Перевозчиков Александр Фёдорович

Материал из Воршуда
Перейти к навигацииПерейти к поиску
The printable version is no longer supported and may have rendering errors. Please update your browser bookmarks and please use the default browser print function instead.

Оло бӧрдод, оло серекъялод

Перевозчиков А. Ф.

Удмурт Республикаысь калык артистэн, Россия Федерациысь дано артистэн, Удмурт Республикаысь кун премилэн лауреатэныз Александр Фёдорович Перевозчиковен мон сцена вылысен гинэ тодмо ӧвӧл. Ньыль ар талэсь азьло шуд усиз пумиськылыны туспуктэмзэ республикамылэн Данъян пул вылаз интыям та дано адямиен. Туж тунсыко но серемес мадиськыны быгатэмзэ тодыса, лӧптэм мылкыдын ик вамыштӥ улон дораз.

Александр Фёдоровичлэн лэсьтӥськон удысын быгатонлыкъёсыз сярысь тодӥсько вал, но адӟыны ӧз кылдылы. Сиськонтӥысьтызы борддор быдэсак шобыртэмын лопата ныдъёсты шори пилем пулъёсын. Туж аспӧртэмлыко адӟиське. Чай юон сямен вераськонмы но та бордысен ӧръяськиз.


Шаян Шурик

- Александр Фёдорович, азьлояз пумиськылыкумы тӥ шуиды вал: сюлэмдылы матын серемес рольёс, отын тросгес шаянъяськыны луэ. Пичи дырды но тӥляд туж шаян вал, дыр, верамдыя, ӧжыт гинэ ӝыны гурттэс ӧвӧл сутӥллям.

- Бен вал сыӵе учыр огаз пӧсь гужеме. Лампалэсь ӝуамзэ эскереме потӥз, нош тылпоттонэ лапас бервылысь жуг-жаг вылэ усиз но гомак луиз. Ярам, бӧрдэмме бускель кышномурт кылӥз но тылпуэз кысӥз.

- Крезьгуръя, суреданъя но географиен дышетӥсьты, нош милям ӟеч автормы Юрий Егорович Шкляев но шаян сямды сярысь вера. Шурик, пе, туж яратэ вал классэз серекъятыны. Ваньмыз пырс! потто, нош со номыр луымтэ сямен туж востэм пуке. Кызьы куаретод на? Со понна йӧтэ ӵош пукись эшезлы.

- Юрий Егорович туж бадӟым пытьы кельтӥз улонам. Глазов пединститут бере школаямы лыктӥз туж шумприч егит дышетӥсь. Ваньмес сьӧраз валтӥз, гурт калыкмы туж кырӟась вал уго.

Юрий Егорович ик ӟеч дышетскисьёсты нуллӥз Кунгурысь пещерае, мон соку 7-тӥ классын вал ни, «ньыльлы» но «витьлы» дышетски. Нырысетӥ классын кык ар пукеме но октябрёноке кыкетӥ классысен гинэ кутэмзы визь пыртӥз. Бере кылеме ӧз поты, калык марда пионер но, комсомолец но вал.

- Асьтэды тӥ туж востэм шуиськоды, но мадемъёстыя чик но сыӵе малпан уг кылды?

- Тодмо артистка Фаина Раневская шуэ вал: мон, пе, сыӵе возьдаськись, сыӵе возьдаськись! Возьдаськемысьтыз ик адямиосты ыстэ вал: «Идите в ж…» Мон но со мактал ик, дыр, но тодмоос, эшъёс пӧлын, нош тодмотэм адямиос пӧлын бакомисько.

Мон туж долкась, ас дуннеям выйысь, японецъёс кадь ик. Ой, кыӵе чебер! Ой, ой… Одӥг пол Выль арлы школаямы туж чебер кыз пуктӥллям, вайёсыз нап-напесь, бумага шудонъёс интые, чилясь шаръёс ошылэмын. Пайми, ымме ик усьтыса учкисько. Степанова Алялэн (Мунё театрын ик ужа) Петыр братэз кеськиз: «Мар долкад?» Вань чеберез сӧриз. Али но куддыръя долкасько на, Маниловлэн сямен чебересь малпанъёсын кӧлыны выдӥсько: «Эх, кыӵе умой вылэм, трос-трос коньдон ке луысал, соку аслэсьтым театрме усьтысал, дыртытэк пуктысал спектакльёс…» Тӥни со выллем но солэсь «уродгес» малпанъёс йырам бергало. Нылпиос сямен ик ваньзэс шудо карем потэ. Мар шуод? Шузи!


Шузи, дыр, мон

- Шуиськоды, театр быдэс улондэс басьтӥз, пинал муртъёс музэн мунёосын шудон сярысь ӧд ке но малпаськылэ.

- Тямысэтӥ классэз мон йылпумъяй Игралан. Соку тӥни нырысьсэ адӟи Мунё театрлэсь шудэмзэ, нош аслэсьтым улонме соин герӟаны малпанам ик ӧй вал. Инмар адӟе, лэся, кинлэн кыӵе сюресэз.

Аслэсьтым удысме шедьтыны гурт сцена но мыным трос юрттӥз. Пичи классъёсын дышетскыкум ик, артист луэме потэ вал. Концертъёс пуктылӥм, спектакльёсын шудӥ. Сцена туж воштэ вылэм адямиез. Яке бадӟыматӥсь пияла пыр сямен визьтэмез возьматэ, яке улонын туж востэм, син шоры йӧтӥсьтэм мурт трослы вылэ ӝутске. Пичи мугоры но монэ вуттӥз, дыр, театре – пичи адямиос бадӟымгес луыны туртто, Наполеон но, Ленин но ӝуждалаенызы ушъяськыны ӧз быгатэ. Эшъёсы нылъёсын чупасько ини, нош мон шоры нокин уг учкы. Оло, кин ке синмаськиз ик, вылды, но сое дыр ортчыса гинэ валаськод ни: нылъёс чеберъёсыз шоры гинэ уг учко вылэм. Шӧтэм, пичи, сыӵе-таӵе бере, малпасько, возьмато ай тӥледлы: луо туж ӟеч артист, адӟоды соку, кинэ палэнтӥ ортчиды. Жаль, асме возьматыны турттон со мылкыды монэ Мунё театрлэсь вылэ ӧз ӝуты, асме кытын ке мукет азьын возьматыны луонлыкъёс трос пол вал ке но. Оло удмурт сям интыысьтым ӧз вырӟыты, оло кышканэ вормиз. Кык пол Москвае кошкыны турттӥсько вал, театрамы спектакль пуктыны вуылэм режиссёръёслэн куремзыя.

Ужедлэсь акыляк медам луы шуыса, вить-куать ар ортчыса, кыӵе ке воштӥськонъёс кулэ шуо. Мынам озьыгес ик луиз. Кык ар ужаса ветлӥ армие, дас ар ортчыса, Свердловскысь театральной училищеысь удмурт студиез йылпумъяй, собере Пермьысь Мунё театрын кӧня ке ужай.

- Перме кошкемды пумысен вераськонъёс вал: Мунё театрлэн со вакытэ кивалтӥсеныз кылды тупамтэ, пе.

- Малы ке ваньмыз озьы малпало. Бен, театрмылэн азьлань улонэз пумысен учконъёсмы котьку дыре ӧз тупалэ, нош Перме кык арлы кошкеме герӟаськемын вал нылыным. Анямылэн артист луэмез потӥз, нош Пермьысь театрын нылпиос понна студия усьтыны чаклазы. Малпай, малы оскалтонтэм ӧтьыкузы. Кышное но шуиз, мӧзмыны, пе, кутскид ни та ужад, тусад но жадем пыӵамын. Ветлы, тӧлатскы, нылэз но дышетоно.

Мон одӥг арлы вазьгес мынӥ, собере нылмы но лыктӥз. Но студиен герӟаськем осконъёсмы ӧз быдэсме. Ар ортчыса, Анямы Ярославльысь театръя институтэ пыриз. Экзаменъёссэ умой сётӥз, туэ кыкетӥ курсэз йылпумъя ни. Быгатонлыкъёсыз вань. Нош мон выльысь берытски аслам театрам. Но сюлэм ӧз буйга, уката быгыртӥськиз. Республикаямы кылдэм югдурен ӵошатыса, Пермьын театр шоры учконзы мукет, артистъёслэсь ужзэс отын дунъяло. Мыным тани квартира понна дун но тыризы. Мунё театрлэн шудэменыз палэнысь гуртъёсын улӥсь нылпиос но тодматскыны быгато, транспорт ласянь юрттэт сётӥське. Нош асьмелэн? Тани алигес «Шулдыр ӝыт» ансамблен ӵош Играе потай. Висъям автобусэз гробовозэн ӵошатыны луоз. Улонэнызы лыдъяськытэк, артистъёс сюрес вылэ пото шальтрам транспортэн. Анатолий Ушаков но тани быриз ужан дыръяз.

Пугачёвалэн но Киркоровлэн мында уждун ми ум куриське, ужан югдурмес ке но мед ӟечгес радъясалзы вал. Кураськисьёс чотын возьытозь, иське, пытсалэ соку театръёсты. Пуктӥзы Операя но балетъя музыкальной театр, нош кырӟаны но эктыны нокинлы. Табере тани Мунё театрысьтымы кивалтӥсьёс калык артистъёс но дано артистъёс чотын республикамылэсь бюджетсэ узырмытыны малпаллям.

Театрамы валантэм югдур кылдэмын – кыӵе ке но экспериментъёс, выльдӥськонъёс. Огъя ужан радлык сураськиз. Вань со огыр-бугыр выронъёс, керетонъёс огшоры гинэ уг ортчо – луло мае ке ныж пуртэн вандэм кадь. Нош нылпиос азе лобась мылкыдын потыны кулэ. Соиз но вань, берло дыре режиссёръёслэн нылпи спектакльёс дасян бордын ужамзы уг поты ни. Возьматоно ук асьсэлэсь быгатонлыкъёссэс бадӟымъёс азьын. Уг валаськы улонмылэсь тазьы мыдлань бергамзэ. Шузи, дыр.

- Александр Фёдорович, тазьы дӥсьтыса вераськонъёслэн шуккетсылэсь уд кышкаське-а?

- Мон номырлэсь уг кышкаськы ни.

- Удмурт студия пумысен но сюлэмды буйганы уг вала кадь…

- Дышетсконмес йылпумъяммы дырысен вуоно арын 25 ар тырмоз ни. Солы шуыса коть пуктоно вал удмурт спектакль, Нациосын ужан политикая министерство но, оло, юрттыны быгатоз.

- Мунёос но, маскаос но тӥ асьтэос лэсьтӥськоды. Со понна нимысьтыз дышетскыны кулэ-а?

- Дышетскыны кулэ, дыр, но шуисько ук, мон туж яратӥ театрез, отпускъёсам но пумозяз ӧй улы дорын. Весь пукисько вал мастерскойын, туж тунсыко потылӥз со уж. Учкыса-учкыса калленэн ачим но дыши мунёос лэсьтыны, собере маскаос борды но басьтӥськи. Анатолий Ушаковлэн юбилеезлы сӥзем ӝытын нырысьсэ возьматӥ соосты. Юбилярез ӟечкланы потозы песятай, песянай, капчи мылкыдо нылмурт, алкоголик, грузин но ачиз Ушаков. Малпано ке, мынам аслам но улонэ маскаос сьӧры ватӥськемын кадь.

Кияз ньыль нылпиен кылем анае войнае кошкем картсэ дас ар возьмаз. Собере ини монэ шедьтэм кубиста пӧлысь. Атаелэсь нимзэ мыным сётэм ик, нош фамилиме гожтэм войнаын бырем картэзъя. Аслаз анаелэн фамилиез Максимова. Вань улытозяз Перевозчикова шуиз ке но ассэ, пересьмем вакытаз паспорт сётыкузы, черкын сётэм справкая Максимоваен пусйизы.

Пичи дыръям анаелэн буби сярысь верамез уг поты вал, ож лудэ кылемзэ ик яратӥз, дыр. Нош мӧйымемез бере сюлэм яразэ бугыръяме ӧз поты ни. Но тодӥсько, буби Шаркан ёросысь. Аслам но утчаськыны дыры ӧз тырмы, лэся. Табере, оло, улэп но ӧвӧл ни. Анае нош улонысь кемалась ик ӧз кошкы, ӵошкыт интыын ӵемтыны шедиз но, чигиськем пыдыз йӧнаны ӧз вала ни.


Ческытэз перепеч пыжоз на

- Александр Фёдорович, кузпалэныды тӥ кыкнады но Мунё театрын ужаськоды. Кудды ог-огдэс пӧяды?

- Оло со монэ пӧяз, оло - мон. Людмила Николаевна театрын кивалтэ постановка люкетэн, цехъёслэсь ужзэс радъя. Кыкнамы но куамын аресмес ортчим ни вал. Шузияськон, юбка сьӧры бызьылон вакытэ ортчиз, нош азьланьын мар? Ноку но уг кышнояськы шуисько вал – весь сюрес вылын, вань улонэд ортче театрын. Кык ар кабинетаз пуки. Тамак кыским, анекдотъёс мадим, оломар сярысь но вераським. Нош одӥг нуналэ, репетициос вискын, загсэ мынӥм но гожтӥським. Вераськом но, нокин уг оскы, ми кышноен картъёс шуыса. Кема-кема дышыны выризы со малпанлы.

- Пӧраськыны быгатэмдэс тодыса, та ужез кышноды туж быгатыса вылады погыльтӥз шуиды вал.

- Бен, ужысь бертыкуз, мон сое сиёнэн пумитасько ни. Нылмы туж яратэ перепеч, пельнянь, бертылыкуз одно ик пӧраны турттӥсько. Отын, палэнын, диета возем каре ке но, дорын ваньзэ сие. Но перепеч пӧраны огшоры нуналэ но мылкыды луоз ай. Оскисько, азьланьын ӟеч нуналъёс ӝужалозы. Тӥледды но пӧраменым утялто.

- Гурын пыжем пӧсь перепечты, Александр Фёдорович, ческыт, дыр, но сцена вылын пыжемез эшшо но сюлэмъя луоз.


Источник:

Перевозчиков А. Ф. Оло бӧрдод, оло серекъялод / А. Ф. Перевозчиков ; записала Лия Малых // Удмурт дунне. - 2005. - 18 марта. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"