Панфилова Елена

Материал из Воршуда
Перейти к навигацииПерейти к поиску
The printable version is no longer supported and may have rendering errors. Please update your browser bookmarks and please use the default browser print function instead.

Елена Васильевна Панфилова (Миннигараева) - удмурт гожъяськись, кылбурчи но журналист

Елена Панфилова

Улон сюрес

Minnigaraevael.jpg

Елена Панфилова вордӥськиз Пичи Пурга черкогуртын 1976-тӥ арын 25-тӥ гудырикошконэ. Пичи дырыз ортчиз Пичи Пурга ёросысь Сосновка гуртын. 1991-тӥ арын Ильинск шор ёзо школаез йылпумъяса, со пыре дышетскыны Можга педучилище. Татысен ик ини со оломаин но тунсыкъяське, нош тужгес но – удмурт литератураен, шаертодонэн, удмуртлыкез утёнэн, пыриське общественной уже, кивалтэ студентъёслэн «Удмурт кенеш» огазеяськонэнызы. [1]

1994-тӥ арын удмуртъёслэн съездазы самой пиналэз делегат луэ.

1995-тӥ арын педучилищеез горд дипломен йылпумъяса пыре дышетскыны университетлэн удмурт филология факультетаз. Чупрес нылаш пыриське калык куспо научно-практической конференциосы. Поэзиез эскеронъя ужъёсыз печатласько «Кенеш» журналын, «История и культура финно-угорских народов» (1998) бичетын.

2000-тӥ арын витьёсын гинэ йылпумъя дышетсконзэ.[1]

УдГУын дышетскись студентка Елена Панфилова, I-тӥ курссэ йылпумъямез бере, гужемзэ аслэсьтыз кужымзэ «Удмурт дунне» газетлэн редакцияз эскероно кариське. Сое шумпотыса куто. [2]

Нош дышетсконзэ йылпумъяса воксё но журналист луиз. Татын политика ӧре зымиз, нуналмысь ортчись ужъюгдуръёс сярысь статьяос, иворъёс гожъяз – Елена Миннигараева (картэзъя) луиз. Ужезъя ӵем кунгож сьӧрысь но Россиысь финн-угор калыкъёс доры вуылэ. Трос гожъя соослэн улэмзы, культуразы сярысь. «Удмурт дунне» газетын усьтэ «Тангыра» финн-угор люкет , берлогес – асьме удмурт шаерын улӥсь калыкъёслы сӥзем «Тугоко» люкет. [3]

2010-тӥ арын Елена Васильевна валтӥсь редакторлэн воштӥсез луиз. Озьы ик со Россиысь финн-угор газетлэн координаторез, парламентской журналист луэ. Сыӵе ик мыло-кыдо пыриське общественной уже. Со «Удмурт кенеш» огазеяськонлэн исполкомаз пыре, удмурт культурая «Дэмен» обществолэн но «Удмурт нылкышно кенеш» организацилэн ёзчизы луэ. [2]

Гожъямъёсыз сярысь

Елена Панфилова пичи дырысеныз гожъяны кутске вакчиесь кылбуръёс, веросъёс но выжыкылъёс. 4-тӥ классысен печатлаське элькунысьтымы удмурт газетъёсын но журналъёсын. [1]

Рос-просгес гожъяськыны дыши мон «Пурга гуръёс» литобъединение ветлыны кутскем бере. Отын ми зэмос писательёсын, кылбурчиосын пумиськылӥмы… Со адямиосын вераськыса, ми мукетэсь луимы. Уг луы ни вал огшоры шаляй-валяй ветлэммы, соослэсь адӟем карыны тыршылӥмы. [2]

Елена Панфилова ас куаразэ утчаны кутскиз огдыре ик прозаын но, литературоведениын но, кылбурет удысын но… Литература сюрес вылэ султӥсь муртэз эскерисьёс нырысь ик учко, шӧдӥське-а солэн аслаз куараез. Елена Панфиловалэн ке – со юн шӧдӥськиз ни «Мумы» повестяз но (со потӥз 1990-тӥ аръёсы эрике куриськем мылкыдъёс, шара веранъёс бордысь), шӧдӥське лирикаяз но. [3]

Елена Панфилова пичи гинэ повестезлы туж узыр, туж аспӧртэмлыко мадён ӧр шедьтэм, со тулкымъёс выллем радъяське. Мадись мурт (повествователь) огвакытэ ик лыдӟисеныз но, асэныз но кенеше-эчеше. [4]

Елена Панфилова – егит кылбурась. Сое сюлмаськыто улонысь астэ утчан, улонмылэн кытчы мынэмез но солэн секытэз сярысь малпаськон. «Вакытлэн нылыз» шуэ ке но ассэ лирической героиня, малы ке но солы та Вакытын капчи ӧвӧл:

Гожъяськисьёсын Л. Малыхен но Е. Виноградовен

«Уг чидаськы сылыны, пилиське лулы-сюлмы». Кызьы ке улонмы огыр-бугыр, озьы ик солэн но пушказ маиз ке но бугыръяське, ог-огзылы пумит луисьмакеосын шӧдылэ («Мон» кылбур). [5]

Четлыке пытсаны

Мон выри кылбурме,

Лек муртлэн кылыныз

Эгесай мылкыдме.

Адями но улон, дыр но вакыт, яратон но шуд… Дунне шоры Елена Панфиловалэн аслаз учконэз. Солэн ӟырдытэсь, эрикоесь но чидасьтэмесь чуръёсыз мылкыдэз бугырто, улонлэсь адскисьтэм палъёссэ шуак усьто.

Тодӥськоды-а, мон тырши вунэтыны кылбуран сярысь. Егит дыръязы ӧжыт-а адямиос мылкыдзэс кылбур чуръёсы кисьто. Дуннеын ваньмыз кемалась кинэн ке кытын ке верамын ни. Мар выльзэ усьто на мон? Усьтӥ ке но, дунне шат воштӥськоз? Но озьы гинэ луысал ке… Сюлэмын тымиськыса улӥсь чуръёсты ӝокатыса уд возьы вылэм. Мон улӥсько соосын ӵош… [6]

Кылбуръёсы пуктэм юанъёс, вератэк кельтэм малпанъёс, чуръёс пуме пӧртэм знакъёс пуктылонъёс верало ини лыдӟисьлы, поэзие дӥсьтӥсь, чидасьтэм, ӟырдыт нылкышно лыктӥз шуыса. [5]

Наградаосыз но премиосыз

Финн посольствоын М. Кастрен огазеяськонлэсь премизэ басьтон

Удмурт Элькунлэн пиналъёсын ужанъя комитетлэн Данъян грамотаез, 1998.

«Удмуртия многонациональная» ӵошатсконлэнлэн «Печатные средства массовой информации» номинациын I премилэн лауреатэз, 2002.

Финляндиысь М. А. Кастрен огазеяськонлэн журналистика удысысь премиезлэн лауреатэз, 2002.

Удмурт лулчеберетэз вӧлмытон но калык кусыпъёсты юнматон удысын бадӟым уж нуэмез понна Удмурт Элькунысь нациосын ужан политикая министерстволэн Данъян бумагаез, 2003.

Удмурт Элькунысь печатья но ивортодэтъя министерстволэн Данъян грамотаез, 2007.

Финляндиысь М. А. Кастрен огазеяськонлэн валтӥсь журналист премилэн лауреатэз, 2009.

Удмурт Элькунлэн Кун Кенешезлэн таукаронэз, 2010.

Удмурт Элькунысь Правительстволэн Данъян грамотаез, 2010.

Библиография

Книгаосыз

Мон – улӥсько! : кылбур бичет. – Ижкар : Инвожо, 2010. – 83 с.

Мумы : повесть. – Ижевск : Удмуртия, 2008. – 63 с.

Статьяосыз

Алина : верос // Удмурт дунне. – 2009. – 23 сент. – С. 7.

Вераськон // Удмурт дунне. – 2010. – 11 июня. – С. 5.

Из : фэнтези // Удмурт дунне. - 2012. - 13 июня. - С. 5-7. - (инГОЖ)

Инме кыско чильтэр бурдъёс / азькылэз Т. Черновалэн // Удмурт дунне. – 2006. – 5 дек. – С. 7.

Куректонэн тырмем омыр = Ohk muret tais // Kuum ӧӧ : suome-ugri ranvaste tanapaeva luulet. - Tallinn, 2006. - С. 504-509. – Текст парал. на удмурт. и эст. яз.

Кышкасько... ; Куректонэн тырмем омыр... ; Чидан чиге... ; Визьмо юртын ; Шуд доры ; Тубон ; Шӧдон // Инвожо = Альманах удмурткого ПЕН-клуба. – 2010. – № 5/6. – С. 137.

Мемей но мон ; Кечато мунё ; Кырымпыдэс : эссеос // Удмурт дунне. – 2010. – 20 янв. – С. 6.

"Монэ валасез валалоз дуннеез..." : кылбур // Инвожо : спец. вып. газ. "Известия Удмурт. Респ." и журн. "Инвожо". – 2011. – № 9/10. – С. 37. – (Удмуртский ПЕН-клуб. Поэтическая площадка).

Прозаез гырись : Татьяна Зайцевалы, литературоведлы : эшлыко чуръёс // Удмурт дунне. - 2012. - 11 марта. - С. 15.

"Сайкаты монэ..." ; "Ӝож. Сыӵе ӝож..." ; Луысал ке... ; Тон уд валаськы ; Шудӥ : кылбуръёс // Удмурт дунне. - 2011. - 13 сент. - С. 7.

Туганэз - выль : Бибинур Загуляевалы, кылчилы : эшлыко чуръёс // Удмурт дунне. - 2012. - 11 марта. - С. 15.

Уйшор чуръёс : кылбуръёс // Кенеш. – 2011. – № 7. – С. 3-9 : фот. – Пуштросэз: Лэзь монэ ; Вакытлэн нылыз ; Сайкан ; Тубон ; Улонлэн позыртэтаз ; "Корос - кулон корка..." ; Кырӟан ; Бус пӧлы выё... ; "Чильпырась кышетэн..." ; "Монэ валасез валалоз дуннеез..." ; Люкиськон ; Ваньмызлэн аслаз дырыз ; "Усиз ке кизили..." ; "...Мынам киям нош инпилет..." ; Сёт бурдъёстэ ; Басьтӥзы ке улонме... ; Анай ; Бертылон ; Пересьмем пичи дыр ; Кикур быдӟа кагаз ; Пыдвыл ; Эн пыкылы, анай ; Чидан чиге... ; Мон - шудо! ; Уйшор чуръёс

Урдо : верос // Удмурт дунне. – 2009. – 8 июля. – С. 7.

"Чырсо ческыт улмо..." : кылбур // Удмурт дунне. - 2014. - 16 сент. - С. 5. - (инГОЖ)

Школае келяз така : юмореска // Удмурт дунне. - 2011. - 2 сент. - С. 15.

Эрик ; Курон ; Быръён ; Мӧзмон : кылтэчетъёс // Удмурт дунне. - 2012. - 14 марта. - С. 6 : фот. - (инГОЖ)

"Я, мар-о мон та улонын?.." ; "Пыдэстэм бекчее тэтчисько..." ; Сайкан ; "Эн серекъя муртлэсь куректонзэ..." ; Визьмо юртын ; Чукырна -шат мон? ; Мон - шудо! ; Кикур быдӟа кагаз ; "Чырсо ческыт улмо..." ; "Монэ валасез валалоз дуннеез..." ; "Тон - кивалтӥсь..." ; "Шыпыт гинэ вӧзтӥм кошке Улон..." : кылбуръёс // Инвожо = Альманах удмуртского ПЕН-клуба. – 2011. – № 5/6. – С. 52-53.

"Я, мар-о мон та улонын?." ; Тӧдьы куака ; "Эн серекъя муртлэсь куректонзэ..." ; Чидан чиге... ; Пересьмем пичи дыр ; Эн пыкылы, анай ; Шуд доры ; "Монэ валасез валалоз дуннеез..." // Удмурт дунне. – 2010. – 25 авг. – С. 5.


Татчы 2005-тӥ арысен потэм чеберлыко статьяос гинэ пыртэмын, кылемъёсыныз тодматскыны быгатӥськоды Удмурт Элькунысь йӧскалык библиотекалэн электрон каталогъёсызъя.

Уже кутэм литература