Редактирование: Кияса ёросысь Салья гурт котырысь семьяен герӟаськем сям-йылолъёс

==Семья кылдытон==

Егит пияшлы 17-20 арес тырме ке, анай-атайёс пизылы кышно ваён сярысь сюлмаськыны кутско ини. Пиосмуртъёс, «нэнэедлы юрттӥсь ваёно ни вал» шуыса, кыл потто. Егит пи вераны быгатэ аслэсьтыз мылкыдзэ. Туала арын егитъёс асьсэос шедьто ке асьсэлы кельшись ныл, вашкала дыръя егитъёслэсь уг но юало вылэм, кельше-а, уг-а синйылтэм нылзы. 

==Ныл куран== 

Озьы кенешемзы бере, анай пиезлэн киросагаеныз яке киросапаеныз ӵош дасясько ныл кураны мыныны. Ныл кураны кык-куинь кузя гинэ уйшор бере мыно вылэм. Ныл мукет гуртын ке улэ, вазьгес пото. Туж чаклало вылэм: сюрес вылысен урод синмо муртэн, буш ведраен адямиен медаз пумиське. Бусыез яке тэлез ортчыкузы эскеро: азьзэс писэй, луд кеч, ӟичы яке коньы медаз басьты. Кӧснуналэ (субботае), озьы ик дӧдьы куштон нуналэ, сюрес вылэ уг пото вылэм. 

Ныл кураны дасяськемъёс люкасько егит пилэн корказ. Нэнэмурт ӝӧк вылэ тӧдьы ӝӧккышет вӧлдэ, отчы колды нянь но пурт понэ, вӧй но сылал пуктэ. Ныл кураны вырӟыны дасяськемъёс со вӧйын нянез веръяло. Атайзы вӧсяське: «Осто, Инмаре! Шудо сюрестэ сёт, мусо Быдӟым Инмаре! Малпан ужмес быдэстыны юртты. Вӧй вылтӥ кадь ветлыса, шудо выль кенэн-кенакен мед бертомы. Юртты милемлы, осто, Быдӟым Инмаре!» Ӝӧк вылысь пичи юдэсъёсын нянь вылэ шорем вӧез веръяло. Собере кузё пиосмурт йыраз изьы поныса, ӝӧк пуме пуктэм винаез веръя но шуэ: «Чеке пересьёс, анай-атайёс, пересьёс, тазьы ик ӵош огазьын сие-юэ. Азяды мед усёз. Милесьтым ӟеч малпанмес быдэстыны юрттэ». Винаез веръямзы бере пуксё. Нэнэмурт сьӧраз басьтыны кулэ: ныртамак, одӥг бутылка вина но азвесь уксё. Капкаез кузё усьтэ но шуэ: «Шудо сюрестэ сёт, Быдӟым Инмаре!». Ныл кураны мынӥсьёс валлэн дӧдьыяз пуксё. 

Ныллэн капка азяз вуыса йыгасько. Корка пырон понна олокыӵе но муг утчало. Алдаса ке но, одно ик корка пушкы пыроно. Пырем беразы нырысь ик ныртамаксэс потто но зынъяса пуко. Кузёосын улон-вылон сярысь вераськон мыто, тазалыксы сярысь юаллясько, гуртысь берло иворъёсты верало. Собере тазьы кутско: 

 – Тӥляд вузаны ветылды вань шуыса кылӥм но, лыктоно кожамы. 

 – Кыӵе ветыл? Милям туэ оштракмы сяна ӧвӧл. 

 – Ма картэд милемлы вераз вал. 

 – Кудӟемын вал, дыр. Солэн гидэ потамез но вань-а, ӧвӧл-а. 

 – Э-э, ма ми сыӵе оскыса лыктӥмы вал. Иське, юмоке сюримы. 

 – Кышно, ма соос ветыл юаны лыктӥллям ук. 

 – Э-ке-ке. Мынам йырам но веть ӧвӧл ни. 

Кузёос кышнопала кариськыса нылынызы кенешо. Пинал ныл соглаш уг луы ке, ныллэн анаез кен юасьёс азе потэ но шуэ: «Милям ветылмы пинял на. Ветылмес ум вузаське на». Нылзы соглаш луэ ке, выль кен юасьёс доры потэ но ныртамаксэс зынъя. Собере ӝӧк вылэ тӧдьы ӝӧккышет вӧлдэ, кол ды нянь понэ, вӧй пуктэ. Кузё кышно лыктэм муртъёсты ӝӧк сьӧры ӧте. Нырысь ик сьӧразы ваем виназэс веръяло, собере кузё кышно ӝӧк вылэ сиён-юон пуктэ на, лыктэм адямиосты куно каре. Нылэн пиос сэргы пуксьыса кенешо. Кылзы тупа ке, ӝӧк вылэ пуктэм вӧйын нянез веръяло. Нырысь ик веръяло анай но атай, собере ини лыктэм муртъёслы но веръяны сёто. Умой-умой кенешем бере выль кензэс люгезяса кельто.

Со тазьы лэсьтӥське. Пилэн анаез сьӧраз ваем азвесь уксёзэ поттэ, ӝӧк вылысь вӧй вылэ бышкалтэ но таӵе кылъёс вера: «Осто, Инмаре! Ӟеч кылдэм нылпи мед луоз. Шудо нылпи мед луоз. Милемыз утись-вордӥсь мед луоз. Осто, Быдӟым Инмаре!» 

Сюан ортчытон сярысь но быгато кенешыны. Одӥг гуртысь ке, туала арын выль кензэс сьӧразы но нуыны быгато ини, нош вашкала дыръя кензэс сюан дыръя гинэ келяло вылэм. 

==Сюан== 

Пилэн бӧлякез выль кен доры мынэ ке, сое ми палан сюан шуо. Сюанлы но кыкласянь ик дасясько. Выль кен ласянь куно карыны, нош эмеспи ласянь сюанчи луыса. Сюанчиосыз маин ке но паймытыны кулэ. Татын но туж малпаськыны кулэ. Тае быдэстон понна трос пумо пуонлыкъёс вань. Соин ик сюанэз ортчытонлэсь азьло выль кен ласянь кенеш ортчыто. Кенешо: кин ӝӧквыл чеберъялоз, кин пӧраськоз, кин аслаз коркаяз сюанчиосты куно кароз, кин тӧр луоз, кин сюанчиосыз секталоз, транспортсэс кытчы интыялозы но трос мукет ужпумъёс. Сюанлэсь азьло сюлмасько выль кенлэсь сандыксэ тырмытонлы. Сандыкез буш на ке, бӧлякысь вань усто чильпаськисьёс, пужъятӥськисьёс ваньмон дыръязы юртто ӵушкон, обросазь, Ӝӧккышет пужъятыны. Усто вуриськисьёс выль дэрем вуро. Озьы тӥни вань ужзэс люкылэмзы бере кутско котькудӥз бӧлякысь семья сюанэз ортчытонэ пыриське. 

Нош эмеспи ласянь асьсэлэн сюлмаськонъёссы: тӧр быръёно, сюанчиослы ивор сётоно, сюанэ мыныны выль удмурт дэрем вуроно, айшет пужъятоно, кузьымъёс дасяно. Ми палан тӧръёс ог-огенызы саламасько. Пи ласянь тӧр ныл ласянь тӧрлы одно ик кузьым сётыны кулэ. Вашкала дыръя кузьмало вылэм кышет яке басма, нош туала арын кин мар быгатэ. Ог 4-5 нунал азьло вань бӧляклы сюанэ мыныны ӧтьыса, котькуд корка пырало но ивор сёто. Мынон нуналэ но тодазы вайыто на. Сюанчиос люкасько пилэн корказ. Котькудӥз сюанчи сьӧраз басьтэ кузьым: басма яке асьсэос маке вурыса; бискыли пыжыса нуо, одно ик – колды нянь. Тӥледыз тӧре пуктӥзы ке, озьыен вуонояз сюанын таос тӥ понна тӧр луозы. Озьыен, тӧр луон пунэмо луэ. 

Кинэ сюанэ нуоно яке ӧвӧл – быдэс бӧлякен кенешо. Басьтыны тыршо чебер ымныро, кырӟаны-вераны, эктыны быгатӥсь бӧлякъёсты. Сюанэз шулдыртыны одно ик куинь-ньыль арганчи басьто на. Куд-огезлы тазьы но шуозы вал: 

 – Микаль вина веръя ке, киосыз лыдыны кутско. Кинэ сюрем гындыны кутске. Сое сюанэ ум басьтэ. Асьме бӧлякмес сереме уськытоз. Винаез трос юоно ӧвӧл, вань мылкыддэ сётыса шулдыръяськоно гинэ. Кызьы сюан ортчиз – озьы ик улонзы но азьланьтӥськоз егитъёслэн. Эн вунэтэ сое. 

Сюанчиос пилэн коркаяз люкасько. Кузё кышно тӧдьы ӝӧккышет вӧлдэ. Отчы вӧен нянь, ӝук пуктэ. Сюанэ мынӥсьёс ӝук сиыны кулэ: сюанын визьзэс медаз ыштэ шуыса. Одно ик ӝӧк пуме кулэм муртъёслы дасям винаез веръяса пото. Котькудӥз сюанчи кисыяз сугон яке чеснок поныны кулэ, нылкышноослы чыртыязы уксётӥрлык, весь поныны вунэтоно ӧвӧл. Ваньмыз со шаплы муртъёслэсь утиськон амалъёс. Пилэн атаез потон азьын Инмарлы вазиське: «Осто, Быдӟым Инмаре! Пиелы (нимзэ вера) туннэ выль кенаклы мынӥськом. Вӧй вылтӥ кадь мынӥськом, вӧй вылтӥ кадь ик мед бертомы. Юртты, осто, Инмаре, Вылись Быдӟым Инмаре!». Сюрес вылэ потыкузы вӧен нянь веръяса пото. Сюанчиосыз бадӟым капкатӥ потто. Кузё ачиз капказэ усьтэ, вӧсяське.

Коркае кинэ ке но возьмаськись кельто. Вашкала дыръя ог дас-дас кык пар валэн сюанэ мыно вылэм. Валъёссэс коверъёсын чеберъяло вылэм, котькуд букоез лыз-вож-горд лентаосын чеберъяло, гырлы думо. Нырысетӥяз пар валлэн дӧдьыяз пуксё эмеспи но солэн анай-атаез. Дӧдьыязы ӝуткаса куэм гын вӧлдо, миндэр поно. Кыкетӥ валэ пуксё тӧръёс, нош отӥяз вань сюанчиос. Нош кыӵе шулдыр жингырто вал ворттэмъя букоысь гырлыос! Гырлыосыз кылзыны быдэс гуртысь калык ураме потэ вылэм. Туала арын автобусэн сюанэ ветло ини. Выль кензы асьсэ гуртысь ке, пудозэс ӝытсэ утялтыса люкасько вал, нош мукет гуртысь ке – нуназе бере 4-5 часлы люкасько. 

Выль кенлэн корказ ваньмыз муш умортоын кадь. Котькудӥзлэн аслаз ужез. Нырысь ик син шоры йӧтэ ӝӧквыл. Котькуд бӧлякын вань ӝӧквыл пуктонъя валась адямиос. Соос учко ӝӧквылэз буёлъя но. Пӧсь сиёнъёсты ӝӧк дурегес пукто, нош пӧртэм пӧраськемъёссэ ӝӧклэн шораз. Няньёс интыязы-а, огкадь сиён-юон одӥг интые луымтэ-а? Ваньзэ учкыны кулэ. Вашкала дыръя сюанлы пӧрало вал: пельнянь, кыстыбей, ӟег пызен крендель, мильым, кукей пуштэм, кукей пилем, базар куарнянь, кенэм пӧзьтэм, сӥлен шыд, вӧйын картошка, сӥль, пыжем ӟазег, ӵӧж, чорыг, паронка, пӧзьтэм горд кушман, сылалтэм кубиста, кияр, губи, парем йӧл, шукисаль, чырскисаль, нянь, чечы, вӧй, варенняос, конфетъёс, пряникъёс, улмо. Сюанлы вань сюлэмзэс поныса пӧрасько. «Сюлэмдэ поныса ӧд ке пӧраськы, ӝӧк вылысь сиён-юондэ уз но веръялэ» – шуо калыкын. 

Азьвыл сюанчиосты вӧл-вӧл усьтэм капкаен пумитало вал. Сюанчиосты нырысь ик пумита выль кенлэн атаез. Со ваньмыныз ӟечъяське, кизэ сётъя, тазалыксы, кызьы вуэмзы сярысь юа, ваньзэсты корка пырыны куре. Сюанчиослы шуыса пӧсятэм вина дасяло вал. Сюрес вылын кынмизы, дыр, шуо вал. Туала арын татын но воштӥськонъёс пыризы ини. Кема ик ӧвӧл ветлӥмы Завьлово ёросысь Юськи гуртэ сюанэ. Выль кенлэн корка дораз вуыса, капкатӥзы пырыны ӧз лэзе. Кузь сюрес вылын кынмыны но шедиськиз, нош егитъёс вань сюанчиосты капка азьын ог ӝыны час сылытӥзы на. Эмеспилы пӧртэм ужъёс дасяллям: выль кенлэсь ымдурзэ тодмано но сое чупано. 

Нырысь ик уксё тырыны куро, кабак вина сектало, вӧйын нянь веръято, собере гинэ пырто. Соин ик сюанчиос сьӧразы уксё но басьтыны кулэ на. Ӝӧк сьӧры пуксем бере пуньы, вилка понна но уксё тырыны косо. 

Вашкала дыръя эмеспи корка сюанчиосын ӵош пыре, но ӝӧк сьӧры уг пуксьы вал. Сюанэ лыктэмъёс (соос азьло ог 30-40 кузя луо вал) нырысь ик кузёосын тодматско, собере гинэ ӝӧк сьӧры пуксьыны косо. Тӧр шоры пукто эмеспилэсь анайзэ, атайзэ, киросагайзэ но киросапайзэ. Укно дуре пуксё нылкышноос, нош соослы пумит – пиосмуртъёс. Ваньзы соос удмурт дӥськутэн (бурлатшортдэремен, чалмаен, йыркерттэтэн, уксётӥрлыкен). Саламъёссэс тыро ӝӧк пуме яке нимаз интые. Котькудӥз сюанчи кузьымзэ поныкуз мар ке но ӟеч кылъёс вера: «Басьтоно кенмы шудо-буро мед луоз». Сюанчиосты шунды бергамъя кабак винаен сектало. Нырысетӥ чаркаез быдтыса юыны косо. Соку гинэ котькуд сюанчилы нимаз чарка пукто. 

Сиськемзы бере, тӧроез вайыны куро. Эмеспилэн нэнэез тӧроез ӧтьыны асьсэ бӧлякысь ик кинэ ке ыстэ. Вашкала дыръя тӧроез валэн ваё вылэм, нош туала арын салазкиен но ваё ини. Миндэр поно, сьӧразы одӥг бутылка вина сёто. Тӧр но солэн кышноез корка пырыса ваньмыныз ӟечбуръясько, пӧртэм серемес вераськыса вань сюанчиослы мылкыд сёто. Сюанчиос тӧрлы виназэс но сёто. Ӝӧк сьӧрын пукисьёс тӧрлэсь гур курыны кутско. Тӧр но выль кен ласянь вань калык кырӟаны кутско. Соос нырысь пӧртэм гурен кырӟало: лекрут гурен, пересь гурен. Сюанчиос шуо: «Таиз милям гурмы ӧвӧл». Куиньметӥяз гинэ тӧр кырӟаны кутске сюан гурен. Тае кылыса, вань сюанчиос султо, ӵош кырӟаны кутско: 


Осто гинэ, Инмаре, Быдӟым Инмаре! 

Вылӥсь гинэ Инмармес 

Йыр йыламы ӝутомы. 

Сизьымдон но дышмонэз пуд уламы лёгалом .


Ӝӧк вылады вӧлдылэм 

Ӝӧк но кышетты. 

Ӵукна гинэ усьылэм 

Ой, пужмер кадь. 


Ӝӧк вылады пуктылэм 

Сиёнды но юонды 

Макарьяысь вайылэм 

Ой, емыш кадь. 


Макарьяысь вайылэм 

Емышъёс но ӧвӧл со. 

Яратылон кудомылэн 

Ужаллям но кужымез. 


Анаймы но лэзьылӥз 

Буртчинэн но биньыса. 

Атаймы но лэзьылӥз 

Азвесен но дурыса.


Асьмелэн но атаймы 

Мар вераса лэзьлӥз? 

Кортам гинэ сандыктэк 

Эн бертэлэ со шуиз. 


Милям гинэ анаймы 

Мар вераса лэзьылӥз? 

Ӟеч муртъёслэсь шыдзэс-няньзэс 

Эн сисьтэлэ со шуиз. 


Сарапул но купецъёс 

Кен басьтыса юыло. 

Алабуга купецъёс 

Ныл сётыса юыло. 


Милям гинэ анаймы 

Мар вераса лэзьлӥз? 

Эн бертэлэ, эн бертэлэ 

Мотор гинэ кенактэк. 


Собере сюанчиос кырӟаса верало кытӥ лыктэмзэс. 


Нюлэскытӥ потыкумы 

Кызьпу люгытъя потӥмы. 

Бусыетӥ лыктыкумы 

Ӟичы пытьыя лыктӥмы. 


Урамады пыримы 

Тыл но люгытъя. 

Гидкуазяды пыримы 

Ой, гын вылтӥ.


Урам кузя тубон дыръя 

Сюрылӥз ук пась капка. 

Парен гинэ вераськом 

Со но кылъёсмес. 


Ӧсэтӥды пыримы но, 

Син шорады учкимы. 

Отысен ик ми валамы 

Тӥлесьтыд но мылкыддэс 


Тубатъёсты ӝужытэсь – 

Тубеммы но уг луы. 

Ӧсъёсты но ньыль сэрго – 

Пыреммы но уг луы. 


Корказяды тубимы – 

Ӧсъёсты но ӵогамын. 

Ми усьтӥмы туй замоктэс 

Зарни но куличен. 


Ми лыктӥмы, ми лыктӥмы 

Лыктэмъёсмы потыса. 

Валъёсмы но лыктӥзы 

Юргаса но юргаса. 


Ой, данэз вал, данэз вал 

Милям гинэ кудомылэн. 

Данэзъя ик вылылэм 

Шыдэз но нянез.


Ой, тӧрие, тӧрие, 

Чальгес гинэ кариськы: 

Милемлы но, ой, ӧвӧл ук 

Ой, но кунока. 


Собере сюанчиосты коркась корка нуллыса куноято. Кырӟало сюан гурен гинэ. Ӝӧк сьӧрысь потыса эктыны кутско. Коркась потыкузы тазьы кырӟало: 


Ой, таулэ, таулэ, 

Сюдэмдылы, сектамлы. 

Таослэсь но бадӟынъёссэс 

Тодылыса улэлэ. 


Та коркась кин доры мыныны тодэ тӧр гинэ. Вань сюанчиос тӧрлэсь гинэ кылзӥсько. Азьло дыръя сюанчиосты куинь нунал кунояло вал. Котькуд ӵукна соосты табанен куно каро. Собере юмшаны пот то. Куд-ог дыръя одӥг корка ик кык пол но пырало вылэм. Пӧлазы кин ке но урысэн нимаз адями но ветлэ вылэм. Кин уг кырӟа, кин бере кыле, соослы йӧтэ вылэм. 

Нуназе сиськыны нош ик сюанчиос кунокуае берто вылэм. Изьыны но кунокуа дорын ик изё. Кузё кышно куно каре пӧзьтэм винаен, чаен, сӥльын перепечен, пельнянен, кыстыбеен, виртыремен. Куинетӥ нуналаз выль кенэз дӥсяло вылэм (мукет коркан): кашамер дэремен, пужъятэм айшетэн, пыдаз укмысо кут кутчало, йыраз буртчин кышет кертто. Дӥсякузы ныллэн эшъёсыз кырӟало: 


Йырад керттэм йыркерттэттэ 

Йырсын кожад-а?

Йырад изьыям чалмадэ 

Буртчин лента кожад-а? 


Зарни луэмед потӥз-а? 

Азвесь луэмед потӥз-а? 

Зарни кадь ик эшъёсыдлэсь 

Люкиськемед потӥз-а? 


Выль кен бӧрдэ, эшъёсыныз люкиське. Собере эмеспиен ӵош сюанчиос доры потэ. Аслаз вордэм нэнэез солы черыкен вина сётэ. Со черык винаен ныл аслэсьтыз бӧлякъёссэ секта. Бӧлякъёс чур гинэ султо. Нырысь ик чаркаен виназэ сётэ нэнэезлы но атаезлы, собере – киросагаезлы но киросапаезлы, вань бӧлякъёслы, эшъёсызлы. Нылаш котькудӥз азе пыдесъяське, чаркаен вина сётыкуз. Вина сектамез понна бӧлякъёсыз солы уксё сёто. Со уксёез ныркышетэ поно, буш киын басьтыны уг яра. Вань бӧлякъёссэ сектамез бере, черыксэ нэнэезлы берыктэ. 

Кузё кышно вань сюанчиосты ӝӧк сьӧры пуктэ. Котькудӥзлы чыртыяз крендель но пичи посудаен вина ошо, Чук тыро: кышномуртъёслы – кышет яке басма, нош пиосмуртъёслы – ӵушкон. Ныллэн анаез но тӧр эмеспилэсь анай-атаезлэсь йырдун куро. Йырдун одно ик уксёен тыроно, со сярысь азьлогес ик кенешо. Йырдунэз берло нылзылы сёто. 

Мукетыз ужпум – сандыкез поттон. Ныллэн бӧлякез сандык вылэ пуксё но уксё куро сандык понна. Уксё тыремзы бере эмеспилэн бӧлякъёсыз сандыкез потто. Ныл люкиське анай-атаеныз, эшъёсыныз, бӧлякъёсыныз. Собере ваньзы веръяло вӧен нянь. Выль кенэз кунултыса поттэ эмеспилэн анаез. Кузё кышно сюанчиослэн вал букоосазы чалма думе. Кузё сюанчиосты келяса тазьы вӧсяське:

 – Осто, Инмаре! Ӟеч мед бертозы. Эн сёты ведӥнъёслы. Палэнты! Бур пал сюресад пырты. Осто, Инмаре, Вылысь Быдӟым Инмаре! Тау юрттэмедлы! 

Сюанчиос валъёсазы пуксё, вӧсяськыса бертыны вырӟо. 

Доразы бертыса, атай капказэ вӧлак усьтэ. Туж чаклало: капка доры номыр понэмын медаз луы. Шаплы муртъёс, тупатон вылысь, пӧртэм шелепъёс тыро вылэм. Анаймурт, выль кенэз бур палтӥз кунултыса, корка пыртэ. Ӧс куспы кыз лыс вӧлдо вылэм, корка выж вылэ – дэра. Вӧсяськыса выль кенэз кышно палась бадӟым ӟус вылэ миндэр вылэ пукто. Выль кенэн артэ кен возьмась, бӧлякысь ик пинал ныл пуксе. Выль кенлэн ныркышетаз кутӥськыса, соос ӵош гинэ ветло вылэм. 

Корка пырем бере выль кен сандыкезлэсь усьтонзэ анаймуртлы сётэ, нош анаймурт – бӧлякысь гажан муртэзлы. Со ик усьтэ сандыкез. Сандыклэн вылӥяз сое возьма кузьым: дэрем, басма яке кышет. 

Сандыкысь вань дӥськутэз корка пушкы гозы кыскыса ошыло. Быдэс арня ӵоже бӧлякысь егит нылъёс чебер кышет кураны ветло. Кышетэз соослы нуллыны сёто. Со понна выль кенлы кузьым вайыны кулэ. Ӝыт выль кенэз но эмеспиез кеносэ ӵогало вал. Егитъёс ортчыто «пельнянь вӧсян».

==Кен пылатон== 

Ӵукнаяз вань бӧлякъёс кенос усьтонэ лыкто. Кеносэз усьтэмзы бере, серекъяса юало, «калыпты (кабды) тупаз-а?» шуыса. Корка пыртыса, выль кен дӥсян ортчыто. Нырысь ик дӥсяло бурлатшортдэрем. Собере йыраз айшон изьыяло, йыркерттэт думо, сатин кышет кертто. Дӥсямзы бере выль кен пылатонэ мыно. Азьпалазы эмеспиен выль кен ведра карнанэн, сьӧразы – возьмаськись, со бӧрсьы бӧлякъёс. Ву омыртыкуз, выль кенлэсь сӧзулзэ пазьгыны тыршо. Выль кен Ву Кузёлы уксё куштэ. Табере татысь солы ву нуллоно луоз, сюрессэ мед тодоз. 

Туала арын сюанлэн та люкетэз тужгес но паськыт вӧлмиз. Выль кен пылатӥсьёс, ву омыртыку, ведраосаз пӧртэм шуг-жаг куяло. Нош омыртэмез бере вань лыктэм калыкез вуэн пазяны кутско. Ортчись адямиосты но палэнэ уг кельто. 

Ваем вуэз сюмыке кисьто, кылеменыз ӝук пӧзьто. Выль кен пыдесъяськыса бӧлякъёслы чаркаен секта ваем вузэ. Вань бӧлякъёсын тодматске. Юэм понна солы уксё сёто. Выль кен кияз ныркышет вӧлдэ – сётъям уксёзэс басьтыны.

Ваем вуэн нырысь ик сектало анайзэс но атайзэс. Собере шунды ӝужамъя вань лыктэм калыкез. Кылем вуэнызы вань калыкез пазяло. 

==Ярашон== 

Сюанлэн кыкетӥ люкетэз нимаське ярашон. Табере сюанэн лыктэ выль кенлэн бӧлякез. Соос озьы ик валъёсын, гырлыосын, уксётӥрлыкъёсын вуо. Усьтэм капка азьын нырысь ик пумита анай но атай. Озьы ик, вӧй но нянь веръяса, корка пыро. Сиськемзы бере тӧрез ӧтё, сое миндэр вылэ пуктыса ваё. Тӧрлэсь озьы ик гур куро. Ярашонлэн гурез мукет. Вань кырӟанъёс ярашон гурен кырӟасько. Ярашонын вань «бекче курон». Сое тазьы куро: 


Тэтчылом но чигтылом 

Выж но сайгактэс. 

Ӝутылом но поттылом 

Пурысьтам но бекчедэс. 


Пурысьтам но бекчеды 

Жаль ке но, ой, потэ,

Эн басьтэ вал милесьтым 

Ой, но сузэрмес. 


Сиылӥм но юылӥм, 

Кӧтъёсмы но тырылӥз. 

Сезьыям но валъёс кадь 

Ми но луимы. 


Узыед но борыед 

Кытын гинэ кисьмалля? 

Кисьмалля ведь, кисьмалля ведь 

Ой, шунды но каӵъёсын. 


Ми бон кытын кисьмаськомы? 

Ми бон кытын кисьмаськом? 

Кисьмаськом ведь, кисьмаськом ведь, 

Ӟеч муртъёслэн ӝӧк сьӧраз. 


Кытын мынам арам культое? 

Езэ адӟеме потэ. 

Кытын милям эмеспимы? 

Бамзэ адӟеммы потэ. 


Чебер гинэ мугоръёсмес 

Атай юртам нуиськом. 

Чебер жингрес куараосмес 

Туклячиям кельтӥськом. 


Урод кылмес кылӥды ке, 

Пыд улады лёгелэ.

Ӟеч кылъёсмес кылӥды ке, 

Йыр йылады ӝутэлэ. 


Сийылӥм но юылӥм ук 

Кӧтъёсмы но тырылӥз. 

Азвесь жыльыен думылэм валъёс кадь 

Ми но луимы. 


Пурисьтам но бекчедылэн 

Эгесэз но тэтчылӥз. 

Азвесь манетэн дурыса, 

Ми но кельтомы. 


Сюанчиос шулдыръясько, экто, кырӟало. Собере соосты дораз ӧте тӧро. Тӧро дорысь сюанчиос бӧляке пото. Ярашонэ лыктэмъёс уйзэ изьыны кунокуазы берто. 

==Куно изьтон==

Ми палан вань «куно изьтон» сям (куноосты но сюанчиосты одӥг кадь изьто). Корка артана писъёс пырто. Соос вылэ валес вӧлдо. Валес вылэ одӥген-одӥген ярашисьёсты выдто. Ымазы чурок поно, со чуроке вина кисьто. Ярашисьёсты изьыны лэзё чурокысь винаез веръям бере гинэ. 

Вазь ӵукна ик бӧлякысь шаплы кышномуртъёс ярашисьёсты сайкатыны лыкто. Серекъян понна изисьёсты суэн буяло. Мисьтиськемзы бере выль кен соосты табанен сюдэ Собере ярашонэ лыктэмъёс нош кунояны потто. 

Азьло дыръя сюанчиосты куинь нунал кунояло вал. Котькуд ӵукна соосты табанен утялто. Собере юмшаны потто. Куд-ог дыръя одӥг корка ик кык пол но пырало вылэм. Тӧро кияз урысэн ветлэ вылэм: кин уг кырӟа, кин бере кыле, соослы йӧтэ. 

Нуназе но ӝыт сиськыны кунокуае берто. Озьы куинь нунал куноямзы бере, ярашисьёс доразы бертыны дасясько. Чыртыосазы озьы ик пичи ӟенеликен аракы, крендель ошыло. Вӧй веръяса, кузё капказэ усьтэ. Ваньзылы шудо сюрес сӥзьыса, ярашисьёсты быдэс бӧлякен шулдыр кырӟаса келяло. 

==Берен пуксён== 

Выль кенэз, кӧня ке улэмез бере, дораз лэзё. Та сям ми палан «берен пуксён» нимаське. Выль кен дораз черсэ, вуриське, куиське: анайзылы, атайзылы но картэзлы кузьымъёс дася. Ог кык арня улэм бераз ужам ужзэ нуыны картэз лыктэ. Эмеспи сьӧры пирдан но лэзё вал: ыж но ыжпи. Тылобурдо нырысь уг сёто. Доразы пирданэн ке берто, пирданзэс нырысь выжы-кумы доры корказы пыртало. Ыжпилы нянь, кеньыр сюдо. Собере ини гуртазы берто. Нош ик «сюдӥсь, дӥсясь мед луоз» шуыса, кеньыр, нянь сюдо. Собере гинэ гидэ лэзё.

==Саламаськон== 

Ми палан вань на «саламаськон» сям. Эмеспиез адӟыны куное ӧтё. Куноямез бере кузьым лэзё вал: дӥськут, тулуп, шуба, валес, шобыр. Соку ик пирдан но лэзё. Кык-куинь ар улэмзы бере нылзылы кунян кузьмало. Озьы сюан йылпумъяське <ref name="salljasuan"> Вахитов Семён. Семья кылдытон / Вахитов Семён Сергеевич. Олле Сальяла. – Ижкар: Йӧскалык прессалэн юртэз, 2022. 31-тӥ – 46-тӥ б.</ref>.


'''[[Пирдан сётон]]''' 

==Литература==

<references />

[[Категория:Семьяен герӟаськем сям-йылолъёс]]
[[Категория:Салья гуртлэн семьяен, ӵыжы-выжыен улон сямъёсыз]]
[[Категория:Кияса ёросысь Салья гурт котырысь фольклор]]
[[Категория: Семейные обряды удмуртов]]