Наговицын Сергей Грацианович

Материал из Воршуда
Перейти к навигацииПерейти к поиску

Писпу возиське выжыосыныз[править]

С. Г. Наговицын

Удмуртъёс пӧлын педагогика наукаосъя докторъёс чиньыен лыдъямон. Соин ик таослэн радазы кин ке выль мурт пыре ке, юн шумпотоно. Туннэ педагогика наукаосъя доктор луыны дасяське Сергей Грацианович Наговицын - биатлонъя СССР-ысь спортъя мастер, отставкаысь полковник, Россиысь Правоя академилэн Ижысь ёзысьтыз - Юридической институтысь - гуманитарной но социально-экономической дисциплинаосъя кафедраен кивалтӥсь, Ижысь Общественной палаталэн муртэз. 1969-тӥ арын вордӥськем пиосмуртлэн печатламын ни 64 научной ужез, соос пӧлын 3 монографиез но трос дышетонъя пособиосыз.

- Пичи дыръям мон туж шаян вал, - веранзэ мытэ Сергей Наговицын. - Анай-атае али ке но уг тодо, но мон еж дыръям тулыс котьку дыртылӥ Иж ӵыпет вылэ. Йӧ вырӟемын ни. Кузь боды кутӥсько но эшеным ӵош тэтчисько бадӟымгес йӧ вылэ. Соин, пыжен сямен, кӧты тырымон уясько, бодыеным солань-талань донгаськыса. Али ке но паймисько, кызьы ӧй выйы.

Милицилэн юртаз но кӧлэме вань. Со юлтошеным ик трамваен город кузя ворттылыны уд поты-а! Солань-талань ветлӥськом, маке быдӟа куараен кесяськиськом на. Центре ваським но йыромим. Кытчы мыныны ум валаське. Одӥг воргорон ӧз чида - милицаос кие кельтӥз милемды. Таосыд жалязы: шкапысьтызы прениксэс поттӥзы, сюдӥзы, чаен сектазы. Атай уйшор бере гинэ вуиз ай милемды басьтыны.

- Чик ӧз йӧтты шат?

- Ма, со дышемын ни вал, дыр, шаянтэмелы. Нылпи садысь но пегаме вал ук. Анай-атае, гуртэ бертом, тонэ вазьгес басьтом, шуизы но, асьсэос уг вуо. Вунэтӥзы, кожай. Пегӟи. Бертӥсько но, ӧс пытсамын. Всё, малпасько, таос монэ кельтӥзы. Куректыса сылонъям ик вуизы. Соку тӥни йӧтӥз вал золгес. Но пиосмуртэ озьы гинэ визьмалод шат?

Удмуртъёс востэм но дӥсьтӥсьтэм луо, шуо ке но, малы ке та сямъёс вирам пыӵаса вуттӥллямтэ. Ижын вордӥськеме но будэме воштӥз, вылды, сямме. Ма, нылпи садын но мыным огпол гинэ визь тырыны ӧз выре. Пичи дыръям мон одӥг ӟуч кылэз но уг тодӥськы вал. Воспитательёс мар сярысь ӟабыльтэмме ӧз валаллялэ. Йырзы кур луэмен, куддыръя тышкаськылӥзы но. Озьы тӥни пушкысьтым удмуртэз вольтчытыны выризы. Но мон ӧй сётскы. Зэм, вордскем кылыным туннэ вольыт вераськыны уг пӧрмытӥськы ни. Та пиртэше понна аслэсьтым ачим ик возьдаськисько. Куддыръя уго чылк-чылк удмуртэн вазем потылэ, нош кылме бералтэме уг лу ни.

- Нош мон малпасько вал: спортэн вырись муртлы ваньмыз лякытэн сётӥське…

- Шонер, спорт адямиез кыдатэ, котькыӵе шуг-секытъёс азьын кужмо каре. Но таяз учыре со но монэ ӧз юнматы. Зэмзэ вераса, куасэн бызьылыны мон, оло, ӧй но кутскысал. Куать арес дыръям киям нырысьсэ кутӥ пӧйшураны яратӥсь ӵужатаелэсь пыӵалзэ. Дарылэн (порох) зыныз кудӟытӥз монэ. Сюлэмам туж кема нуллӥ на ӵашйыса кадь чузъяськем куаразэ но. Сокугес ик вордскиз таӵе мылкыды: военной луо. Валай мукетсэ но: та малпанэз улонэ пыӵатон понна тазалык кулэ. Озьы дас кык арес дыръям ачим куриськи Ижысь 7 номеро нылпи спортшколае. Отысь тренер Александр Мокрушин монэ валтӥз куасэн бызьылонэ. Татысен выжи биатлонэ, герӟаськи «Ижпланета» спортклубен.

- Городын но республикаын ортчылӥсь ӵошатсконъёсысь огысьтыз но ӧд кыльылэ, шуо.

- Зэм. Дышетӥсе куддыръя монэ урокъёсысь но уг лэзьы вал. Жади ни, пе, журналэ пусйылыны, тон ӧвӧл шуыса. Весь куаретылӥз: кин тон интые визь люкалоз? Зарни медален школаез йылпумъямме возьма вал со. Нош мон «ньыльёсгес» бичай. Дышетӥсьёс шуылӥзы: талы янгыш спортэн выремед. Соослы уд валэкты ук вормонлэсь шӧмзэ. Ярано коть, ачиз директор мыным дурбасьтылӥз, со ачиз мозмытъяз монэ урокъёсысь. Данъяськиз, луоз, нырысетӥ инты басьяменым.

Озьы ке но лыдъясько: асме рос-прос возьматыны быгатӥ армиын дыръям, Москва дорын сурон сапегъёсме пӧськытыкум. Татын ик биатлонъя СССР-ысь спортъя мастер луи.

- Телевидениысь яратоно каналды «Спорт», дыр?

- Озьы луыны кулэ, дыр, но мон сое учкыны уггес турттӥськы. Мурт вормонъёс мылкыдэз саптало. Россиысь биатлонъя чемпионат вал туэ. Отын вормиз Мордовилэн сборноез. Нош кин отчы пыре? Ньыль удмурт! Асьмелэнъёс сопала 2008-тӥ арын ик кошкизы. Табере тани Иван Черезов но Максим Максимов спортсменъёсмы ӝутыны ӧдъязы Тюменьысь спортэз. Та пияшъёсты мон туж умой тодӥсько. Ваняез ачим дышетӥ ай куке-соку. Бертэмезлы быдэ пумиськылӥськом. Валасько: асьме дорын мугорез кыдатыны луонлыкъёс бадӟымесь луысалзы ке, огзы но палэнэ ӧй кошкысалзы. Малпасько: матысь 7-8 ар ӵоже Удмуртиын уз луэ ӟеч биатлонистъёс. Егитъёслы табере нокин сьӧры уйиськыны-кыстӥськыны. Ма, ужзылэсь азинлыксэ адӟытэк ик, мылкыдзы куашкалоз но, мукет удысын кужымзэс мертаны ӧдъялозы. Жаляса верано, таӵе югдуре вуэмын куасэн бызьылон но. Зэм, спортэн вырисьёслэн стипендиоссы туннэ бадӟымесь. Но коньдон бордын гинэ шат ужпум? Мон егит дыръя 3 стрельбище вал. Али - одӥг. 1980-тӥ аръёсы кужымез кыдатыны луэ вал «Ижсталь», «Ижпланета», «Металлист», «Темп», «Буммаш», «Буревестник» спортклубъёсын. Глазовъёс данъяськизы «Прогрессэнызы». Арнялы быдэ огпол ке но одно радъясько вал ӵошатсконъёс. Стартэ огдыре потэ вал 300 мурт. Республикалэн первенствоез понна нюръяськон 3 этапен ортчылӥз. Туннэ та номыр ӧвӧл.

Асьмелэн биатлон комплексмы гинэ но дуно коттеджъёс вискы пачкатэмын. Стрельбище куашкан калэ вуэмын. Отысь мишеньёс шоры 20 ар талэсь азьло ыбылӥськизы ни.

- Ёросъёсын стадионъёс ӝутӥсько ук, солы шумпотыны кулэ.

- Шонер пусйиды: ёросъёсын. Нош мар лэсьтӥське Ижын? Али тани Чекерил спорткомплекс котырын бергало. Рос-прос ужаны кутскиз ке, куасэн бызьылон но, валэн ворттылон но радъяськозы. Но гуртоос сокеме лыктозы шат? Асьсэ стадионазы гинэ но кужымзэс эскерыны мылзы уг поты ай. Гужем сярысь веранэз ик ӧвӧл - луӵӵе бакчаосазы копаськозы. Ма, районъёсын тренеръёс но лябесь. Городын со ласянь капчигес. Пиналъёс, ваньмон дырзэс юнме быдтытозь, спортэ мед кыстӥськысалзы. Тае лыдэ басьтоно вылэм.

- Ӵапак таӵе югдурен сэрен спортысь ӧд-а кошке? Армиысь бертэмды бере тӥ Ижысь 12-тӥ школаын усьтӥды вал биатлонистъёсты дасянъя школа. Асьтэос тренер луиды.

- Спортысь кошкемелэн мугез одӥг гинэ ӧй вал. Тренер луыны мыным туж кельшиз. Ма, кин ке малпа, вылды: мар-о косъяськонлэн но тышкаськонлэн шугез? Озьы ӧвӧл со. Тынад дышетскисед стартэ потэ ке, тон ачид но соин артэ шок-пуль бызиськод кадь, янгышъёсыз понна астэ йырйиськод. Ярам, тренерлэн та гинэ ужез луысал ке. Тӥрлык вужмемын. Уксё ӧвӧл. Пыдкутчанъёс, куасъёс син азьын куашкало. Кин сое лэсьтоз? Уйёсы ачим пукылӥ-лякылӥ. Собере школаме но ворсазы. Ижын, пе, сотэк но тырмо спортклубъёс.

Солэсь азьвыл монэ милициын ужась эшъёсы ялан ӧтьылӥзы доразы, кӧня, пе, куас тупатъянэн вырод на? Милям, пе, тытын со ласянь капчигес. Аслам но погонъёс нуллэме потэ вал. Та малпан но маза ӧз сёты, лэся. Соин ик куриськи МВД-е.

- Полковникозь ӝутӥськыса, милициын кызь ар ужаса, малы интыяды пукыны ӧд чидалэ? Тӥ сюлмаськемен, Россиысь Югдурез утёнъя министерстволэн Нижний Новгородысь академиезлэн Ижысь ёзаз - Милицилэн школаяз - кылдӥзы спортплощадкаос. Озьы ик колониосын ӝужазы мугорез кыдатыны юрттӥсь сэрегъёс, отчы пуксизы пӧртэм пумо тренажёръёс. Кечат-вамат сьӧры шедемъёслэн мылкыдзы лӧптӥз, таза улон котыре кыстӥськыны ӧдъязы. Пӧртэм эскеронъёс ортчытъяса, таза улонлы сӥзем кандидат уж но гожтӥды.

- Вуоно милиционеръёс пӧлын спортэз мон огнам ӧй азинты. Бадӟым кужым, аслым оскон сётӥз Нижний Новгородысь академилэн Ижысь ёзэныз кивалтӥсь Юрий Антонов. Ӵапак соку татын радъямын вал йӧнала спортбаза, усьтӥськиз тир.

- Табере тӥ педагогика наукаосъя доктор…

- Воксё озьы шуыны луэ меда? Зэм, Санкт-Петербургын ӝыны ар талэсь азьло защитае ортчиз ни. Кандидатлы, ужзэ эскерыкузы ик, ним сёто ке, доктор луыны секытгес. Тонэ быдэс ар ӵоже юнматытэк возьыны быгатозы. Малы ке шуоно со дыр ӵоже уждэ нимысьтыз эскере Россиысь комиссия. Соин ик доктор луэме сярысь мукетъят, киям дипломе вуэм бере, вераськомы ни. Мед кисьмалом на.

- Озьы ке но тодэм потэ, мае тӥ эскериды таяз учыре.

- Европалы матынгес кариськеме потӥз, лэся. Отысь дышетон радлыксэс асьмелэнэз вылэ «золъяй». Асьмеос дышемын ни адямилэсь визьзэ вить баллъя дунъяны. Шонергес вераса, ньылья. Туала вакытэ «кол» журналэ уг пуктӥськы. Но сыӵе вашкала дунъетъёсын ужаны яра на меда? Оло, 100 баллэ выжоно? Та юрттоз адямиез быдэсак чакланы. Нырысь ик, тодон-валанзэ. Кыкетӥез, учкомы, макем со пыриське общественной уже. Куинетӥез, эскеромы, макем ӟеч сётъя экзаменъёссэ. Ваньмыз та юрттоз валаны, кыӵе адями азямы, быгатоз-а со ассэ улонын шедьтыны. Со бордысь ик потоз ни: таидлы 100 балл яке ӧжытгес пуктоно.

Горд диплом уго уг возьматы на, тон туж ӟеч ужась ни шуыса. Специалист луон понна вить-куать ар гыроно на. Европаын таӵеосты уже ик уг куто, соослы чик кулэ ӧвӧл номыр но карыны быгатӥсьтэм муртъёс. Асьмеос но пумен сыӵе калэ вуиськомы. Сотэк-а студентъёс радысь потэм маке туж шуген кытчы ке интыяське, ӵемысь ассэ воксё но уг шедьты. Уноез каръяське магазинэ, кыӵе ке менеджерын ужа. Шонер-а та? Ӧвӧл. Ӵапак студентэз 100 баллъя чаклан ик юрттоз азьланяз ӟеч специалист поттыны. Егит мурт уго тодоз ни: нокыӵе ужъёсы али ӧй пыриськы ке, азьланяз мыным капчи уз йӧты.

- Тӥ ЕГЭ-лы но дурбасьтӥськоды, луоз?

- Шонер. Туэ Ижысь гурт удысъя академиын радъямын вал конференция. Отын куаретӥсь шедиз: нырысетӥ курсысь студентъёс туж ичи тодо, ЕГЭ-ен ӟеч отметкаоссы ке но вал. Кин но со лекъяськиз: ЕГЭ уг возьматы адямилэсь зэмос тодон-валанзэ, йырвизез со сыномытэ гинэ, озьыен, сое быдтоно. Оло нош чик но ЕГЭ бордын ужпум ӧвӧл? Оло нош йырвизез сыномытэ туала дышетон система? Мон советской школа пыр потӥ. Соку дышетон программаез юнматылӥз СССР-ысь Калыкез дышетонъя министерство. Мукет сямен вераса, тон коть бадӟым городын ул, коть пичи гуртын - ваньзы визь люказы одӥг авторлэн учебникезъя. Нош туннэ? Котькуд школалэн аслаз программаез. Одӥгезлы дышетӥсьлы огез учебник сюлмызъя, музонэзлы - мукетыз. Физкультуралы гинэ но одӥгаз школаын арняяз куинь час висъямын, мукетаз - кык.

- Куд-ог школаос, ЕГЭ-лы дасяськыны дыр уг тырмы шуыса, «кулэтэм» предметъёсты воксё но быдто. Кылсярысь, удмурт кылъя но литературая часъёсты кулэсто…

- Таӵе учырын ЕГЭ-ез янгыш карыны луэ меда? Огпол юромо Интернет вотэсэ пырай. Отысь шедьтӥ 2008-тӥ ар понна ЕГЭ-лы дасям юанъёсты. Бырйи история, обществознание но ӟуч кыл предметъёсты. Эскероно кожай: кӧня юанлы шонер валэктон шедьтыны быгато? Люкай ог 85 балл. Отметка вылэ выжтоно ке, со «витьлы» матын. Мукет кылын вераса, котькуд пинал, сое дыраз дышетӥд ке, талэсь улӥе уз лэзиськы. Солэсь ортчыт, ЕГЭ юрттэ вань адямиосты одӥг дуско вылэ пуктыны.

- Но ЕГЭ-лэн урод палыз но вань: кузьмаськон кырмиськиз школаос борды.

- Соиз вань ик. Солы ним но сётэмын: платные услуги. Аслам 13 аресъем пие сыӵе вотэсэ сюрылӥз. Школаын визь люкакуз, дышетӥсез сое но эшъёссэ урокъёс бере келляны кутскем, со понна уксё курыны ӧдъям. Визьнодасьлэн правоез ӧвӧл пиналэз нимысьтыз дунын дышетыны. Собере, законын вань на таӵе валан но: федерал компонент. Отын тӧдьы вылын сьӧдэн гожтэмын, кӧня час нуиськыны кулэ соиз я таиз предмет. Сое тӥясьёсты улляно. Со сяна, мыным воксё уг кельшы классъёсты люкемзы: таиз юн, соиз ляб, куинетӥяз мургес дышето куд-ог предметъёсты. Нош маин висъясько та классъёсы ветлӥсь пиналъёс? Оскытыны выро: Ижын 30 номеро школаын юнгес валэкто математикаез. Кин тодэ, та удысын, оло, генийёссы вань ик, но ваньзы математикъёс уг луо.

- Законъёсты ӟеч тодӥськоды, шӧдске.

- Туала вакытэ соосты тодытэк луэ меда? Вылаз ик, мон Ижысь Общественной палаталэн муртэз луисько на. Тӥ но али шуоды, дыр: солэн кужымез вань шат? Ма но со карыны выриськомы ик. Кылсярысь, школаосын но нылпи садъёсын попечительской совет луыны кулэ шуыса законэз ачим эскери. Со сяна, Удмуртиын спортэз но мугорез кыдатонъя культураез азинтон сярысь законэ воштонъёс но мон дэмлай.

Источник:

Наговицын С. Г. Писпу возиське выжыосыныз / С. Г. Наговицын ; записала Е. Сараматова // Удмурт дунне. - 2010. - 24 сент. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"