Максимов Леонид Михайлович

Материал из Воршуда
Перейти к навигацииПерейти к поиску

Быгатонлыктэ вакытаз дуроно[править]

Максимов Л. М.

Леонид Михайлович Максимов - техника наукаосъя доктор, профессор, Удмурт Республикаысь наука удысысь дано ужась, УАССР-ысь гурт хозяйствоысь дано механизатор, Россия Федерациысь вылӥ профессиослы дышетон удысысь дано ужась. 50 ар ӵоже тырше ини Ижысь гурт удысъя академиын агроинженерияя (азьвыл механизацияя) факультетын. 1984-тӥ-2003-тӥ аръёсы кивалтӥз «Гурт хозяйствоысь машинаос» кафедраен.

Та паймымон воргорон, Удмуртиын гинэ ӧвӧл, быдэс Россиын тодмо луэ техника малпаменыз но сое выльдэменыз. Кылсярысь, ваньмыз тодо солэсь картошка октон машинаоссэ.

Патентэн юнматэмын ӵужкушман октон комбайн, му вылысь ӵужкушманлэсь куарзэ ишкон, картошка быръён, бакча кидыс кизён машинаосыз но трос мукет изобретениосыз. Тодосчилэн машинаосыз юнматэмын 62 патентэн. Удмурт Республикаысь гурт хозяйствоын ужасьёс пӧлын сыӵе изобретатель ӧвӧл ни.

Ӟеч тыршемез понна Леонид Михайлович Максимовлэн нимыз но туспуктэмез куинь пол пырылӥзы Ижысь гурт удысъя академилэн но Ижысь Октябрь ёрослэн Данъян пулъёссы вылэ.

Профессорлэн кивалтэмез улсын кык сюлэсь трос студент диплом гожтӥз. Леонид Максимовен ӵош дас одӥг студент выль техникаез кылдытӥсь луиз. Тодосчи юрттэмъя, вить аспирант наукая кандидат луиз, кык мурт будӥз докторозь.

Шудо пичи дыр

Вордски Балезино ёросысь Чуйялуд гуртын 1932-тӥ арын. Семьяын куать нылпи пӧлысь кык кузя кылимы: Егор агае но мон. Монэ муми 42 аресказ ваем на.

Лидия Спиридоновна мамаелэн дышетскемез нокӧня но ӧй вал. Гуртысь но ноку палэнэ ӧз поталля. Тятяе, Михаил Лукьянович, со вӧзын йӧно адскиз: 4 классэз йылпумъямын, Нырысетӥ дунневыл но Граждан ожъёсы пыриськемын. Коммунист. Балезиноын нырысетӥосыз пӧлын кылдытӥз «Коммунар» артель.

Со вакытэ Чуйялудмы артэ гуртъёслэсь узыреныз висъяськиз. Бадӟымесь гидкуазьёсын, пӧртэм пужыё буям ӟезьыосын юртъёс котькудӥз гурт кузё выллем адско. Колхозын - етӥн вӧй, кирпич поттон заводъёс, магазин, вуко, пул пилён. Вал ни татын грузовой машина но. Городын сямен, нуназезэ нылпиосты яслие, садике нуллӥзы.

Со суредъёс вунонтэм кылизы. Капчи, мыло-кыдо ужась гуртоос. Хозяйство куинь бригадалы люкемын. Куспазы ӵошатсконъёс ортчо. Огпол сыӵе но учыр тупаз. Куинетӥ бригада, мукетъёсыз медам кылэ-тодэ шуыса, валъёссылэн пыдъёсазы гын сапегъёс кутчаса, ватскыса сямен, вазь ӵукна бусые ужаны потӥз.

Гужем калык кырӟаса бертылӥз ужысь. Нош куазь шундыё ке, нылкышноос ог-огзылэсь чебер дӥсяськылӥзы. Сюлмысь тыршизы, мылкыдзы ӝутӥськемын - озьы вань бусы ужъёс дыраз быдэсъяськизы. Толалтэ но калык тэк ӧз улы. Кышноос черсӥсько, керттӥсько, вурисько, куисько. Пиосмуртъёс кут кутало, гын сапег кышъяло, пу дасяло. Тодэ лыктэ мукетыз но: толалтэ туж трос праздникъёс тупаллязы. Ми доры кык но, куинь но нуналлы мукет гуртъёсысь валэн куноос вуылӥзы. Асьмеос но собере кунояны ветлылӥм. Озьы, война кутскытозь, шудо улӥмы, йӧспӧртэм «нылпи коммунизмын» кадь.


Кӧт сюма - йыр ужа

Шудо вакытэз тарказ 1941-тӥ ар. Пиосъёсты нуналлы быдэ кадь фронтэ келяллямы. Гуртэ кылизы куать пересь воргорон, кышномуртъёс но пиналъёс. Та аре мон школае вамыштӥ. Нырысь аръёсаз дышетсконын эшъёсылэсь номырин ӧй висъяськы. Куинетӥ классысен задачаосты но примеръёсты мульыез кадь куаданы пӧрмытӥ.

Соин куд-ог анай-атайёс нылпиоссэс дорам ысъяны ӧдъязы. Юрттэме понна, тау карыса, пу дӧдьы, куды кузьмазы, курегпуз но мукет ческыт пыжиськемъёс вайылӥзы. Ньылетӥ классэз Данъян грамотаен йылпумъяй. Озьы ке но гужем вакытэ йырыз ужа шуыса ӧз жалялэ, ваньмыныз огкадь колхоз ужын пӧсяй. 9 аресысен трудодень понна тырши ни. Эшъёсын ӵош уриськимы, шеп бичамы, валъёсын турын нуллӥмы, усыямы.

Тазэ но учырез уг вунэтӥськы. Азьвыл ю шертонын молотилкаос ужазы. Быдэс нунал ӵоже валъёс молотилка котыртӥ бергазы. Огпӧртэм уж туж акылес потэ. Пиослы ӵектӥ таӵе амал. Вуж пулъёслэсь 2 метр пасьтана круг лэсьтӥм, молотилка шоры юнматӥм, пукон инъямы. Пунӥмы на кузь сюло. Черодэн интыяськиськом пукон вылэ: огез пияш валъёсты ужатэ, нош мукетъёсыз со вакытэ шудыны быгато. Та вал ужез капчиятонын нырысетӥез ӵектонэ.

Дышетсконме азьланьтӥ Балезиноысь шор ёзо школаын. Улӥ патерын. Кӧлан интые - пол, ӟус, полать. Сиёнэ но йӧскадь ӧвӧл. Арнялы быдэ дорысь ныпъяса нуллӥ картофка, сылалтэм кубиста, пичияк пызь. Сое котькуд нуналлы огкадь люкыны выри, озьы но кӧты весь сюмаз. Классын одӥг тодмое но ӧвӧл. Соин, лэся, сием потонэ уката золъяз монэ. Со муген ик урокъёсын но шып пукылӥ, тодэмме но ӧй вералля. Ма, тетрадь но, книга но ӧвӧл. Ӝыныез школа госпитальлы пӧрмытэмын. Классъёс - кезьытэсь баракъёс, татын солань-талань бызьыло комакъёс. Дышетскон мылкыды уката куашказ. Урокъёсы ветлэмысь дугдӥ. Ӵемысь калги чугун сюрес дуртӥ, поездъёсты, калыкез, шпанаосты чаклай.

Огполаз уроке учырай ик. Арифметика мынэ. Дышетӥсь юа дорысь ужзэс. Туж шуг задача вылэм, нокин но быдэстымтэ. Бускелелэн тетрадяз учки но - соку ик йырам решениез кылдӥз. Киме ӝутӥ, доска доры потыса, лэсьтӥ. Урокъёс бере монэ дышетӥсь директор доры пыртӥз.

Отын визьмазы урокъёсы ветлымтэысь но ушъязы задача лэсьтэме понна. Соку ик карандаш но тетрадь сётӥзы. Дышетскон арез йылпумъяй, урокъёсты кельтытэк. Эшъёсылы задача лэсьтыны юрттылӥ. Соос гажазы монэ. Гужем озьы ик колхозын тырши. Уж трос. Сиён начар. Ваньмы ик пиос огвыллем лапегесь кылимы.


Пу чемоданэн - институтэ

Мон дорозь Чуйялуд гуртысь одӥг адями гинэ шор ёзо школаез йылпумъяз. Аттестат басьтыса, малпай институтэ пырыны но инженер луыны. Но малпамъя гинэ улыны уг луы. Мумилы 62 арес ини, Егор выны - висись, трудармиын ужа. Дорын копейка но коньдон ӧвӧл. Покчи классъёсты дышетӥсь двоюродной братэ доры 30 иськемзэ пыдын вамышъяй. Юрттӥз - 70 манет сётӥз. Егор вуж чассэ кузьмаз. Пу чемоданам муми понӥз ӵыжтэм вӧй но кык сукыри нянь. Сыӵе узырлыкен сюрес вылэ потӥ.

Коньдонысьтым 68 манетсэ но 10 копейказэ билетлы быдтӥ. Улытозям нырысьсэ пукси поездэ но Свердловск городэ ширтӥ. Документъёсме сётӥ Уралысь политехникая институтэ, бырйи туж шукырес лыдъяськись факультетэз - физикая но техникая нимаськисьсэ. Сю адямилы инты вань. Куриське 660 абитуриент, пӧлысьтымы 110-эз - медалистъёс. Физикаез но химиез «витьёслы» сётӥ. Сочинениен «куинь» лякизы. Ньылетӥ экзаменэ ӧй ни пыры.

Пу чемоданэн, копейка но коньдонтэк, арнязэ сютэм - вамыштӥсько город ульчаостӥ. Ӟус вылын кӧлӥ. Ӵукна дӥсьтытэк пыри столовое. Кема пуки. Отын ужасьёс ӧз чидалэ, юазы: кытысь-марысь вуэмын тон? Жаляса кык тусьты ӝук но шыд сётӥзы, грузчике ужаны ӧтизы. Верантэм шумпотӥ.

Арня ортчыса, газет вузан киоскысь яркыт ялонэз синйылтӥ: Свердловскысь гурт удысъя институтын усьтӥське механизацияя факультет. Ӵуказеяз ик отчы лобатӥ. Азьвыл сётэм экзаменъёсы вӧзы кык предметъя гинэ тодэм-валанме эскеризы на. Кызьы уд шумпоты: студент луи, общежитиын сэрег висъязы. Дышетски гижысь-пиньысь. Экзаменэ кык пол ветлэме ӧвӧл - ваньзэ котьку дыраз сётъяй, шпаргалкаосын но ӧй выры. Висказ, станциын вагон бушатъяса, коньдон поттӥ. Дыр кыльылӥз на лыдӟиськыны, комсомол ужын берганы.

Куинетӥ курсэз йылпумъяса, дорлы матэгес кариськем потӥз. Выжи Молотовысь (Пермьысь) гурт удысъя институтэ.


Востэм кивалтӥсь

1955-тӥ арын институтэз йылпумъяй, ужаны лэзизы Балезино ёросысь Бадӟым Юнда МТС-э. Ёросын таӵе станцизы куинь. Огаз но инженерзы ӧвӧл. Мон - нырысетӥез.

Ужме мытӥ секыт югдурын. Ю калтон вакытэ тордэмзы понна ужысь мозмытӥзы МТС-лэсь директорзэ, партилэсь интыысь секретарьзэ но мастерскоен кивалтӥсез. Мыным, егит специалистлы, кыткиськоно луиз кивалтон удысэ. Шаплы луэменым ноку ӧй висъяськылы, нош татын асме егит но туж востэм шӧдӥ. Озьы ке но каньсыраса улыны дыр ӧвӧл. Пертчоно производствоын кылдӥсь шуг-секытъёсты, зӥбломытоно ужасьёс куспысь керетонъёсты. Озьы ик МТС-ын но ужез радъяно.

Гуртысь мастерской ноку ӧз эстӥськы, машина но трактор ёзъёс гӧртэмын. Трактористъёс курмем дӥсен, пыдъёсазы кутэн, гольык киосын машинаосты бичало-тупатъяло. Ваньзы ӝожтӥсько, кезьыт шуыса, но нокин номыр уг кары. Ӵектӥ кормозапорниклэсь лэсьтыны парен ужась пурты. Шуныт сётӥсь гумыосты куштӥськем корт пӧлысь утчамы. Толэзь ӵоже батареяос но пӧрмытӥмы, парен ужась пурты но вуиз. Мастерскойын нырысьсэ кылдӥз шуныт. Воргоронъёс шумпотэменызы монэ ки йылазы лэйкатӥзы. Таӵе нуналъёс али но уг вуно. Странаен Н. Хрущёв кивалтыку, гурт хозяйствоын валантэм воштӥськонъёс кутскизы. Районысь куинь МТС-ёсты одӥге огазеязы. Мыным инженерлэсь ик ужзэ ӵектӥзы. Ар ортчыса, валтӥсь инженер каризы. МТС-ын ужасьёс тыршизы, час шоры учкытэк. Соин республикаын бӧрсьысь кык ар техника дасянъя но тупатъянъя нырысетӥ инты возимы.

Ужез ӟеч валаме понна телефильме но сюриськиз. 1958-тӥ арын комсомоллэн обкомез ӵектэм Удмурт телестудилы фильм дасяны. Озьы шеди «Молодёжь нашей МТС» возьматонэ. Нырысьсэ ачим мадиськи экран пыр. Таяз учыре кыллы ӧй ёрмы. Уго ужез тодӥсько ни. МТС-ёслы луыса со вакытэ колхозъёс ӟеч урожай басьтыны кутскизы, йылӥзы йӧл но сӥль поттон. Но ӟеч кутсконэз таркасьёс шедизы. Шӧдтэк шорысь Компартилэн ЦК-ез но СССР-ысь Министръёслэн Кенешсы пуктӥзы: МТС-ёслэсь ужзэс выль сямен радъяно. Соку вань техникаез колхозъёслы но совхозъёслы дунтэмен вузано луим. МТС пӧрмиз техникаез тупатъясь интылы. Вань ӟеч специалистъёсты ужысь уллязы. Мылкыд куашказ. Йырвизьме бергатонъям сыӵе малпанэ вуи: гурт хозяйство - секыт удыс. Я куазь солы пумит мынэ, я кивалтӥсьёс валантэм воштӥськонъёс ортчыто. Татын вормонъёс басьтыны туж секыт.


Нырысетӥ вормон

Соин малпай дышетон удысэ кыстӥськыны. Оски: тодон-валанэ нырзэс мултэс уз чуртналэ реформаен вырисьёс, политика лэсьтӥсьёс. Но производствоысь ишкалскыны соку ик ӧз кылды. Мылкыдме тодыса, партилэн райкомез монэ пуктыны малпаз вордскем колхозам председателе. Та сярысь ивортӥзы гурт удысъя министрлы но.

Нош мон со вакытэ ик, сельхозинститутэ ужаны куриськыса, министерствое гожтэт келяй. Вазиськонэ тупаз сельхозинститутысь ректорлэн куронэныз. Таиз сюлмаськиз вузысь кафедраосы ӧтьыны производствоез ӟеч тодӥсь-валась специалистъёсты. Министр сюресме ӧз ӵогы. Озьы мон вуи институтэ.

Бырйи гурт машинаосъя кафедраез но ассистентлэсь ужзэ. Малпай, татын творчество вите. Озьы, Балезиноысь куинь комнатаем шуныт квартираез кельтыса, улыны выжи студент общежитие. Кык поллы кулэсмиз уждунэ но. Ваньмыз эшъёсы паймизы: малы берлань чигнаськод? Ма, ачим но укыр шыпыт ужелэсь акыльтыны ӧдъяй. Но яратон мылкыд ваньзэ берыктӥз. Ужан вискам тодматски вуоно кузпалэным - Тамара Михайловнаен. Ар ортчыса, Павел пимы вордскиз. Улон воксё мукет ӧре кожиз кадь.

Ужын вормонъёс но азинсконъёс тупазы. Ӵош ужась эшъёсы ректорлы вазиськизы: Максимовлы студентъёсты кемалась дышетоно ни. Преподавателе пуктэмзы бере лекциос лыдӟыны кутски, оскизы курсовой но диплом ужъёсты нуыны. Но со вакытэ ик партилэн обкомаз гочатыны ӧдъязы. Нырысь инструктор, пе, луод, собере отделэн кивалтод. Сӥзизы бадӟым оклад, квартира, ӟеч сиён-юон, арлы быдэ курортэ путёвка. Но валай: сыӵе майбыр улон - огдырлы. Ӧй мыны.

Со понна институт сётӥз вуж коркась кык комнатаен патер. Оски: тупатъялом-выльдом. Со понна уката но выйи кадь эскерон ужам. Малпаськыны ӧдъяй картофка октон машинаосты выльдон сярысь. Уже кыстӥськиз 4 ар. Та дыр ӵоже 5 пӧртэм машина дасяй. Утчаськонэ вӧзы ватсаськизы на экзаменъёс, нуналмысь лекциос, коньдонэз шыръян. Озьы уйёсме иземысь дугдӥ, соин но висён погыртӥз. Арлэсь кема виси, кыкетӥ этаже мырдэм тубай. Кин тодэ ай, мар луысал, но бурмытӥзы монэ куасэн бызьылон но пыдын ветлон. Соку ик йырам чилектӥз на картофка копан арбери лэсьтонъя мукет амал. Пӧрмиз ук! Выль машинаез кылдытэмелы нырысетӥ свидетельство басьтӥ. Соку ик кужыме но кык поллы йылӥз кадь. Уката, кыкетӥ пие - Лёвае вордскиз. Диссертациме ути Москваын гурт удыслы машинаос лэсьтон институтын.


Малпан быдэсмиз - партия куашказ

1970-тӥ аръёслэн шоразы монэ обкоме ӧтиз гурт удыс понна кыл кутӥсь секретарь Н. Г. Кулагин. Ачиз но со МТС-эн кивалтэмын. Мыным ӵужкушман октонъя шугъяськонъёссэ вераз. Та бакча сиёнэз утялтон вакытэ бусые потто школаын дышетскисьёсты, студентъёсты, заводын ужасьёсты. Соин валче дышетон куашка, городын транспорт ветлон дыр сураське. Кивалтӥсьлэн юанэз одӥг: уз-а луы картофка октон машинаен ӵужкушман бичаны? Тае эскерыны капчиен соглаш кариськи, берло валай, макем секыт возэ кыткиськи. Уго ужез али ик мытоно, нош нокыӵе база ӧвӧл: не коньдон, не токарен-слесарьёс. Соку вераськон ӝутӥ институтын студентъёслэсь конструктор бюрозэс радъян пумысен. Бӧрысь 5 ар ӵоже кураським на: я мастерской, я станокъёс, я материал. Но ӵужкушман октон комбайн дасянмес ӧм аналтэ. Вуим одӥг малпанэ: кылдытоно выль агрегат. Нырысь ик шедьтоно амал: кызьы кешыр куарез турнано. Таиз бордын кызё ар пала тыршимы. Со дыр куспын 18 пӧртэм амал ӵектэмын. Со пӧлысь 14-езлы патент сётӥзы. Озьы ик, та ужпумлы сӥзьыса, уно гожъямын диплом ужъёс, куинь диссертация но дасямын.

Ӵужкушман куарез ишканъя таӵе усто агрегат быдэс дунне вылын ӧвӧл ни. Но ӟечлык сьӧры уйиськыса, вунэтӥм дырез. Обкомлэсь куронзэ быдэстӥм, нош партия куашкаса вуттӥз. Гурт удысын но воштӥськонъёс луизы. Табере сомында гектаре кешыр кизисьёс ӧвӧл ни. 80 процентэз ӵужкушман нимаз адямиослэн бакчаосазы будэ. Нош калыклы милям машинамы кулэ ӧвӧл. Ярам, берло дыре кешыр будэтон борды басьтӥськизы фермеръёс. Соос, юрттэт курыса, дорамы вазисько.

Огдырлы вунэтэм кадь луиз картошка октон техника. Соин нош ик та удысэ кыстӥськи. Малпанъёсме ватыса ӧй улы, соин, лэся, дасям схемаосыя техника поттыны кутскизы «Рязсельмаш» но «Лидсельмаш» (Белоруссия) заводъёс.

Бӧрысь йырме тӥяй на картошка пудэз утялтон бордын. Вань та ужамме адӟыса, Россиысь гурт удыслы машина лэсьтонъя институт ӵектӥз доктор диссертация утьыны. Вакчи дыр ӵоже тазэ но ворми. Озьы удмуртъёс пӧлын техника наукаосъя нырысетӥез доктор луи. Со сяна, кылдытӥ 54 пумо изобретение.


Тӥтэк - кин-о мон?

Кема дыр ӵоже институтын огнам техника наукаосъя доктор вал. 2003-тӥ арын бордам ватсаськиз Павел пие. Табере со но доктор, профессор ини. Али агроинженерияя факультетлэн деканэз.

Ужын матысь юрттӥсе луиз покчиез пие но. Лёва институтын студент дыръяз ик уно станокъёсын ужаны дышетскиз, слесарьлэсь но, сварщиклэсь но ужзэс ӟеч тодэ. Студентъёслэн конструктор бюрозы со вылын возиськиз. 90-тӥ аръёсы ужамезлы коньдон но ӧз тыре, нош со тышкаськемез пеляз но ӧз поны. Яратэ ужзэ, озьыен, нокытчы уз вырӟы. Лёвалэн кузпалыз Елена Вениаминовна но тодосчиослэн сюресазы ик кожиз. Со академиысь пудо эмъянъя факультетэз горд дипломен йылпумъяз, кандидат ужзэ утиз, институтын ик тырше.

Кышное Тамара Михайловна - туж чупрес, визьмо нылкышно. Вань дорысь ужъёсты, коньдон ужпумъёсты со бергатэ. Профессиезъя но угось экономист. Тамара Михайловна пиосмылэсь тыршемзэс вала, данъяське соосын.

1990-тӥ аръёсы кун заказъёс шуак быризы. Соку ми доры вазиськизы Воткаысь машина поттонъя но «Нити-Прогресс» заводъёсысь конструкторъёс. Соос ик выль машинаосмес улонэ поттӥзы - адӟытӥзы «Ижтех-94» выставкаын. Машинаосты тупатъяны кулэ вал на. Но коньдон ӧвӧлэн та уж дугдӥз.

Огполаз огнам но комбайн бичан борды кутскылӥ. Эскери Шаркан ёросысь «Мишкинский» СПК-ын. Берлогес ассэ умой возьматӥз картошка пуд утялтон агрегат. Соин гурт хозяйствоос куремъя машинаос бичаськомы ик. Соос кулэясько ӵужкушман пудэз висъясь техникалы, кык рад кизись мотоблоклы. Арендае курыло картошка октон комбайнэз. Кылем арын лэсьтӥмы ӵужкушман кизён выль агрегат. Эгра но Дэри ёросъёсын хозяйствоос туэ картошка октӥзы пичи комбайнэнымы.

Озьы ке но быдэстэм ужъёсын буйгам уг поты. Кылдытысал на чылкак выль картошка октон машина. Но кытын сое бичалод? Туннэ таӵе техника лэсьтонэн кык мастер выре. Нош быдэс заводъёс со вакытэ ик буш сыло. Кытысь ке коньдон кыскыны луысал ке? Таӵе малпаськон лулсэръёсме тарка.

Тау кареме потэ юрттӥсь-валась адямиослы. Соос эскеронъёс дыръя но палэнэ ӧз кыльылэ, коньдонэн но юрттылӥзы. Тау Дэри ёросысь «Пальниковский» хозяйстволэн тӧроезлы В. Болтачевлы, «Мир» агрокомбинатлэн кузёезлы Г. Красновлы, «Путь Ильича» колхозлэн кивалтӥсезлы В. Никитинлы но «Юськи» СПК-лэн кузёезлы Е. Ходыревлы.

Улонлы ӝожтӥськем уг поты. Адями узыр, пичиезлы но шумпотыны быгатэ ке. Семьяе ӟеч, ваньзэ лэсьтӥ тыро-буро улон понна. Бадӟым узырлык вордэ вожпотонэз, вожъяськонэз. Капчи улыны, инкуазен валче шокаса, котырад ӟеч калыкез люкаса.


Источник:

Максимов Л. М. Быгатонлыктэ вакытаз дуроно / Л. М. Максимов ; записала Юлия Кузьмина // Удмурт дунне. - 2009. - 13 нояб. - С. 6, 11. - (Удмурт кизилиос).


За предоставление материала выражаем огромную благодарность редакции газеты "Удмурт дунне"