Бадретдинова Люза Геннадьевна

Материал из Воршуда
Версия от 16:19, 20 февраля 2016; Sveta.Bat (обсуждение | вклад)
(разн.) ← Предыдущая | Текущая версия (разн.) | Следующая → (разн.)
Перейти к навигацииПерейти к поиску

Кылбуранын ӧвӧл борддор[править]

Badretdinova Luza.jpg

Люза Бадретдинова - кылбурчи, шаерысьтымы дано журналист, Эстониысь Ӵыжы-выжы калыкъёсъя программалэн литературая премиезлэн лауреатэз, «Сюлэм пужыос», «Мынам сюресэ - сюлэме» кылбур бичетъёслэн авторзы. «Дась лу!» газетын кыдаса, туннэ та шыпыт но йӧно кышномурт ужа «Кизили» журналын. Та нуналъёсы Люза Геннадьевна пусйиз 50 арессэ.

Та гуртын гинэ шунды сиос вешаса келялляло уммез...

- Люза Геннадьевна, гожъяськондэс мытыны кин-мар юрттӥз: бадӟым семьяды - тӥ 5 сузэр-вынъёс пӧлын будэмын, яке шулдыр вордӥськем палъёсты – Башкортостанысь Алтау гуртты?

- Нырысетӥ кылбурме гожтӥ, 5-тӥ классэ ветлыкум. Бурдъясьёс сюризы: гуртысьтымы ӵыдонтэм шулдыр инкуазьмы но яратоно дышетӥсе Фания Байметова. Фания Ильтимировна ӟуч кылъя но литературая урокъёсты нуылӥз. Быгатӥз пушкысьтым гожъяськон мылкыдме сайкатыны. Озьы Башкортостанлы сӥзем чуръёсы кылдӥзы. Соосты школаын линейкаын ваньмыз азьын лыдӟи. Эшшо гуртысьтымы пиналъёс «Дась лу!» газетэз лыдӟыны ярато вал. Соос борды мон но итӥськи. Яратоно нуналъёсы вал вторник но четверг. Соку угось гуртамы «Дась лу!»-эз вуттылӥзы. 5-тӥ классысен ик Ижевске дышетскыны лыктон мылкыды кылдӥз ни.

- Кыӵе семьяын тӥ будӥды?

- Атае Геннадий но анае Таслима вань улонзэс колхозын ужазы. Та вакытэ гуртамы одӥгез гинэ сузэре улэ на. Отӥосыз Удмурт шаере выжы лэзимы. Озьы ке но Алтау палъёсы ялан сюлэмам. Кышеды, Танын шуръёс туж шулдыр интыетӥ визыласа кошко. Али но тодам на эшъёсыным эмъюм турын-куар, эмезь-боры бичаса ветлэммы. Турын-куаръёсмес нимысьтыз адямилы сётӥськом вал. Со милемлы - уксё. Та коньдонэн анаймы школалы дӥсь басьялляз. Песяе, солэн сузэрез, ӵыжы-выжыосмы, ог-огзы доры ветлыса, ортчемзэ вераса, пукыны яратылӥзы...

Семьяямы мон бадӟымез вал. Соин шудыны кошкиськод но кышкаса улӥськод ни: песянай тани-тани утиськыны чортоз. Мон бӧрсьы вордӥськиз Люция. Но 3 аресаз витьымтэ шорысь кулӥз. Туннэ но уг тодӥськы, кыӵе мугъёсын солэн улонэз быриз. Люция шаплы но визьмо вал. 3 аресаз туж вольыт вераськылӥз. Яратылӥз гуртысьтымы Быдӟым оже пыриськем Гильниахмет агаен лабыртыны. Азьло вакытъёсы коркаос ӝужытэсь ӧй вал. Соин Люция укно котыре кариськоз но ветеранэн кема-кема вераськоз вал...

Собере вордӥськиз Марина. Мон сямен ик, йылпумъяз Удмурт кун университетысь филология факультетэз. 4 пинал будэтэ! Марсельмы уно аръёс ӵоже «Ижсталь» заводын ужаз. Али механической заводын тырше. Ангелина но УдГУ-ын тодон-валан люказ, ужа «Ӟечбур!» газетын.

20 ар висмы луиз Артур выныным - вордӥськиз, университетын 1-тӥ курсын дышетскыкум. Артур анай-атаймылэсь удыссэс азьланьтоно кариськиз - Ижысь гурт удысъя академиез бырйиз.

- Тӥ ныло-пиё семьяын будэмын, ялан ужаськоды покчиосын. Соин паймымон: асьтэос одӥг пи гинэ вордӥллямды.

- Зэм, озьы пӧрмиз - бызьытэк, огнам 33 аресам Женяме вайи. Али 10-тӥ классын дышетске. Удмурт ужрадъёсы ветлыны яратэ. Кылбур но калленэн гожъя ни. Театрез, крезьгур дуннеез туж гажа.

Кылъёсты но, тупез кадь, дыши ӵыжаны...

- «Дась лу!» газетын ужам аръёсты сярысь тодады вайиськоды: ӝыт вуыса но, дорамы бертэммы уг поты вал. «Кизилиын» но ужды сюлэмдыя, шӧдске - 1991-тӥ арысен ини отын тыршиськоды.

- Мон шумпотӥсько, «Дась лу!»-ын вань тубатъёсты ортчи шуыса. Корректорысен журналистозь будӥ. Туннэ газет-журнал поттон удыслэсь вань пуштроссэ тодӥсько. Соин редакциысь котькудӥзлэсь ужзэ гажасько - руль бергатӥсь-а со, янгышъёсты тупатъясь-а, дизайнзэ радъясь-а. Тау газетлэн азьвыл редакторезлы Анастасия Гребиналы. Дышетскыкум «Дась лу!»-ын практикаосме ортчылӥ, 5-тӥ курсын отчы ик кыли.

«Кизилиын» ужаны кутскеме дырысен вуоно арын 25 ар тырмоз. Татын но уже сюлэмыя. Кельше школаосы, нылпи садъёсы потаны. Угось адӟиськод тэшкылиослэсь ӝуась синъёссэс. Соослы тунсыко милям журналмы. Котькудӥзлэн мылкыдыз вань сое басьтыны. Но, жаляса верано, тросэз анай-атайёс пиналъёссылэн малпанъёсынызы соглаш уг луо. Удмурт кылэз гажан мылкыдлэсь инъетсэ пичи дыръя ик кылдытоно, дыр. Куд-ог анай-атайёс верало: нылпимес садын ӟучомытӥзы. Но пиналын семьяын анай кылын вераськид ке, удмуртсэ со ноку уз вунэты. Ас вылам тае шӧдӥ. Тёп-тёп удмурт Женяме нуи тып-тып ӟуч садэ. Нырысь-валысь Женя отын ассэ шыпыт возиз. Собере дышиз. Туннэ ӟучен но, удмуртэн но капчиен вераське.

Удмурт кыллэсь кулэлыксэ, шунытсэ валаськод, шаерлэсь палэнэ потыса. Нижний Тагилэ егит гожъяськисьёслэн семинаразы Екатерина Макароваен вуылӥмы. Люкаськемъёс пӧлысь тросэз гожъясько ӟуч кылын. Ми - удмурт сямен. Егитъёс та сярысь тодӥзы но, ёртэмысь ӧз дугдэ: лыдӟе на, лыдӟе милемлы удмурт кылбуръёстэс, макем чебер тӥляд кылды!

- Тодосчиос кылбурандэс ӵошато чильпаськонэн. Чуръёсты пужыос выллем шунытэсь но чебересь пӧрмемын...

- Кылбуранын тужгес секытэз мон понна – нырысетӥ чур. Со вань ке, кылбур капчиен чильпаське. Нырысетӥ чур йырам лыктыку, ручка но бумага ки улам уг луо ке, ӝожомисько. Угось сое тодам вайыны уг быгатӥськы ни. Берло куддыр гожтӥсько ик, но со кылъёслэн жингыртэмзы мукетгес кылӥське.

Азьло аръёсы, зэм, инкуазь бурдъялляз. Али чуръёсы вордӥсько, сюлэмме кыӵе ке учыр чепыльтыку. Тросэз туала кылбуръёсы сӥземын удмуртлыклы, калыкмылы, кылмылы. Нырысетӥ бичетме печатлан азьын кема малпаськи: кулэ-а со, ӧвӧл-а. Собере кылбурчи Людмила Кутянова ӝот-ӝот визьнодаз: кылбуръёслы корка одно ик ӝутоно. Со чуръёсты утись выллем луоз. Коркатэк чуръёс кужымзэс ыштозы. Верамез сю процентлы шонер вылэм. Книгаысь чуръёсты учкыса, чылкак мукет мылкыд кылдэ. Озьы 2006-тӥ арын «Сюлэм пужыос» книгае вордӥськиз.

2008-тӥ арын Эстониын потӥз кыкетӥез сборнике - «Мынам сюресэ - сюлэме». Сое дасяны юрттӥзы эстон писатель Арво Валтон но кылысь кылэ берыкъясь удмурт нылаш Надежда Пчеловодова. Книга 4 кылын пӧрмиз: удмурт, ӟуч, англи но эстон. Чуръёсме ӟуче ачим берыктӥ. Ӵапак соку ик валай: удмурт кылмы макем мур пуштросо вылэм! Тани «Сизьым полэс, тямыс полэс» кылбурме ӟуче берыктӥськод но, соку ик вань чеберез ыше кадь.

- Калыкын шуо: адямилы секыт луыку, со яке вӧсяськыны, яке кылбур гожъяны кутске. Тӥ та веранэн соглаш-а?

- Ӧвӧлгес, дыр. Кылбуран - со творчество. Творчество - со эрик. Нош эрикын тон котьма малпаны, гожъяны, суреданы быгатӥськод. Шуом, ужын, семьяын, калык пӧлын кыӵе ке могӟетъёс-борддоръёс вань: сое карыны уг яра, тае эн вера... Кылбуранын - ӧвӧл. Со эркынак шокчон выллем.

- Кудӥз кылбурды али но пуштэс бугыртыса возе?

- Кыӵе умой - тон вань:

Ӵемтылыкум -

                 ӝутӥськыны,

Висьылыкум -

                  эмъяськыны,

Жадьылыкум -

                  шутэтскыны,

Яратыкум -

               бурдъяськыны.

Кыӵе умой - тон вань:

Анай шӧмо, анай тусо,

Анай сямо кылы.

Та кылбурам возьматыны вырисько, макем яратӥсько удмурт кылме! Вераны тыршисько: со улэп! Соин ик сое нуналмысь нуналэ утёно. Дунне вылын вань калыкъёс кылдӥллям, эсэпсэ валаса. Вань шаплыосыз, вань шыпытъёсыз. Удмуртъёс востэмесь, шуо. Тае мон уродэн уг лыдъяськы. Со асьмелэн аспӧртэмлыкмы. Туж кельше шаермылэсь ортчем сюрессэ эскерыны. Та сярысь трос книга лыдӟисько. Ас поннам малпасько: мынэсьтым гожъяськись ӧй пӧрмысал ке, одно ик этнограф луысал.

- Тросэз кылбуръёсты пӧрмемын кырӟанъёслы. Чуръёсты маинызы меда крезьгурчиосты – Надежда Уткинаез, Пантелей Кузнецовез - бордазы кыско?

- Кык крезьгуръёс - кылбур но гур - ог-огзылы тупало ке, со туж усто. Кылбур озьы кыкетӥзэ вордӥське. Мукет сямен жингыртыны кутске. Калыклы, лыдӟисьлы эшшо но матын луэ.

Яратонэ - Сюрес: сюлэмысен сюлэм дорозь

- Тодӥсько: тӥ туж яратӥськоды сюрес вылэ потаны. Шаермес котыръям сяна, кунгож сьӧры но вуылӥськоды.

- Зэм. Котькуд гужем - сямам пыӵаз ини - емыш бичаны Финляндие ветлӥсько. Туэ но ӧй чида. Отысь фермер дорын узы, эмезь бичай, улэм-вылэменызы тодматски.

Сюрес вылын кыӵе но адямиосын ӧй пумиськылы ни. Поездэн мыныкум, дорам Владимир городысь кышномурт пуксиз. Нылме, пе, консерваторие пыртыны нуисько ай. Кыл бӧрсьы кыл – удмуртъёс вылэ вуимы. Кышномурт но выжызэ вератэк ӧз чида: мынам атае вепс вал, но вепс луэмзэ ялан ватэ, пе, вал... Собере Нижний Новгородысь пияшен тодматскимы: мон, шуэ, фин-угор калыкъёсын тунсыкъяськисько. Дышетскемезъя филолог вылэм.

Туэ тани Финляндие вуылыкум, фин кылбурчиен тодматскимы. Лахти городэ мыныкумы, сюрес вылысен со милемды машинаяз пуктӥз. Эше, Оля Титова, фин кылын вераське бере, юалляськыса тодӥз, выль тодмомы кылбурчиослэн фестивалязы ветлэм. Кылбураме сярысь мынам но вераме потӥз. Кылбур сборникме кузьмай. Алигес тани почта пыр солэсь книгазэ басьтӥ. Отысь кылбуръёсты удмурт кылэ берыктыны курадӟисько али.

- Тӥляд эшшо гань-гань кариськон амалды вань на.

- Куиськыны яратӥсько. Газетады куиськон тӥрлык кулэ шуыса ялон сётӥ вал. Можга палъёсысь кышномурт вашкала станоксэ дэмлаз. Сое Ижысь квартираям вуттӥ. 10 метр пала выж лёгет куи. Ужан вискам паймем вылысьтым но паймылӥ: макем секыт вылэм со уж! Дуръёссэ но, шорзэ но ялан чаклано - медаз лябӟе. Суредэз но пуктоно на - половик чебер мед пӧрмоз. Соин выж лёгетлэсь инъетсэ нырысь рос-прос кылдытоно.

Жаляса верано, али куиськон арберие шальтрамын. Соин кытысь мар шедьтӥсько, солэсь ёзъёссэ выльдӥсько. Йырам пӧзе ини малпан - борддоре ошыны шуныт но чебер ковёр куэме потэ на. Собере ини, оло, дунне вылэ вордӥськоз куинетӥез но книгае.

Вакчи юан - вакчи веран

Ужан нуналды кутске - утялскон бордысен. Редакциямы нырысь тузон ӵушылӥсько, собере гинэ гожъяськон, журналэз радъян борды кутскисько.

Берлозэ лыдӟем книгады - Историяя, кылъя но литературая Удмурт институтэ ветлыкум, син шорам йӧтӥз прибалтийско-финской калыкъёс сярысь книга. Отын ужась эше Ольга Титова кузёезлэсь лушкем сое мыным сётӥз. Макем тунсыко вылэм! Санкт-Петербург городэз ӝутонэ пыриськем фин-угор калыкъёс сярысь гожъямын.

Яратоно кылбурчиды - соос трос. Вошъясько мылкыдыя: я А. Ахматова, я М. Цветаева, я воксё тодмотэм гожъяськись. Но таослэсь книгаоссэс али шедьтыны шуг. Тросаз магазинъёсын вузало нимо-дано адямиослэсь произведениоссэс.

Магазинысь дуно дэрем кельшытӥды - мон сое уг басьты. Угось тодӥсько: сыӵе ик дэремез луэ аслыд вурыны яке керттыны. Магазинъёстӥ ветлӥсько, идеяос утчаса.

Тӥледлы Люза ним сётэм - атаелэн апаез, райцентрысь врачмылэсь адӟем карыса, со кадь ик лякыт, умой адями мед будом шуыса.

Тӥ понна юбилей - со... выль инвисъёсты усьтон вакыт. Туала арын улондэ шулдыргес, тунсыкогес карыны сомында луонлыкъёс вань: дуннеез котыръя, мугордэ куасалля, пӧртэм киужен выр... Дыр гинэ чаляк ортче.

Гуръёслы шедизы чуръёс

Надежда Уткина, кырӟась:

- Люзаен 20 арлэсь кема ог-огмес тодӥськомы ни. Со мынам яратоно кылбурчие. Люзалэн ужъёсыз капчиен бордам бинисько. Сюжетъёсыз, ӵошатонъёсыз, гожъяськон амалэз - аспӧртэмлыко. Люза камсьӧр удмуртъёс, язычникъёс пӧлын будэмын, оло, соин кылбуръёсыз усто пӧрмо.

Мынам но солэн малпаськон, шӧдон ӧръёсмы огкадесь. Нырысетӥ кырӟанъёсы - «Сизьым полэс чиданэ», «Ширъясько-поръясько» - кылдӥзы 1992-тӥ арын. «Яратонэ» кырӟанэ визитной карточкалы пӧрмиз. Ӟуч, француз кылъёсы берыктӥ.

Люзалэн кылбуръёсызъя ваньзэ-ӧвӧлзэ 11 кырӟан гожтӥ. Соин, оло, милемлы творческой ӝыт радъяно?

Кузьыли но со, бубыли но со

Ульфат Бадретдинов, «Кизили» журналлэн валтӥсь редакторез:

- Кылбурчиос - аспӧртэм адямиос. Люза огпол сайкам 9 часын ӵукна. Уже бере кылисько ини шуыса, тыпыр-тапыр дӥсяськем но троллейбус остановкае потэм. Сылэ-сылэ - троллейбус уг вуы. Ульчаетӥ ветлӥсьёс но уг адско. Азяз такси дугдэм: тӥледлы кытчы? Люза вазем: мон троллейбусэн ик мыно. Воргорон синъёссэ питыръям. Ма, кыӵе троллейбус 2 часын уйин...

Люза «Кизилиын» кема ужа ини. Солэн журналысь вань геройёсын кылыз тупа. Кузьыли кадь шаплы ужа. Бубыли кадь кылбур дуннеетӥ лопыръя. Пиёк кадь командир кариськыны быгатэ, кулэ дыръяз кортӵог но шуккыны пӧрмытоз. Чимали кадь нылпиосын шудыны яратэ - журналысь вань шудонъёсты ачиз дася. Паймоно солэн пӧртэм луыны быгатэмезлы.

Источник:

Бадретдинова, Л. Г. Кылбуранын ӧвӧл борддор / Л. Г. Бадретдинова ; записала О. Корепанова // Удмурт дунне. - 2015. - 18 дек. - С. 10, 15 : фот. - (Тӧр шорын).

За предоставление материала выражаем огромную благодарность редакции газеты "Удмурт дунне"