Комаров Анатолий Ермолаевич

Материал из Воршуда
Версия от 14:42, 6 февраля 2015; Admin (обсуждение | вклад) (1 версия импортирована)
(разн.) ← Предыдущая | Текущая версия (разн.) | Следующая → (разн.)
Перейти к навигацииПерейти к поиску

Выль бугро ӵупо на[править]

Комаров А.Е.

Куд-ог адямиосты егитысен ик яркыт кизили каро. Нош мукетъёсыз вужерын возисько. Берлоосыз пӧлы мон пыртысал писателез но журналистэз Анатолий Ермолаевич Комаровез. Со кема аръёс ӵоже тыршиз ёрос газетъёсын, Удмурт радиоын, «Советской Удмуртия» газетлэн валтӥсь редакторез вал. Анатолий Ермолаевич – Удмурт Республикаысь культура удысысь дано ужась, ужысь ветеран, ӟеч тыршемез пусъемын уно данъян грамотаосын.

- Анатолий Ермолаевич, нырысетӥ сентябре сизьымдон арестэс пусйиды. Востэм сямды улонады ноку ӧз люкетылы-а?

- Анай-атай но Инмар мыным сыӵе сям сётӥллям бере, кытчы пырод. Но со мыным ноку ӧз люкетылы. Котькыӵе удысэз кыштыр гинэ нуылӥ. Мамае, Мария Лукьяновна, укмыстонлэсь ортчемын ини. Сузэре дорын, Можга ёросын, улэ. Нош тятямы, Ермолай Антонович, висемезлы чидатэк, улонысь вазь кошкиз. Тушмонэн ожмаськыса, Белоруссиозь вуэм. Со дыр куспын мама кык похоронка басьтэм. Ярам коть, войнаысь со, пал суй луыса ке но, бертӥз. Ой, со шоры учкыны ик жаль вал. Войнае ветлэм бервылъёсыз, мунчое пырыкумы, адӟиськылӥзы. Мугорысьтыз, уката ик кунулысьтыз, векчиесь осколокъёсыз пырак кулытозяз потылӥзы.

Ми тямыс нылпи вал. Сизьым кузя жильк-жильк пиос но одӥг сузэрмы. Тятямы ачиз сярысь серекъяса шуылӥз: «Семь сыновей, сам соловей». Жаляса верано, кыкез вынъёсы улонысь кошкемын ни.

- Секыт улон шоры учкытэк, трос нылпи пӧлын будыса но, дышетскыны быгатӥллямды.

- Кион гуртысь сизьым классъем школаез йылпумъяса, шор ёзояз Вавоже вамыштӥ. Со вискын тэль но кораны ветлоно луиз. Угось дышетсконэз ке азинтоно, уксё тыроно вал. Удалтӥз: ӵапак со вакытэ дунын дышетсконэз быдтӥзы.

Удмурт кыллы но литературалы милемыз дышетӥз Яков Фёдорович Меньшиков. Туж умой адями вал со. Лек ожын ожмаськемын. Бӧрысь мон со сярысь очерк гожтӥ. Дышетскись дышетӥсез сярысь гожтӥз шуыса, туж шумпотӥз.

Пичиысен ик суредаськыны яратылӥ. Суредъёсме ошылыны дорын борддоръёсмы ик ӧз тырмылэ. Соин ик троссэ эшъёсылы кузьмалляй. Школаын нимысьтыз адӟытонъёс радъяллязы. Таӵе быгатонлыкме шӧдыса, лэся, монэ бордгазетлы редакторе юнматӥзы. Ма, мон классамы староста но вал. Концертъёс дасяллямы, спектакльёс возьматъямы.

Пичи дырысеным суредась яке эмчи луэме потылӥз. Трос шуг-секытъёс пыр потыса ке но, одӥгез малпанэ быдэсмиз: мединститутлэн студентэз луи. Дышетскон аръёс туж тунсыкоесь вал. Куинетӥ курсэ потӥ но… Пединститутысь биология факультетэ дышетскыны пыри. Солэн мугез таӵе вал.

Одӥг пол Саша Зорин эше монэ кунояны Можга ёросысь Починка гуртэ (Студёный Ключе) нуиз. Ӝытазезэ асьсэ клубе гинэ потыса ӧз тырмы, сьӧрло Бакагуртэ нуиз на. Отын нылъёсын вальс бергамы, ӵукнаозь шулдыръяським. Саша доры бертӥм но, сэндрае изьыны выдэм муртъёс, ну, лулӟылӥськом ук. Сашалы сипыртӥсько: сыӵе-сыӵе нылаш мыным кельше кадь. Ӵуказеяз Иже мыныны потӥ. Со нылашен ӵапак одӥг вагонэ пуксьыны тупаськеммы. Ӝажы вылэ сумкаме куштӥ вал. Адӟисько, ныллэн йыр вылаз отысь тёп! тёп! мар ке вия. Тодам лыктӥз: Сашалэн анаез шунтэм вӧй келяз вал. Му пыр виямон возьдаськи.

Городысен мон сое ыштӥ. Бӧрысь Лизаез, Сашаен утчаса, шедьтӥм ини. Август толэзе пумиським. Соберегес ик группамес колхозэ ужаны келязы. Отысь бертыса, соку ик Лизаос доры кен юаны мынӥмы. Октябрь толэзе огазеяським ини. Озьы тӥни, заочно амалэн дышетскон понна пединститутэ потоно луиз – враче заочно амалэн дышетскыны уг луы. Ужаны Вавож ёросысь Гурезь-Пудга гуртэ мынӥмы. Отысь школаын биологиез но, физкультураез но, рисованиез но нуи. Отын ик Лина нылмы вордӥськиз.

- Тодэм потэ ини, ку бен гожъяськон ӧре кыстӥськиды?

- Школаын ужан вискам ӵужектонэн висьыны уси. Ӧжыт кулытэк ӧй кыльы. Эмчилэн ӟеч йӧнатэмез сярысь заметка гожтӥ ёросысь «Авангард» газетэ. Со сяна, эшшо мар но со келяй на. Редакторзылы кельшем, лэся, гожъяськеме. Дорамы, пе, ужаны возьмаськом.

1966-тӥ арын Вавож черкогуртэ вуимы. Ужаны Лизаен кыкнамы но редакцие интыяськимы. Нырысь ик монэ кылысь кылэ берыктӥсе пуктӥзы, собере корреспондентэ, редакторлы юрттӥсе. Отӥяз редакторе юнматӥзы. Кузпалы корректор луыса ужаз. Вавожын ик Володя но Ирина пиналъёсмы вордскизы.

Нош ай ужамы ми кыӵе маскара. Сюресъёс соку туж аламаесь вал. Редакцилэн машинаез ӧвӧл. Командировкаосы «Урал» мотоциклэн потамы.

Со сяна, соку редакторъёслы ёросысь колхозъёсы ветлоно луылӥз. Ӵукналы быдэ отысь сводкаосты райкоме вуттоно вал. Редактор колхозъёс понна кыл кутылӥз. Соку партия кивалтӥз. Юаса-вераса ӧз улэ, шӧдтэк шорысь 1975-тӥ арын «Алнаш колхозник» газетэ редакторе юнматӥзы: отын, пе, газетсы куашкан калэ вуэмын. Милям со дыре Вавож черкогуртын улон интымы но туж умой вал ини. Мунчо но пуктыса вуттӥмы. Дышем интыысь кошкеммы уг поты ни вал. Но мар карод?

- Тӥ алнашъёслэсь но улонзэс берыктӥллямды.

- Озьы луыса потӥз. Выль коллектив, выль адямиос. Вуим но, редакциын печатлан машинаоссы но, линотипсы но ӧвӧл. Вань ужъёсты киын быдэсъяло. Нош Вавожын милям ваньмыз вал ини. Та пумысен Алнашын уно гинэ тыршоно луиз. Удмурт кылын потӥсь газетсы но ӝегаса лэсьтӥськылӥз. Сое но радъяны быгатӥм.

Вазен редакциын ужасьёсты колхозэ юрттыны лэзьяллязы. Ми Вавожын быдэс коллективен шумпотыса ветлылӥмы, мыло-кыдо ужаллямы. Нош Алнашын пайми: колхозэ мынӥсь ӧвӧл. Ушъяськытэк верасько: ми кузпалэным, Елизавета Григорьевнаен, соосты ас бордамы кыскыны быгатӥмы. Со сьӧраз сиён пӧраса нуэ, калыкез отын утялтэ. Ужасьёсмы таӵе выремезлы паймизы. Собере ваньзы, ньыльдон пала адями, шумпотыса колхоз бусыосы ветлыны кутскизы ини. Коллектив туж ӝог ми борды дышиз. Отӥяз котьмае, одӥг кылысь кариськыса, ужамы ини. Алнашын со вакытэ малы ке но «Ошмес син» литературно-творческой кружоксы ӧз ужа. Сое но выльдӥмы. Гожъяськисьёс шумпотыса отчы ветлыны кутскизы. Ачим но соку кылбуръёс гожъян борды кыстӥськи. «Выль бугро мон ӵупи» нимо кылбур бичетме поттӥ. Собере гожъяськон мылкыды эшшо но золгес пуромиз. Ужъёсме «Советской Удмуртия» газетын но «Молот» журналын печатланы кутски.

Туж умой вал кусыпмы Семён Шихарев писателен. Милемлы соин «Алнаш колхозник» газетын ужаны шуд усиз. Семьяосынымы эшъяськыса улӥмы. Дорамы Ижысь кылбурчиос Олег Поскрёбышев но Гай Сабитов вуылӥзы. Асьсэлэсь кылбур чуръёссэс лыдӟем сяна, милесьтым но пӧрамъёсмес эскерылӥзы, гожъяськон мылкыдмес пуромытыса кельтылӥзы. Со сяна, кружокамы музон писательёс но вуылӥзы. Герман Ходыревен Василий Смирнов ялан мыным гожъяны мылкыд сётылӥзы. Милесьтым озьы ужаммес Флор Васильев синйылтэм. Монэ «Молот» журналэ ужаны ӧтиз. Дырыз дыръя потыны ӧй быгаты. Флор Иванович бырыны шедиз. Али ке но туж жалясько, мыным соин «Молот» журналын ужаны ӧз кылды шуыса. Ма, собере Алнаш райкомлэн нырысетӥ секретарез Анатолий Поляковлэн но монэ озьы гинэ лэземез ӧз поты. Со аре монэ Иже ӧз ке но лэзе, вуонояз, 1979-тӥяз, мон «Молотэ» вуи ини. Нырысь ик кыл кутӥсь секретаре пуктӥзы. Собере валтӥсь редакторлэсь ужзэ быдэсъяй. Татын ини уно тодмо писательёсын ӵош ужано луиз.

- Татысен тӥляд тубатты вылӥе но вылӥе ӝутӥське.

- Озьы луыса кошке. Собере нош ик шӧдтэк шорысь монэ УАССР-ысь телевидениея но радиовещаниея комитетэ председательлы воштӥсе юнматӥзы. Радиоын но туж умой, тупаса ужамы.

- Но тӥледлы Удмурт радиоын но кема ужаны ӧз сётэ, «Советской Удмуртия» газетэ валтӥсь редакторе юнматӥзы.

- Озьы. Одӥгаз уже дышиськод кадь, нош мукетаз выжто. Табереяз обком монэ КПСС-лэн ЦК-яз, Москвае, келя. Валтӥсь редакторъёсты соку отын юнматылӥзы. Пырисько ини со юртэ. Туж бадӟым кабинетэ ыстӥзы. Отын маке кузьда ӝӧк сылэ. Со сьӧрын маке мында йӧно адямиос пуко. Тодон-валанме котьма ласянь эскеризы. Адямиен ужаны быгатонлыкме но чаклазы кадь. Туж сабырлы адями, калыкен быгатод ужаны, шуизы. «Советской Удмуртиын» коллектив бадӟым вал. Журналистъёс сяна, газетын соку трос писательёс ужазы. Адями сярысь соос ӟечесь очеркъёс гожъяллязы. Мон коллективен огкыл шедьтылӥ, нокинэ вӧсь ӧй карылы. Улон инты но быгатэммыя сётъяллямы. Малпасько, ӵош ужам эшъёсы али ке но со аръёс сярысь умоен гинэ вералозы.

- Со аръёсы газетлэн тиражез но туж бадӟым вал ук. Лыдӟисьёсын ӟеч кусып возьылӥды. Со пумысен, оло, кыӵе ке нимысьтыз секретты вань?

- Соку туж трос ветлӥськом вал гуртъёстӥ. Со дыр куспын кӧня лыдӟисьёсын пумиськемын! Фермаосы, лудъёсы поталлямы. Ужась калык сярысь лыдъянтэм гожъямы. Вазен коркалы быдэ «Советской Удмуртия» газетэз басьтылӥзы. Соку компьютеръёс, Интернет ӧй вал ук, калык трос лыдӟиськылӥз. Газетлэн тиражез зэмзэ туж бадӟым вал: кызь сюрсозь луылӥз. Нош войналэсь азьло куатьтон сюрсозь но будылэм. Мынам али ке но сюлэмы командировкае, калык пӧлы куриськылэ. Сотэк улонын мар ке уг тырмы кадь.

- Газетын ужась муртлы, уката ик кивалтӥсьлы, литература удыстэс секыт ӧй вал-а азинтыны?

- Соку вань уйёс мынам вал. Вис ке шеде, уж дурын но гожъяськыны тыршылӥ. Со вакытэ ӟуч кылын «Рядовой революции» книгае вордскиз. Собере эшшо кужымме мукетыз бордын эскереме потӥз на.

Гердлэн лёгам музъемаз будэм мурт, со сярысь мар ке но гожтоно шуыса, сюлмаськылӥ. Солэн ӵыжы-выжыосыныз пумиськылӥ. Соослэсь верамъёссэс гожъяса кельтылӥ. Собере, Гердлы сӥзьыса, нылпиослы «Лызгырлыос-шыркунъёс» нимо повесть поттӥ. Книгалэн вылбамаз Леонид Прозоров Гердэз нылпиосын ӵош суредаз. Туж чебер со пӧрмиз.

- «Советской Удмуртия» газетлы выль ним – «Удмурт дунне» – тӥ сётӥллямды, шуо.

- Вазен газетлэн нимыз не удмурт, не ӟуч вал. Со умойгес но валамонгес мед луоз шуыса, мон ӵектонэн потӥ: ойдолэ газетмылэсь нимзэ воштоме – «Удмурт дунне» нималоме. Удмуртъёс быдэс дуннеын уло ук. Куд-огез пумитъяськыны выризы ик вал, мар, пе, со «дунне» кыл луоз. Табере со нимлы ваньмыз дышизы. Газетлэн нимыз котьку но озьы ик вал кадь. Ма, «дунне» кыллэн валанэз туж паськыт ук.

- Собере тӥ Удмуртиысь Писательёслэн огазеяськоназы чеберлыко литератураез вӧлмытонъя бюроен кивалтӥды, та огазеяськонлэн тӧроезлэн воштӥсез луыса но ужады. Улондэс воксё гожъяськон пала кожытӥллямды ук.

- Мон «Удмурт дуннеын» 1994-тӥ арозь ужай. Совето власть куашкан вакытэ котькытын воштӥськонъёс кутскизы. Мынам но соку улонэ мукет пала пельтӥз: писательёслы матэгес кариськи. Сокугес очеркъёсын «Асановская быль» но веросъёсын но повестьёсын «Юриськем музъем» книгаосы потӥзы. Озьы монэ Россиысь Писательёслэн огазеяськоназы кутӥзы.

- Та вакытэ мар бордын ужаськоды ни? Писательлэн, пе, пероез нуналлы быдэ одно ик маке но мед ӵабъялоз.

- Нуналлы быдэ киям ручка кутыны тыршисько. Яратон сярысь поэма гожтӥ. Ялан тупатъяса но выльдыса, мон сое кызь кык главаозь вуттӥ ини. Сое кызьы ке но калык пӧлы вӧлмытоно вылэм. Кузебай Герд сярысь гожъямъёсы но туж трос ини. Соосты но печатланы кулэ. Шумпотӥсько, куд-ог кылбуръёсы кырӟанлы пӧрмизы. Радио пыр соосты кылӥсько но, ма, ку гинэ крезьгурчиос со чуръёсме шедьтӥллям меда шуыса, паймисько. Тау соослы.

- Нош мар тужгес но тӥледыз та улонын сюлэмшугъяськытэ?

- Удмурт кылмы медаз быры. Кыл бордын возиське асьмелэн выжымы. Будӥсь нылпиос но сое медаз вунэтэ вылэм. Сюлэм вӧсь луэ, гурт нылпиослэсь ӟуч сямен шенгыль вераськемзэс кылоно ке. Та сярысь дышетӥсьёслы но анай-атайёслы сюлмаськоно, дыр.

Нуналлы быдэ дневник нуисько. Олокӧня тетрадь люкаськемын ини соос. Малпасько, куке-соку аслам ик ужъёсам кутыны быгато ай.

- Анатолий Ермолаевич, «Удмурт дунне» газетын ужасьёс но лыдӟисьёс тӥледыз быдӟым юбилееныды, 70 аресэныды, ӟечкылало. Сӥзиськом юн тазалык, гожъяськон пероды ноку но медаз сыномы. Улонады мед шумпоттытозы нылпиосты но соослэн нылпиоссы, гожъям ужъёсты. Вӧзады котьку мед луозы тӥледыз валась, яратӥсь но гажась адямиос.

- Тау. Нош мынам тӥледлы сӥзёнэ одӥг: газет лыдӟисьёс эшшо но тросгес мед луозы.

Источник:

Комаров А. Е. Выль бугро ӵупо на / А. Е. Комаров ; записала Л. Тихонова // Удмурт дунне. - 2011. - 19 сент. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"