Капитонов Иван Иванович

Материал из Воршуда
Перейти к навигацииПерейти к поиску

Вашкалаезлы оскись[править]

Kapitonov.jpg

Иван Капитонов Удмурт кун университетысь дизайнъя факультетын дышетӥз вал, но аслэсьтыз шудзэ шедьтӥз вордскем палъёсысьтыз – Пичи Пурга ёросысь Шор Кечолын. Отын со нылпиосты дышетэ технологияя, суредаськонъя но черчениея. Кибашлыосын кружок нуэ. Иван Капитонов – Пичи Пурга ёрослэн гербезлэн авторез. Киужъёсыныз пыриськылэ художникъёслэн но скульпторъёслэн «Тангыра» калыккуспо фестивалязы но пӧртэм ӵошатсконъёсы. Пусъемын пыӵалэз чебермась гравёръёслэн «Зарни киос» медаленызы.

Лётчик яке суредась

– Иван Иванович, тӥляд быдэс семьяды калыклэсь висъяське, шуи ке, уг янгыша, дыр. Агайды Владимир Капитонов – биолог, тодосчи, быдэс шаермылы тодмо. Светлана сузэрды Ижысь одӥгаз коррекционной школаын дышетэ, тунсыкоесь урокъёс ортчытъя, кылбуръёс гожъя.

– Милемыз анай-атаймы сыӵеесь вордӥллям, дыр. Соослы тау шуыны кулэ. Мемеймы «Мир» колхозын экономист но, бухгалтер но, фермаен кивалтӥсь но луыса ужамын. Со туж зол кышномурт вал. Кылзэ вераз ке, соя луыны кулэ, озьы ик лэсьтод. Тятя тылпу кысӥсьёс дорын шофёр луыса тыршиз. Куиньнамылы мемеен тятя вылӥ тодон-валан сётӥзы. Бадӟымез Рая апаймы Яган-Докья гуртысь нылпи садын кема аръёс ӵоже ужаз, али шутэтскыны потӥз ини. Мынам агае понна сюлэмы вӧсь луэ. Со кема гинэ дышетӥз Удмурт кун университетын, диссертацизэ но утиз. Но улон интылы ёрмеменыз, мукет городэ кошконо луиз. Отын квартира соку ик сётӥллям. Со сьӧры табере эшъёсыз но кыстӥсько ини, улыны сьӧрло кошко. Озьы тӥни кӧня визьмо адямиосмес ыштӥськом.

Конечно, мон, агаелэсь адӟем карыса, будӥ. Но пичи дыръям туж ик солэсь кылзӥськеме уг поты вал. Со сярысь мон трослы алякгес вылӥськем. Школаын но монэ ялан пыкылӥзы, агаед туж лякыт сямо, нош тон сьӧраз ортчиськод шуыса. Володя мыным, бадӟым агай кариськыса, уж сётыса кельтэ вал. Нош мон шудыны пегӟылӥ. Эсьмаса, липетъёс йылтӥ бызьылонъям кӧня штанъёсме меда кесяй! Ми тросэныз эшъёсыным, соос пӧлын кылбурчи Илья Пельтемов но вал, ульчаын будэмын. Бадӟымгес луыса ини, гитараен шудыны дышим. Соку егитъёс но ульча быдэсак ми киын вал, ваньмыз дорамы кыстӥськылӥзы.

Пичиысен туж потэ вал лётчик луэме, со малпан сюлэмме ялан бичатыса кадь возиз. Со сяна, суредаськыны яратылӥ. Соин, школаез йылпумъяса, Иже кошки, художник-гравёре дышетскыны пыри пыӵал тӥрлык лэсьтонъя школае. Туж визьмо но быгатӥсь Леонид Павлович Куршин кие сюри, со милям мастермы вал. Кибашлы воргорон дышетӥз кортэз валаны, соин ужаны, со вылэ суред пуктыны. Заводын кема ужаса ӧй вутты, армие басьтӥзы. Тупаны но кулэ ук, Оренбургысь военной училищее, ВВС-э, шеди. Татын дышетскем быдэс дуннелы тодмо космонавт Юрий Гагарин. Службае туж тунсыко ортчиз. Ӵемысь пыралляй библиотекае. Отын ужасьёс ма но ӧз вераллялэ Юрий Алексеевич сярысь. Со туж пичи но чиед мугоро вылэм. Сыӵе пияш космосэ лобӟиз шуыса, паймыса мадьылӥзы. Училищеысь экспонатъёс, быдӟым художникъёслэн суредъёссы мон дорын, складын, возиськылӥзы. Малы ке шуоно мон лэсьтӥськисьёслэн старшой мастерзы луыса служить кари. Суредъёс мыным сыӵе тунсыкоесь но матынэсь потылӥзы.

Лётчик луон сярысь малпанэ ныр улам ик гожеръя ни вал. Али аслым ачим йыры кур: кык ар служить карыса, доре бертӥ. Жалясько, туж жалясько мон со пумысен, али ке но ас поннам лобасько кадь. Нош кыӵе косо вал кыльыны!

Выжыосты утчан

– Армия бере ик-а пыриды Удмурт кун университетэ?

– Солэсь азьло ужаны интыяськи Ижысь механикая заводэ. Ми отын 4 кузя гравёр-художникъёс тыршимы, пыӵалъёслы чебересь суредъёс лэсьтылӥмы. Заводын гравёръёслэн школаысьтызы мастереным ӵош ужай. Леонид Павлович улыны но, ужаны но дышетӥз. Жаляса верано, со улонысь кошкемын ини.

Ужан сяменым тодӥ: Удмурт кун университетын, пе, худграфын выль специальность усьтӥське – дизайн. Агае но отчы мыныны мылкыдме ӝутказ. Абитуриентъёс тачак – 1 интые 11 адями.

Ми дышетскыны 30 кузя пыримы ке, йылпумъяны кылдӥз 9-эзлы гинэ. Пиос воксё 3 гинэ кылимы на. Преподавательёсмы туж золэсь вал: Харьковысь, Санкт-Петербургысь, Екатеринбургысь. Секыт вал дышетскыны: суредаськон но, инженерно-технической предметъёс но вал. Вылӥ математикаез но трос гинэ йыръёно луиз.

Дышетсконме йылпумъяса, ужаны университетэ ик кыли, кортэз чеберъяса лэсьтон арбериос бордын тырши. Таин валче вашкала выжыосмылэсь историзэс тодэме, кортлэсь чеберъяса лэсьтэм киужъёссэс аслам синъёсыным адӟеме но киосыным кутылэме потыны кутскиз. Эшъёсыным, Сергей но Василий Степанов вынъёсын, история наукаосъя докторлы Маргарита Ивановалы вазиським. Со милесьтым малпанъёсмес валаз, Иднакаре лэзиз. Отын гудӥськысa, вашкалаослэсь дӥсьсэс но чеберъяськон арбериоссэс шeдьтылӥм но эскерылӥм. Ноку aдӟылымтэ арбериосын пумиськылыны кылдӥз.

Студeнт дыръям щуд усиз «Алангасарлэн вужерез» удмурт кино пуктон бордын ужаны: валтӥсь геройёслы костюмъёс дасяны юрттӥськи. Гравёръёсты дасясь школаын дышетскеме мыным туж иназ луиз – пель угыос, чыртывесьёс, суйпоскесъёс лэсьтылӥ. Удмурт театр Пётр Захаровлэсь «Эбга» спектакльзэ пуктыку, 9-тӥ-13-тӥ дауръёсысь кильтыръяськонъёсты син азямы возимы. Озьы ик раскопкаосысь шедьтылэм вашкала чеберъяськонъёс кадь чыртывесьёс но пель угыос лэсьтӥм «Айкай» но «Италмас» ансамбльёсысь нылкышно артистъёслы. «Италмасэн» соку кивалтӥсь Анатолий Мамонтов ушъяз, усто лэсьтӥллямды, маэстроос, шуиз.

Та ужъёс бере удмуртлыкен тунсыкъяськонэ эшшо но зол пуромиз, выжыосмы сярысь трос книга но литература лыдӟыса, тангыра лэсьтэме потыны кутскиз. 600 ар талэсь азьло удмуртъёс, кортэз куасалляса, оломар но лэсьтыны быгато ни вылэм. Нош тангыраез пулэсь ик вӧлылӥллям. Солэн куараез туж кыдёке кылӥськылэм. Вашкалаос, сюан-сэбедзэс, нылпи вордӥськемзэс, малы ке шумпотэмзэс ивортыса, тангырае одӥг сямен йыгало вылэм, нош тылпу потыку но тушмонъёс вуыку – мукет сямен.

Мон малпамъя, котькыӵе секыт вакытэ адями ас выжыяз берытске, отысь аслыз кужым утча. Мон но со муген тангыраез лэсьтон борды кутски, дыр.

Вордскем палъёсын

– Вылӥе ӝутскон тубаттэс уретыса кадь, вордӥськем палъёсады берытскиды. Малы?

– Озьы луиз, улэм-вылэмъя мемей но, тятя но лябӟыны кутскизы. Городэ кошкыса, милям, пиналъёслэн, соос доры озьы гинэ бертылэммы ӧз луы ни. Со вакытэ секыт аръёс тупазы. Улыны амалзы бырыса, монэ соос эриктэм доразы вайизы. Пичиезлы, пе, пилы гуртэ улыны кылёно, анай-атаез но юртъерез солы, пе, утьыны-вордыны кулэ.

Нырысь ик гуртысьтымы школаын инты мыным ӧз сюры, Пичи Пургаысь нылпи творчествоя центре интыяськи, кибашлы нылпиосын кружокъёс нуыны кутски. Кык ар отын ужаса, асьме школае интыяськи – суреданъя, черчениея но технологияя дышетӥ. Табере мон Кечолын 18 ар ӵоже ужасько ини. Арняяз 3 нунал Яган-Докья шор ёзо школае дышетыны ветлӥсько на. Но гуртэ бертэме пумысен али ке но жалясько. Городэ кыльысал ке, оло, озьы ик университетын ужасал, студентъёсты дышетысал. Кин тодэ, оло, наукае но кыстӥськысал. Быръем удысэ мыным туж кельше вал. Нош семьяен улон шудэ татын ик, лэся, вылэм, вордскем гуртысьтым пумитай яратонме, Таня кузпалме.

– Кин луыса ужа Татьяна Владимировна?

– Кузпалы Сьӧлта ёросысь Гобгуртын вордскемын. Удмурт кун университетын биологияя но химияя дышетӥсьлы дышетскемын. Сое ужаны келяллям Аксакшур шор ёзо школае. Кечол школаысь директормы Алексей Захарович Мурашов Таняез милям школаямы кыскыны быгатэм. Татын но со предметъёсъя ик дышетэ. Собере ми валаса ик ӧм вуттэ, ог-огмылы синмаським, лэся, семья кылдытӥм. Табере 2 пиналъёсмы будо. Алёшамы туэ 4-тӥ классэ вамыштӥз, нош Ульянамылы арес но 2 толэзь сяна ӧвӧл на. Кызьы ке но улыны кулэ ук, нылпиосты будэтоно. Пудолэсь ӧм куштӥське на, 2 ошпи, 3 ыж но 2 кеч вордӥськом. Талэсь азьвыл скал но возимы вал. Ох, тырме гуртын уж, уката ик пудо ке вордӥськод.

Синъёсыз – пыдэстэм ошмесъёс

Кузпалыз Татьяна Капитонова:

– Иван Ивановичен Кечол школаын 3 ар ӵоже ог-огмес ӧм ик синйылтылэ кадь. Сыӵе адями мон шоры учкоз шуыса, ӧй ик малпалля. Иван угось мукет пиослэсь котыр ласянь висъяськылӥз: причёскаез но, дӥськутэз но, сямыз но аспӧртэм, олокыӵе но киужен выре, удмуртлыкен но вашкала улонэн тунсыкъяське, гитараен туж умой шудэ. Мыным со нырысь туж востэм но отын ик ассэ укыр йӧно но вылӥ возись кадь потылӥз. Вылаз ик, Удмурт кун университетын, пе, дышетэмын.

Милемыз соин уж огазеяз, шуыны луоз. Одӥг пол, амал шедьтыса, дыр, ини, со мыным, контрольной ужлы анализ лэсьтыны косыса, вазиськиз. Собере туристической кружоклы программа гожтыны косӥз. Ужмы умой пӧрмиз. Мон соку пайми: вераськись но, дӥсьтӥсь но вылэм. Эшъяськыны кутскеммы бере но ай кема гинэ мон со шоры нимын-тулын вазиськылӥ, ялан Иван Иванович шуылӥ.

Туж тунсыко адями со. Котькыӵе уж борды мыло-кыдо кутске. Республикаысьтымы нылпиослы «Турипи» экологической лагерь но кылдытъяз. Жаляса верано, берло аръёссэ солы коньдон висъямысь дугдӥзы.

Шаерчи Валерий Баймурзин:

– Иван Иванович сярысь вераны кыл уг тырмы, сыӵе со тунсыко адями, йӧспӧртэм. Со, азьланез сярысь малпаськыса, улэ, вашкалаез борды ӝабырскыны, вунэм сям-йылолъёсты улӟытыны тырше. Кылем дауръёс сярысь вераськыны кутске ке, синъёсыз ик воштӥсько, пыдэстэм ошмесъёс кадь луо. Солэн киужъёсыз паймымонэсь, музейын сямен огшоры уг сыло, пӧртэм ужрадъёсы кутӥсько, адямилы шумпотон ваё. Тросэз соос – ӵашъем кызлэсь тангыра, кортэз куасалляса лэсьтэм лампаос, сюсьтыл тыронъёс, люстраос, пулэсь но кортлэсь шкатулкаос – кошкемын ни палэнэ: Москвае, Санкт-Петербурге, Америкае...

Иван Ивановичлэн котькуд ужаз наӵ-наӵ удмурт шӧм шӧдӥське. Алигес Пичи Пурга черкогуртын «Воршуд выль синмын» фестивале Иван Иванович эшъёсыныз Владимир Михайловен но Юрий Петровен ӵош куала лэсьтӥзы. Ас мылкыд каремезъя Улын Кечолысь войнае быремъёслы синпелет пуктӥз.

Иван Ивановичлэн азьланяз бадӟым малпанэз вань – вордӥськем Улын Кечол гуртаз (пичи дыръяз анай-атаез Шор Кечол гуртэ улыны выжизы) гуртоослэсь улонзэс вылӥ ӝутон понна Пельга воршудлы сӥзем скульптура лэсьтыны ӧдъя. Малпанэд мед быдэсмоз, эше!

Источник:

Капитонов, И. И. Вашкалаезлы оскись : беседа / И. И. Капитонов ; записала Л. Тихонова // Удмурт дунне. - 2016. - 9 сент. - С. 10, 15 : фот. - (Тӧр шорын).

За предоставление материала выражаем огромную благодарность редакции газеты "Удмурт дунне"