Рябинина Зинаида

Материал из Воршуда
Перейти к навигацииПерейти к поиску
The printable version is no longer supported and may have rendering errors. Please update your browser bookmarks and please use the default browser print function instead.

Зинаида Кирилловна Рябинина (Вахрушева) - удмурт гожъяськись,Удмуртиысь сӥё-дано журналист.

Зинаида Рябинина

Улон сюресэз

Зинаида Рябинина вордӥськиз 1971-тӥ арын 26 тулыспалэ Сьӧлта ёросысь Кейлуд-Зунья гуртын. [1]

Нылаш быдэ вуиз вить нылпиё семьяын. Галя апаез сое школае мынэмезлэсь азвыл ик лыдӟиськыны но гожъяськыны дышетӥз. Семьяязы котьку пӧртэм пумо газет-журналъёс басьяллязы. Анайзы, Валентина Степановна, ужезъя ӵемысь Сьӧлтае вуылӥз но котькуд мынэмаз выль книга вае вал. Ӝытазе быдэс семьяен лыдӟиськыса пукылӥзы. Таӵе ӝытъёс нылашлэн улоназ яркыт шортъёсын пужъятэм суред кадь лякиськыса кылизы. [2]

Юнкоръёсын ужан, 1998

Школаын дышетскыкуз ик со туж чырткем вал, котькытын – азьветлӥсь. Нырысетӥ классэ ветлӥсь нылашлэсь кыкетӥ, куинетӥ классысь нылпиос но кылзиськылӥзы. Трос лыдӟиськиз. Маке борды басьтӥське ке, одно пумозяз но ӟеч лэсьтоз. [3]

Нылаш туж тыршыса дышетскиз, яратоно предметъёсыз – удмурт кыл, удмурт но ӟуч литература, пӧрмытӥз сочинениос гожъяны. Со ужъёсыз али ке но дышетӥсьёсыз архивазы утялтыса возё. Зина озьы ик мылысь-кыдысь пыриськиз школалэн улоназ но: эшъёсыныз тыршыса стенгазетъёс, концертъёс дасяллязы, огназы кылем пересьёслы юрттылӥзы. 1986-1988-тӥ аръёсы Удмурт телевидение элькунысь школаос куспын «Юан-веран, тодон-валан» конкурс ортчытӥз. Зина командалэн капитанэз луиз. Кӧня Зина выступлениослы сценарийёс, девизъёс, конкурслы юанъёс, калык пӧлын юан-веранъёс (опросы) дасяз! Тыршемзы юнме ӧз луы, командазы басьтӥз главной приз – дунтэк путёвка Москва – Тверь городъёсы. Но Зина ачиз мыныны ӧз быгаты – школаез йылпумъян экзаменъёс сётон вакыт вуиз. [4]

Пичи дырысеныз Зиналэн тодаз апай-агаезлэн «Дась лу!» газетэз вожмаськыса лыдӟылэмзы, «Шонер тодӥзы» рубрика улысь ас нимтулъёссылы шумпотылэмзы. «Берлогес «Дась лу!» вуон нуналъёсты нырысетӥ яратонэным пумиськонъёсты кадь возьмалляй. Ай эшшо отын аслад кылбуред ке печатламын! Котькудаз сямен номеръёсын ужъёсы потазы. Газет мынам сюлэм буйгатонэ, матысь эше кадь луиз...» – тодаз вае Зинаида Кирилловна. [2]

Югдонысь шор ёзо школаез йылпумъяса, дышетскыны пыре Удмурт кун университетысь филологияя факультлэн удмурт отделенияз. 1992-тӥ арын дышетскон вакытаз ик «Ӟечбур!» газетлэн редакцияз ужаны кутске. [1] Туж шумпотыса уже ветлӥз… «Нош куке сётӥзы «Яратэ, уг яраты» бамез дасяны, шудэлэн пумыз ӧй вал. Сюлэмме ик поныса гожъяськылӥ та темая. Кӧня муртэн мон соку гожтэт пыр кусып возьылӥ!..» - вера З. Рябинина. [2]

Rzk2.jpg

1998-тӥ арын сое ӧтизы «Удмурт дунне» газетэ. Татын со нырысь быдэсъяз корреспондентлэсь ужзэ, бӧрысь иворъёсъя отделлы редакторе юнматӥзы. «Алексей Петрович ноку уг юа вал, быгатод-а, пӧрмытод-а шуыса. Косэ но тӥни. Яке сокем оске-а вылэм? Нош мон косэм-оскем ужез быдэстыны дышемын, - мылкыдзэ усьтэ Зинаида. – Пионер но комсомол огазеяськонъёс сыӵе сям пыӵатӥзы». [2]

2003-тӥ арын Зинаида Вахрушевалы оскизы валтӥсь редакторлэн воштӥсез луыны. Та дыр ӵоже егит нылкышно ассэ шедьтӥз кивалтон удысын, улонэ пыӵатӥз выль малпанъёсты. Кылсярысь, газетысь «Удмурт кизилиос» рубрика улсын печатласькись тужгес устоосыз материалъёс 2007-тӥ арлэн пумаз потӥзы нимаз книгаен.

2010-тӥ арысен «Удмурт дунне» газетлэн валтӥсь редакторез луиз. Ватсано созэ но. «Удмурт дуннелэн» 95 аръем сюресаз 25 пол ини вошъяськизы валтӥсь редакторъёс. Зинаида Вахрушева - нырысетӥез нылкышно редактор! Егит кивалтӥсьлэн улоназ валтӥсь малпанэз таӵе: нылкышно кадь шӧдыны мед быгатод, воргорон кадь малпаськыны мед пӧрмытод. [5]

Гожъямъёсыз сярысь

Нырысетӥ «Гужем» нимаськись кылбурзэ Зинаида Рябинина гожтӥз 1985-тӥ арын, ӟазег возьмакуз. Печатлаз сое «Дась лу!» газетын. Егит кылбурчи шумпотыса пыриськылӥз «Ӟечбур!» газетын ортчись конкурсъёсы но. [5] «Со вал гужем лагерьысен. Дышетӥсьмы одӥг нылашез редакцие заметка гожтыны косӥз. «Нош малы монэ ӧз куры, - малпасько, - мон но сочинениосме «5»-лы гожъясько ук». Доре бертӥ но, тютюпиосты возьманы ыстӥзы. Мынам мыл уг пот, мылкыды олокытын поръя. Соку тӥни нырысетӥ кылбуре кылдӥз. «Вунонтэм гужем» конкурсэ сое ыстӥ, вормисе потӥ. Со понна мыным «Смена» фотоаппарат кузьмазы, мылкыды бурдъяськиз». [2]

Университетэз йылпумъякуз, Зинаида «Лулсэр» нимо творческой диплом гожтӥз. Отчы студенткалэн 48 кылбурез но А. Ахматовалэсь но М. Лермонтовлэсь берыктэм ужъёсыз пыризы. 1990-тӥ аръёслэн шоразы автор кепыратэк пыриз егит кылбуретэ «сэрегъёсты» гажась лирической героиняеныз. Мукет нылкышно кылбурчиос пӧлысь Зинаида Рябинина висъяське ӧч карыса, чепылляны турттыса гожъяськон манереныз. Лирической героинязэ со чеберъятэк возьматэ. [6]

«Эн волятэ трос сэрего изэз» - таӵе нимын 2001-тӥ арын «Удмурт дунне» газетын Зинаида Рябининалэн кылбуръёсын бадӟым сузьетэз потӥз. Нош кылбур бичетэз нимаське «Синмаськем тӧлъёс». Та йыръянъёс ик усьто ини кылбурчилэсь валтӥсь малпанъёссэ: нокин дунне вылын уг улы яратытэк, котькудӥз адями (озьы ик лирической героиня но) маиныз ке но аспӧртэмлыко луэ. Со пӧртэмлыкез ик сое тунсыко каре. [6]

2006-тӥ арын «Удмуртия» издательствоын Зинаида Рябининалэн «Синмаськем тӧлъёс» нырысетӥез кылбур бичетэз потэ. Та бичетлы дунъет сёто критикъёс, писательёс. Ваньзы соос пусъё авторлэсь кылбуръёсаз «чепыллясь» зэмлыкез возьматэмзэ.

2008-тӥ арын Зинаида Рябининалэн потӥз кыкетӥез , «12 суред» нимаськись, кылбур сборникез. Бичет огшоры ӧвӧл – печатламын Эстониын. Туж тунсыко пуштросо, узыр суредъёсын но туспуктэмъёсын. Но уката но паймымонэз – кылбуръёс сётэмын ньыль кылын: удмурт, ӟуч, англи но эстон. Книга потэмын фин-угор калыкъёслы юрттон программая Эстониын.

Авторлэн кылбур жанр бордын утчанъёсыз котьма ласянь паськытэсь. Нырысь ик, тематика ласянь. Со сярысь кылбуръёслэн нимъёссы, сӥзёнъёссы но умой верало: «В. Романовлы», «Шузи чорыгъёс», «Кыкетӥзэ корка ӝутэ атай», «Пиме вордон уе» но мукетъёсыз. Но котькудзэ соосты огазея лирической героиня, кудӥз та кылсуредъёс но тусъёс пыр аслэсьтыз сюлэмшуго пушдуннезэ возьматэ. [7]

Зинаида Рябининалэн кылбуран дуннеяз нырысетӥ интые пото яратонэн герӟаськем кылбуръёс, кытын валтӥсь инты басьтэ ӝожмыт мылкыд. Лирической героинялэн улоназ яратон вае ке но шумпотон, соин ӵош ик солэсь сюлэмзэ куректонэн, бӧрдонэн тырмытэ, чебер осконэз ӵуше. Яратон темаез усьтыкуз, та кылбурчи нылкышно но пиосмурт кусыпъёслэсь лушкем палъёссэс кепыратэк усьтэ. Солэн лирической героиняез – кепырасьтэм, сьӧлыко, мукетъёсызлэсь висъяськись адями. [6]

Нимысьтыз висъясько дышем кабъёсын, мертэтъёсын но дунъетъёсын ченгешон кылбуръёсыз. Кылбурчи лыдӟисез малпаськытэ, со азе юан пуктэ, тодмо арбериос но югдуръёс шоры мукет синмын учкыны косэ.

Яратон темаен артэ та авторлэн кылбуръёсаз озьы ик ӝутӥське нравственной («Мыным ӧз кылды армие келяськыны», «Егит нылаш ӵуше синпумъёссэ»), философской («Шузи чорыгъёс», «Малы мон вордскытозь кылдытӥллям синучконэз?») тематика, соос семья кусыпъёсын герӟаськем ужпумъёс но выль югдуръёс пыр усьтӥсько («Сына выль кен йырсиоссэ…», «Милям куноосмы ай вань…»). Татын нимаз висъяське анай но анайлык удыс. [6]

Кылбурчи тунсыко возьматэ пиосмурт но нылкышно кусыпъёсты. Лирической героиня понна нылмурт луон удалтымтэен, шудтэм луонэн ӧвӧл герӟаськемын. Со понна нылкышно луон бадӟым шуд.

Зинаида Рябининалэн кылбуран шоры учкемез но аспӧртэмлыко. Автор малпамъя, «шудо муртъёс кылбуръёс уг гожъяло»:

Чагыр инмын кизилиос уг пишто,

Соос пишто пеймыт-пеймыт инмын.

Кылбурчиос ноку кылбур уг гожто

Укыр чылкыт, сайкыт ке сюлэмын.

Кылбур чуръёс вордско тэлегъяськись лулын

Курадӟыса, пеймыт-пеймыт инмын.

Вераны луоз, Зинаида Рябинина туала нылкышно лирикаын висъяське психологической ӧре кыстӥськеменыз.

Библиография

Книгаосыз

Синмаськем тӧлъёс : кылбуръёс. – Ижевск : Удмуртия, 2006. – 78 c.

Kaksteist pilti = 12 суред = 12 картинок = Twelve pictures. – Tallinn : Kirjastuskeskus, 2008. – 60 lk.

Статьяосыз

А. Орлушалы : кылбур / Зинаида Рябинина // Удмурт дунне. - 2014. - 25 июля. - С. 2.

Выль арен! // Удмурт дунне. – 2010. – 15 янв. – С. 15.

"Вырйылысь питырске лымы люк..." : кылбур // Инвожо : спец. вып. газ. "Известия Удмурт. Респ." и журн. "Инвожо". – 2011. – № 9/10. – С. 38.

Гумыр сузьет : кылбуръёс // Удмурт дунне. - 2013. - 19 марта. - С. 4 : фот. - (инГОЖ). - Пуштросэз: 70-тӥ аръёс ; 80-тӥ аръёс ; 90-тӥ аръёс ; 2000-тӥ аръёс

Йыромем толэзь // Инвожо. – 2007. – № 5/6. – С. 168–170 : фот.

Ку ветло на таӵе ярдуртӥ? // Кенеш. – 2009. – № 4. – С. 36–39.

Куно : кылбур // Удмурт дунне. - 2014. - 16 сент. - С. 5. - (инГОЖ)

Кыӵе меда шунды? ; Лулпыжет : веросъёс // Кенеш. – 2007. – № 11/12. – С. 47–64.

"Мон – термометр..." ; "Акыльтӥ ни мон..." ; "Яратыны яратӥсько..." ; "Та дуннеын номыр выльзэ уг малпа..." ; "Бускель песянай, пе, кулэм..." ; "Кыкетӥзэ корка ӝутэ атай..." ; "Вань ке тон, Инмар..." // Инвожо. – 2005. – № 9. – С. 75.

"Мон уйёсме ыштӥ – юртты..." = "Mul kadunud оn ӧӧd. Appi!..." // Kuum ӧӧ : suome-ugri ranvaste tanapaeva luulet. – Tallinn, 2006. – С. 470–473. – Текст парал. удмурт. и эст.

Синмаськем тӧлъёс // Кенеш. – 2006. – № 7. – С. 45–49.

"Синмаськем тӧлъёс" бичетысь // Удмурт нылкышно кылбуретлэн тулкымъёсыз / Л. П. Федорова. – Ижевск, 2007. – С. 322–328.

"Строит второй дом отец..." ; Сыну : стихи / пер. авт. // Литературная газета. - 2013. - 3-9 июля (№ 27). - С. 6.

Та мынам городэ! ; Ӧтён // Удмурт дунне. – 2010. – 11 июня. – С. 5.

Тугаськем герд // Феномен Удмуртии. – Ижевск ; М., 2008. – Т. 6 : "Как слово наше отзовется...". – С. 439–442.

Хайдар но Гайдар : эшлыко сӥзёнъёс // Удмурт дунне. – 2007. – 7 сент. – С. 15. – (Шӧкыч).

Чырткем, анай! ; Гужем ; Ӝуась гурын - перепеч : кылбуръёс // Удмурт дунне. - 2012. - 18 мая. - С. 14, 15.

Ӵуж ваза ; Артистка : веросъёс // Кенеш. – 2007. – № 3. – С. 10–18.

Шузи чорыгъёс ; Сталин вакытэ пуктэм песянаелы ; "Сяськаосын шобыртӥзы шӧез..." ; "Акыльтӥ ни мон базар сяськаедлэсь..." ; "Чик возьмамтэ шорысь..." ; "Кезьыт кылъёстэ кылытозь..." ; "Мазэ ке виим яратонысь..." ; "Пож вуын гылъяса пызьыртӥд но..." // Удмурт дунне. – 2006. – 29 марта. – С. 7.

Берыктэмъёсыз

Лермонтов, М. Ю. Кавказ : кылбур / Михаил Лермонтов ; берыктӥз Зинаида Рябинина // Удмурт дунне. - 2014. - 21 окт. - С. 2. - (инГОЖ)

Лермонтов, М. Ю. Кураськись : кылбур / Михаил Лермонтов ; берыктӥз Зинаида Рябинина // Удмурт дунне. - 2014. - 17 окт. - С. 2.

Обрезкова, Н. А. Куинь вӧсе... : кылбуръёс / Нина Обрезкова ; берыктӥз Зинаида Рябинина ; суредъёсыз Павел Микушевлэн // Удмурт дунне. - 2014. - 21 окт. - С. 4.

Пригов Д. А. "Кышномурт метроысен ӵыжиз..." ; "Тани мон, шуом, огшоры ӟуч поэт..." ; "Бызись мурт ӵемтылэ..." ; "Киям колбаса ке сюре – бӧрдӥсько..." // Удмурт дунне. – 2007. – 22 авг. – С. 8.


Татчы 2005-тӥ арысен потэм чеберлыко статьяос гинэ пыртэмын, кылемъёсыныз тодматскыны быгатӥськоды Удмурт Элькунысь йӧскалык библиотекалэн электрон каталогъёсызъя.

Уже кутэм литература

  1. 1,0 1,1 Хайдаров Р. Зинаида Рябинина (1971) // Писатели и литературоведы Удмуртии : биобиблиогр. справ. / сост. А. Н. Уваров. – Ижевск, 2006. – С. 172.
  2. 2,0 2,1 2,2 2,3 2,4 Ермолина А. «Шудо, шедьтӥськод ке астэ» // Ӟечбур! – 2010. – 3 июнь. – С. 5–6.
  3. Романова Г. Возьматом ай, кыӵеесь селтаос! // Удмурт дунне. – 2006. – 27 окт. – С. 5.
  4. Рябинина А. Гордость нашей деревни // Октябрь. – 2010. – 8 дек. – С. 2.
  5. 5,0 5,1 Гожтоз, кивалтоз, бурдъялоз… // Удмурт дунне. – 2010. – 9 апр. – С. 1.
  6. 6,0 6,1 6,2 6,3 Федорова Л. Зинаида Рябинина (1971) // Удмурт нылкышно кылбуретлэн тулкымъёсыз / Л. П. Федорова. – Ижевск, 2007. – С. 322-332.
  7. Шибанов В. «Малы мон вордскытозь кылдытӥллям синучконэз?..» // Синмаськем тӧлъёс / З. Рябинина. – Ижевск, 2006. – С. 74–76.