Лимонова Надежда Петровна

Материал из Воршуда
Версия от 14:42, 6 февраля 2015; Admin (обсуждение | вклад) (1 версия импортирована)
(разн.) ← Предыдущая | Текущая версия (разн.) | Следующая → (разн.)
Перейти к навигацииПерейти к поиску

Книга борды ӵемтыса[править]

Limonova.jpg

Та йӧно, чебер, пальпотӥсь, адямиосын быгатыса вераськись кышномурт сокем ваменэс луыны быгатэ шуыса, нырысь-валысь уд но малпа. Газетэ гожтэмлы быдэс ар пумитъяськыса улӥз: кызьы, пе, сокем тодмо, бадӟым адямиосын одӥг радэ султом? Но чидан гурезьёсты но берыктэ, шуо. Озьыен, тодматскиськом:

Лимонова Надежда Петровна: Вордӥськемын Дэбес ёросысь Данёгуртын.

Дышетскемез: Удмурт кун университетысь кунгожсьӧр кылъёсъя факультет.

Ужан тубатъёсыз: Вотка ёросысь Первомай школаын немец кылъя дышетӥсь. Ижысь Жданов нимо лыдӟиськонниысь библиотекарь, нылпи библиоткаен кивалтӥсь.

Городысь библиотекаослэн ёзэтазы методист. Удмурт Элькунысь Национальной библиотекаысь шаертодонъя отделысь валтӥсь библиотекарь, 1993-тӥ арысен шаертодонъя но финн-угор литературая ёзэн кивалтӥсь. Ужез уно данъян грамотаосын пусъемын, Удмурт Элькунысь культура удысысь дано ужась ним сётэмын.

Семьяез: картэз Лимонов Владимир Аркадьевич, суредась. Пиез Сергей, 29 арес, юрист, улэ Санкт-Петербургын.

- Уно аръёс ӵоже библиотекаын ужаса, тӥ сямен, воштӥськиз-а кадь лыдӟиськисьёслэн лыдзы, яратоно книгаоссы?

- Шаертодонъя отделын ужасько бере, мынам уг луы вераме, дас вить ар талэсь азьло лыдӟисьёсмы одӥг выллем книгаосты ярато вал, нош али мукетъёссэ шуыса. Шаертодонэн вырисьёс - дышетскись-а со, тодосчи-а, яке огшоры ас шаереныз тунсыкъяськись мурт - ми доры лыкто нимысьтыз юанъёсын: шуом, этнографияя, калык культурая, историяя, шедьтэм информациез ужазы кутон понна. Аръёс ортчемъя соослэн куронъёссы ӧз воштӥське.

Но мынам туж шумпотыса пусъеме потэ берло аръёс ӵоже фондмылэсь узырмемзэ. Азьвыл шаертодонъя книгаос ӧз тырмылэ, ванез но вужесь, бездыт тусоесь вал. Нош туннэ шаертодонэн тунсыкъяськисьес самой шудоесь. Уго библиотекамес огъя басьтоно ке, мукет отделъёсы, шуом чеберлыко литературая ёзэтэ, туж ӧжыт книга вуэ. Азьло аръёсын ӵошатыса, 3-4 пол ичигес. Соин ик тросэз лыдӟисьёс отысь кулэ ивор уг шедьто. Нош милям удысмы берло аръёсы узырме. Книгаос пото синмаськымонэсь пуштроссы ласянь но, вылтуссыя но. Кияд кутытэк уд чида.

- Трос дауръёс ӵоже Россия дуннеын тужгес но трос лыдӟиськись кунэн лыдъяськылӥз. Нош туннэ - сизьыметӥ интыын. Пӧрмоз на-а меда валтӥсь интыез берен берыктыны. Ма со понна лэсьтоно?

- Азьло сямен, калыкез нокызьы но уд лыдӟиськыты ни. Адямилэн котьку маке выльзэ тодэмез потэ. Луллэсь «сюмамзэ» азьло тырмытыны быгатэ вал книга гинэ. Нош туннэ вань телевизор, интернет, кино - котыр ивор вераны луонтэм трос. Солэсь воксе палёмоно. Адямилы мешокен коньдон кисьтӥд ке, со нырысь-валысь уз но вала, ма соин карыны – солань-талань пазяськоз. Иворен но озьы ик. Кӧня ке дыр ортчыса, адямиос солэсь жадёзы, буйгалозы, выльысь берытскозы книга доры. Но, мыным потэ, со дырез матэгес карыны луэ. Та бордын нырысь ик ужаны кулэ анай-атайёс. Соос асьсэос мед возьматозы лыдӟиськонлэсь пайдазэ. Нылпи пичи дырысеныз ик тунсыко книгаосын котыртэмын луиз ке, мумы-бубыезлэсь лыдӟиськемзэс адӟиз ке, со одно ик литератураез яратыса будоз. Озьы ик югдурез тупатон понна тыршыны кулэ дышетӥсьёс но библиотекарьёс. Соос тэшкылиослы тужгес но умойёссэ, яркытъёссэ книгаосты ӵектӥзы ке – нылпиослэн вылез борды кыстӥськон мылкыдзы уз сӥя.

Пичиос ӵемгес мед ӵемтозы умой книгаос борды. Огпол канжаськыса, соос книгаез киязы кутозы, ӵуказеяз кӧня ке бамзэ учкозы, нош усьсэяз быдэссэ лыдӟыса потозы.

- Нош асьтэлэн яратоно книгады вань-а?

- Школаын дышетскыкум, мон программаен ӵектэм произведениосты ваньзэ сямен лыдӟыли. 9-тӥ классэз йылпумъяме бере Удмуртиысь делегациен вуылӥ Совето Союзысь пинал краеведъёслэн слётазы. Со ортчиз А. С. Пушкинлэн улэм интыосаз. Отысь бертэме бере мон поэтлэн гожъямъёсаз выйи. Выльдӥськон кутскем бере азьвыл лыдӟыны лэзьымтэ литература дорамы вуиз но, мон отчы выйи. Шузими В.Шукшинлэн веросъёсын книгаосыныз. Собере мукетъёсызлэн черодзы вуиз - Ильф но Петров, Зощенко, Аверченко – соослэсь устоез писательёс мон понна кема аръёс ӵоже дунне вылын ӧй вал. Бӧрысь выжи мемуаръёс вылэ. Берло вить арзэ воксё синмаськыса лыдӟисько поэзиез. Паймисько солэн кылызлы, кызьы поэтъёс одӥг кылбурын сомында вераны быгато. Туж кельшо туала гожъяськисьёс. Соос туж кужмоесь. Но жаль, туэ тросэзлэн книгазэс поттэмзы, гожъямъёссэс лыдӟись доры вуттэмзы уг луы.

Яратоноез сярысь ке верано, мынам туннэ ӧвӧл сыӵе книгае, кудзэ ке мон лыдӟо, лыдӟо но лыдӟо…

- Туала библиотекарь но библиотека – кыӵе луыны кулэ соос?

- Дунне вылын урод книгаос ӧвӧл, уго котькудаз кыӵе ке малпанэз вань, котькудаз авторлэн сюлэмыз понэмын. Соин ик котькудӥз книга ас лыдӟисьсэ шедьтыны кулэ. Нош со понна кыл кутэ библиотекарь. Кемалась ик ӧвӧл, таӵе учырен пумиськимы. Сукыръёслэн библиотеказы ужасьёс дорамы дассэ тужгес но устооссэ берло дыре потэм удмурт произведениосты бырйыны курыса вазиськизы. Соосты, пе, синтэм яке лябӟись адямиослы лыдӟымон карозы. Пусъем произведениос пӧлын Генрих Перевощиковлэн «Узы сяськаян вакытэ» повестез вал. Сое адӟыса шуо: ма, пе, та сюлэмез бугыртӥсь произведение, ойдолэ, сое палэнтом. Кызьы-озьы? Одӥг адями сое секытэн лыдӟем но табере мукетъёсызлы вуттоно ӧвӧл, кожа. Нош эмъясь озьы ассэ возиз ке? Та висись мыным уг кельшы, мон сое уг йӧнаты шуиз ке. Соин ик ӟеч библиотекарь нырысь ик тырше котькуд книгалэсь кулэлыксэ адӟыны, калыклы сое возьматыны.

Туала лыдӟиськонниын ужась одно ик туж визьмо мед луоз. Лыдӟисьлы кулэ книгаез пальпотыса сетэм сяна, со тодыны кулэ ивор утчасьлы маин эшшо юрттыны луоно. Со понна дорамы вуись вань книгаослэсь пуштроссэ тодоно, газет-журналъёсты учкыса потоно. Туала технологиосты ӟеч валано, тодоно, кытысь кулэ информациез капыртыны луэ. Лыдӟисьлы зэмзэ но юрттыны быгатӥм ке, «куноосмы» уно но уно луозы. Тани берло дыре бадӟым магазинъёс пукто, отын - няньысен кортӵогозь - ваньмыз вань. Ми но со выллем ик - лыдӟисьесмылэсь вань кулэяськонъёссэн быдэстыны быгатыны кулэ.

Со понна ми ӟеч кусыпъёс возьыны тыршиськомы Россиысь финн-угор калыкъёслэн библиотекаосынызы – Карелиысь, Комиысь, Марий Элысь, Мордовиысь но Ханты-Манси шаерысь валтӥсь лыдӟиськонниосын эшъяськиськом. Озьы ик Венгриен, Эстониен, Финляндиен. Ми соосын ӧм тупалэ ке, Удмуртиен герӟаськем материалъёс, шуом, тодосчиосмылэн отын печатласькем ужъёссы, удмурт лыдӟись доры ӧз вуэ ке, соку, милемлы, библиотекарьёслы, дун – копейка. Ведь милям кадь фонд быдэс дуннеын овол. Малпаське ай, кытын люкало на удмурт шаертодонъя информация. США-ысь лыдӟиськонниосын шат? Шуом, кунмылэн историезъя книгаез шедьтыны луоз котькудысьтыз сямен библиотекаысь, нош удмурт шаертодонъя – ми дорысь гинэ.

Америкаысь одӥгез президент ас вакытаз туж ӟеч кылъёс вераз: кунлэн экономикаез сярысь ваньзэ вераны луэ, солэн библиотекаосаз пыраса. Мон соин быдэсак соглаш. Басьтэ ай Финлядиысь библиотекаосты. Мон со кунын кык гужем ӵоже стажировка ортчи: финн кылэз дышетӥ, книга юртъёссылэн ужаменызы тодматски. Гурт лыдӟиськонниязы нырысьсэ вуэме бере синвуаськытэк ӧй чида - сыӵе усто библиотекаослэн ваньзылы шумпотыса но жаляса - милям валтӥсь библиотекаосмы но таӵе выжыкыллы инбамозь кадь кыдёкын. Нош гурт библиотекаосмы сярысь кылпум ик поттыны возьыт. Макем ӧжыт вуо отчы книгаос, араз ог дасо пала гинэ. Макем ӟеч утё отын котькудзэ книгаез. Нош милям? Басьтом 1970-тӥ-1980-тӥ аръёсты. Вылӥысен верало: та книгаосты ӝажы вылысь утялтэ, лыдӟись кие соос медам сюре. Малы? Авторез кунгож сьӧры пегӟиз. Мар-о со сыӵе?

Книгаос уг тырмо, ваньзэ но кытчы поныны паймиськом, соосын адӟытон лэсьтыны озьы ик луонлыкмы ӧвӧл – интылы туж ёрмиськом. Газет-журналъёс сярысь веранэз ик ӧвӧл. Малпаське ай, шуом, студент лыктэ библиотекае, нош кулэ книга уг шедьты. Кыкетӥзэ, куинетӥзэ вуэ – нош ик буш киын бертэ. Собере со лыдӟиськонниослы оскемысь дугдэ но, ужзэ гожтыны кинэ ке но дунын медъя. Озьы мурт визьмын дышетскем адямилэсь ӟеч специалист пӧрмоз шат? Нош сыӵе специалистъёс кунмес пыд вылаз умой-умой пуктыны быгатозы-а? Соин ик мон но шуисько: библиотека со шаермылэсь экономиказэ возьматӥсь лакмус кагаз. Нош милям со туннэ пиштӥсь льӧль.

- Уд-а жаляське, Надежда Петровна Лимоновалэсь, оло, бадӟым, тодмо педагог пӧрмысал шуыса?

- Пичильтык но уг. Тэшкыли дыръямы ми дышетӥсь но эмъясь луонэз сяна ӧм тодылэ. Эмъюмен вырон мон котьку но вераны луонтэм кыдёкын вал бере, юанъёс ик ӧз кылдылэ – дышетӥсь луо. Университетэз йылпумъяса, школае вуэмелы туж шумпотӥ. Нош библиотекае шедеме бере мон соку ик валай: та инты мыным Инмарен дасямын, татысь кошкыны уг ӵыды ни. Собере, нылпи библиотекае шеди бере, мон ӧй но вала, шуак ужме воштӥ шуыса. Но школаысь кошкеме бадӟым шуккет луиз аслам но картэлэн анай-атайёсмылы. Уго соос туж данъяськылӥзы, нылзы но кензы дышетӥсь шуыса. Нош библиотекарь – кин-о со? Ӝуась синъёсы шоры учкыса, дышетӥсьёслэсь, анай-атайёслэсь пӧртэм юанъёсын, куронъёсын дорам вазиськемзэс адӟыса, соос но валазы библиотекарьлэсь дунзэ.

Библиотека мыным туж бадӟым луонлык сётӥз тунсыко адямиосын тодматскыны, котьку но малы ке вылезлы дышетскыны, азьлань мыныны. Кылсярысь, ужъя ми ӵем потаськомы элькунмылэн палэназ, пӧртэм семинаръёс, пумиськонъёс, дышетонъёс ортчытъяськом, нош макем узыр песьтэрен бертӥськомы отысь. Мон котьку но верасько: вань профессиос куинь уж вылын инъяськемын - эмъясь, дышетӥсь но библиотекарь. Малпаське ай, со удысъёсын ужась адямиостэк нокыӵе мукет профессия уд басьты.

Уж воштэмам урод палъёсыз но вал: мон немец кылэз вунэтӥ. Лыдӟиськыны быгатӥсько, верамез валасько, но шалтыр вераны уг пӧрмытӥськы, кыл утчасько ини. Озьы ке но, немец сямен вераськемез кылӥсько ке, пельме маяллям кадь потэ.

- Кызьы-о пичи удмурт гуртысь нылашлэн йыраз кылдӥз кунгожсьӧр кылэз дышетон сярысь малпан?

- Школаысен туж яратӥ географиез, олимпиадаосы но ветлӥсько вал. Но уж быръён дыр вуэм бере малпай: географиез ас поннам но дышетыны быгато, нош немец кылэз, мын ай, ас поннад дышеты! Кури дышетӥсьмылэсь немец кылын литературазэ, сое «йырйыны» ӧдъяй. Со дырысен монэ урокъёсын ӧз юаллялэ ни. Нош макем мынам тодэмме возьматэме потэ вал – али но кӧты куректэ на.

- Улонысьтыды тужгес но яркыт учыр?..

- 15 ар талэсь азьло мон кыкетӥзэ вордӥськи. 1992-тӥ арын вуи Удмурт Элькунысь Национальной библиотекае. Монэ татчы «куразы» мукет лыдӟиськонниысь - калыккуспо ужъёсъя специалист кулэ луэм. Со дырозь библиотекаын таӵе ужась вылымтэ на, мыным ӵектӥзы: ӝыны арзэ литератураен, калыкен тодматскы, каллен-каллен ужан ӧре пырод. Соглаш кариськеме бере кыкетӥ нуналаз ик песьтэр ныпъязы: туж бадӟым выставка дасяно луиз. Со ужаз библиотекалэн вань ёзъёсаз, нимаськиз «Удмурт калыклэн историез но культураез». Адӟытон дасян сяна, сое усьтонлы сценарий гожтыны косӥзы, ачид ик нуод, шуизы. Та ужез быдэстон понна мон ваньзэ сямен удмурт историяя но культурая книгаосты лыдӟыса потӥ. Соку пайми, удмурт калык макем тунсыко но узыр вылэм. Удмурт менталитетлы сӥзем 19-тӥ даурысь гожъямъёсты лыдӟыса, асме ӟечгес валаны кутски. Мон пичи дырысеным ик тёп-тёп удмурт кылын вераськыса будӥ, нош аслэсьтым удмурт луэмме, мукет калыкъёслэсь висъяськемме уг шӧдӥськы вылэм.

Ужрад ортчем бере дорам, ӟеч кылъёс вераса, кык туж синмаськымон кышномурт пыриз. Огзэс но уг тодмаськы. Одӥгез вылэм Мария Михайловна Самсонова. Со библиотека ужын аксакал, шаертодонъя ёзэн кылдытӥсь, тодмо писательлэн кышноез. Нош мукетыз ымзэ усьтӥз гинэ но, сюлэм вылтӥ вӧй кисьтэм кадь луи, солэсь куаразэ мон котькуд нунал вань сюлмысьтым кылзӥсько уго – Милитина Васильевна Решитько-Гаврилова. Так кык дано кышномуртэн тодматскеме мыным эшшо одӥг пыкъет луиз. Шуак синъёсы усьтӥськизы: макем визьмоесь, учкымонэсь вылӥллям удмуртъёс. Нош мон? Вераськисько шенгыль-пенгыль, асваланэ но удмурт ӧвӧл вылэм. Уката ик В. Е. Владыкинлэн книгаысьтыз таӵе кылъёсты шедьтыса, бордазы кугӟай: зэмос удмурт, пе, туж ӟеч кырӟаны быгатэ. Уг ке пишмыты, со – кыкетӥ сортъем адями. Нош мынам атае – гуртысьтымы нырысетӥ арганчи, анае паймымон чебер кырӟа, мынам ке пель вылам гондыр лёгаськем гинэ ӧвӧл, эктэм но, лэся. Ӵапак со «удмурт луон вакытам» куатетӥ классын дышетскись пие гуньдытӥз. Мама, шуэ, тон «ӟардон» кылэз «з» букваен вера, адямиос медам валалэ, тон ӟуч ӧвӧл шуыса. Соку мынам солы возьматэме потӥз: удмурт луонлэсь ӧвӧл возьдаськоно - солы шумпотыны, соин данъяськыны кулэ. Та малпанэ пӧрмиз кадь - университетын дышетсконзэ йылпумъякуз, пие вераз: «Туж тонэныд данъяськисько но туж тыныд вожъяськисько – кык кылэз, кык культураез тодӥськод – тон кык пол узыргес». Мыным потэ, тае ӟеч валаны кулэ анай-атайёс, нылпизэс школае сётыкузы. Соос кожало, нылпизы кык кылэз дышетӥз ке, секыт луоз, сураськоз. Уз! Кылъёсты тодэмез солы капчиенгес дышетскыны юрттоз, дуннеез яркытгес кароз, адямиосын капчиенгес кусып тупатыны нодъялоз. Республикамылэн палэназ кошкыса, мон котьку но тодам возисько – шорам библиотекарь шоры кадь гинэ уг учко, удмурт калыклэн нылыз шоры кадь учко.

- Кыӵе вал пичи Надялэн самой льӧль малпанэз но быдэсмиз-а со?

- Малпанэ кык вал. Нырысетӥез – дышетӥсь луыны, кыкетӥез – чебер кырӟаны. Одӥг ласянь учкыса, одӥгез но тыро-пыдо улонэ ӧз пыӵа, нош мукет ласянь кырыжо-мерыжо кыкнаиз но пӧрмизы, кадь: мыным ужея ӵемысь дышетӥсь выллем ужано луэ, шуом, ёросъёсы но бускель элькунъёсы семинаръёсын потаку, нош кырӟаны… калык сьӧры, ойдо, буро-палляно нёжъясько ик.

- Мон тодӥсько одӥг льӧль малпанды сярысь – «иностранецлы» бызьыны. Кызьы со кылдӥз но быдэсмиз?

- Возьдаськон сямы аслым котьку но туж люкетӥз бере, малпай: мыным туган туж етӥзэз кулэ. Гуртысьтымы пиос но туж востэмесь вал бере, чилектӥз: «иностранецлы» бызёно. Университетэ вуэме бере но эшъёсы юалляло вал: ку бызёд ни? Вот, шуисько, тунсыко но шумприч пияшез пумитай ке – соку ик. Зэмзэ верало: вуоно картэ мыным нырысь-валысь пӧлы пум быдӟа но ӧз кельшы. Но со бордам тэбиниз, кырмиськиз но ӧз лэзьы ини. Куамын арлэсь кема ӵошен улон сюресмес малпаса, ӝот-ӝот вераны быгатӥсько, со – мынам адямие, со мон понна инбамен кылдытэмын. Ми - одӥг шумесысь лэсьтэм кык кутэмнянь выллем. Пуштросмы гинэ пӧртэм. Малпанэ быдэсмиз: картэ «иностранец» – чуваш.

- Одӥг тодмо адямилэн та выллем кылъёсыз вань: творческой адямиослэн кышнооссылы, пе, памятник пуктоно. Нош тӥляд кузпалды суредась. Шӧдӥськоды-а тӥ творчествоен вырись адямиослэсь ас дуннеязы выйыса ветлэмзэс, кыӵе пытьы кельтэ со семьяен улонэ?

- Мон синмаськыса учкисько кузпалылэн улонысь чеберзэ адӟыны быгатэмез шоры. Со выллем адямиос воксё мукет – туж узыр но паймымон - дуннеын уло. Вань валче улонмы ӵоже со монэ, китӥм кутыса, сьӧраз инбаме ӝутэ но отӥ нуллэ. Но куддыръя (котьку но витьымтэ шорысь!) шуак лэзе но, мон парашюттэк музэ васькисько. Мон валасько, инме вуылон – туж бадӟым шуд, со ӧжытэзлы кузьмамын. Мыным вожъяськисьёс но шедёзы, дыр. Но мон аръёс ортчемъя ачим дырын-дырын вожъяськисько куд-ог тодмоосылэн вӧт-вӧт музъемвыл улонзылы.

- Ма бордын, тӥляд учкемдыя, кышномуртлэн шудэз?

- Яратон бордын. Малпасько, нылкышно со понна дунне вылэ кылдытэмын. Мон быгатӥсько вераны, шуд - со ӟеч уж, нылпиос, умой эшъёс шуыса. Но яратонтэк, соосын гинэ, кӧт уз тыры. Кышномуртэз яратӥз ке одӥг ке но ӟеч воргорон, со шудо кышномурт.

- Озьыен, тӥ шудо?

- Озьы шуыса оскисько.

- Кыӵе кузьым возьмаськоды улонлэсь?

- Выжымы мед азьланьтӥськоз. Азьло мон кӧня ке паймисько вал песянайёслэн нунокъёссы понна шузимемзылы. Нош али ачим но ӵужай луон понна кисьмай кадь.

Источник:

Лимонова Н. П. Книга борды ӵемтыса / Н. П. Лимонова ; записала Н. Образцова // Удмурт дунне. - 2007. - 4 сент. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"