Антонова Екатерина Леонидовна
Муш мумы[править]
Та нылкышнолэн туж шуныт пальпотӥсь синъёсыз. Вӧзтӥз ортчыку, со пиналэзлэсь но, пересезлэсь но мылкыдзэ юалоз, лӧпкытоз. Со огдыре туж каньыл но туж задор, нош кырӟанъёсыз ваньмызлы матын но валамон. Озьы гожтэ Пичи Пурга ёросысь Бобья-Уча школаысь Андрей Фёдоров аслаз дышетӥсез, Россиысь но Удмуртиысь культура удысысь дано ужась, тодмо арганчи Екатерина Леонидовна Антонова сярысь.
Та чупрес арганчиез шаерамы тодӥсьтэмез, зэм но, ӧвӧл, дыр. Ушъясьёс, ӟеч кыл верасьёс сюро, но Екатерина Леонидовналы таосыз кылъёс туж дуно, малы ке шуоно соосты вера пинал. Арлыдоос - ас ёзъёс, чеберъяськыны быгатозы, нош пинал - уз.
Паймон
Нырысетӥ шумпотонзэ Катя уг тод ни. Со понна туж ӟеч тодэ нырысьсэ вожъяськемзэ. Огпол анаез солы выль дэрем дӥсяз. Атаед, пе, солдатысь вуэм, мын соос доры ( мумиз гожтӥськымтэ вал, соин солдат ас атай корказ пырем). Пичи Кати тачыр бызьыса кошкиз. Ӧс куспы султӥз но утчаське: кытын атай, кыӵе со атай? Адӟиз: ӝӧк сьӧрын сьӧдкысъем чебер воргорон пуке. Ал вылаз кыӵе ке нылашез возе, соиз, куаӵ карыса, маке быдӟа яблокез куртчылэ. Со мынам атае ке, малы со мукет нылашез веша, малы сое яблокен утялтэ - уг вала Кати. Нош воргорон весь со пала учкылэ. Кӧня ке дыр ортчыса ини, пересьёс маскаръяськемзэс шараязы: ми тонэ алдам, пе, Лёня, тӥни тынадэз нылыд - ӧс куспын. Атаез сое ки вылаз кутӥз, но яблок Катилы ӧз сюры ни…
Пичи нылаш туж яратэ вал юон дыръёсты. Соку уго чузъяськылӥз арган куара. Ульчаын шудыкуз но, кытысь ке арган куараез кылэ ке, бызьыса отчы пыре. Гур чузъяськытозь, пыр учкыса сылэ, кызьы бирдыосты зӥбыло. Эх, огпол ке но утчано вал!
Собере Иван агаезлы «Украина» арган басьтӥзы. Куараез!!! Кылзыса-кылзыса кӧт уг тыры. Сое Иван киысьтыз ик ӧз куя кадь. Катя чидатэк витьылӥз ӝытэз. Иван клубе кошке гинэ - нылаш арган борды ӝабырске. Юнме, номырзэ валатэк зӥбылэ, куддыр одӥг-кык нотаос куспазы герӟасько кадь. Анай-атаезлы люкетонтэм вылысь, арганзэ мунчое поттыса кыска. Кӧня ке нунал курадӟемез бере агайзэ дышетыны куриз. Соиз посӥськиз ик, но одӥг гурез дышетӥз. Отӥзэ, пе, ачид выр. Быгатонлык ке сётэмын, ачид дышод, ӧвӧл ке - выронэз но ӧвӧл. Катя кема ӧз курадӟы - дышиз. Арган солы зэмос эш кадь луиз. Одӥг учыр бере солэн нош уммез ышиз. Соку со школае ветлэ ни вал. Кырӟанъя уроке кияз чиль-дол инструментэн пыриз ӝужыт, чебер воргорон. Арган ӧвӧл со, маке мукет - бирдыосыз укыр трос. Валентин Степанович баянэн шудыны кутскиз но, Катя палёмиз. Солэн со вие ик дышетскемез потыны ӧдъяз. Кызьы огдыре сомында бирдыез зӥбылоно меда? - весь малпаськылӥз со. Но дышетӥсезлы вазиськыны возьдаськиз.
Кин луон сярысь Катя малы ке чик ӧз малпаськылы. Анаез доярка вал бере, со но скал кыскыны дасяськиз. 8 классэ йылпумъяса со фермае вамыштӥз. Ужез кельшылӥз. Вылаз ик, нуназезэ скал кыскыны сьӧрло возь вылэ машинаен ветлӥзы. Быдэс сюресэз кырӟало вал. Огпол маке муген скал кыскисьёс доры вуиз ёросысь егитъёсын ужанъя ёзысь Володя Коновалов. «Катя, - шуэ, - куараед укыр чебер, арганэз зол кыскаськод, давай-ко культпросветэ дасяськы. Али Пургалан ӵап дасяськон курсъёс мыно». Ӝыныез курсъёс ортчемын ни вал ке но, Катя мынӥз. Табере экзамен сётон дыр вуиз. Иже ноку поталлямтэ нылаш кызьы мыныны но уг вала. Ӧжыт гинэ мыдлань пала ӧз кошкы, ярам, станциын ужась валэктӥз. Пуке табере нылаш вагонын, кузь йырси пунэтъёсыныз шудыса. Шуак азяз формаен адямиос потӥзы, билетсэ юало. Кыӵе билет, мар билет, кытысь сое басьтоно? - пайме со. Эскерисьёс туж ӧз кесяське, но вуоно станциысен потыны косӥзы. Пото ай, пе, малпаз нылаш. Озьы со, вагонысь вагонэ пегаса, Ижозь вуиз ик. Ярам, вокзалысен пурга эшъёссэ пумитаз, олокызьы городэтӥ ветлысал. Кисыысьтыз кӧня ке копейка шедьтӥз на - улон шулдыр!
Экзаменэ со берлоосыз пӧлын пыриз. Ӝӧк сьӧрын пукисьёс юало: кин тон, кытын документъёсыд?
- Катя Никонова. Документъёс кулэ шуыса, мон ӧй тоды…
Дышетӥсьёс паймыса ог-огзы шоры учкизы ик, но нылмуртэ ӧз уллялэ. Я, пе, лыктӥд бере, кырӟа ни.
Катя кырӟаны ӧдъяз но куараезлэсь ачиз кышказ. Буш залын со туж кужмо шуккиське вылэм. Кырӟанзэ пумозяз кылзӥзы. Бӧрысь ивортӥзы: дас пургаос пӧлысь училищее кутэмын Катя Никонова гинэ.
Дышетскыны со туж ӧз курадӟы. Сольфеджио шат нырысь-валысь шуген сётскылӥз. Но туж-туж мӧзмылӥз гуртэзлэсь. Огпол ӟуч кылъя урокын анай сярысь сочинение гожтыны косӥзы. Кисьтӥз ке кисьтӥз нылмурт отчы мылкыдзэ. Тетрадьёссэс берыктэмзы бере усьтӥз но - отметка борды удмурт сямен гожтэмын: «Эн мӧзмы». Катя туж паймиз но шумпотӥз: ӟуч кылъя дышетӥсьсы, Анна Яковлевна Евсеева (али Удмурт театрысь литературая люкетэн кивалтэ) удмурт вылэм. Сюлэмаз гань-гань луиз, мӧзмонэз но зӥбломиз кадь.
Огпол училищеысь хоровой отделениын кырӟанъя кыӵе ке конкурс ялӥзы. Катя дышетскиз оркестровой люкетын. Кӧня ке эшъёссэ люкаса, со оргкомитетэ мынӥз: милям но кырӟаммы потэ. Уг, шуо, уг яра. Нылъёс уг кошко. Мырдэм но кызьы конкурсэ пыриськыны лэзизы.
Катя валаз: соос усто кырӟазы. Но сётӥзы кыкетӥ инты. Берло ини одӥгез дышетӥсь вераз: озьы кулэ вал… Нылъёс соку нырысьсэ валазы, мар со вожвылъяськон.
…Распределение азьын эшъёсыз тапыр! бызьылӥзы, Ижысь тодмо ансамбльёсы кельтыны курыса. Катя ини кемалась гуртэ бертон сярысь малпаське. Но комиссилэн кивалтӥсез Аркадий Фёдорович Завойских (со вакытэ культурая министр) шуак шуэ:
- Мынод Удмурт театре, Нина Бакишевалы кыкетӥ куара луод.
- Уг, бертэме потэ! - пумит кылзэ вераны дӥсьтӥз нылмурт.
- Соку Челябинскысь культурая институтэ келялом.
- Уг мыны!
Кӧня пыкылӥз сое Аркадий Фёдорович ваменэс луэмысьтыз, Катя аслэсьтыз кариз - Улын Юрияз берытскиз.
Нырысетӥ вормон
18 аресъем нылашез юнмато клубе, худруке. Мар бордысен кутсконо? Калык бен клубе пота, но егитъёс кир-пазь луо, кӧня ке эктэмъясько но, сема кӧм сяласа, доразы кошко. Кызьы соосты огинэ кароно, творчество борды кысконо? Луоз ик-а коллектив кылдытыны, концерт дасяны? Оло, нырысь агитбригада гинэ кылдытыса эскероно, училищеын та ласянь трос визь-нод сётӥзы.
Екатерина Леонидовна, кӧня ке мыло-кыдо егитъёсты огинэ люкаса, баян поттэ… Озьы вакчи дыр ӵоже соос пичияк концерт дасязы, гуртъёстӥ, фермаостӥ, бусыостӥ ортчизы.
Тодмооссэс сцена вылысь адӟыса, огез бӧрсьы мукетыз лыкто, коллективе курисько. Агитбригадаез вожмаськыса ӧтчаны ӧдъяло ёросысь мукет гуртъёс, синйылто республикаын. Озьы 1973-тӥ арын «Чипчирган» агитбригадаез келяло Казане зоная ӵошатсконъёсы. Улын Юриысь артистъёс отын 17 коллектив пӧлысь устоосыз луизы, Россиысь конкурслэн лауреатъёсыз ним басьтӥзы.
Катялэн мылкыдыз уката лӧптӥз, табере ужа но ужа. Но Антонова клубын ужаменыз ӵош быдэсъяз на комсомол огазеяськонлэн секретарезлэсь ужзэ но. Гуртысь гуртэ со вал вылын ветлӥз. Огпол сюрес вылысен, пумитазы лыктӥсь тракторлэсь кышкатскыса, валэз нылмуртэ пешкытыса кельтӥз. Музъем вылысь Катя мырдэм султӥз. Озьы чебер малпанъёссэ шуак зӥбиз висён - тыбырыз чидантэм ӵогъялляз, баянэз возьыны пумен секыт но секыт йӧтылӥз. Репетициос бере вӧсезлы чидатэк бӧрдылӥз. Врачъёс ӵектӥзы ужзэ воштыны. Катя куректӥз ке но, кызь арескын ӧлексы кылемез ӧз поты, вуриськон цехе ужаны кошкиз.
Сюрлызэ эмъяз кадь, но интыяз сюлэм висён шедьтӥз: одӥг нунал но ӧз ортчылы, клубзэ, эшъёссэ, баянзэ малпатэк. Ӵап озьы сэрекъяса улыкуз, со доры «курась» пыриз - Бобья-Учалась колхоз тӧро клубазы чеберлыкъя кивалтӥсь утчаса ветлэ вылэм. Со нуналэ Катялы нош бурдъёс кылдӥзы кадь. Бобья-Учалан ужзэ со азьвыл манеръя ик мытӥз - агитбригада кылдытыны малпаз. Катяез мурт ӧз каре, нырысь ӝытаз ик куать мурт гожтӥськиз. Огзылэсь-огзы адӟыса, бригадае трос калык люкаськиз. Вожмаськыса гожтӥськылӥзы армиысь бертэм пиос но. Ужзэ радъяса, егит специалист нош конкурсэ пыриськыны малпаз. Но ачиз туж шугъяськиз: кык пол удалтылэ шат? Ӧм ке ворме, эшъёсы юнме танякеме вайид уз шуэ-а? Но маке но оскон сётылӥз. Бобья-Учалась Екатерина Никоновалэн агитбригадаез конкурсын нош ик устоез луиз.
Яратон
…Поезд дурк-дурк нуэ пассажиръёсты Иж пала. Жадем адямиос, простыньёсын шобырскыса, чус кӧло. Станциосын ӝуась пичи тылъёс гинэ югдытъяло соослэсь ымныръёссэс. Катя паймыса учке: кызьы соослэн кӧлэмзы потэ? Со али дунне тыр кырӟасал. Со уе кӧлон ӧз лыкты вагонысь эшшо одӥг муртлы. Дӥсьтытэкгес пуксиз со Катялэн пыд азяз. Алигес армиысь бертэм Паримонлэсь шораз шуныт учкылэмзэ Катя азьлогес ик шӧдӥз ни вал, но нылмурт ачиз кылпум уз потты ук.
Ӝоген Катя Никонова Антонова луиз, кузпалыз шоры туж небыт, Пари шуыса вазьылӥз.
Бӧрсьысь бӧрсе куинь ныл вордӥзы. Одӥгзэ, Ниназэ, Екатерина Леонидовна аслаз вордскем нуналаз но часаз вордӥз. Нылпиос но кышномуртлы ужаны ӧз люкетылэ. Со вакытэ Бобья-Учалан фольклор коллектив но кылдытӥзы ни. Республикалэн юбилеез азьын егит специалист малпаз фольклоръя бадӟым праздник ортчытыны. Сельсоветэ пырись вань гуртъёсты, колхозысь вань огазеяськонъёсты огинэ люказ - 120-130 мурт люкаськиз! Вераны капчи кадь, нош мын ай утча сомында муртэ огазеяны. Тани со хорез азе султэ, йырзэ сэзъялтэ, бамзэ кыскыса, «и..!» шуэ но - нырысетӥ чураз ик кин ке паллянэ коже, кин ке кылъёссэ вунэтэ. Екатерина Леонидовна пайме: кызьы-озьы «Дано лу, партиез» гинэ но уд тоды? Бӧрысь ваньмыз вӧй вылтӥ кадь кошкиз. Табере мар ке но выльзэ кулэ.
Ӵап со вие клубысь режиссёр Николай Леонтьев выль спектакль борды басьтӥськиз. «Аннок кулэ», - вазиськиз со Катялы. «Уг быгаты!» - куалектӥз Катя. Нош аслаз сюлэмыз шумпотэмен юнгес жугиськыны ӧдъяз - солэн кемалась потэ ни драмаын шудэмез. Оло, кылзӥськоно ик министрлэсь... Но жаляны бер, иське, татын, самодеятельной сцена вылын лулысь-сюлмысь шудоно. Ӝоген калык Катя шоры Аннок шуыса вазиськыны ӧдъяз - спектакльын шудэм ролез укыр кельшем.
Улэ но улэ ни вал озьы Антонова, нылпиоссэ будэтыса, ужезлы шумпотыса, но огпол ки улаз кыӵе ке журнал сюриз. Отын гожтэмын: адями 30 аресказ пуксетске ке, ноку уг азинскы ни, пе.. Катялы ӵап 30 арес. Тазьы пукыны уг яра. Оло, дышетсконо? Вазиськиз ёрос администрацие. Соосыз культурая министерствоен вераськизы, юалляськизы. Катялы ӝоген ивор вуиз: дасяськы Пермьысь культурая институтэ.
Аресъем нылзэ кельтыса, Катя кошке. Училище бере 12 ар ортчемын, быгато-а - шугъяськиз со. Быгатӥз. Дораз туж шумпотыса бертӥз. Вуиз но - эшшо одӥг ӟеч ивор - Екатерина Антоновалы сётӥллям Россиысь культура удысысь дано ужась ним.
Араз кык пол Катя сессие ветлӥз, азьло сямен ик клубын ужаз. Огпол нуназеян вакыт син шораз йӧтӥз диван урдсын сылӥсь арган. Осто, шудыны быгатӥсько на меда? - кияз кутӥз со вашкала тодмозэ. Огпол-кык пол кыскиз - тодмо гур потӥз. Кышномурт, ачиз но шӧдылытэк, шудыны ӧдъяз. Часта улыса, клубе кытысь-мар кышномуртъёс пыризы.
- Сиськыны мыныкумы шудэмдэ кылӥм. Дышеты милемды но, Катюш.
- Ма, мон ачим но йӧназ уг быгатӥськы.
- Кызьы быгатӥськод.
Ӵуказеяз мукетъёсыз вуизы:
- Катяпай, милям но шудэммы потэ…
«Ма, тазьы маке но туж тунсыко пӧрмоно кадь ук», - чилектӥз солэн йыраз.
- Ну-ка, нылъёс, ӵуказе ваньды ӵош лыктэ ай, сьӧрады эшшо мылкыд карисьёсты вае.
Лыктӥзы, кин чуланысь, кин корка сигысь арганъёссэс поттыса. Песяйёс но вуиллям: «Ой, Катюш, кытын тон вал ми пинал дыръя… Кенме ке но гожты, арган басьтом», - куризы соос.
- Муш мумы тон, косытэк-ӧтьытэк но калыкез бордад кыскыны быгатӥськод, - кенэзлэсь ужзэ ушъяса шуиз огпол Париезлэн нэнэез. Катялэн сюлмыз нясь-нясь луиз - эктыса-кырӟаса ветлӥсь кенъёсты тросэз-а валалоз-дунъялоз?
Тӥни со вал туала «Арганчи» калык ансамбльлэн кылдэмез. Нырысь дасо пала люкаськизы, собере - кызьлэсь трос. Нылкышно арганчиослэн данзы калыке туж ӝог вӧлмиз - соосты вожмаськыса ӧтчаны ӧдъязы Иже, собере сюрес усьтӥськиз Москвае но кунгож сьӧры. Но кытын гинэ соос медаз луэ: Финляндиын-а, Москваысь Чайковский нимо залын-а, Удмурт филармонилэн сцена вылаз-а, бускель колхозын-а - котькытын вань сюлэмзэс поныса шудо-кырӟало, учкисьёсты-дунъясьёсты уг висъяло.
Огпол адӟыны кылдӥз: «Арганчиос» вуон азьын огаз гурт клубын ужасьёс тачыр бызьыло, микрофонъёс пуктылыса. Но Екатерина Леонидовна сцена вылэ потӥз но калыкен ӟечъяськемезлэсь азьло микрофонэз палэнтӥз - ми, пе, таӵе силёосын ум выриське, кырӟано ке кырӟано, нош соин куаратэмъёс мед дауртозы.
Жинграк кисьтӥсько удмурт гуръёс, шаплы-шаплы кыскало арганэз нылкышно киос. Сьӧрло потакузы, нуналаз быдэн куинь концерт но сёто арганчиос.
- Чиньыосты уг висё на-а? - юай мон огез концерт бере Екатерина Леонидовналэсь.
Юанлы пумит со киоссэ возьматӥз. Чиньыосыз вирӟектытозь нярӟемын. Геннадий Заволокин удмурт нылкышно арганчиосты нырысьсэ адӟемез бере кема вазьылыны ӧвӧл быгатэм. Собере юам ик: «Зэм-а ваньды шудӥськоды?» Котькудӥзлэсь шудэмзэ нимысьтыз кылзэм. «Играй, гармонь!» передачае сюрон бобья-учаос понна бадӟым дан вал. Ӝоген Геннадий Заволокин бырыны сюриз. Сое буре ваён концертэ бобья-учаосты Настя Заволокина нимысьтыз ӧтиз: тӥ, пе, атаелэн яратоно арганчиосыз вал. Таӵезэ быдэс дуннеысь уд шедьты, шуылэм со. Но Пургала вуыса вылысь артистъёслы Иже мыныны автобус ӧз сюры. Луылэ озьы но - «Арганчиосыз» кыӵе ке фестивале-конкурсэ ӧтён ёрос администрацие вуэ, нош отысь уг иворто…
- Нылъёстэс-арганчиостэс пичиысен дышетӥськоды-будэтӥськоды, нош соос бызьыса сьӧрло кошко. Ужды жаль ӧвӧл-а?
- Ансамбльысьтым 17-ез арганчие бызьыса кошкиз ни, но уг жаляськы, соос асьсэлэсь быгатонлыксэс уг аналто, одӥгез тани Пургалан коллектив кылдытӥз ни. Интыязы вуо пиналъёс. «Покчи арганчи» фольклор коллективмы - «Пурга кизилиос» объединенилэн филиалэз - гуртамы 12 арзэ ужа ни. Пиналъёсыным вуылӥмы ни Венгриысь Балатон ты дуре, Эстоние. Калыке потаса, соослэн мылкыдзы уката лӧптэ, культуралы, искусстволы тунсыксы будэ. Оскисько: соос будыса мынэсьтым но усто пӧрмытозы.
Мӧзмон
- 1995-тӥ арын улын юриос гуртсылы сӥзем бадӟым праздник ортчытӥзы. Отчы вань гуртооссэс ӧтизы. Екатерина Антонова кема йырзэ тӥяз: мар кузьмано. Оло, кырӟан малпано? Кутскиз журналъёсты бугыръяны. Син шораз йӧтӥз Л. Тихоновалэн гуртэзлы сӥзем кылбурез. Гур ӝог пӧрмиз. Катяпай бурдъяськиз. Бӧрсязгес ик кылдӥз Любалэн ик кылъёсызъя «Удмурт нылкышно» кырӟан. Со ӝоген быдэс шаерамы вӧлмиз, вань удмурт нылкышноослэн гимнзылы пӧрмиз. Со сяна, Е. Антонова эшшо 16 кырӟан гожтӥз на, кудзэ ке - кылбурчиослэн кылъёссыя, кудзэ ке ачиз малпаз. Аслыз туж кельше «Одӥг уйдэ лушкало» кырӟанэз - кузпалъёс Серебренниковъёс сое туж чебер быдэсто. Нош уйин сюлэмыз зӥбиськыку, ум лыктытэк кылльыкуз, со кырӟа ӟардӥсь ӵукналэн льӧль бамъёсты чупамез сярысь (кылъёсыз О. Ведровалэн). Нылъёсыз кемалась будӥзы ни, асьсэлэсь семьяоссэс кылдытӥзы. Катяпай табере сизьым полэс песянай ни. Но сыӵе шудлы со Паримонэзтэк шумпотэ - 8 ар талэсь азьло, туж секыт висемез бере, кельтӥз сое яратоно картэз. Екатерина Леонидовналы 45 арес вал ай. Со бере со 21 пол бызьыны быгатысал ни - сомында курасьёсыз вал.
Дыр бурмытэ, шуо. Ӧйтӧд. Татчыозь сюлэм буйганы кулэ ни кадь. Но со азьвыл сямен ик кужекъя. Кышномурт куддыр 2-3 часын уйин но султэ но арганзэ кыске. Кык-куинь гур шудыса, зӥбет ӧжыт лэзе.
- Улонэ тон мынам - арганэ, - яратоно муртсэ музэн ӟыгыртэ сое Катяпай.
Тубатъёс:
1973-тӥ ар - Россиысь агитбригадаос куспын ӵошатсконын Пичи Пурга ёросысь «Чипчирган» басьтэ -тӥ инты. Казань.
1973-тӥ ар - Е. Антонова нимамын Пичи Пурга ёросысь культура удысысь тужгес усто ужасен.
1977-тӥ ар - Россиысь агитбригадаос куспын ӵошатсконын Пичи Пурга ёросысь «Ӝужась шунды» лауреат луэ. Казань.
1977-тӥ ар - Е. Антоновалэн фольклор коллективез пыриське Удмурт литературая но искусствоя нуналъёсы. Москва.
1983-тӥ ар - РСФСР-ысь культура удысысь дано ужась.
1985-тӥ ар - кылдытэ Антоновъёслэсь семья ансамбльзэс.
1988-тӥ ар - дышетскыны пыре Пермьысь культурая институтэ.
1988-тӥ ар - пусъемын СССР-ысь Культурая министерстволэн «За отличную работу» пусэныз.
1991-тӥ ар - кылдэ «Арганчи» ансамбль.
1994-тӥ ар - ансамбль Уралысь улосвыл фестивальын 1 степенё диплом басьтэ.
1996-тӥ ар - «Арганчи» басьтэ калык ансамбль ним.
1997-тӥ ар - «Арганчи» ансамбль концерт сётэ Кун Думаын. Москва; Е. Антоноваез пырто шаерысьтымы Данъян пул вылэ.
1999-тӥ ар - Финн-угор калыкъёслэн калыккуспо фестивалязы фольклор коллективъёс пӧлын 1-тӥ инты басьтэ. Финляндия, Ряяккуля.
2002-тӥ ар - Финляндиын но Эстониын концертъёс.
2004-тӥ ар - Е. Антоновалэн «Покчи арганчи» ансамбле VIII калыккуспо нылпи фестивальын 2-тӥ инты басьтэ. Венгрия.
2005-тӥ ар - «Арганчи» пыриське финн-угор калыкъёслэн фестивалязы. Эстония.
Источник:
Антонова Е. Л. Муш мумы / Е. Л. Антонова ; записала З. Рябинина // Удмурт дунне. - 2007. - 1 июня. - С. 6, 11. - (Удмурт кизилиос).
За предоставление материала выражаем огромную благодарность редакции газеты "Удмурт дунне"
