Котков Алексей

Материал из Воршуда
Перейти к навигацииПерейти к поиску
The printable version is no longer supported and may have rendering errors. Please update your browser bookmarks and please use the default browser print function instead.

Алексей Владимирович Котков - удмурт гожъяськись, Удмурт Элькунысь гожъяськисьёслэн огазеяськонзылэн ёзчиез.

Kotkov11.jpg

Улон сюресэз

Пинал кылбурчи Алексей Котков вордӥськиз Ижкарын 1991-тӥ арын 11-тӥ коньывуонэ. Но пичи пияшлы городысь омыр ярамтэен, эмчиос анай-атаезлы гуртэ улыны выжыны дэмлазы. Озьы 1992-тӥ арын Котковъёс Алёшалэн анаезлэн вордскем палъёсаз, Шаркан ёросысь Петуньки гуртэ кошкизы. Нырысь одӥг арлы гинэ шуса чаклазы вал, но шӧдтэк-валатэк дыр ортчиз. [1]

Алёшалэн Атаез – Владимир Васильевич Котков – шаерамы тодмо адями: кылбурчи, драматург, крезьгурась, нырысетӥ удмурт бард, журналист. Анаез – Ирина Александровна – Шаркан ёросысь Петуньки школаысь музеен кивалтэ, историяя но удмурт кылъя урокъёсты нуэ. Семьяын Алёша кыкетӥ нылпи. Апаез, Натӥ, Удмурт кун университетысь ӟуч филологияя факультетэз заочно быдтӥз. Алёша анай-атаезлы вазь юрттӥсь луиз: та кышномурт уж, шуыса, ӧз улы, пылесос борды но кутскылӥз, выж но миськылӥз. [2]

Пичи дырысен Алёша котьмаин тунсыкъяськиз, котьмае тодыны тыршиз. Лыдӟиськыны но дышиз школае мынэмезлэсь азьло ик. Лыдӟиськыны яратэмзэ шӧдса, анай-атаез книга октӥзы гинэ. Доразы узыр библиотека люказы. Школаын но та пияш туж мыло-кыдо дышетскиз. «Абдрасько та дышетскиселы, – шуэ классэн кивалтӥсьсы Вера Васильевна Широбокова. – Кытчы гинэ со уг вуы! Я урокын выль темаез зӥб-зӥб валэктэ, я спектакльын шудэ, я радио пыр вераськемзэ кылоно, я телевизорысь адӟоно». Берло аръёсы Алёша школаезлы трос вормонъёс ваиз пӧртэм олимпиадаосын но. [3]

Алёша арлы быдэ егитъёслэн «Шундыкар» лагерязы шутэтскылӥз, отын трос ужрадъёсы пыриськись, азьветлӥсь луэменыз, кык пол Эстоние вуылӥз. [4]

Спектакльын шудыкуз

Аслаз блогаз Алексей гожтэ: ««Шундыкар» лагерез туж умой тодӥсько. Куать арзэ ветлӥ. Одӥг арзэ бадӟым литераторъёсын эшъяськи, кылем 5 сменаосы театр отрядын кужымме эскери. «Шундыкар» туж бадӟым юрттэт сётӥз мыным азьланяз Удмуртиысь писательёслэн огазеяськоназы пырыны но театральной институтэ вуыны».

2008-тӥ арын гужем Алексей вуылӥз Марий-Эллэн шоркараз Йошкар-Олае. Отын пыриськиз финн-угор гожъяськисьёслэн Х калыккуспо конгрессазы. Ортчем ужрадын со самой егитэз вал. Та конгресс эшшо но ӝутӥз Алёшалэсь гожъяськон мылкыдзэ. Вуылӥз «Егит гожъяськисьёслэн российской совещаниязы» Сургутэ. [4]

2008-тӥ арын Алексей Котков 17 аресаз Удмуртиысь писательёслэн огазеяськонзылэн самой егитэз ёзчиез луиз. Но со гинэ мар ай. Та етӥз пияш трос гожъяськемез но книгаос поттыны быгатэмез понна та аре ик Герман Ходырев нимо премилэн лауреатэз но луиз. 2009-тӥ арын Петуньки школазэ Алёша зарни медален йылпумъяз. Со арын ик, бадӟым конкурсэз ортчыса, Алексей Котков пыриз дышетскыны Москваысь Щепкин нимо вылӥ театрал училищее. [4]

Гожъямъёсыз сярысь

Алёша какетӥ классын дышетскыкуз, атаез – тодмо удмурт кылбурчи Владимир Котков – школаязы соку «Петуньки сяськаос» литературно-драматической кружок усьтӥз. «Басьты монэ кружокад, мон но кылбур гожъясько», – тазьы вазьыса, пиез атайзэ нырысетӥ кылбуреныз тодматӥз. «Мон мылысь-кыдысь вордски…» – кылбур таӵе чурен кутске вал. [5]

Пумен пинал гожъяськисьлэн кылбуръёсыз, веросъёсыз, вакчиесь выжыкылъёсыз ёросысьтызы «Инвис», элькун «Ӟечбур!», «Удмурт дунне» газетъёслэн но «Кизили», «Вордскем кыл», «Инвожо», «Кенеш», «Луч» журналъёслэн бамъёсазы потаны кутскизы. Нош 2001-тӥ арын, Петунькиысь литературно-творческой кружоке ветлӥсь пиналъёслэсь ужъёссэс люкаса, «Милемын шулдыр» нимо бичет поттыны быгатӥзы. Алёшалэн но тросэз ужъёсыз отчы пыртэмын вал. Кыкетӥ классын дышетскыкуз пияш гожтӥз «Книгаос» выжыкыл. 2000-тӥ арын со печатламын вал ёросысь «Инвис» газетын. 2009-тӥ арын Алёшалэсь «Тазьы пальыша Алёша» книгаезлы презентация ортчытыкузы, Петуньки библиотекаысь но клубысь усточиос со выжыкылъя сценка возьматӥзы. Озьы ик пинал гожъяськись ӵемысь вормисе пота творческой конкурсъёсын, мар понна дипломъёс но грамотаос басья. Нош 2008-тӥ арын кӧняез ке кылбуръёсыз ӟуч кылэ берыктыса печатласькизы Москваын потӥсь «Литературная газета» изданиын. [3]

Алексей Котков школазэ быдтыкуз, солэн потӥзы ини кык кылбур бичетъёсыз – «Инсьӧры ивор» (2007) но «Тазьы пальыша Алёша» (2008). Гожъя Алёша пиналъёслы. Гожъямъёссэ ӵемысь серемес карыны турттэ. Угось ачиз но яратэ серекъяны, шулдыръяськыны. [4]

Анай-атаеныз вокзалын

Туж потэ вал ужаме –

Ваньзэ лэсьтэм ни нэнэ.

Шаньги пӧрам со мыным,

Скаллы куштэм ни турын.


Ветлэм ни бичаськыны,

Вуэм ни мисьтаськыны.

Ваньзэ-ваньзэ со лэсьтэм,

Но одӥгзэ вунэтэм.

Вунэтэм шутэтскыны.

Ӝоггес мыно юрттыны!

Тросэз кылбуръёсыз егит авторлэн сӥземын семъяезлы. Кыӵе яратыса со гожтэ анаез, атаез но апаез сярысь:

Пуктӥз корка атае,

Чеберъяз на ай сое.

Нырысь пыртӥм коӵышмес,

Собере – котыръёсмес.

Ми но Натӥен пырим,

Ӧс куспы ӵошен тэрим!

Собере пыриз анай,

Кин кыре кылиз на ай?

Атае.

Со выльысен

Ужзэ учке кырысен.

Наградаосыз но премиосыз

Шаркан ёросысь гожъяськись пиналъёс пӧлын нырысетӥ степенё диплом, 2008.

Герман Ходырев нимо премилэн лауреатэз, 2008.

Библиография

Книгаосыз

Тазьы пальыша Алёша : стихи для детей. – Ижевск : Инвожо, 2008. – 66 с.

Инсьӧры ивор : кылбуръёс. – Ижевск : Ред. газ. «Ӟечбур!», 2007. – 26 с. – («Ӟечбур!»-лэн пичи книжкаез).

Статьяосыз

«Ӟечбур!»-лы : кылбур // Ӟечбур! – 2009. – 17 сентябрь. – С. 1.

«Кошкид, ӧд учкы ни бӧрсяд...» : кылбур // Ӟечбур! – 2009. – 5 февраль. – С. 3.

«Утчасько мон тема...» = Тема ; «Мар гинэ ӧд лэсьтэ тӥ... = Эх вы, люди!... : кылбуръёс // Ӟечбур! – 2008. – 25 сентябрь. – С. 8.

Визькылъёс : пословицы // Кизили. – 2009. – № 7. – С. 2 обл.

Губиос : лыдъяськон // Ӟечбур! – 2009. – 17 сентябрь. – С. 2.

Гужемлэсь жадёд-а? : кылбур // Ӟечбур! – 2009. – 30 июль. – С. 1.

Комок но Кимок ; Вужерез исан ; Зорыку // Удмурт дунне. – 2006. – 8 ноябрь. – С. 6.

Кырӟан : кылбур // Кизили. – 2009. – № 7. – С. 2 обл.

Салазки ; Ӝуась гурен! ; Выль аре : кылбуръёс / В. Г. Мустаев // Кизили. – 2008. – № 11/12. – С. 11.

Суредась но эксэй : выжыкыл // Вордскем кыл. – 2009. – № 2. – вкл. л.

Тема ; Эх вы, люди!.. : стихи // Литературная газета. – 2008. – 23-29 апр. – С. 2. –(«Художник, воспитай ученика, чтоб было у кого учиться...»)

Уголок России = Мынам шаере : кылбур // Вестник (Шаркан). – 2009. – 3 нояб.

Уйин ; Катьтэм Натӥ ; Мынам интернетэ ; Кызьы тодоно? ; Гур ; Шунды ; Бурмыто-зы ; Убо, курегъёс, пушнер ; Губиос-губиясьёс : кылбуръёс // Инвожо. – 2009. – № 8/9. – С. 76.

Шудо вакыт ; Шунды : кылбуръёс // Ӟечбур! – 2005. – 6 октябрь. – С. 6.

Шунды : кылбур // Инвис (Шаркан). – 2007. – 6 апрель.

Кырӟанъёсыз

Котков А. Убо, курегъёс но... пушнер ; Кин кӧлэ на – вӧталэ ; Возьмано ке – возь-мано... ; Гур : кылбур-кырӟанъёс // Ӟечбур! – 2008. – 30 октябрь. – С. 9.

Котков В. Лагерьын : «Вайизы но лагере...» / нотаос вылэ гожтӥз М. Г. Ходырева // Ӟечбур! – 2011. – 28 апрель. – С. 3.


Татчы 2005-тӥ арысен потэм чеберлыко статьяос гинэ пыртэмын, кылемъёсыныз тодматскыны быгатӥськоды Удмурт Элькунысь йӧскалык библиотекалэн электрон каталогъёсызъя.

Уже кутэм литература