Редактирование: Павлова Юлия

=Вашкалаез биниське зарни бугоре=
[[Файл:Снимок15.jpg|thumb|left|]]

'''Юлия Павловалэсь ку гинэ эн юа, кыӵе ужъёсыд мыно — со котьку шуоз: ту-у-уж умой! Та веранэзлы амалтэк оскод. Шаркан ёросысь Пороз гуртын вордскем жингрес куараё егит дышетӥсь тунсыко проектъёсыныз паймытъя. Усточи нылпиослэн элькун школаязы со фольклорлы дышетэ, пиналъёсыз пӧртэм конкурсъёсын вормонъёс басьтыло. Будӥсь 2 пиосыз но тодон-валанъёсынызы али ик шумпотто ни.'''

'''- Юля, «Корка нылпиен шулдыр» бадӟым проектэд улонэ пыӵа — филармониын ортчыло удмурт фольклорлы сӥзем нылпи ужрадъёс. Учкисьёс соосты туж кельшытӥзы. Кытысь таӵе малпан кылдӥз?'''

- Та проект улсын чакламын вал 3 бадӟым пумиськон. Кыкез — «Пот, пот, шундые!» но «Зарни бугор» — ортчизы ини. Али куинетӥезлы дасяськиськом. Таӵе бадӟым уж борды, оло, кутскыны ӧй но дӥсьтысал. Филармония ӵектонэн потӥз. Отын та выллем ӟуч фольклорлы сӥзем проектъёссы вылӥллям ни. Вотка ёросысь Новый черкогуртысь «Колядки» ансамбль та ужен вырем. Учкы, пе, соослэсь. Нош мон юромо нокыӵе кырӟам-верамъёссэс пелям ӧй поны, шаерысьтымы ӟуч ансамбльёс пӧлысь «Колядки» тужгес золэз потэ ке но. Шуи: ваньзэ ас малпамея-шӧдэмея радъяло. Сотэк проектъёсмы огкадесьгес луозы. Озьы улонам нырысьсэ бадӟым сценаын ужаны кутски.

«Пот, пот, шундые!» нырысетӥ концертын школаысьтымы нылпиос возьматӥзы трос нылпиё вашкала удмурт семьялэсь одӥг нуналзэ — кызьы анаен-атай ӵукнаысен ӝытозь, кыласа-бураса, визькылъёс вераса, утё-вордо пиналъёссэс. Жаляса верано, аръёс ортчо. Вань со ӟеч сямъёс ышо-быро. Тае малпаса ик, вылды, залын пукись арлыдоослэн амалтэк синъёссы нюромылӥзы.

'''- Мӧйыос но покчиос кыкетӥяз пумиськонэ — «Зарни бугоре» — мыло-кыдо пыриськизы. Секыт ӧй вал-а соосыныз но, таосыныз но ужаны?'''

- Нырысь-валысь репетициос нимаз мынӥзы. Собере ини ӵошен радъяллямы. Соку серекъямы но, бордимы но ини. Я соиз, я таиз песянаймы ыше яке чакламтэ вакытэ сцена вылэ потэ. Но та понна соослы йыр чик но кур ӧз луылы. Дэри ёросысь Пероггуртысь «Кильтырнаос» ансамбльысь 82 аресъем арлыдоослы паймыса гинэ быриськиз: кытысь кужымзы, мылзы-кыдзы потэ? Тӥни кинъёслэсь пиналъёсмылы адӟем кароно! Висёнъёссы, сюлмаськонъёссы вань-а, ӧвӧл-а — шуныт пальпотонэн шумприч экто. «Зарни бугорын» соос школаысьтымы нылпиосын ӵош возьматӥзы «Визь ӝук» йылолэз. Вашкала вакытъёсы пиналъёс, коркась корка пыраса, кеньыр курыса, ветлылӥллям. Кин ке кеньыр, кин ке парсь быж, кук, пель сётэ вылэм. Соин ик ӝук но пӧзьтылӥллям. Йылолмы сцена вылын туж учкымон пӧрмиз. Нош «Ньылен эктонмес» репетициосын юромо ӧм волятэ — импровизация мед луоз. Нылпиос арлыдоосын ӵош эктонэз дышетӥзы сцена вылын, учкисьёс азьын.

Куинетӥ концертмы — «Нылпи — сяська тугоко» — сӥземын луоз фин-угор калыкъёслы, соослэн культуразылы, ог-огенымы кусып воземмылы. Нылпиосын дышетӥськомы эстон, мадьяр, фин кырӟанъёсты. Тау юрттэмзылы кунгож сьӧрын улӥсь удмурт эшъёсылы Светлана Едыгаровалы но Настя Петрова-Дэметерлы. Соос мыным узыр но тунсыко материал келязы.

'''- Та проектын маиз тужгес но секытэн сётӥське?'''

- Номеръёсты ог-огенызы герӟан бордын трос малпаськоно. Ачим ик режиссёр но, постановщик но бере, йырме зол гинэ бергатоно луисько.

Нырысь-валысь мон дышетски Ижысь культурая училищеын калык кырӟанъя ёзын. Бӧрысь пыри Удмурт кун университетлэн искусствоосъя институтаз. Татын ини инбамысь музъем вылэ усем кадь луи.

Калык кырӟан но фольклор чылкак пӧртэмесь вылэм. Фольклорез сцена вылэ поттыны туж секыт. Соин но, оло, егитгес вакытам мӧзмыт малпалляй: туала учкисез сям-йылолъёсын бордад кыскыны быгатод на меда? Нош учкод ке — луэ вылэм. Ужпум со бордын гинэ — удмурт фольклорез вань сюлмысь яратоно! Куд-огъёсыз сое юромо чеберманы выро. Та мыным туж уг кельшы. Фольклор ас понназ туж гочамон ук!

'''- Нош мӧйыослэсь кырӟан-веранъёссэс кытысь утчаськод-шедьтӥськод?'''

- Отысь-татысь тунсыко пересьёс сярысь ивор тодӥсько но соку ик диктофонэн доразы ширтӥсько. Кемалась ӧвӧл вуылӥ Шаркан ёросысь Быгы гуртэ «Быг-быг» фестивале. Отысь шедьтӥ Воткаын улӥсь 82 аресъем Анфиса Фёдоровнаез. Со пластинка кадь — 3 но, 4 но час дугдылытэк кырӟаны-лабыртыны дась. Кызьы собыдӟа арлыдын кылъёсты вунэтэмын ӧвӧл! Кылзыса-кылзыса синкылиос асьсэос васько, ява. Со вашкала гуръёсын кӧня куректонэз, шумпотонэз, яратонэз, малпаськонэз… Амалы ке луысал, ортчем дауръёсы вуылысал, диктофонам вань вашкала удмурт гуръёсты гожтыса кельтысал.

Бичам-шедьтэм материалъёсме бумага вылэ нотаосын пусйылӥсько. Бӧрысь ини школаын пиналъёсын ӵош соосты дышетӥськом. Куддыр дышетскисьёсы но юрттӥсько. Пересь анай-атайёссылэсь кырӟанъёссэс гожтыса ваё. Удмурт визькылъёсты, мадёсъёсты, кырӟанъёсты эскериськом но — паймиськом: кызьы вашкалаосмы, нюлэс кушын улыса, сыӵе визьмо чуръёс шедьтылӥллям. Шуом, куно пумитан гур — «Ӟеч кылмес ке верано, куарлэсь векчи кыл кулэ. Куарлэсь векчи кыл кулэ ӧвӧл, визьмолэсь визьмо куно кулэ» яке «Сю ар ум улэлэ, ойдолэ валче гинэ уломы». Усто малпамын! Жаль, туала егитъёсты поромытэ Интернет. Отысь ваньзэ шедьтозы кожало, лэся. Нош мыным потэ, визь кылэн юрттозы вашкалаосмы гинэ.

Фольклорен висьыны кутскеме бере шӧдӥ, ас бордам трос ужаны кутски шуыса. Али кинлы ке вӧсь карыны шедьтӥсько ке, капчиен дораз лыктӥсько но, вождэ эн вай, шуисько. Удмуртъёс сярысь но трос гинэ малпаськисько. Туннэ ӵем кылӥськомы анай-атайёслэсь верамъёссэс: нылы-пие удмурт сямен вераськыны уг быгато, но валаны туж ӟеч валало. Со чик но умой ӧвӧл. Озьыен, та будӥсь нылпиослэн нылпиоссы удмуртэз уз ни тодэ. Школаын ӟучомись пиналъёсылы но мон шуисько: котькӧня тырше ӟуч кадь кариськыны, удмурт тустэс-буйдэс нокытчы но уд ватэ. Ум валаське узырлыкенымы — удмурт кылэз тодэменымы — данъяськыны.

'''- Школаысьтыды «Шудон» ансамбльды шаерамы гинэ ӧвӧл, быдэс кунмылы тодмо луэ ини. Вормонъёсты вылысьтыз вылаз лыкто.'''

- Зэм. «Шудон» ансамблез кылдытӥз Марина Николаевна Роготнева. Мон солэсь ужзэ азьланьтӥсько. Шумпотӥсько: нош ик выль вормонмы вань. Удмуртиысь Правительстволэсь «Наследники» премизэ басьтӥз мынам дышетскисе Настя Сапожникова. Талэсь азьвыл Глазовын ортчем «Иднакар» фольклор фестивальын Гран-при басьтӥмы. Со нуналэ ик Ижын радъяськиз «Крезьгуро мозаика» калыккуспо фестиваль. Таяз но вуттӥськимы — нош ик Гран-при утӥмы. Трос гинэ дипломъёс басьтӥмы П. Чайковскийлы сӥзем «Зарни пилем» фестивальын. Пусйытэк кельтоно ӧвӧл созэ но: пиналъёсыным вуылӥмы Сьӧд зарезь дуре. Пыриськимы «Зарезь тулкым» калыккуспо ӵошатсконэ. Отысь бертӥмы «Калык вокал» номинацияя дипломен. Тыршеммес дунъяло бере, мылкыдмы лопырске, нош но нош ужаммы потыны кутске. Шаерамы радъяськылӥсь калык культуралы сӥзем одӥг фестивальлэсь но, ужрадлэсь но ум кылиське.

Ачим пыриськи на вал республикаысьтымы усточи нылпиосын ужасьёс пӧлын ортчем конкурсэ. «Калык вокал» номинацияя диплом утӥ. Дышетӥсьёсын ӵош поттӥмы нылпи крезьгуръёсын «Ӟольгыри» сборник. Собере гижысь-пиньысь ужай «Пичи чеберай но батыр» конкурслэн сценариез бордын.

'''- Пиосыд — Артём но Егор — чылк-чылк удмурт кылын верасько. Кызьы, Ижын улыса, ӟуч пиналъёсын эшъяськыса, соосыд ӧз ӟучоме?'''

- Мон малпай: милям выжымы удмурт. Даурысь дауре кыстӥськись со сӥньысэз мыным чигтыны уг яра. Ӧвӧл мынам сыӵе правое. Соин ик азям ужпум пуктӥ: нылпиосыным весь удмурт сямен лабыртоно.

Артёме садэ ветлыны кутскемез бере воксё ӟучомиз ини вал. Ой, мама, снег идёт, шуэ. Мон вазисько: о-о, пие, лымы усе. Нуналысь нуналэ озьы вераськылыса, Артёме выльысь удмурт луиз. Али Кузебай Герд нимо гимназиын дышетске. Яратоно урокез — паймод но бырод — фольклор, пе. Мынам вашкала сям-йылолъёсты гажан мылкыды солы но паласькем, шӧдске. «Шудон корка» телепередачае но трос пол пыриськылӥз ини. Егит кырӟасьлэн [[Ручкина Светлана|Светлана Ручкиналэн]] вордӥськем нуналэзлы, удмурт мультфильмлы уксё бичанлы сӥзем ӝытэз но нуыны пумит ӧз луы. Крезьгурез, сценаез туж умой шӧдэ.

Пичиез, Егоре, Кузебай Герд нимо садэ ветлэ. Пороз гуртам бертӥськом ке, удмурт сямен вераськемзэ гуртоос кыло но чабкисько: кызьы-озьы городысь пиёк удмуртэн шатыр лабыртэ?! Нош мон паймемзылы паймисько. Кыӵе кылын вераськыны кулэ удмурт семьяын будӥсь пинал? Артёмез но Егорез гуртам нуисько, удмурт кылзэс отын мед волятозы шуыса. Нош учкод ке, вераськыны ик нокинэн вылэм ини. Мылкыды ик быре, ӟучомем нылпиосты адӟыса. Соослэн ӟуч кылын шузи-мази ӟабыльтэмзы макем шуш кылӥське.

Али покчиос пӧлын удмурт сямен вераськон кыӵе ке экзотика кадь луэмын ни. Ярам коть, удмурт луэмзылэсь соос уг кепырало. Артёмлы мон весь верасько, тон удмурт шуыса. Нош азьло аръёсы тросэз удмурт егитъёс городын ӟучомылӥзы. Туннэ мон ас вылам туж умой шӧдӥсько: со аръёсы вотякъёс шуыса макем зол ултӥяллязы, али сокем юн чиданлык — иммунитет — кылдэмын. Мон — тёп-тёп удмурт нылкышно, тусы-буйы но, малпаськонэ но… Нокызьы но ӟуч уг луы. Ӟуч калык культура мыным туж тунсыко ке но. Та вакытэ тани Удмурт кун университетысь эшъёсыным ӵош «Нюркины песни» ӟуч фольклор ансамбле кырӟаны-вераны ветлӥськом.

'''- Пусъёно: университетысь тросэз эшъёсыд Москваысь кизилиос дорын ужало. Тынад но быдэс кунмылы тодмо артистъёслы матэгес кариськемед ӧз-а поты?'''

- Монэ кизилиос уг гочато. Мыным тунсыко фольклор. Со пумтэм-йылтэм книга кадь. Макем сое тросгес тодӥськод, сокем тунсыкогес потыны ӧдъя. Нош кизилиос доры матэгес кариськыны котьку луэ — тани та арняе гинэ ветли ай Кристина Орбакайтелэн концертаз.

'''- Мынам кузпалы Порозысь бере, со сипыртӥз: Юля, пе, школаын дышетскыкуд ик, котьма ласянь адскымон вал. Туннэ но тон пӧртэм ӧвӧл. 7 часын ӵукна ик буяськемын, кильтро дӥсяськемын, ай кускад обруч бергатӥськод!'''

- Мыным кельше адямиослэсь пӧртэм луыны. Ӵош ужась эшъёсы серекъяса шуо: тон доры, пе, музее кадь ветлӥськом дӥсяськемдэ учкыны. Дышетскисьёсы но адӟем каро — йӧспӧртэм луыны тыршо, удмурт дӥсен город ульчаетӥ поръяло.

Ай тани концертъёсы пумысен сюлмаськыса, 2-3 киломе куштӥ ни. Ма, туж иназ со — тулыс вуэ ук. Егорме вордэме бере 10 килолы чиедоми — сылалтэк ӝук но ву вылын пуки. Асме весь чакласа улоно луэ. Школаын дышетскыкум, яратылӥ волейболэн, баскетболэн шудыны. Туж кельше бызьылыны. Мылкыдме ӝутӥсько на, ыж гонэн вырыса. Чыртывесьёс, пельугыос, сумкаос гындӥсько.

'''- Вова кузпалэныд кызьы тодматскиды? Со но удмурт ужрадъёслэсь уг палэнскы кадь.'''

-О-о. К. Герд нимо садын пӧртэм калыкъёслэн сям-йылолъёссылы сӥзем «Ӵыжы-выжы» фестивале ӵошеннамы пыриськылӥмы. Поръёслэсь улэм-вылэмзэс, дунне шоры учконзэс возьматӥмы. Нош тодматским ми соин Можгалан. Удмурт кун университетын дышетскыкум, «Эктон корка» студие ветлӥсько вал. Концертэн вуылӥмы Можга палъёсы. Тодӥсько на: туж уг пот вал отчы мынэме. Порозам сюлэмы туж куриськылӥз. Ай автобусмес кык час витимы на. Вуиз но, сюрес вылын тормозэз тӥяськиз. Озьы мырдэм но кызьы Можгае вуим. Туннэ картэлы серекъяса шуисько: дорад чик тормозъёстэк вуи ук!

Вовалэн но сюлэм шӧдэм, лэся. Ас понназ малпам: автобусысь кудӥз нылаш нырысь ик потоз, сое ик кышно ваё. Мон потӥськем. Вова туннэ шуэ: нырысь учкеме бере ик, пе, синмаськи. Кузпалы мувӧй поттон удысын ужа. Висказ дышетскыны тырше на. Мыным но юрттӥськыны пумит уг луы. Ма, анае-атае но палэнэ уг кылё. Нылпиосмы висьыны усё ке, утиськыны городэ вуо. Али соос пенсиын шутэтско ни. Анае быдэс улонзэ ужаз фермаын. Атае пудо першал вал.

Туннэ туж шумпотӥсько: валче кужымен огез бадӟым малпанэ быдэсме — ӟеч кивоштӥсьёсы будо. Озьы бере, удмурт калыкмылэн вашкала сям-йылолъёсыз озьы гинэ сылмыса уз быре ай.

'''Источник:'''

'''Павлова, Ю. Вашкалаез биниське зарни бугоре/Ю. Павлова; записала О. Корепанова // Удмурт дунне. - 2015. - 16 марта - №18 - С. 10, 15. - (Тӧр шорын).'''

'''За предоставление материала выражаем огромную благодарность редакции газеты [http://udmdunne.ru/"Удмурт дунне"]'''

[[Категория: Удмуртские звезды]]