Четкарёв Олег

Материал из Воршуда
Перейти к навигацииПерейти к поиску
The printable version is no longer supported and may have rendering errors. Please update your browser bookmarks and please use the default browser print function instead.

Олег Геннадьевич Четкарёв - тодмо удмурт прозаик, Россиысь писательёслэн огазеяськонзылэн ёзчиез, Россиысь журналистъёслэн огазеяськонзылэн ёзчиез, Удмурт Элькунысь лулчеберет удысысь сӥё-дано ужась.

Олег Четкарёв

Улон сюресэз

Олег Четкарёв вордскиз 1953-тӥ арын 11-тӥ толсуре Дэри ёросысь Изгуртын. [1]

Семья кусыпъёссы туж шунытэсь, умоесь вал. Мумиз-дышетӥсь сюлмысьтыз яратӥз книгаосты но кырӟанъёсты. Удмуртъёсыз но, ӟучъёсыз но крезьгуръёс кельшизы солы. Бубиз синмаськымон усто шудылӥз арганэн но скрипкаен. Шофёрын ужаз. Шудтэм учыре шедьыса, со вазь быриз. Валамон ини, мумизлэн-бубизлэн мылкыдъёссы пизылы но юн пыӵазы. [2]

Анаеныз Лидия Степановнаен но бадӟыменыз Петя братэныз

Гольык пыд дырыз ортчиз вордӥськем гуртаз. «Ой, мар но ӧй вал! Война бырем бере но ук сютэм улон вал. Ми, покчиос, дэрем уламы курыт гумы бичаськом, сииськомы. Но кӧтэз со уг тыртыты вал, валамон ини», – тодаз вае О. Четкарёв. Ужаны пичиысен ик дышетӥзы. Мар понна со али но тау каре анай-атаезлы. Сюдӥсьсы-вордӥсьсы бырыны шедемен, Четкрёвъёслэн семьяязы улон секыт луиз. Семьяын куинь нылпиос вал. Озьы со мумизлы юрттыны кутске. Юрттэмез сярысь нырысь тодэ ваёнъёсыз куать-сизьым арес дыръяз ыбес возьмамез. Гурт пумын, кыкнапалаз ик, капка чаклалляз. Гуртлэн одӥг пумысеныз мукетаз бызьылса ветлӥз. Машинаослы капкаез усьтэ вал, но ӟазегъёсты эскере. Ӟазегъёс кескичесь – пась шедьто но сезьыез шырӟылыны вуо. Сое изъянтэм понна бригадирлэсь сюре. Толэзь куспын ужамез понна дас-дас вить манет сётӥзы. Кыӵе шумпотон вал пичи пияшлы аслаз ужаса поттэм коньдонэныз шаровар но пыдкутчан басьтэмез. [3]

Гурт пыртӥ Ижысь Сарапулэ нуись паськыт сюрес ортче. Пичи дырысеныз вожъяськыса учкылӥз со отӥ ширтӥсь машинаосын пукись адямиос шоры. Сюрес сое кытчы ке ӧтьылӥз, чортылӥз. [4]

Удмурт кылэз ньылетӥ классозь гинэ дышетӥз, собере кыл волятонэз но, удмуртлыкез шӧдонэз но кыдаз-будӥз книгаос сьӧрын. Огкутскемен лыдӟылӥз, сюлэм пыртӥз поттылӥз удмурт писательёслэсь произведениоссэс. Тужгес но кельшылӥзы М. Коноваловлэн «Гаянэз», Кедра Митрейлэн «Зурка Вужгуртэз», П. Блиновлэн «Улэм потэез». [5]

Литература удысын Олег Четкарёв лэсьтӥз школаын дышетскыкуз. Кылбуръёс малпаны яратоз вал. Нош урокын сочинение гожтоно ке, одно ик эркын шуоно темаез бырйылӥз. Куд-ог гожъямъёссэ быдэс класс азьын лыдӟылӥзы. «Толэзё уин» сочиненизэ печатлазы районысь «Ленинец» газетын. [2]

Олеглы туж кельшо вал литература но физика. Соин ик, школаез йылпумъяса, со кытчы дышетскыны мыныны ӟудӥз вал. Но соку физикаез яратэмез вормиз. Егит пияш Казане кошке но отысь училищеын связистэ дышетске. Татын со ӵош сюре но Юкаменскын одӥг бригадаын артэ ужа Флор Васильевлэн выныныз Валериен. Соиз тодматэ Олегез агаезлэн книгаосыныз. [2]

Училищеез Олег Четкарёв «витьёсын» гинэ йылпумъяз. Удмурт университетын журналистъёсты дасяны кутскемез тодыса, филология факультетлэн удмурт ёзэтаз дышетскыны пыриз. Татын тодон-валан люкакуз ик, ӵемгес но ӵемгес веросъёс, кылбуръёс гожъяны кутскиз, нош «Дась лу!» газетын практиказэ ортчыкуз, выжыкылъёс но кылдытӥз. [5]

Университетын пияш лул-сюлэмезлы матысь но тодмо ӧре шедиз. Яратыса кылзиз ӟуч но удмурт литературая лекциосты. Солы озьы ик туж кельшизы В. И. Петровскийлэн кивалтоно семинараз чеберлыко произведениосты эскеронъёс. Мылысь-кыдысь пыриськылӥз литературно-творческой кружоклэн ужаз. Дышетскон аръёсаз умой-умой тодматскиз Даниил Яшинлэн, Флор Васильевлэн, Вениамин Ившинлэн кылбуръёсынызы. Озьы ик матысь луизы прозаикъёс Семён Самсонов, Роман Валишин. [2]

1976-тӥ арын, университетэз йылпумъяса, О. Четкарёв «Последние известия» газетлэн редакцияз ужаз, Удмурт радиоын нылпи передачаослэн редакторзы луыса тыршиз. Бӧрысь – Удмурт телевидениысь художественной программаосъя валтӥсь редактор, «Молот» журналысь проза но публицистика отделлэн редакторез, трос аръёс ӵоже Удмуртиысь Писательёслэн огазеяськоназы чеберлыко литератураез эскерись-чаклась луыса ужаз. Тӧролэн воштӥсез но тӧро луыса тыршиз. [6]

Та вакытэ Олег Четкарёв «Кенеш» журналын публицистикая ёзэтлэн редакторез луэ. [1]

Гожъямъёсыз сярысь

Олег Четкарёвлэн нырысетӥ произведениосыз – заметкаосыз но пичиесь веросъёсыз – школаын дышетскыкуз ёросысь газетъёсын печатласькизы. Пинал муртлы со туж бадӟым шумпотон но, данъяськон но вал.

Удмурт лыдӟисьлы Олег Четкарёвлэн нимыз тодмо луиз 1970-тӥ аръёслэн пумазы. Гожъяськон сюрессэ веросъёс бордысен кутскиз, соослэн пуштроссы ӵемысь герӟаськемын вал аслаз авторлэн пичи дырысьтыз тодэ ваёнъёсыныз, гуртын будэм пияшлэн улонэз валаны тыршеменыз. Нош удмурт литературае йыг-йыг, солы гинэ тупась куараен со пыриз ини 1990-тӥ аръёсы, куке кылдытӥз синмаськымон повестьёссэ «Чагыр но дыдык...» (1989), «Кыӵес» (1993) но «Пиртэш толэзь» романзэ (1996).

Финн шаерын пумиськон, 1995

Удмурт критикъёслэн но тодосчиослэн пусъемзыя, Олег Четкарёв трослы выльдӥз но азинтӥз повесть жанрлэсь луонлыкъёссэ. Солэн быгатонлыкез но гожъяськон кужымез тужгес но шараяськиз та жанрын. Туала удмурт повесть кылдытӥсьёс пӧлысь со одӥгез тунсыкоез автор луэ. Сое со ачиз но шӧдэ, тазьы валэктэ: «Одӥг пичи повестьын ик вакыт сярысь но, адями сярысь но трос вераны луэ. Оло, бадӟым жанр борды кутскымтэелэн одӥгез мугез ӵапак та ик луэ». [5]

Удмурт прозаез эскерись тодосчи Т. И. Зайцева гожтэ: «О. Четкарёвлэн произведениосыз удмурт чеберлыко литература понна бадӟым вормон шуыны луоз... Пусйыны кулэ — нырысь ик, О. Четкарёвлэн аслаз темаез. Асьме литератураын вань солы гинэ тупась, соин гинэ туж аспӧртэмлыко ӝутэм ужрад: гурт но город вискы сюрем адямилэн улонэз. Шонергес вераса, гурт но город вискы шедем адямилэсь драмазэ сэрттон-пертчон. Та секыт адӟонэз О. Четкарёв удмурт прозаын ваньмызлэсь мургес усьтӥз, паймымон но аспӧртэм шараяны пӧрмытӥз «курадӟись» адямилэсь вӧсь луэмзэ, солэсь лул висёнзэ котыр бергась дуннеен герӟаны быгатӥз. Ӟуч литература ас вакытаз трос поттӥз таӵе геройёсты, соосты маргинальная личность шуизы.

О. Четкарёв асьме литературае маргинальной адямиез пыртӥз но сое удмурт материал вылын возьматӥз, удмурт адямилэсь таӵе адӟонзэ тунсыко но выль гожъяськон амалъёсты уже кутыса суредаз.

Удмурт лыдӟись понна кема витем но огдыре ик малпамтэ шорысь кузьым луиз О. Четкарёвлэн «Чагыр но дыдык...» повестез». [7] Та произведение писательлэн творчествояз но, огъя удмурт прозаын но выль вамыш луэ. Вылез шӧдӥське сюжет сӧзнэтлэн радъяськемаз но, текст пушкын метафоризация амаллэн вӧлскемаз но, характеръёсты но кылсуредъёсты вашкалаеныз но туннэеныз пӧлэстыса-ӵошатыса суреданын но. Собере темаез ласянь чаклано ке, со, мукет авторъёслэн гожтосъёсынызы ӵошатыса, татын тужгес но «мур гудэмын». Озьы ке но удмурт прозаын (верос удысын) ӵемгес пумиське таӵе мотив: город пушласянь быдтэ адямилыкез, гуртысь потэм егит адями отын азгынме, вирсэртэм, сюлэмтэм луэ. Герой (пиосмурт) вунэтыны кутске дораз кылем анай-атайзэ, ӵыжы-выжыоссэ, удмурт кылзэ (угось ӵемысь солэн кышноез ӟуч), улоназ солэн одӥг малпанэз — тросгес коньдон поттыны но дырзэ шулдыр ортчытыны. Веросын нравственно-психологической конфликт кылдэ.

Олег Четкарёвлэн «Чагыр но дыдыкез...», гурт-город тема вылэ пыкиськыса, паськытатэ но муромытэ инъет луись конфликтлэсь мугъёссэ, пуштроссэ но нимаз адямиен герӟаськем «висёнъёссэ». [5]

Веросъёсаз но повестьёсаз Олег Четкарёв геройёсыныз артын улэ, соослэн куректонзы, шумпотонзы авторлэн сюлэм пыртӥз потто. Куд-огзэ произведениоссэ лыдӟыса секыт мылкыд кылдэ ке но, автор лыдӟисьсэ малпаськыны ӧте, калыкедлэсь, музъемлэсь , мӧйыослы ӟеч сямъёссылэсь люкиськонлэсь алэ, шуг-секытъёсты вормыны дышетэ. Та бордын писательлэн данлыкез. [6] Автор трос ужа кылысь кылэ берыктон бордын. Со удмурт кылэ берыктӥз В. Распутинлэсь, С. Романовскийлэсь, О. Поскрёбышевлэсь, А. Демъяновлэсь но мукет авторъёслэсь произведениоссэс.

Аслаз но произведениосыз берыктэмын ӟуч, коми, пор, чуваш, мадьяр но мукет кылъёсы. [4]

О. Четкарёвлэн утчаськонъёсыз туала удмурт критикаез но литературоведениез выль ужан амалъёс борды басьтӥськыны чорто. [8]

Библиография

Книгаосыз

Выж герӟа ярдуръёсты : повесть. – Ижевск : Удмуртия, 1985. – 120 с.

Йӧ вылэ тэтчон : веросъёс, повесть. – Ижевск : Удмуртия, 1989. – 223 с.

Крещение – грехам отпущение : повести и рассказы. – Ижевск : Удмуртия, 1993. – 255 с.

Мон ворми тонэ тӧл. – Ижевск : Удмуртия, 1982. – 49 c. : ил.

Статьяосыз

Мон ворми тонэ, тӧл! // Азвесь кышетэн толэзь : веросъёс : семьяын лыдӟон книга / люказ но радъяз В. Н. Ившин. – Ижевск, 2007. – С. 114–115.

Сӧнь : верос // На переломе эпох : Союзу писателей Удмуртии 70 лет, 1934–2004 : ст., стихотворения, прозаич. произведения, док. – Ижевск, 2006. – С. 146–148.

Соловьиная ветвь : рассказ / пер. А. Демьянов // Удмурт. правда. – 2006. – 11 окт. – С. 3. – (Литературный клуб).

Утисько яратон юме // Кенеш. – 2011. – № 3. – С. 3–5.


Татчы 2005-тӥ арысен потэм чеберлыко статьяос гинэ пыртэмын, кылемъёсыныз тодматскыны быгатӥськоды Удмурт Элькунысь йӧскалык библиотекалэн электрон каталогъёсызъя.

Уже кутэм литература

  1. 1,0 1,1 Уваров А. Олег Четкарев (1953)// Писатели и литературоведы Удмуртии : биобиблиогр. справ. / сост. А. Н. Уваров. – Ижевск, 2006. – С. 121–122.
  2. 2,0 2,1 2,2 2,3 Богомолова З. Улон тубатлэн лёгетъёсыз // Инвожо. – 1993. – № 4. – С. 3–7.
  3. Сунцова А. Витьтон – улонлы пушъён // Ӟардон. – 2003. – 16 дек. – С. 1, 2.
  4. 4,0 4,1 Олег Четкарёв (1953) // Вордскем кыл. – 2011. – № 3. - С. 36–37.
  5. 5,0 5,1 5,2 5,3 Пантелеева В. Олег Четкарёв (1953) // Удмурт литература : 10–11-тӥ классъёслы учебник / С. Т. Арекеева [и др.]. – Ижевск, 2008. – С. 357-359.
  6. 6,0 6,1 Олег Геннадьевич Четкарёв (1953) // Завьялово ёросысь писательёслэн но поэтъёслэн творчествозы. – Ижевск, 1997. – С. 79–86.
  7. Зайцева Т. О. Четкарёвлэн повестьёсыз сярысь малпанъёс // Движение эпохи – движение литературы : удмуртская литература ХХ века : учеб. пособие. – Ижевск, 2002. – С. 206–218.
  8. Зайцева Т. Олег Четкарёвлэн гожъяськон амалъёсыз пумысен кӧня ке малпанъёс // Первой удмуртской грамматике 225 лет : сб. ст. – Ижевск, 2002. – С.138–141.