Нефёдова Раиса Геннадьевна

Материал из Воршуда
Перейти к навигацииПерейти к поиску

Одӥгзэ пытьыме выльысь выль лёгысал[править]

Нефёдова Р. Г.

Раиса Геннадьевна Нефёдова – Удмурт Республикаысь калык артистка. Асьмеос дышимы ни кадь адӟыны сое генеральша, эксэй кышно, анай интыын. Пиналъёс сюлэмзы шымырскыса учко кузь ныро пересь Яга шоры. Кыӵе со Нефёдова? Улонын но рольёсаз кадь ик йӧно меда? Нош синъёсыз малы сокем жальмыт учко? Ас азям таӵе юанъёс пуктӥ но ӧжытак кӧбераса вамыштӥ Удмурт театре.

- Вуид-а, нуныкае? Ӟечбур, ӟечбур, - пумитаз монэ Раиса Геннадьевна. Таӵе ӟеч мылкыд бере кыӵе кышкан луоз на? Сцена вылын визь-нод сётӥсь, бадӟым сюлэмо анай огшоры улонын но сыӵе ик ик лякыт вылэм.

Йыромон-а, утчаськон-а?

- Ку нырысьсэ сцена вылэ потӥды?

- Школаын дышетскыкум кылбуръёс лыдӟылӥ. 11-тӥ классэз йылпумъяса, куинь арзэ аслам школаям ужай. «Ӝог юрттэт» сётӥсь интыын вал: кыӵе ке дышетӥсь я висьыны усе, я кытчы ке кошке – вань «пасьёсты» монэн кышъяло. Ӵапак со вакытэ ми коллективенымы валче спектакльёс пуктылӥмы. Ваньмы егитэсь ай. Соин, лэся, таӵе мылкыдмы ӧръяськиз. Степан Широбоковлэсь «Мынам яратонэ татын» пьесазэ, мукет удмурт сценкаосты шудылӥм. Клуб тыр калык люкаськылӥз.

- Быдӟым ож берегес вордскемын тӥ. Улон секытэн-а, школаез йылпумъяса, вылӥ тодон-валан люканы соку ик ӧд кошкелэ?

- Дышетскыны мыныны луонлык вал. Тодӥ Ижысь пединститутэ заочной люкетэ документъёс кутон сярысь. Шоркаре вамыштӥ. Татын ик ар дышетскыса вуттӥ но – газетысь ялонэз адӟи: Удмурт театр артист луыны мылкыд карисьёсты люка. Мынам но мынэме потӥз. Со дырозь артист луон мылкыд сюлэмын гыбдаз. Кӧня киноактёръёслэсь туспуктэмъёссэс люкалляй! Ой-ой-ой! Паймылӥ: кызьы меда Людмила Гурченколэн йырсиез такем чебер тупатъямын. Элина Быстрицкаялы, Изольда Извицкаялы синмаськылӥ. «Тихий Дон» кинофильмез учкеме бере, мыным сокем Аксиньялэн ролез яраз. Кӧня пол романзэ лыдӟи. Потэ артист луэме, нош кызьы отчы мыноно, кудпала вамыштоно, тодын ик ӧй вал.

- Соин-а литературае йыромиды?

- Мон вань сюлмысьтым яратӥ сое. Малы шуоды? Школаямы егит дышетӥсь лыктӥз. Мон, витетӥ-куатетӥ классын дышетскись, синмаськи Фаина Фёдоровналэн кузь, чебер чиньыосызлы. Усто крезьгурчиослэн сыӵе чиньыоссы луо, шуо. Фаина Фёдоровналэн киосыз чебересь бере, озьыен, дышетоно урокез но, литература ваньмызлэсь кулэсгес. Егит дышетӥсь мыным сокем яраз – мон солы праздник-а, огшоры нунал-а, весь открытка гожъясько.

Тямыс класс бере вамыштӥ Нововолковской школае. Классэнымы кивалтӥз Ренат Кириллович Лекомцев – ӟуч кылъя но литературая дышетӥсь. Книгаез но кылэз яратонэ эшшо но муромиз. Татчыозь со мынам кылемын на. Янгышен гожтэмез адӟисько ке, виры ик пӧзьыны кутске.

- 1967-тӥ арын Москвае вуыса, чылкак мукет дуннее сюриды кадь йӧтӥз-а?

- Малпалэ ай: гуртысь адями – Москваын. Со дырозь Глазове но Иже гинэ вуылэме вань. Москвае мыныкум, мыным 21 арес вал ни, озьы ке но палёми: театръёс, музейёс… Ваньзэ, мае адӟыны луэ, учким кадь. Ветлымтэ интыос но ӧз ни кыле.

Мынам аслам улон гоже

- Артистлы кельшисьтэм, сюлэмызъя тупасьтэм роль сётыны быгато-а?

- Кудӥзлы тани сёто роль. Артист чутрак пумит луэ: мон уг шуды сое! Нош мон нокыӵе рольлы ӧй пумитъяськылы. Ми ёзъёслэн сыӵе малпанзы тодазы но ӧвӧл. Нош егитъёс! Эшшо мар, малы мон со ролез шудом, со мынам ӧвӧл, шуо. Нош тон туртты, лэсьты со ролез, возьматы. Оло, сое режиссёр юромо тыныд сётӥз. Оло, солэн тынэсьтыд вань быгатонлыктэ возьматыса ужамдэ адӟемез потэ.

- Тӥледлы ӵемысь йӧно роль висъяло: я анаез, я эксэй кышноез шудӥськоды.

- Мыным кельше сыӵе мур пуштросо образэз возьматыны. Котькуд артистлэн сыӵе режиссёрез мед луоз, кин быгатоз солэсь пуштроссэ усьтыны. Мыным удалтӥз ужаны режиссёрен Александр Вершининэн. Соин валче пуктӥмы «Мае кизид, сое аралод», «Дор» спектакльёсты. Кык сю поллэсь ятыр сцена вылын шудӥськом «Бызьыны вуэм песяйёс» комедиез. Со репертуарысь уг быры.

- Премьераос дыръя быдэс зал калык люкаське, сомында сяська кузьмало. Нош огшоры нуналэ учкись но ӧжытгес луэ, сяськаен но уг шумпотто ке, ӝожмыт ӧвӧл-а?

- Ма, тазэ гинэ чиданы быгатом ни.

- 1973-тӥ арын лэсьтэм туспуктэмдэс учконо ке, ой-ёй-ёй кӧня выль пыжем удмурт артистъёс. Нош асьме театре пӧлысьтызы кӧняез кылиз?

- Али тямыс кузя ужаськомы.

- Азьвыл тӥ театрысь парторганизациен но кивалтӥллямды, директорлы воштӥсь но вылӥллямды. Али сыӵе ужъёсты ӧвӧлэн мӧзмыт уг-а поты?

- Ӧжытак мӧзмытгес но. Мон тау гинэ шуысал коммунистъёслэн парторганизацизы. Малы? Нырысь ик, со дышетӥз монэ дициплиналы. Мынам аслым кылдытэм гоже – ватерлиние – вань. Солэсь улӥегес васькыны но вылӥязгес тубыны но мон уг быгатӥськы. Уже лыктоно ке, ӝыны часлы вазьгес мед вуом. Лэсьтэм ужъёсы азьвыл пуктэм куронъёсылы мед тупалозы, малпасько.

«Кизилиосты» ӝуатӥсь

- Мон малпасько: тӥлесьтыд усто дышетӥсь но пӧрмысал. Угось трос аръёс ӵоже мыло-кыдо ужаськоды «Пурга кизилиос» центрын. Кызьы отчы сюрес лёгиды?

- Пичи Пурга районысь театрез яратӥсь нылпиосын нырысь ужаны кутскиз режиссёр Василий Ушаков. Собере кулэ луэм кыкетӥез дышетӥсь. Мылкыдыд, пе, ӧвӧл-а? Мон но оскалтыны малпай.

- Пургалась усточиосын ужало тодмо артистъёс, писательёс, крезьгурчиос. Озьы ке но, тодӥсько: сомында тыршемзы понна соос трос коньдон ӧз басьтэ. Уждунзы сюрес вылэ ик бырылӥз, дыр. Тӥ но, уксёез тодады вайытэк, арнялы быдэ «Пурга кизилиосы» ветлӥды. Ма со сётӥз тӥледлы?

- Укыр трос ӟечсэ. Нылпиос туж зол сюлэмез бугырто. Ачид но егитомиськод кадь соосын ӵош. Нырысьсэ лыктыкузы, пиналъёс возьдаськисесь луо, ымысьтызы одӥг кыл мырдэм гинэ кыскиськод. Кык-куинь урок ортчыса, кепыранзы но ыше, бурдъясько но кадь – ӵапак со понна мон шумпотылӥ, эшшо улон мылкыд соос кузьмало на. Укмыс ар мон пурга пиналъёсты дышетӥсько ни. Берло дыре Ильинск черкогуртысь нылпиос доры вуылӥсько. Озьы тани луиз: азьвыл сямен ваньмыз пиналъёс Пургала уг ни ветло. Табере дышетӥсьёс меӵак школаосы мыно. «Пурга кизилиосты» кылдытӥсь Владимир Яковлевич Самсонов, таӵе суредэз адӟыса, коросаз ик берыктӥськоз, дыр. Куддыр малпасько, та центр, оло, ӝоген быроз но шуыса. Угось «Пурга кизилиослэн» герӟась кужымез Никвлад Самсонов вал. Али таӵе огъясь мылкыд ышемын. Зэм соиз: дышетӥсьёслы умой, вань нылпиос одӥг школаын ке. Азьвыл тазьы луылӥз: кыӵе ке пьеса басьтӥськом, роль люкылӥськом, нош мукет занятие одӥг гуртысь пинал ӧз вуы, собереяз – эшшо кин ке. Озьы ке но пӧртэм школаосысь дышетскисьёс люкасько ке, пӧлазы ӵошатскон пуроме, котькудӥзлэн маин ке висъяськемез потэ. Соиз умой вал.

- Укмыс ар ужатозяды пумитады-а сыӵе быгатӥсь пиналэз, кинэ коть али ик театральной училищее лэзь вал?

- Соку ик Баграш-Биграысь Валера Чибышев тодэ лыктэ. Та школаысь ик етӥз Руслан Матвеев ветлӥз. Али со Можга педколледжын театр люкетаз дышетске.

- Огзылэн но шат артист луон мылкыдзы сокем ӟырдыт ӧвӧл – театральной училищеосы уг йыгасько?

- Кызьы шуо, урод, пе, соиз солдат, кинлэн генералозь будэмез уг поты. Пиналъёсын нырысьсэ пумиськыку, мон огвыллем юан сётӥсько: «Малы «Пурга кизилиосы» лыктӥд»? Артист луэме потэ, шуо. Со понна трос ужано, валэктӥсько. Котькуд куараез, кылэз йӧн-йӧн веран понна нуналмысь тыршоно – артикуляционной гимнастика лэсьтоно. Дышетске, дорады ужалэ шуыса, келясько пиналъёсты. Мукетъят пумиськыкумы гимнастика сярысь юасько но, нылпиос йырзэс ошо. Ӧм лэсьтэ, пе.

- Эшшо ма бордын гижысь-пиньысь тыршоно на артистлы?

- Нырысь ик, сцена вылын вераськыны. Кыкетӥз – эктон. Уг яра малпаны, татын туала сямен позыръяськыны-тэтчаны дышето шуыса. Эктон – со мугорлэн каньылэн куасалляськемез, нуйтӥськемез. Угось сцена вылын тэтчано но, жугиськоно но. Театральной училищеын ми фехтованилы но дышетским.

- Куддыр сцена вылэ мунё кадь чебер дыды потэ. Мукет дыръя со ик конгро ныро Ягалы пӧрме. Ватонэз ӧвӧл: татын туж зол грим юрттэ. Нош кин буя-сына актрисаез?

- Асьмеос. Талы но училищеын ик дышетӥзы. Кылсярысь, вань «портретной» нимаськись грим. Огаз занятилы мон дасяй француз актрисалэсь Полина Виардолэсь туспуктэмзэ. Собере пӧртэм кремъёсын, буёлъёсын асме солы укшатыны выри. Пӧрмылӥз. Пересь муртэ шудоно ке, кисыриос суредано луэ. Котькуд рольлы выль ымныр малпано.

Шып-шып, ас поннам

- Палэнысен учкыса, тӥ туж йӧно йыг-йыг вамышъясь адямилы тупаськоды. Нош театрлэн палэназ - семьяын, эшъёсты пӧлын – кыӵе луиськоды?

- Маке уж борды кутскисько ке, нокин медаз люкеты кадь потэ. Дорын но сиён пӧраны ӧдъясько ке, нокин монэн медаз вераськы. Шып-шып улыны яратӥсько. Семьяосы маке туж кулэ луыку гинэ мыным одӥг-кык кылын вазё.

- Озьыен, кузпалдэс ческыт сиёнъёсын ӵемысь шумпоттӥськоды. Нош малы-о карттылэсь йырзэ соку ик ӧд берыктэ? Кылэм вань, тӥ, пе, ог-огдэс Москвае мынэмлэсь азьло ик Ижын конкурс дыръя синйылтӥллямды. Малы кузпалъяськондэс вить ар возьмано луиз?

- Петялэн туж юн малпанэз вал: нырысь дышетсконэз йылпумъяно. Мыным соя кариськыны кылиз. Собере мон кемалась тодӥсько вал ни, картэ Петя нимо луыны кулэ шуыса. Мадём-а? Егит дыръям тунаськи: изьыны выдыку, миндэр улэ бумага вылэ пи нимъёс гожъяса тыри. Ӵукна кыӵеез ки улам сюриз, сое ик поттӥ. Петя. Фу! Сяласькисько. Гуртамы Петя нимо пи улӥз, нош мыным со воксё уг кельшы вал. Зэм, кузпалы мукет Петя луиз.

- Дорады кыӵе кылын вераськиськоды?

- Анаеным но Петяен удмурт сямен, нош Ксюшаен оломалы кылы весь ӟуч кошке. Нылы ваньзэ удмурт сямен вала, нош бӧтьыртыны кутске ке, пичияк янгыша, ачиз ик сое шӧдэ но нош ик ӟуче выже.

- Кемалась ӧвӧл пусйиды 55 арестэс. Пенсие уг на-а улляло?

- Кызьы шуо, артистъёсты театрысь уг улляло, татысь соосты потто гинэ на. Валентина Загуляева но Вероника Садаевалы быдэн 65 арес, Леонид Романовлы но 65 луоз, Геннадий Соловьёв 70 арес бере театрысь кошкиз. Вань сыӵе положение: 50 аресысен драматической актрисаос пенсие потыны быгато. Озьы Галина Владыкина но, Фаина Будина но, Ольга Чужанова но пенсионеръёс ни.

- Табере мон валай кадь: котькыӵе удысэз басьты, семья-а со, нылпиос-а, яратон-а – тӥлесьтыд улон сӥостэс герӟа театр.

- Бен, мынам сюлэмы пырак удмурт театрлы сётэмын. Секыт мыным, театрын рос-прос кивалтӥсь, зэмос режиссёр ӧвӧл ке. Оскем потэ умоезлы. Оскисько: ӟеч спектакльёсмы луизы ке, удмурт учкись но аслэсьтыз театрзэ юнгес гажаны кутскоз.


Источник:

Нефёдова Р. Г. Одӥгзэ пытьыме выльысь выль лёгысал / Р. Г. Нефёдова ; записала Алёна Ионина // Удмурт дунне. - 2004. - 13 февр. - С. 6, 11. - (Удмурт кизилиос).


За предоставление материала выражаем огромную благодарность редакции газеты "Удмурт дунне"