Туганаев Виктор

Материал из Воршуда
Версия от 11:23, 9 февраля 2015; Admin (обсуждение | вклад) (1 версия импортирована)
(разн.) ← Предыдущая | Текущая версия (разн.) | Следующая → (разн.)
Перейти к навигацииПерейти к поиску

Виктор Васильевич Туганаев - пиналъёслы гожъяськись, биология наукаосъя доктор, профессор.

Tuganaev.jpg

Улон сюресэз[править]

Россия Федерациысь но Удмурт Элькунысь наука удысысь дано ужась Виктор Васильевич Туганаев вордӥськиз Алнаш черкогуртын 1941-тӥ арын 28-тӥ феврале. [1]

Витя вордӥськиз война кутскон аре крестьян семьяын. Атаез, Василий Сергеевич Туганаев, пизэ вож нуны дыръяз гинэ адӟыса вуттӥз на, сое фронтэ басьтэмзы берегес ик бырыны шедиз. Анаез ньыль нылпиен кылиз. [2]

Пияш ляб вордскиз. Вылаз ик золотухаен но сьӧдунэн (рахитэн) курадӟиз. Лябезлы паймыса ик, ӵыжы-выжыез ӧз ик оскылэ адями луэмезлы. Куинь аресказ Витя вераськыны сяна, ветлыны но ӧз йӧндыры на. «Но Инмарлэн мон пумысен аслаз малпанэз вылэм, лэся», – вера али Виктор Васильевич. Ог нуналэ Витя быдэс предложение верам сяна, пыд йылаз султыса, вамыш лэсьтӥз но кошкиз азьлань. Котырысьтыз адямиос озьы адӟизы кык паймымон арбериосты, чудо шуонэз. [3]

Тодон-валанъёс Виктор басьтӥз Алнаш шор ёзо школаын. Но школае со шуак ӧз сюры ай. Школае мынон аресыз вуэм бере, ӵем висьылэменыз но мугорыз пичиен, анаез пизэ дораз кельтӥз. Но пияш кема малпаса ӧз улы – укноетӥ потӥз но пегӟиз школае. Дышетӥсь но, Анна Фёдоровна Фёдорова, шораз учкыса, паймемзэ вераз: уд на, пе, быгаты дышетскыны. Пияшлэн нош эшъёсыныз ӵош туж дышетскемез потэ ук. Соку дышетӥсьсы солы, ява, быдэс «экзамен» пыр потоно кариз. Озьы гинэ Витяез школае кутӥзы. [3]

Доразы книгаос чиньыен лыдъямон гинэ вал. Соос но, оло, сюрс пол лыдӟемын. Витя агаеныз ӵош, солэсь чик но бере кыльытэк, алфавитэз дышетӥз, лыдӟиськыны кутскиз. Туж капчиен йыраз кыльылӥзы кылбуръёс. Гажаз арифметикаез, пыр-поч тодӥз лыдпусъёсты уноянъя таблицаез. Виктор Васильевичлэн пинал дыръёссэ тодэ ваёнъёсын бадӟын но тунсыко статья гожтэмын «Удмурт дунне» газетын. [3]

Пичи дырысеныз пияш бакча-сад бордын выриз. Та сямыз анаезлэсь, дыр, выжемын. Анаез турын-куаръёс сярысь умой тодэ вал. Гурт калык но шуылӥз: Васиннялэн киыз будосъёслы мынэ. Туж секыт аръёсы но бакча сион утьылӥз пиналъёссэ сютэм улонлэсь. Куатетӥ классын дышетскыкуз, Витя гербарий люканы кутскиз. Нош 9-тӥ классысен сад будэтыны кутскиз. Трос тыршиз соиз бордын: будосъёс мерттӥз, утялтӥз соосты.

Секыт война вакытэ вордскиз бере, Витя пичи дырысен ик секыт ужез быдэсъяз. Котькуд гужем колхозын тыршиз, бадӟымгес классъёсын дышетскыкуз, Алнашысь кирпич заводын ужаз. [4]

Пичи дыръяз ик Витялы дунне пушкын кыӵе ке но кужым вань кадь потылӥз. 1958-тӥ арын егит пияш сюрес вылэ потӥз. Туж пыремез потэ вал Казаньысь кун университетэ, географ яке биолог луэмез потэ вал. Нош вуиз Ижкаре. Шоркарамы биологлы, но географлы но уг дышето вылэм. Амалтэк Виктор пыриз дышетскыны естествознаниея факультетэ. Тыршемез юнме ӧз луы. 1961-тӥ арын Казаньысь кун университетын ортчиз быдэс Совето Союзысь студентъёслэн наукая ужъёссылы сӥзем конкурс. Отын Викторлэсь ужзэ синйылтӥз профессор М. В. Марков. Со ик юрттӥз Казаньысь университетын заочно дышетскыны пырны. Кык ар куспын вить курслэсь экзаменъёссэ сётӥз. Ӧз кушты пединститутсэ но. [3]

1963-тӥ арын кафедраын ассистент луыса ужаны кутске. Та ик луэ солы дышетӥсь но тодосчи луонэзлы инъет. 1964-тӥ арын В. В. Туганаев Казаньысь кун университетлэн аспирантураяз дышетскыны пыре. Татын дышетсконзэ со йылпумъя 1967-тӥ арын но ботаникая кандидатской диссертацизэ гожтэ. Кандидат луэм бераз сое ас университетаз ужаны кельто – нырысь-валысь ассистент интые, собере – доцентэ.

1974-тӥ арын пыре Ленинградысь кун университетлэн докторантураяз. 1978-тӥ арын диссертацизэ синмаськымон ӟеч утемез бӧрсьы солы ботаникая доктор тодосчи ним сётӥзы. Доктор луэмез бере Виктор Васильевич бертӥз Удмурт кун университетэ. Татын солы сётӥзы профессор ним, кивалтӥз кафедраен, собере биолого-химической факультетэн. Бӧрысь луиз научной ужъёсъя проректор. 1988-тӥ арын Виктор Васильевич нош ик ботаникая но будосъёсъя, экологияя кафедрае ужаны выжиз. [2]

Вань улонзэ Виктор Васильевич наукалы сӥзиз. Котькуд гужем экспедициосы потаз. Удмурт шаерын солэн вуылымтэ интыосыз ик ӧз кыле ни, дыр. Со сяна, дуннеысь сюресъёсты но котыръяз гинэ. Трос выль турын-куар шедьтылӥз но пӧртэм научной ужъёс гожъяз. [5]

В. В. Туганаев печатлаз ини 350-лэсь ятыр научной ужъёс, 20-лэсь трос книгаез. Ваньмыз соос сӥземын будосъёсты эскерон, инкуазез утён но экологияя тодон-валанъёсты узырмытон ужпумъёслы. 2000-тӥ ар понна Виктор Васильевичлы Инкуазез утёнъя комитет «Вож адями» ним но сётӥз вал.

Со туж дӥсьтыса басьтӥськиз трос тодэмез но чакламез кулэ карись "Удмуртская Республика" энциклопедиез кылдытон борды. Туннэ нуналлы со кык изданиен потэмын ини. Та ужзы понна 2001-тӥ арын авторской коллектив данъямын вал Удмурт Элькунысь Государственной премиен. [6] Виктор Васильевич али но эскерон-чаклан ужъёсыз бордын тырше, инкуазьмес утёнлы вань кужымзэ сётэ, пӧртэм амалъёс утча. Умой тодосчи, дышетӥсь но атай луэмзэ со ужрад но возьматэ – Александр пиез атаезлэн сюрестӥз мынӥз, со – биология наукаосъя кандидат. [5]

В. В. Туганаев трос аръёс ӵоже ини быгатыса кивалтэ Алнаш землячествоен. Талантъем адями трос ужез вормыны быгатэ, ваньзэ радызъя ке лэсьтэ. Озьы ик Виктор Васильевич Туганаев но.

Гожъямъёсыз сярысь[править]

Куатетӥ классысен Витя дневник нуыны кутскиз. Ӟуч кылын дышетӥсьсы, Саушкин Владимир Васильевич, дышетӥз та ужлы. Нырысь анай кылын гожъяз созэ. Нош 9-тӥ классысен – ӟучен. Угось валаз, ӟуч кылын гожъяса ӟечгес ӟуч кылэз тодоз шуыса. Школаязы Геннадий Красильников вуылӥз, со туж паймиз: малы, пе, дневниктэ ӟуч кылын нуиськод. Дневник нуон сямзэ Виктор Васильевич али ке но ӧз кушты. Одӥг нуналзэ но гожтыса кельтытэк тырше. Со, пе, организовать каре адямиез. «Куддыръя чик но гожъям уг поты, но гожтоно – дышемын», – вера тодосчи. [4]

Литературной творчествоен Виктор тунсыкъяськыны кутскиз школыан дышетскыкуз ик. Соку со школьной литературной кружокен кивалтӥз. Та кружоклэсь ужамзэ синйылтыса но юрттӥськыса улӥзы элькунысьтымы тодмо гожъяськисьёс – Н. В. Васильев, Г. Д. Красильников, Н. С. Байтеряков, Г. А. Ходырев. Школаязы ӵемысь вуылӥз А. Г. Векшина. Но пиналъёс соку малпаны но ӧз тодылэ – тодмо поэтесса Ашальчи Оки но врач Векшина одӥг адями шуыса. Виктор Туганаев трос лыдӟиськиз, бӧрысьгес тужгес но яратоно писательёсыз луизы А. Чехов но Ф. Достоевский. Удмурт гожъяськисьёс пӧлысь пусйылӥз П. Черновлэсь но Г. Перевощиковлэсь творчествозэс. [1]

В. В. Туганаев аслаз книгаосаз, гожъямъёсаз матын но валамон гожъя биология но экология сярысь. Солэн сочинениосыз воспитательно-просветительской, гуманистической мылкыдъемесь. В. Туганаев ачиз котьку синмаськыса лыдӟылӥз сказовой манеръем фольклор произведениосты. Соин но, дыр, ачиз но автор пиналъёслы гожъякуз олицетворение амалэз ужаз кутэ. Гожъяськись котыр улонысь арбериосты улӟытэ: «Кузьылилэн гинэ но вань сюлмыз, шӧдонэз, нервъёсыз – озьыен, соин но валась макеен сяин выроно». Котьмае яратон, гажан мылкыдыз ик юрттэ солы пиналъёс понна но сыӵе чебересь но улонлы дышетӥсь произведениос кылдытыны. [1]

В. Туганаевлэсь произведениоссэ шумпотыса печатлало «Ӟечбур!», «Удмурт дунне», «Известия Удмуртской Республики» газетъёсын, «Кизили», «Кенеш» журналъёсын но муктъёсаз. Озьы ик «Удмурт кыл нылпи садын» (1992), «Котырысь улон но мон» пиналъёслы гожтэм огъя бичетъёсын. Трос тодос книгаос гожъяса, пумен В. Туганаев шӧдӥз – пиналъёсты ас музъемдэ, ас котырысь улонэз яратыны дышетоно пинал дырысен. 1988-тӥ арын гожъяськисьлэн «Коля тодэ 50 будосэз, нош тон?..» книгаез потӥз.

Писательлы вож буёл кельше. Тани книгаосыз вань: «Зелёные спутники человека», «Встречи с зелёными друзьями», дасямын куинетӥез - «Зелёный храм науки». Солэн ужъёсыз трос гинэ. Нош нылпиослы книгаосызлэн куинезлэн ик нимъёссы герӟаськемын «вож» кылын. Буёлэз гинэ ӧвӧл, кылыз но кельше, удмурт сямен «вож» но, ӟуч сямен «зелёный» но. Автор уг шуы, вож – со кисьмамтэ, еж яке быдэ вуымтэ кадь, вож - со зэмос инкуазь буёл, тужгес умоез но кулэез буёл. Малы ке шуоно, вож пигментъёсын, хлорофиллъёсын кылдытӥсько будосъёс, соосты сие пудо-живот, ваньмыз сямен улэп макеос но адямиос. Асьмеос туж юн герӟаськемын вож буёлэн. [6]

Виктор Васильевич пӧртэм удысъёсъя ужа. Ас удысэзъя сяна, «На пути к духовному возрождению» (2004), «Народные средства выживания и лечения» (2005), «Рассвет над деревней» (2006), «Инопланетянин в нашем городе» (2007) нимо книгаосыз потэмын, но трос мукетъёсыз. 2011-тӥ арын В. Туганаев «Моя Вселенная» книгазэ печатлаз. Татын автор возьматыны тырше ас будэм но улон сюрессэ, аслэсьтыз творческой но наукаын басьтэм вормонъёссэ. Книга гожтэмын ӟуч кылын.

Трос дырзэ но тазалыксэ В. Туганаев сётӥз «Удмуртская Республика» энциклопедия поттонлы. Та книга бордын туж кема ужамын. Солэн авторъёсыз ньыль сюлэсь уно. Энциклопедия кылдытон сярысь малпан лыктӥз со доры ог дас ар талэсь азьло. Утчаз со борды басьтӥськыны мылкыд карисьёсты. Дас кык кузя люкаськизы. Дасязы ужан план-программа. Ветлӥз Москваысь энциклопедияя издательствое, отын ик ас понназ кыӵе ке но школаез ортчиз. Учкылӥз пӧртэм кунъёслэсь энциклопедиоссэс, чаклаз, кызьы ужало азьвыл совето республикаосын. Собере кутскизы ужаны. 2001-тӥ арын потӥз нырысетӥ изданиез. Нош 2008-тӥ арын – будэтъям но тупатъям вариантэз. [5] Тӥни озьы, нуналысь нуналэ В. В. Туганаев лэсьтэ аслэсьтыз ужзэ.

Премиосыз[править]

Удмурт АССР-ысь наука удысысь дано ужась, 1980

Россия Федерациысь наука удысысь дано ужась, 1993

Удмурт Элькунысь Государственной премилэн лауреатэз, 1993 но 2001

Удмурт Элькунысь Правительстволэн премиезлэн лауреатэз, 1993

Ижкарлэн Дано адямиез ним, 2005 [7]

Библиография[править]

Книгаосыз[править]

Нош ик Коля сярысь : пудо-животъёс, пӧйшуръёс, тылобурдоос, вуын улӥсьёс, ными-кибыос сярысь веросъёс. – Ижевск : Удмуртия, 1993. – 78 c.

И снова – о Коле, а также о животных, домашних и диких : рассказы . – Ижевск : Удмуртия, 1997. – 76 с.

Рассвет над деревней . – Ижевск : (б. и.), 2006. – 129 с.

Коля тодэ 50 будосэз, нош тон?.. : веросъёс. – Ижевск : Удмуртия, 1988. – 40 с.

Коля знает 50 растений, а ты? : рассказы. – Ижевск : Удмуртия, 1989. – 40 с.

Статьяосыз[править]

Кыдан : улонысь учыръёс // Удмурт дунне. – 2010. – 20, 21 июля. – С. 6–7.

Кырӟанъёсыз[править]

Постников Н. Алнашын кадь ӧвӧл [Ноты] : "Ойдо вордскем шаерамы..." / кылъёсэ гожтӥз В. Туганаев // Малпасько тонэ : кырӟанъёс = А мне бы увидеть тебя : песни / Н. Постников. – Ижевск, 2010. – С. 70.


Татчы 2005-тӥ арысен потэм чеберлыко статьяос гинэ пыртэмын, кылемъёсыныз тодматскыны быгатӥськоды Удмурт Элькунысь йӧскалык библиотекалэн электрон каталогъёсызъя.

Уже кутэм литература[править]

  1. 1,0 1,1 1,2 Уваров А. Виктор Туганаев (1941) // Писатели и литературоведы Удмуртии : биобиблиогр. справ. / Сост. А. Н. Уваров. – Ижевск, 2006. – С. 179–180.
  2. 2,0 2,1 Постникова Г. Данъяськымон удмурт тодосчи // Алнаш куара. – 2011. – 25 март. – С. 3.
  3. 3,0 3,1 3,2 3,3 Туганаев В. Кыдан : улонысь учыръёс // Удмурт дунне. – 2010. – 20, 21 июля. – С. 6-7.
  4. 4,0 4,1 Орехова Л. Музъем уж адямиез вылӥе ӝутэ… // Инвожо. – 2005. – № 1-2. – С. 30-31;34-36.
  5. 5,0 5,1 5,2 Тихонова Л. Воштӥськон луыны кулэ… // Удмурт дунне. – 2011. – 1 март. – С. 5.
  6. 6,0 6,1 Никитин Ф. «Вож» мурт // Удмурт кизилиос : очерки, зарисовки, интервью (2001-2007). – Ижевск, 2007. – С. 8–9.
  7. Туганаев Виктор Васильевич (1941) // Удмуртская Республика : энцикл. – Изд. 2-е, испр. и доп. – Ижевск, 2008. – С. 657.