь литература, журналистика удысъёсын тужгес мыло-кыдо тыршисьёссэс. 2002-тӥ арын Москвае люкаськӥзы газетъёсын, журналъёсын ужам но ужась муртъёс. Россиын улӥсь но финн-угор кылъёсын гожъяськись, ас выжыоссылэсь кыл, лулчеберлык удысъёсысь сюлмаськонъёссэс возьматыны быгатӥсь но ортчем ӵошатсконъёсын вормись муртъёсты данъязы. Удмуртъёс пӧлын таӵе бадӟым данэз утӥзы «Удмурт дунне» газетлэн редакциысьтыз журналистъёс Елена Виноградова, Елена Миннигараева, Милитина Гаврилова-Решитько. Вань вормисьёслы сётэмын финн культурая М. А. Кастрен огазеяськонлэн сӥё-дано дипломъёсыз. [4]

Ӟеч ужамез понна Елена Марковна Виноградова данъямын трос пӧртэм грамотаосын.[1]

Гожъямъёсыз сярысь[править]

Е. Виноградова Л. Малыхен но Е. Миннигараеваен

Лена пичи дырысеныз ик гожъяськон удысэн тунсыкъяське. Кызьы шуэ ачиз гожъяськись, нырысь кылбуръёссэ со гожтӥз ини 3-тӥ классын дышетскыкуз но ыстӥз "Дась лу!" газетэ. Кылбурез газет бамын ӧз поты. Покчи авторлэн мылкыдыз куашкам вал но, эшъёсыз кутскем ужезлэсь куштӥськыны ӧз лэзе. 8-тӥ классын дышетскыкуз, школаязы ветло "Алнаш колхозник" газетысь ужасьёс, соос пуромытӥзы ныллэсь мылкыдзэ. Гожъямъёссэ выльысь но выльысь ыстылӥз газетъёсы, соосты табере печатлаллязы ни "Советской Удмуртиын" но. Атаез туж шумпотэ вал, нылыз гожъяське шуыса. Газетлэсь котькуд номерзэ чидатэк возымалляз.[2]

Елена Виноградова шуэ, солы, пе, кылбурет удысэ сюрес "Дась лу!" газет усьтӥз. Отын со вакытэ Герман Ходырев ужаз. Дано кылбурчи гожтэтъёсаз котьку лӧпкытъялляз: "Йырдэ эн ошы — гожъя! Сэзьгес кариськы!". Та газетлэн сэзь юнкор луэмез понна Леналэн нимыз редакцилэн Данъян Книгаяз но пыртэмын вал. Перозэ волятыны озьы ик юрттӥзы Алнашысь «Ошмес син» литобъединение но университетын ужась удмурт литературно-творческой кружок, кудӥныз кивалтӥз Д. А. Яшин. Берлогес поэзие сюрес лёгыны бадӟым юрттэт сётӥзы кылбурчиос Иосиф Иванов но Иосиф Бобров. [1]

Малпаськон, улон-вылонэз эсэплан шӧмоесь но туала публицистика пала кыстӥськись кылбуръёсыныз удмурт литературалэсь шыкыссэ узырмытӥз Елена Виноградова. Нырысетӥ чуръёссэ кылбурчи сӥзиз вордӥськем шаерезлы, ӟеч адямиослы, ас гуртэз котырысь чебер инкуазьлы. Елена Виноградовалэн кылбуръёсыз печатласько газетъёсын но журналъёсын.

Солэн кылбуръёсаз усьтӥсько пӧртэм пумо темаос: яратон, вордӥськем шаерез гажан, огъя улон ӧр, инкуазез утён, поэт но поэзия... Чуръёсыз тырмемын ӝожмыт мылкыдын, ӧтё малпаськон дуннее (огъя улон ӧре, туннэ нуналысь ужпумъёсы). [2] Е. Виноградовалэн лирической героиняез улонысь уг шедьты бордын гинэ ялан возиськись шумпотонэз. Зэмос улонын шумпотон вань, но кема со уг кыстӥськы, пельпумъёс вылэ секыт зӥбисько сюлэмшугъяськонъёс но курадӟонъёс:

Нош адӟиськод котьку кайгыронэз —

Синпумъёстэ лушкем ӵушалтӥськод,

Та улонын ӧвӧл вылэм ӟечез —

Зэм улонын ичи пальпотӥськод...

"Гадяд тэрисьтэм шумпотонэн..."

Виноградовалэн кылбуръёсыз маин пӧртэмесь? Нырысь ик, солэн лирикаяз яратонлы сӥзем кылбуръёс валтӥсь инты уг басьто. Лирической героиняез уг куректы палдурес яратон пумысен. Тросаз учыръёсы адӟиськом шудо нылкышноез, нылашез, соос понна яратон бадӟым шумпотон луэ ("Выль лымы вылтӥ гылӟе пыды...", "Лыктэ ни яратон...").

Кыкетӥез, солэн поэзиез паймымон матын луэ М. Федотовлэн "Вӧсь" книгаысьтыз кылбуран (поэтической) дуннеезлы. Куд-ог учыръёсы образъёс меӵак тодмамонэсь луо ("вирсэр", "берпуметӥ сэрег", "мон лобисько"... ). Басьтом Е. Виноградовалэсь таче чуръёссэ: [2]

Мон лобышто йӧтылымтэ кыре —

Закрась синъёс соку шузимозы,

Думет йылын кадь, весь кыстаськозы,

Мон лобышто йӧтылымтэ кыре...

2002-тӥ арлэн пумаз Елена Виноградовалэн «Кенеш» журналын потэм кылбур бичетэз шумпоттэм тодмо тодосчиез Василий Михайлович Ванюшевез: «Таяз бичетысь быдэ вуэм кылбурчи адӟиськиз ини. Малпаськон ӧраз шумпотон вӧзын уно сюлэмшугез но вань. Соиз умой: та мылкыдъёс ӵук лысву кадь чылкыт кылсуредъёс пыр вераны быгатэмын». [5]

Наградаосыз но премиосыз[править]

М. А. Кастрен премилэн лауреатэз, 2002

Библиография[править]

Статьяосыз[править]

"Асфальт вылысь йӧэд ини шуна..." : кылбур // Алнаши - сердцу добрый свет. - Ижевск, 2004. - С. 214.

"Быръем кылбуръёс" сузьетысь // Удмурт нылкышно кылбуретлэн тулкымъёсыз / Л. П. Федорова. – Ижевск, 2007. – С. 334–340.

Буд, эке! ; Одӥг кадь бӧксо : кылбуръёс // Зарни дэремен шунды : семьяын лыдӟон книга. – Ижевск, 2006. – С. 32.

Кезьыт : кылбур // Ӟечбур! – 2005. – 3 февраль. – С. 3.

"Кыӵе туссэ кузьма мыным даур?!." = "Mis näo mul kingib sajand praegune..." ; "Мон бичасько музъем вылэ..." = "Ma korjan maha kukkunud..." ; "Нош ик ӵукна йыггетэ ни трамвай..." = "Ja jälle tramm see kolksub koidu eel..." ; "Вожо дыр вакытэ..." = Jaanipäeval ära sa... : кылбуръёс // Kuum ӧӧ : suome-ugri ranvaste tanapaeva luulet. – Tallinn, 2006. – С. 452–457. – На удмурт. и эст. яз.

Наблюдение : стихотворение // Увинская газета. – 2011. – 26 апр. – С. 3. – (Литературная страница).

Осенняя грусть : стихотворение // Увинская газета. – 2010. – 8 окт. – С. 4. – (Поэтической строкой).

"Утро, день, вечер, ночь..." ; "У Вселенной..." : стихи // Увинская газета. – 2005. – 20 дек. – С. 3.

Татчы 2005-тӥ арысен потэм чеберлыко статьяос гинэ пыртэмын, кылемъёсыныз тодматскыны быгатӥськоды Удмурт Элькунысь йӧскалык библиотекалэн электрон каталогъёсызъя.

Уже кутэм литература[править]

  1. 1,0 1,1 1,2 Хайдаров Р. Елена Виноградова (1967) // Писатели и литературоведы Удмуртии : биобиблиогр. справ. / сост. А. Н. Уваров. – Ижевск, 2006. – С. 139–140.
  2. 2,0 2,1 2,2 2,3 Федорова Л. Елена Виноградова (1967) // Удмурт нылкышно кылбуретлэн тулкымъёсыз / Л. П. Федорова. – Ижевск, 2007. – С. 333–334.
  3. Христолюбова Л. Виноградова Елена Марковна (27.01.1967) // Удмуртские женщины. ХХ век : биогр. справ. / Л. С. Христолюбова. – Ижевск, 2002. – С. 292–293.
  4. Ромашова Е. Вормиз дас вить устоез // Удмурт дунне. – 2002. – 12 нояб. – С. 1.
  5. Ванюшев В. Куашетон-а, мур пуштрос-а… // Кенеш. – 2003. – № 3. – С. 90–95.