Редактирование: Пахомов Василий Евстафьевич

=Инбам но музъем вискын=
[[Файл:Pahomov.jpg|thumb|left|]]
'''Василий ПАХОМОВ лыдӟисьёс понна кемалась дырысен ас адямизы ни. Арнялы быдэ сямен солэн суредъёсыз «Шӧкыч» бамын маскаръясько. Василий Евстафьевичлэн суредан дуннеын сюресэз паськыт: художник-оформитель сямен со карикатураос, портретъёс лэсьтэ, живопись амалэн суреда.'''

'''Лесток выжы – юн выжы'''

– Семьяямы ми 8 нылпи вал: 5 пиос, 3 нылъёс, – вера В. Пахомов. – Пиос пӧлысь мон самой пичиез. Школае ветлӥсь агайёсылэсь буёло карандашъёссэс лушкемен басьтӥсько но суредаськисько вал. Суредъёсы яркытгес но чебергес мед пӧрмозы шуыса, дыльдыясько. Весь куаретылӥзы, опеть, пе, карандашъёсмес кутылэм ни. Яратӥсько вал сяськаосты суреданы, уката но розаосты. 

Нырысетӥ классэ мынӥ но, бадӟымез агае, Коля, тышкаське: урокъёстэ лэсьтэм интые, нош ик, пе, суредаськыса пукиськод. Мон гур вылэ пегӟисько вал, нокин медаз адӟы, медаз куареты шуыса.

Атае Быдӟым ожысь контузиен бертӥз, соин со пастухынгес возиськиз. Мон но соин ӵош ветлылӥ. Сьӧрам огшоры карандаш, бумага листъёс кутӥсько вал. Чорыг ты котырынгес, Силлё ошмес дурын пастухаллям. Скалъёс шутэтскон вакытэ чай пӧзьтылӥм. Атае монэ шур дуре сутэр куарлы лэзе вал. Вайёссэ тӥяса ваемысьтым, куаретэ: тынэсьтыд чиньыостэ, пе, озьы тӥяно. Льӧмпуэз чигтылэмысь, опеть йӧттэ вал: уг, пе, яра будосъёсты вӧсь карыны. Озьы пичиысен инкуазез шӧдыны, валаны дыши.

Атайме Евстафий Петровичез Алнаш ёросысь Ляли гуртамы Лесток гинэ шуо вал. Оло, вераны шугъяськемысьтызы, озьы нималлязы. Ма, мынэсьтым атай нимме но котькытын янгышен гожто. Туж паймылӥ атайлэн нокытчы учкытэк скалэз, валэз суредамезлы. Кӧня ке гожъёс лэсьтэ но, улэп вал син азе пуксе, нош та пудо-животэз туж секыт суреданы.

Анае Агафья Степановна тросгес нылпиосын пукылӥз, нош ваньмыкуз колхозын ужалляз. Яратӥсько вал солэсь станокен куиськемзэ учкыны. Пӧртэм буёло шортъёслэсь, йырысьтыз басьтыса, олокыӵе но пужыос пӧрмытъяз. Шортъёссэ но ачиз буялляз. 

4-тӥ классозь дышетски Лялиысь пичи классъем школаын. Нырысетӥ дышетӥсе Иван Фёдорович Данилов школае мынэме бере ик шуиз, тон, пе, суредась луод. Быръёнъёс я мукет кыӵе ке ужрадъёс луо ке, монэ ялонъёс гожъяны косэ вал, ачим ик соосты капкаосы ошылӥ.

5-тӥ классэ мынӥ ни Варзи-Ятчи школае. Агайёсы шуо, басьтэ ни, пе, Васялы акварель ке но. Кырсие вӧё краскаос басьтӥз. Мон соин ватман вылэ суредаськисько вал. Классэн кивалтӥсьмы Елизавета Николаевна Векшина, Ашальчи Окилэн племянницаез, суредан конкурсъёсы пыриськыны дэмлалляз. Вормонъёс басьтылӥ. Урокъёс дыръя эшъёсме, дышетӥсьёсты суредалляй - шаржъёс лэсьтылӥ. Быдэс класс коскаса пуке вал. Трос пол йӧтылӥз мыным со понна анай-атаелэсь.

Пичи дырысеным ик дыши арганэн шудыны но. Семьямы милям туж кырӟась. Атае Колямылы шуыса гармошка басьтӥз. Ми, пичиосыз пиос, кеносын лушкемен шудыны дышетскимы. Нокин вератэк-валэктытэк, кылэммыя гур пуктылӥм. Концертъёсын кырӟалляй но. Котьма ке но сюлэмлы матын вал суредаськон.

'''Тодэм потон бызьылытэ'''

– 8-тӥ классын дышетскыкум, ки улам шедиз справочник – кытчы мыноно дышетскыны. Синйылтӥ Свердловскысь художественно-промышленной училищеез. Малпай, училище нимаське бере, мыным одно ик 10-тӥ классэз йылпумъяно ӧвӧл. Акварелен, гуашен инкуазез суредаса, 5 ужме бандеролен келяй. Ӧтён вуиз, конкурсэ пыриськытэк, дышетскыны кутӥськом, пе. Дышетскыны шуыса сӥзьыл пал мынӥ ни. Шорам учкизы но юало, кӧня арес, пе, тыныд? Тӥни соку тодӥ, 10 классэз ик йылпумъяно, та училищеын вылӥ образование сёто шуыса.

Свердловск улосысь Баранчинская станциын семьяеныз улӥсь Анисья апае доре бертыны ӧз лэзьы ни, ваньдылы-а, пе, гуртэ кыльыны кулэ, огды ке но городын мед улоды. Васнецов нимо художественной училищелэн Нижний Тагилысь филиалаз вазиськи. Октябрь толэзьлэн пумыз вал ни, шуизы, вуоно арын сентябре лыктод. Быдэс ар юнме быроз шуыса, Баранчинская станциысь ГПТУ-е слесаре дышетскыны пыри. Нижний Тагилозь мынон-ветлонэз 40 минут гинэ вал, ГПТУ-ын дышетскон вискам художественной училищее суреданъя урокъёсы ветлӥ на. Кык арзэ отын заочно амалэн выллем тодон-валан люкай, зачётъёс но пуктылӥзы. Дышетскеме пумысен документэ но вал, коркамес сэрттыку, со кытчы ке луэм. Ӝыт ужась школаын шор ёзо тодон-валан но басьтыса вуттӥ.

'''Зарезьын омыр ыркыт'''

– ГПТУ-ез йылпумъяме бере армие басьтӥзы. Ижысь призывной пунктын арня пала улӥ ни вал. Морякъёс вуыса, нош ик медкомиссиез ортчыны косӥзы. Учкисько но, справкаосы ПЛ гожто. Мар со сыӵе, уг валаськы. Подводной лодкаын служить карыны «курало» вылэм. Северодвинскын 9 толэзь дышетскеме бере шеди Уйпал флотэ – Кольской полуостровысь Губа Оленья городоке.

3 ар служить кари ракетчик-подводник луыса. Китаен кунгож дорын огдыре шуг-секытъёс кылдӥзы. Соку вань подводной лодкаосты Охотской зарезь дуре келязы – мар ке луоно ке, ядерной боеголовкаосын ракетаосты лэзьыны дасесь вал. 1971-тӥ арын Кубае но 2 арнялы вуылӥ, мукет подлодкаысь ракетчикез воштыса. Фидель Кастроен вань командаенымы фотое пуксимы.

Капчи ӧвӧл 70 нунал ӵоже ву улын искусственной кислородэн шоканы. Нокин медаз адӟы шуыса, жуг-жагез уйёсы куштылӥмы. Кемагес служить карисьёс асьсэос шоканы поталлязы, али вуэмъёссэ пинал карыса. Ыркыт омыр пыремез возьмаса, пукиськод ни. Но солэсь гинэ но йыр онграны кутске. 2 толэзьёсын уям бере отпуск сётылӥзы, 2 пол доре бертаны вуттӥ, огпол Финской заливысь подводникъёслэн юртазы 22 нунал ӵоже тазалыкме юнматӥ.

Суреданлэсь армиын но ӧй куштӥськы. Карандашен лэсьтэм зарезь суредъёсы «На страже Заполярья» газетын печатласькизы. Эшъёсы весь куро вал нылъёссылэсь портретъёссэс фотографиосъя лэсьтыны, фотоальбомъёсазы суредалляй. Политотделэн кивалтӥсь, ужъёсме адӟыса, штабе басьтыны турттэ вал. Подлодкалэн командирез шуэ: милемлы асьмелы но суредаськись кулэ. Ленинской комнатаез но, офицеръёслэсь юртсэс но, воинъёсты данъян комнатаез но кулэезъя суредай-радъяй. Геройёслы-подводникъёслы сӥзем аллеяысь портретъёсты выльдӥ. Губа Оленья городокын эскизэя «СССР-лы 50 ар» стела но пуктӥзы. Сварщике дышетскемын бере, асме ик сое лэсьтыны куризы. Ӧйтӧд, сылэ на меда со? Аръёс ортчыса, телевизор пыр адӟи служить карем интыме. Сюлэм вӧсь луэ: лодкаос сисьмыса, сыномыса сыло. Туж ветлэм потэ вал отчы, но военной городоке озьы гинэ уд пыры. Подводникын служить кареме сярысь но 25 ар ӵоже поттылыны ӧз лэзе.

'''Суредан мылкыдэз уд пыкъя'''

– Армия бере малпасько вал дышетсконме Нижний Тагилысь художественной училищеын азьланьтыны. Адӟон сьӧре ветлэ вылэм. Одӥг но ӝыны ар служить кареме бере атае кулӥз. Соин люкиськыны бертакум, Москваысь аэропортысен чемоданме лушказы. Тамак кыскон вискам ӟус вылын вераськыса пукись песянайёслы чакланы кельтӥ вал. Потэме бере ик егит нылэн пиен лыктӥллям но чемоданме нуиллям документъёсын валче. Ярам, военной билетэ кисыям вал. Милицие ивортӥ. Армиысь но бертӥ ни, заводын 3 ар ужаса но вуттӥ, соку гинэ чемоданме шедьтӥллям. Отчыозь кыллем аэропортысь котыр возён камераын. Лушкаськисьёс тельняшкаосме, коньдонме гинэ басьтӥллям. Кышказы, луоз, милиция быдэс аэропортэз соку котыртӥз уго.

Частям вуэме бере политотделын справка лэсьтӥзы, общественной ужен выремме но гожтыса. Со ик юрттӥз ни Ижысь мотозаводэ интыяськыны. Заводлэн кивалтӥсез Игорь Стыценко, одӥгысьтыз выставкаысь суредъёсме адӟыса, ӧтиз художник-оформителе. Но отчы конкурстэк ӧз кутылэ. Кадръёсъя отделэ лыктӥ но, ужъёсме вайыны куризы, зэм ик-а, пе, пӧрмытӥсько суреданы. Кутӥзы, портретъёс лэсьтыны пӧрмытэме но кельшиз, лэся. Оскытӥзы, 3 ар ортчыса, квартира басьтод, пе. «Буммаш» заводын ужась Лиза кышноме но цехамы выжтыны дэмлазы. Со маркировщица луыса ужаз. Ӝоген 2 комнатаен квартира висъязы семьямылы.

Заводын ужам сяна, ас мылкыдыя живописен выри. Инкуазь суредъёсыным пыриськылӥ Уралын, Поволжьеын, Москваын ортчылӥсь бадӟымесь выставкаосы. Ог 100 пала картинаос суредай ни. Тросэз вузамын, уката но тросэз кузьмамын. Даслэсь ятырез Германие нуэмын.

1989-тӥ арын толэзь пала улӥ но суредаськи Совето Союзысь художникъёслэн Краснодар улосысь Горячий Ключ дачаязы. Отчы лэзьязы бадӟымесь адӟытонъёсын вормисе потэмъёсты. 5 суредме Москвае но басьтӥзы. Но перестройкаен валче ужъёсы кытчы ке ышизы.

Заводын ужакум ик, 1983-тӥ арын, одӥг арнялы ВДНХ-е семинаре ысъязы. Отчы люкаськылӥзы быдэс Союзысь художник-оформительёс но карикатуристъёс. «Советской Удмуртия» газетлэн редакциез сюлмаськемен но, отчы вуи. 1975-тӥ арысен «Шӧкыч» бамын карикатураосы потаны кутскизы. Нош вуттӥз монэ газетэ ӵош дышетскем эше Николай Байтеряков. Пумиським но шуэ, ойдо возьмато ужан интыме. Соку редакция интыяськемын вал Пастухов урамын. «Шӧкычез» дасяз Фёдор Суворов. Дораз пырим. Суред кулэ вал, пе. Суредасьсы Пётр Ёлкин ӵапак кытчы ке кошкемын вылэм. Отын ик карандашен мар ке лэсьтӥ. Со дырысен весь курылӥзы серемес суредъёс лэсьтыны. Карикатураосы «Крокодил», «Чаян» (чуваш), «Пачемыш» (пор) журналъёсын но потылӥзы.

'''Город вӧлъя бурдъёссэ'''

– Мотозаводын ог 40 пала художник-оформительёс вал. Котькуд аре выставкаос ортчылӥзы. Мынэсьтым ужъёсме синйылтэм Ижевск городысь валтӥсь художник Рашид Сабитов. Солэн дэмламезъя ӵош ужась эшеным Борис Рыковен арлы быдэ 1-тӥ Майлы Ижысь Шор площадез демонстрацилы дасяллямы. Туж тунсыко адями вал Борис. Быдӟым ож дыръя пленэ шедем, олокыӵе но учыръёссэ вера вал. Гитлерлэсь портретсэ суреданы косылӥллям, со понна сюдылӥзы, пе, озьы гинэ луло кылем.

Площадез чебертыны висъяло вал буёлъёс, кисточкаос, басма. Транспарантъёс, панноос лэсьтылӥм. Рыковен ӵош ик демонстрацилы КПСС-лэн ЦК-езлэн Политбюроысьтыз адямиослэсь портретъёссэс суредаллямы. Быгатонлыкме эскерыса, Сабитов нырысь Андроповез суреданы косӥз. Собере ини совето вакытысь вылӥ кивалтӥсьёслэсь дасо пала портретъёссэс лэсьтӥ.

Йылпумъяй партилэн Ижевскысь горкомез бордысь художник-оформительёсты дасясь 2 аръем курсъёсты. Мотозаводын ужакум, монэ весь косо вал партие пырыны. Армиысь сыӵе мылкыдын ик бертӥ вал. Но заводын уйиськыны кутскизы лыдпус сьӧры, олокинэ но кутылӥзы партилэн радъёсаз. Озьы чутрак пумит кариськи.

Мотозаводын 27 ар ужаса вуттӥ. Выльдӥськон вакыт кутскем бере уждунэз 8-9 толэзьёсын ӝегатылӥзы. Нош семьяез сюдоно. Кышное, сюлэмыз висьыса, операцие сюриз, уг ни ужа вал. «Ужысь ветеран» ним сётон пумысен ужпум ӝутэмзы но ӧз ни ӝегаты, Ижысь электротранспортъя управление суредасе выжи. Пенсие потыса но, тэк уг пукиськы, возьмаськисьын ужасько. Дыр вань суредаськыны. Газетысь «Шӧкыч» бам но, «Кенеш» журнал но серемес суредъёслы кулэясько.

Вӧё краскаосын суредаськонлэсь но ӧй люкиськы. Алигес Ярослава внучкае шуэ, семьяысьтымы ваньмызлэсь сямен портретъёссэс лэсьтӥд ни, мынамез гинэ ӧвӧл. Вӧё буёлъёсын лэсьтэм ужме школаяз но возьматэм. Дышетӥсьёсмылэн но, пе, туж потэ тусъёссэс лэсьтытэмзы.

'''Пунэмзэ берыктон'''

– Кузпалыным Елизавета Владимировнаен 2 пи будэтӥм. Пичиез, Володямы, таяз Выль аре шӧдтэк шорысь улонысь кошкиз. Ужаз лэсьтӥськисьын. 10-тӥ классын дышетскись Владик пиез техника борды кыстӥське. Но выжымылэн быгатонлыкъёсыз солы но паласькиллям, суредаське но, баянэн но шудыны быгатэ. Бадӟымез пимы, Вячеслав, юристэ дышетскиз. Таизлэн но нылыз чеберлык борды кыстӥське. Ярославамылы 9 арес гинэ ай, нош кытчы гинэ уг вуттӥськы, кырӟаны но, эктыны но, акробатикае но ветлэ. Ку дыр но шедьтэ? Кытӥяз туж жалясько, но со серекъя гинэ.

Ми но Лизаен куке но пиналэсь вал, одӥг классын дышетским. Одӥг парта сьӧрын но пукеммы вань. Соку мон сое ӧй ик синйылтылы. 8-тӥ класс бере Лиза Иже кошкиз, армиысь отпуске бертӥ но ӧй ик тодма. Ӵош дышетскем эше кышноеныз артысь Варклет-Бӧдья гуртэ куное мыныны дасяське (отчы мынам сузэре быземын). Монэ но ӧтиз. Шуэ, кудзэ, пе, нылэз сьӧрад нуод сузэред доры? Лизаез ӧти. Мынӥмы валэн, дӧдьыен. Туж зол пелляськемен, сузэре шуиз, кӧлыса, пе, кошкоды. Ӵуказеяз пыдын бертыны потӥм, сюрес ӧвӧл, мертчытэм лыс вайёс кузя мырдэм-мырдэм вамышъямы. Мынам пыдъёсам ботинкаос, йырам бескозырка. Синмаськытӥ, лэся, Лизаез. Армие гожтэтъёс ысъяз, бертэме бере, кык толэзь улыса, Варзи-Ятчи сельсоветын гожтӥськимы. Нокинлы ӧм вералэ. Куаретӥзы ик бен лушкем ужаммы пумысен. Пунэмзэ берыктӥзы. 2009-тӥ арын гуртоосмы туж шуныт пумиськон радъяллям. Серекъяса веразы: та, пе, тӥледлы сюан интые медло.

'''Серем потон артэ вамышъя'''

– Дипломъёсы, данъян грамотаосы олома зӧкта люкаськемын, нош художникъёслэн радъёсазы пырымтэ. Мон инбамен музъем вискын выллем: самодеятельной художникъёс лыдъяло профессионал шуыса, профессионалъёс самодеятельнойёс пӧлы пырто – нимысьтыз дышетскем, пе, кулэ. Малпасько ик вал Удмурт кун университетысь худграфе пырыны, но нимо-дано суредасьёс ик шуизы: тынад аслад живописья ужан амалэд ӟеч, нош университетын дышетӥсьёсты дасяло – быгатонлыкъёстэ суралозы. Но нимысьтыз тодон-валан ӧй басьты ке но, суредасьёслэн радазы пыремын ӧвӧл ке но, со ӧз люкеты мыным бадӟымесь выставкаосы пыриськылыны. 2001-тӥ арын, 50 арес тырмонэлы сӥзьыса, Художникъёслэн союззы ик нимаз адӟытонме радъяз Ижысь «Галерея» центрын.

Тросэз тодмоосы, гуртоосы малпало вылэм, мон газетын ужасько шуыса. Мотозаводын тыршеме сярысь но со вакытэ гожъяны уг яра вал. Картинаосме адӟыса, паймылӥзы: тон, пе, живописен но выриськод-а? Карикатураосы ог сюрс пала люкаськизы ни, дыр. Тема шедьтыны секыт ӧвӧл. Соос тонэныд артэ ветло-уло. Тамак кыскыны курилкае потӥськод но, кин мар вера. Одӥгез чорыгамзэ маде, мукетыз эшшо кыӵе ке учырез. Кылэмъёсме мон блокнотам гожъясько, собере соос суредъёсын улӟо. Озьы гожъяса, трос блокнот быдтӥ. Тодам лыктэ таӵе учыр. Мотозаводысь 31-тӥ цехын шутэтскон нуналъёсы но дежурить каро вал. Пенсионер ужаны кемдэм нуналэ борддорысь огнетушитель усем. Таид пожарнойёслы жингыртэм: борддорысь пожарник усиз но, ымысьтыз шукы потэ, пе. Куалектонъяз «огнетушитель» кыл «пожарниклы» пӧрмем. Анекдотъёс но юртто син азе суред пуктыны.

«Удмуртия» издательствоын ужан вакытаз Михаил Федотов кылбурчи серемес суредъёсыным книга поттыны дэмлаз вал. Ужъёсме дасяй, нош Федотов улонысь кошкиз. Мукет нокин басьтӥськись ӧз луы ни. Отӥяз вакыт но воштӥськиз. Табере книга поттон сярысь малпанэз ик ӧвӧл. Но суредан мылкыды уг пуксьы. Кин ке но шуиз: суредасьёслы но писательёслы пенсие потыны, пе, уг яра, улытозязы мед тыршозы.

'''Источник:'''

Пахомов, Василий Евстафьевич. Инбам но музъем вискын / Василий Пахомов ; записала Лия Малых ; фот. Владимир Беломорских // Удмурт дунне. - 2016. - 1 апр. - С. 10, 15. - (Тӧр шорын).

'''За предоставление материала выражаем огромную благодарность редакции газеты
[http://www.udmdunne.ru/ "Удмурт дунне"]'''

[[Категория:Удмуртские звезды]]