Антонов Сергей Анатольевич
Аслам кӧкыям
Сергей Антонов ас вылаз эскериз дышетӥсьлэсь, гожъяськисьлэсь, ужрадъёсты нуисьлэсь, военнойлэсь удысъёссэс. Артистлэн, мунёен шудӥсьлэн, ужез борды басьтӥськыса гинэ, со ас кӧкыяз шедиз кадь.
Мунё театре кемалась ӧз вуы ке но, быдэстӥз ни 25-лэсь ятыр рольёсты. Труппаеныз но, ас понназ но вормисе потылӥз уно фестивальёсын-конкурсъёсын. Сергей Антонов ассэ эскере на драматург ласянь но. Театрын туэ сӥзьыл пуктэмын луоз «Академия смеха» спектаклез.
- Али ке но син азям «Инвожо» журналысь туспуктэмед но яратонлы сӥзем веросэд. Малпай соку: та егит пияшлэсь кужмо гожъяськись пӧрмоз. Кытысен кылдӥз культура, литература борды кыстӥськонэд?
- Малпасько, та мылкыдлы инъет луизы пичи дырысь учыръёс но, арысь аре люкаськись тодон-валан но, пӧртэм адямиосын тодматсконъёс-пумиськонъёс но.
Вордски мон Можга ёросысь Удмурт Пычас вӧзысь пичи гуртын - Мельниковоын. Атае Анатолий Васильевич школалэн директорез но, физрук но луыса тыршиз, анае Александра Николаевна нылпи садын ужаз, покчи классъёсты дышетӥз. Мыным 3 арес тырмыку, соос Бадӟымсурд гуртэ сюанэ вуылӥллям. Туж кельшем соослы отын. Та гуртысь школаын ӵапак дышетӥсьёслы кулэясько вылэм. Пиналъёссэс - монэ но кык апайёсме - кутыса, отчы улыны выжиллям.
Али ке но тодам кылиз анаен ӵош нылпи садэ вамышъяме. Котырам - удмурт кылын ӟабыльтӥсь пиос но нылъёс. Нош мон ӟуч сямен гинэ вераськыны быгатӥсько. Апайёсме но, монэ но анае нырысь ӟуч кыллы дышетӥз, милемын ӟуч сямен гинэ вераськылӥз. Выжыезъя ачиз ӟучо-удмурто вал ке но, школаын солы секытэн сётскиллям ӟуч кыл но литература. Соку ик йыраз малпан пыӵам: пиналъёсме мон нырысь ӟучезлы дышето. Анаелэн таӵе кичӧлтонэзлы луыса оло нош лыдӟиськыны яратэменым ӟуч кылъя но литературая урокъёс мон понна тужгес но тунсыко потылӥзы. Та ик творчество дуннее кыстӥськонэ луиз, лэся.
Жаляса верано, секыт висемез бере улонысь кошкиз атае. Мыным соку 6 арес вал. Атайтэк кыльыса, сьӧраз медам ортчы шуыса, анае дисциплина борды зол басьтӥськиз. Валтӥсь интые потӥз тодон-валан люкан. Ма, анаелэсь мылкыдзэ ӧй куашкатылы, «витьёслы» гинэ дышетскыны тырши. Ваньмон дыръёсы пыриськылӥ школаын но, гуртысь клубамы но ортчись ужрадъёсы.
- Озьыен, сцена улонэн тон пичиысен тодматскемын...
- Бадӟымсурдысь клубен соку кивалтӥз али тодмо артист Геннадий Ганьков. Гурт клубъёсын соку «зарни вакыт» вал, шуыны луоз. Кӧня пӧртэм драмая кружокъёс, пичи театръёс кылдылӥзы, инструментъёслы ёрмонэз ӧй вал. Ужрадъёсы сомында калык люкаськылӥз!
Уг вунэтӥськы ни туж зол паймемме. Клубмылэн сцена вылаз спектакль мынэ. Залэ туйнаськем калык шокчыны уг дӥсьты - сокем сак учке. Зэм но, туж зол шудо артистъёс - кыӵе ке нимо-дано театрысь, дыр, таосыд, малпай. Рос-просгес учки но - воксё абдрай: валтӥсь ролез шудэ колхозысьтымы комбайнёр, мукетыз роль оскемын трактористлы, куинетӥез - скал кыскисьлы. Синъёсылы уг оскиськы, пушкам - культурной шок! Кызьы озьы: артистлы дышетскымтэ, музъем ужен вырись адями такем оскымон шудыны быгатэ?! Тани таӵе малпанъёс ик культура шоры учконме муромытӥзы, мылкыдме бугыртӥзы.
Тодам кылиз на пичи дырысьтым мукетыз учыр. Геннадий Ганьковлэн Светлана кузпалыз крезьгуръя урокъёс нуылӥз. Мон кадь пичиос ваньмы солы синмаськемын вал. Огпол дышетӥмы «Пусть всегда будет солнце» кырӟанэз, сое быдэс хорен быдэстӥськомы. Светлана Викторовна монэ гинэ мед синйылтоз шуыса, ну, кужмо куараен кырӟасько ук! Борддоръёс, эсьмаса, дырекъяло кадь. Дышетӥсьмы кизэ ӝутӥз, кырӟаммес дугдытӥз но пальпотыса шуэ: Антонов сяна, кырӟаськом ваньмы. Таиз учыр но улонам бадӟым урок луиз.
- Мон тодэмъя, тон «Ӟечбур!» газетлэн Данъян книгаяз но пыртэмын. Кин валтӥз тонэ гожъяськон дуннее?
Мылкыдме бурдъяз дышетӥсе Нина Фёдоровна Кутасова. Со нуиз егит гожъяськисьёслэсь кружоксэс. Сереме потэ, нырысетӥ кылбурме тодам вайисько ке:
Урокын пичи Коли
Чик уг кылзӥськы али,
Соин ӵемысь
«кык» басьтэ,
Мемизэ куректытэ.
Чыры-пыры гожъямъёсы нырысь печатласькизы ёросамы потӥсь «Можга иворъёс» газетын. Бӧрысь кутскизы синмаськонъёс-яратонъёс. Вылаз ик, ӵапак со вакытэ шуд усиз «Шундыкар» лагерьын шутэтскыны но визь-нод люканы. Тодматски удмурт егитъёсын-азьветлӥсьёсын: А. Эркишевен, Т. Ишматоваен, Д. Корепановен но трос мукетъёсыныз. Соосын эшъяськыса, творчество дуннее эшшо но зол выйи кадь. Яратонлы сӥзем веросъёс гожъяны кутски. Нырысь - ӝыны бам мында гинэ, бӧрысь - тросгес но тросгес. Малпай соку: гожъяло со сярысь гинэ, мае ас вылам шӧдӥ, мае сюлэмы пыр поттӥ. Озьы кылдӥз Марина нылашлы сӥзем кузь веросэ: «Ӟечбурын!» со вить номерын потӥз. Нош та нылашен адским но вераським, дыр, нунал ӵоже гинэ - волейболъя ёрос ӵошатсконын. Веросэлэн сюжетэз туж огшоры вал: валтӥсь геройлэн выпускной ӝытэз, нош яратоно нылашез бускель гуртын улэ. Со солэсь туж мӧзме. Быдэс классэныз ӟардонэз пумитам интые, пияш мотоциклаз пуксе но, тӧлэн вожмаськыса кадь, нылашез доры ширтэ. Лыдӟисьёслэсь сюлэмзэс бугыртӥ, лэся: мыным гожтэтъёс вуылыны ӧдъязы.
Бӧрысь ас бордаз кыскиз «Инвожо» журнал. Лыдӟисьёсыз но бадӟымесьгес ни - ачим но будӥсько ук, гонорар но ятыргес тыро. Ӵапак соку асме эскери инсценировкаос-пьесаос гожъян ласянь.
- Таиз удыс кылбуръёслэсь-веросъёслэсь тунсыкогес, иське, потӥз?
- Веросэз гожтыку, туж трос дыр быре ӵошатонлы, описанилы. Куд-ог дыръя кыӵе ке тупась кылэз шедьтон понна йырез сомында тӥяно луэ. Пьесаосын кызьы: геройёслэсь вераськемзэс диалоген сётӥськод но - тӥни.
Дыр ортчемъя ӧй ик вала та жанрлэсь сюлмам мургес но мургес пыӵамзэ. Одӥгзэ ужме бордаз али ке но возе культура удысысь дано ужась, режиссёр Василий Ушаков - оло, пе, куке но пуктыны пӧрмытомы...
Режиссёрлы-драматурглы дышетскеме ӧвӧл ке но, кызьы шуо, опыт лыктэ тыршемъя. Али спектакльёслы сценарийёс гожъясько ни, режиссёр синмын чакласа: кызьы сцена вылэ усёз тыл, кызьы асьсэды шӧдозы артистъёс, кытчы пуктӥськоз декорация но трос мукет. Спектакльёслы сюжетъёс лыкто ас понназы. Но соку ик гожтыса уд кельтӥськы ке - всё! Тодад вайид на ке но, мылкыд но, малпанъёс но сокем яркытэсь уг луо ни. Асме дышетӥ ни: бордам котьку мед луоз ручкае.
Тани алигес кылдытӥ тодмо ӟуч кылбурчилы Сергей Есенинлы сӥзем спектакльме. Режиссёрмы лыдӟиз но, шуиз: укыр пеймыт мылкыд кельтэ сценариед. Мои шуи, кызьы кулэ, озьы ик радъялэ. Уг яратӥськы гожтэм ужме выльысь тупатъяны. Ярам, пе: капчи мылкыдъем кылбуръёсыныз кизертом. Мед, пе, луоз сьӧдэз но, тӧдьыез но. Эшшо мон шӧдӥсько: театре туала нылпи лыктэ постановкаез огшоры учкыны - пуксид но учкид. Сюжет, кыӵе ке мораль пумысен солэн йырзэ чик но тӥямез уг поты. Map карод: сыӵе куронъёс туала улонамы. Тае мон адӟисько кык пиосы вылын но. Нош режиссёръёс огымысь шуо: мае сцена вылын пуктӥськомы, со пиналэз нырысь ик малпаськытыны, малы ке дышетыны кулэ. Бен, таиз шонер - озьы луыны кулэ, вылды. Но мукет ласянь, пинал учкисьмес но ыштыны быгатомы ук. Иське, соку басьтӥськоно анай-атайёслэсь психологизэс воштон борды: пиналъёссылы бадӟымгес саклык мед висъялозы, компьютерлэсь, Интернетлэсь мед палэнтозы, малпаськытыны мед дышетозы...
- Шуид вал: апайёсыд азинтӥзы анай-атайдылэсь сюрессэс. Тыныд та удыс сюлэмыдъя ӧз тупа шат?
- Школаез йылпумъяку, йырме чик ӧй тӥя: дышетскыны пыри Можга педучилищеысь начальной классъёслы дышетӥсьёсты дасянъя удмурт группае. Одӥг интые 7-8 мурт куриське вал, со мыным сыӵе бадӟым конкурс потӥз. Мон отчы капчиен шеди.
Зарни вакытэ кутскиз соку. Анайлэн бурд улысьтыз мозмытски бере, созэ но, тазэ но веръяме потӥз. Map шуод: психика юнмамын ӧвӧл ай, сӧриськыны кема шат. Озьы дышетсконэ кытчы ке палэнэ кыльыны кутскиз: «2»-ёс басьяны кутски, «блатной» луэме потӥз. Ӝоген дораз ӧтиз педучилищелэн директорез Николай Пискунов. Со атаеным ӟеч эшъёс вал, чурыт кылзэ вераз: кема, пе, чидаса улӥ ни сьӧраз ортчемдэ, дась ӧвӧл на тон бадӟым улонлы. Озьы мон, педучилищеез куштыса, выльысь берытски Бадӟымсурдысь школаямы - 11-тӥ классэз йылпумъяны.
Педучилищеын эриклэсь шӧмзэ валай ке но, общественной уже пыриськемысь ӧй дугды: радъялляй дискотекаос, КВН-ёс но трос мукет. Веросъёс, пьесаос но гожъямлэсь ӧй палэнскы. Куд-ог дыръя эшъёсын пумиськонысь бер уйин бертӥсько но, комнатаям пырыса уг вуттӥськы, соку ик ручка борды басьтӥськисько, вожомем кадь гожъяськыны кутскисько вал.
Педучилищеын дыръям ай дышетӥсь Татьяна Кибардина ӵектӥз: Можгаысь РДК-ын, пе, люкаськылӥськомы, пьесаосын шудӥськомы - та уже пыриськыны мылкыдыд ӧвӧл-а? Озьы ми дэмен пуктӥмы «Кытын тӥ, пересьёс?» спектакль. Та постановкаенымы пӧртэм ёросъёсы-гуртъёсы вуылӥмы. Асме сцена вылын туж эрико шӧдӥ.
Бен, сцена вылын мунёосын шудон кӧня ке мукетгес. Тон дышиськод мунё (маска) сьӧры пегӟыны. Солы пычатӥськод тупась выросъёс, озьы куара луло луэ кадь, азьпал радэ потэ, нош артист кытчы ке палэнэ кыле кадь. Шӧдӥ ни: сцена вылэ маскатэк-мунётэк потоно луэ ке, нырысь шуак луисько, возьдаськисько.
- Кытчы шонтӥд, школаез йылпумъяса? Шаян мылкыдыд кема кыстӥськиз на?
- Можгаысь РДК-ын кружоке ветлэме, сцена вылын шудэме, 11-тӥ классэз йылпумъятозям, йырысьтым ӧз кошкы ни. Киям шедиз «Кытчы дышетскыны мыноно?». Сое учкылӥсько, малпасько: быръёно сыӵезэ удысэз, кытын медаз луы химияя, биологияя экзамен, мед луоз сочинение, эктыны но кырӟаны быгатэмез мед эскерозы. Та куронъёслы кыӵе уж тупа? Артист!
Можга ёрослэн администрациысьтыз культурая ёзысь специалистъёсын, педучилищеын дышетскыкум ик, кусып тупатӥ вал ни, грамотаосын но уно пол пусйылӥзы. Соослы вазиськи: кытын артистэ дышетскыны луоз меда? Чектӥзы, мын, пе, Удмурт театре ветлы, отын артистъёслы набор ортчытъяло. Отчы вазиськи но, алигес гинэ, пе, быдэс группаез Москвае дышетскыны келямы. Вазиськы ай Мунё театре, оло, соос артистлы кулэясько? Озьы мон шеди та театрысь дано артистлэн Александр Перевозчиковлэн шуныт бурд улаз. Со ик монэ дасяз ни Казаньысь культурая но искусствоосъя кун университетэ пырыны. Монэ со, дырзэ жалятэк, дышетӥз сцена вылын шудонлы. Александр Фёдорович индылӥз: экзамен дыръя комиссилэсь кивалтӥсьсэ висъяськод но со вылэ гинэ ужаськод, солы гинэ кельшыны тыршиськод! Казане дышетскыны одӥг интые 76 мурт куриське вылэм! Нош мон отчы шедемме ик ӧй вала. Басняелэсь ӝынызэ лыдӟыса вуттӥ-а, ӧй-а, комиссилэн кивалтӥсез, Казаньысь мунё театрысь режиссёр Людмила Дьяченко, монэ дугдытӥз: «Больше не приходи». Нош нунал ортчыса, кыкетӥ тур кутске. Йырме ну! тӥясько ук: мар малпаса озьы шуизы - улляса-а яке кыкетӥ туртэк но монэ кутыны дась-а? Эшъёсы экзамен сётӥзы но, дӥсьтытэк пырисько Дьяченко доры. Пумитам вазиз: мон шуи ук, эн ветлы ни, кутэмын ни ук. Та дышетӥсен ӟеч эшъёс луимы, али ке но кусып возиськомы, эшъяськиськомы.
- Капчиен-а сётскиз артистлэн удысэзлы дышетскон?
- Казаньын визь пыриз ини. Котькуд предметэз дунъяса, ваньзэ тодыны турттыса, дышетски. Ма, направление сётыса, мыным оскемзэ вераз ук быдэс театр! Вылаз ик, куинетӥ курсын семья кылдытӥ Пичи Пурга ёросысь Пугачёво каргуртысь Лена нимо нылашен. Ӝоген пимы вордскиз. Дышетскыса ужано луиз. Общежитиысь кошкимы нимаз квартирае. Амалтэк уксё поттоно луиз. Уй клубъёсын диджей но ужрадъёсты нуись луыса тырши. Ӵош дышетсконо эшеным Рафаил Тагировен кылдытӥмы «Чемодан» шоу-театрмес: асьмеос ик пӧртэм тумошо номеръёслы сценарий гожтӥськомы, асьмеос ик сое пуктӥськомы но.
4-тӥ курсын дышетскыкум, монэ ӧтизы Казаньысь мунё театре - «Щелкунчик» постановкаязы пинал пилэн куараез кулэ луэм, мон та рольлы тупай. Озьы трудовой книжкае отын мытэмын. Та сярысь тодэм Мунё театрмылэн кивалтӥсез Олег Никитин. Дышетскон интыям жингыртэм, зол пӧсекъям: ум сётэ пияшмес, ми сое шаермылэн направлениеныз дышетӥмы! Олег ... монэ ӝоггес выжтыны турттӥз ни Ижысь Мунё театре. Озьы 5-тӥ курсын, Казаньысь - Иже, Ижысь Казане ветлыса, дышетски но, ужай но. Кун экзаменъёсты умой сетӥ, диплом басьтӥ.
Но Ижын мон ас пушкамгес выйи кадь: Казаньын кадь уксё ӧй басьты ни, Ижын улон интымы ӧй вал, Пугачёвоысь нуналлы быдэ ветлоно луиз. Эшшо кыкетӥ пимы вордскиз. Кызьы шуо, синъёсы ӝог бездӥзы. Театрысь кошконо кариськи...
Пугачёвоысь воинской часте ужаны интыяськыны ӵектӥсь луиз. Уждунэз но кельшымон, льготаос но ичи ӧвӧл. Озьы мон культураысь военной удысэ выжи. Кыӵе но интыосы командировкае ӧй вуылы, мае но ӧй адӟы. Но Пугачёвоын пуштылонъёс дыръя улон юртмы изъянмиз, ярантэм луиз. Соин ик Иже выль квартиралы сертификат сётӥзы. Выльысь вуи городэ.
- Мунё театр тонэ выльысь бурд улаз кутӥз?
- Выльысь берытскеме пумысен чик уг жаляськы. Та удысэз мон, оло, золгес дунъяны но кутски. Сцена, творчество сяна, мылкыдме бурдъяло пиосы: ачим атайтэк будӥ бере, соослы саклыеме тросгес висъяны тыршисько. Тани алигес камера куризы, олокыӵе но видео дасяло, соосты Интернетэ пуктыло. Бадӟымез артист луон мылкыдзэ шараяз ни... Шӧдӥсько: театрын мон ас кӧкыям. Рольёс кылдо, пьесаос гожъясько, азьланезлы малпанъёсы трос, мылкыды ӟеч - мар кулэ на!
Источник:
За предоставление материала выражаем огромную благодарность редакции газеты "Удмурт дунне"
