Чернова Людмила

Материал из Воршуда
Версия от 11:23, 9 февраля 2015; Admin (обсуждение | вклад) (1 версия импортирована)
(разн.) ← Предыдущая | Текущая версия (разн.) | Следующая → (разн.)
Перейти к навигацииПерейти к поиску

Чернова Людмила Александровна - егит удмурт кылбурчи.

Чернова.jpg

Улон сюресэз[править]

Чернова Людмила Александровна вордӥськиз Пичи Пурга ёросысь Гожня гуртын 1984-тӥ арын 10 тулыспалэ. Школае Люда мынӥз вордскем гуртаз. Пичи классын дышетскыкуз ик ветлӥз шаерез тодонъя, удмурт кылъя но литературая кружокъёсы. [1] 5 – 9 классъёсын дышетскыкуз ик Люда кутскиз ветлыны «Пурга кизилиос» литературной объединение. Татын литературной кружоке ветлӥсь пиналъёсын ужазы прозаик Никвлад Самсонов, Удмурт Элькунысь калык писатель Вячеслав Ар-Серги но мукет удмурт гожъяськисьёс. Гожняысь шор ёзо школаын 9-тӥ классын дышетскыкуз, шаерез тодонъя олимпиадаын вормисе потыса, Люда Можга педколледже экзамен сётытэк пырыны быгатӥз. Татысь со начальной классъёсын дышетӥсь луыса потӥз. [1]

2003-тӥ арын Л. Чернова Удмурт кун университетэ журналистикая факультетэ дышетскыны пыриз. Люда дышетсконэ йырыныз ик зымиз. 2005-тӥ арын солы Германие вуылыны шуд усиз. Нылашлы туж тунсыко вал Европаысь лулчеберетэн тодматскыны но немец кылзэ волятыны. [1]

Нылаш пичи дырысеныз котьмаин тунсыкъяськыса будӥз, кылбуръёс гожъяз бере – «Шундыкар» пыр потытэк ӧз кыльы. Ньылетӥ классэз йылпумъяса, гужем сое нырысьсэ келязы та лагере. Удмурт гожъяськисьёсын, суредаськисьёсын, крезьгурчиосын но мукет тунсыко адямиосын пумиськылонъёс, трос пиналъёсын эшъяськон Людалэн сюлэмаз вунонтэм кылизы. Берло но со «Шундыкарлэн» гужем лагеряз сюрыны тыршылӥз. Можга педучилищеын дышетскыкуз но ай люкиськемез ӧз луы. Нош университетэ пыремез бере, со вожатой луыса отчы вуылӥз ини. [2]

Гужемез гуртын улон, бакча котырын берган, юртъер пушкын юрттӥськон – тазьы шутэтско тросэз студентъёс. Нош Людмила гужемзэ чылкак мукет сямен ортчытӥз. Кык толэзь ӵоже со ужаны вуттӥз куинь лагерьын: «Пурга кизилиын», «Шундыкарын» но «Усточикарын». «Усточикар» - со «Шундыкарлэн» инъетэзъя кылдытэм лагерь. Солэн радъясьёсыз – удмурт егитъёслэн «Шунды» огазеяськонзы но Башкортостанысь пиналъёслэсь ваньмон дырзэс радъясь специалистъёс. [3]

Шӧртчи нылашлэн тэк пукемез уг лу. Пумен со пиналъёслэн «Шунды» огазеяськонзылэн правленияз пыриз. Нош 2008-тӥ арын тулыспал толэзе отчётно-выборной конференциын Людаез «Шундылы» тӧрое бырйизы ини. Трос уж лэсьтэмын кык ар куспын. [2] Дышетсконзэ йылпумъяса, Людмила Индустрии ёрослэн администрацияз культурая, егитъёсын но спорт удысын ӧнерчи луыса ужа.

Гожъямъёсыз сярысь[править]

Нырысетӥ кылбурзэ Люда кыкетӥ классын дышетскыкуз гожтӥз. Со тулыслы сӥземын вал. [4] Покчигес дыръяз ик, Люда одӥг-ог кылбурзэ калык син азе поттылӥз. Мукетъёсызлэсь висъяськылӥз ке, висъяськылӥз жингрес куараеныз, чупрес мылкыдо луэменыз. Никвлад Самсонов верамъя, та пичи гинэ нылаш чырмыт сямыныз, калык азе потыса, гожтэм чуръёссэ эшъёсызлы лыдӟыны быгатэменыз паймытӥз. Нош 1995-тӥ арын Гожня школалэн директорез, Р. П. Герасимова паймытӥз, милям, пе, одӥгез нылашмы быдэс сборник поттымон кылбуръёс гожтӥз ини. Соку ик висъяськыны кутскиз 5-тӥ классын дышетскись Люда Чернова. Нылашлэн аспӧртэмлыко творчествоез котькудӥзлэн син шораз йӧтӥз. Кӧня ке кылбуръёссэ лыдӟемез бере «сборниксэ» печатлан понна куризы, озьы но озьы, Люда, сёт милемлы тетрадьдэ, отысь быръём, печатланы ӵектом. Нылаш чутрак пумит луиз со занятиын тетрадьзэ сётыны, мынам, пе, тетрадьёсы трос ӧвӧл... [5]

Но мукетаз занятиын Люда пумит ӧз кариськы ни тетрадьзэ сётыны. Соку ик тодматскизы «Пурга кизилиос» солэн быдэсак творчествоеныз. Мар веранэз, вал отын тырмымтэос но. Но Никвлад Самсонов шумпотӥз нылашлэн улон шоры сэзь синъёсын учкемез, ас мылкыдзэ ваньмызлы кылымон вераны тыршемез, аслыз гинэ тупась куаразэ утчаны сюлмаськемез. [5]

Книга поттон сярысь Люда Чернова 9-тӥ классын дышетскыкуз тырысь льӧль малпанъёсын улӥз. Соку ик бичетэз печатланы дась вал ини. Но берло веразы: мӧйы гожъяськисьёслэсь но книгаоссэс поттыны та вакытэ туж секыт, пе, возьмано луоз. Нылашлэн мылкыдыз усиз, малпанэз ноку уз быдэсмы кожаз вал ини. Но озьы вылымтэ… 2007-тӥ арын сӥзьыл тодӥз: Москваысь гожъяськисьлы Дмитрий Приговлы сӥзьыса, егит кылбурчиослы вожвылъяськон ялӥське. Вормисьлэсь книгазэ поттозы, пе. [4]

Конкурсэ пыриськыны быгатӥзы 35 аресозь егит кылбурасьёс, потэм сборникъёссы ӧвӧл на ке. Конкурсэ 30-лэсь ятыр ӟуч но удмурт кылбурасьёс пыриськизы. Кужымзэ мертамез потӥз Людалэн но. Гожъямъёссэ ӟуч кылэ берыктыса, конкурсэ пыриськиз. Людалэн гожъямъёсыз дунъясьёслы уката но кельшиллям. Жюри пусйиз: удмурт нылашлэн кылбуръёсыз матын луо Дмитрий Приговлэн гожъян манерезлы. [6] Чернова Людмила вормиз, нырысетӥ интые потӥз. 2008-тӥ арын Людмилалы шуд усиз «Шокче тулыс» нимысьтыз кылбурет бичетсэ печатланы. Нылашлэн шумпотонэзлэн пумыз ӧй вал. Книгаяз аслаз ик кӧня ке суредъёсыз пыремын. [4]

Премиосыз[править]

Дмитрий Пригов нимо «Ошмес» премилэн лауреатэз, 2007

Библиография[править]

Книгаосыз[править]

Шокче тулыс = Дыхание весны : стихотворения. – Ижевск, 2008. – 79 б.

Статьяосыз[править]

Азвесь салам ; Сӧсыр : кылбуръёс // Удмурт дунне. - 2011. - 20 апр. - С. 5. - (Dart : удмурт егитъёслэн газетсы ; № 4).

Другая ; Сладость надежды // Литературная газета. - 2008. - 15-21 окт. - С. 2. - (Современная удмуртская поэзия).

Малпан ; Тонтэк ; Мон кикы кадь ; Толэзьтэм уй : кылбуръёс // Удмурт дунне. - 2006. - 14 февр. - С. 6.

Мон ; Ортчись дыр : кылбуръёс // Удмурт дунне. - 2006. - 21 марта. - С. 7.

Пумиськон ; Из сюлэм ; Уз тодма ни ; Асьмеос но инкуазь : кылбуръёс // Удмурт дунне. - 2007. - 29 мая. - С. 7.

Шу-шу ӝыт // Удмурт дунне. - 2009. - 17 нояб. - С. 5.


Татчы 2005-тӥ арысен потэм чеберлыко статьяос гинэ пыртэмын, кылемъёсыныз тодматскыны быгатӥськоды Удмурт Элькунысь йӧскалык библиотекалэн электрон каталогъёсызъя.

Уже кутэм литература[править]

  1. 1,0 1,1 1,2 Чернова Людмила Александровна : немного о себе // Шокче тулыс / Людмила Чернова. – Ижевск, 2008. – С. 5.
  2. 2,0 2,1 Жигалова Э. В мире солнечных людей // Удмуртская правда. – 2008. – 10 сент. – С. 3.
  3. Корепанова О. Нош ик, пе, ӧтём «Усточикаре» // Удмурт дунне. – 2005. – 30 авг. – С. 8.
  4. 4,0 4,1 4,2 Тронина О. Мылкыдын – лобаны, нош пыдъёсын ветлыны луэ // Ӟечбур! – 2009. – 5 февр. – С. 2.
  5. 5,0 5,1 Самсонов Н. Кылбурчи луо // Инвожо. – 1995. – № 7-8. – С. 27.
  6. Шушакова Н. «Ошмес» - удмурт нылашлы // Удмурт дунне. – 2007. – 9 нояб. – С. 5.