Игнатьева Римма Серафимовна

Материал из Воршуда
Версия от 13:26, 30 октября 2015; Sveta.Bat (обсуждение | вклад) (→‎Игнаш выжылэн нюжаез)
(разн.) ← Предыдущая | Текущая версия (разн.) | Следующая → (разн.)
Перейти к навигацииПерейти к поиску

Игнаш выжылэн нюжаез[править]

Ignatieva.jpg

Та нуналъёсы 60 арессэ пусйиз Россиысь Писательёслэн но журналистъёслэн огазеяськонъёссылэн ёзчизы, Удмурт Республикаысь дано журналист, Ашальчи Оки нимо премилэн лауреатэз, уно книгаослэн авторзы Римма Серафимовна Игнатьева (Лаптева).

- Римма Серафимовна, гожъяськемдыя шӧдӥське: лул-вирады чеберлык но нылпиосты яратон пыӵамын.

— Вордӥськи Кез ёросысь Нюрошур гуртын — туж шулдыресь интыос отын. Анай-атаелэн ми 5 кузя пиналъёссы вал. Ваньмыз та, зэмзэ но, лул-вирам пыӵамын ик, дыр. Жаляса верано, Надя сузэре улонысь, шудтэм учыре шедьыса, вазенгес кошкиз ни. Анай-атае но кемалась ми вӧзын ӧвӧл. Гуртмес неперспективной шуыса быдтӥзы. Нюрошурмы Кезлэсь 20 иськемын. Куке-соку со Кулига районэ пырылэм. Одӥгаз удмуртъёслэн съездазы таӵе учыр луиз: лыктэм куноосын вераськыса сылӥськом. Мон Кез ёросысь Нюрошур гуртысь, фамилие Игнатьева, шуисько. Нош соос пумитам паймизы, отын, пе, ӧвӧл Игнатьевъёс. Ёросамы эшшо одӥг Нюрошур вылэм на.

- Анай кылэз пичиысен яратэмды шӧдӥське.

— Милемыз тятямы пичи дырысенымы лыдӟиськыны дышетӥз, нырысь ик удмурт книгаосты. Соин, дыр, анай кыл но литература мыным туж матын луизы. Библиотекаысь книгаосты котомкаен доре нуллӥськом вал. Школаямы одно ик удмурт кылэз дышетыны косо вал. Директормы Вениамин Петрович Ившин удмурт кыллы но литературалы дышетӥз. Со удмуртлыкез гажа но вала вал. Озьы ик музон предметэн дышетӥсьёс но анай кыл шоры ӟечен гинэ учкылӥзы. 8 классэз Ю-Тольён школаын пырпотыса, 9-тӥ-10-тӥ классъёсты Выльгуртысь шор ёзо школаын йылпумъяй ини. Мукет азе дышетскыны мыныны малпанэ но ӧй вал: Удмурт кун университетысь удмурт факультетэз бырйи. Лыдӟиськыны яратэме улонам туж юн юрттӥз. Пичи классъёсын дышетскыкум, «Дась лу!» газетын но ёросысьтымы «Кизили» газетын пичиесь веросъёсы но кылбуръёсы печатласькылӥзы. Студент дыръям Даниил Яшинлэн литературно-творческой кружоказ ветлӥ. Отын трос егит гожъясьёсын тодматски. Ми доры писательёс ӵем вуылӥзы, гожъямъёсмес эскерылӥзы, дэмланъёс сётылӥзы. Одӥг курсын дышетским ӟуч кылбурчиен Сергей Гулинэн, тележурналистэн Алашеев Владимир Евсеевич но тодосчиен Шушакова Галина Николаевна. Университетын дышетскем аръёс вунонтэм кылизы.

- Вордскем палъёсады ужаны кошкыса, кин тодэ, оло, улонды чылкак мукет пӧрмысал. Но улон тӥледыз чутрак мукет азе — гожъяськонлэн ӧраз — вуттэ, зэмос журналистозь но писателёзь ӝутэ.

— Университетэз йылпумъяса, ужаны келязы Дэри ёросысь Шаберды школае. Урокъёс сётэм сяна, литературно-творческой кружок нуылӥ. 3 ар ужаса, тазалыке лябӟемен, больницае шеди. Собере улонэ воштӥськиз, улыны городэ выжи. Кӧня ке дыр ӵоже Дышетӥсьёслэсь тодон-валанзэс будэтонъя институтын учебникъёсты но методической пособиосты дасянъя отделын ужай. Со вакытэ ик гожъяськылӥ «Советской Удмуртия» газетэ. Одӥг пол тунсыко учыр луиз. Учебникъёсты но пособиосты печатламлэсь азьвыл обллитысь цензоръёслы возьматъяно вал. Рукописен папкаез кутыса, Печатья юртэ вамыштӥ. Ӵапак нуназеян вакытэ лыктыны тупаськем. Вай ай, малпасько, «Советской Удмуртилэн» редакцияз пырало, выль печатласькись номерен тодматско. Соку выль потӥсь газетлэн полосаосыз борддоре ошылэмын луо вал. Коридорын лыдӟиськыса сылонъям кин ке пельпумам чабкись луиз. Ачиз редактор Михайлов Василий Михайлович вылэм. Тон ми доры весяклы ӧд лыкты на-а, шуэ. Собере кабинетаз пырыны косӥз, милемлы, пе, кылысь кылэ берыктӥсь кулэ. Мон редактор дорысь лӧптэм мылкыдын потӥ. Кема малпаськыса ӧй улы, монэ гожтэтъёсъя отделэ пуктӥзы. «Семья» бамез дасяны оскизы. Трос калыкен пумиськылыса но гожтэтъёсын ужаса, улон-вылонысь лэчыт ужпумъёсты сэрттыны-пертчыны тыршылӥ. Командировкаосы ӵем потано луылӥз.

- 1995-тӥ арын «Удмуртия» издательствоын нылпиослы «Ческыт зыно сяськаос» книгады потӥз. Собере пероды эшшо но вольытгес луиз, бӧрсьысь бӧрсе книгаосты вордскыны кутскизы, журнал-газетъёсын ужъёсты печатласькыны ӧдъязы.

— Нырысетӥ книгае потэм бере туж бадӟым вис луиз. Журнал-газетъёсын повестьёсы печатласькизы ик, нош нимаз книгаен поттыны луонлык ӧй вал. Веросъёсын «Быльырам синкыли» огъя бичетын печатласьки ик. Фин-угор гожъяськисьёслэн ужъёсынызы Екатеринбургын антология потӥз. Куд-ог веросъёсы отчы пыризы. 2010-тӥ арын гинэ вордскиз веросъёсын «Оксилэн сюлмаськонъёсыз» нылпиослы повесте. Собере аслам коньдонэным бӧрсьысь бӧрсе музонъёссэ поттыны быгатӥ ини.

- Гожъяськонды кык сюреслы висъяськиз — публицистика но проза. Кудӥз соос сюлэмдылы матынгес луо?

— Публицистикатэк ӧй луысал проза, ӧй кылдысалзы темаос. Со улонэз мургес валаны дышетӥз. Мон соосты висъяны уг быгатӥськы — соиз но, таиз но одӥг.

- Тӥ одӥг нунал но гожъяськытэк уд улӥське. Кытысь сюжетъёстэс басьтӥськоды?

— Ваньзы соос улонысь басьтэмын. Али азьло мында уг гожъяськиськы ни. Та вакытэ матысь ӵыжы-выжымылэн 5 аресъем Дима пиеныз пукисько. Солэсь выросъёссэ, верам кылъёссэ кылыса-адӟыса, «Кизили» журналэз лыдӟись тэшкылиослы амалтэк олокыӵе но веросъёс кылдо. Кылсярысь, Димаез 4 арес дыръяз анай-атаез нырысьсэ цирке нуллӥзы. Отын со носороглэсь, туж бадӟым пӧйшурлэсь, кышкам, эсьмаса, ӟус улэ ватскем. Озьы адӟытон быремлэсь азьло соос циркысь кошконо луиллям. Со учыр вылын нош ик верос кылдӥз, кудӥз нимаське «Носолёг». Пичи нылпиос котырын бергаса, соослэсь выросъёссэс чакласа, тазалык но шӧдскымон умоя кадь, мылкыд но капчи луэ, вылаз ик, веросъёс но кылдо на. Нылпиослэсь но, мӧйыослэсь но сямъёссэс чаклатэк, верос но, повесть но, роман но ӧй кылдысал.

- «Игнаш сайкемын» романдэс калык яратыса лыдӟиз. Со «Кенеш» журналын печатласькиз. Тодэм потэ вылэм сое кылдытэмды сярысь.

— Аслэсьтым ӵыжы-выжыосме тодэме потэмен, архиве вазиськи. Отын пукон сяменым мар ке мында ивор шедьтӥ. Тятяелэн песятаезлэн песятаез Игнаш вылэм. Солэн выжыез туж бадӟым вылэм. Кузьма но Прокол агай-вынъёсыз вылӥллям на. Кузьма 25 ар царской армиын служить карем. Отысь бертэмез бере эксэйлы ӟеч тыршемез понна солы музъем пай сётӥллям. Озьы та вын-агайёс гурт кылдытӥллям, сое Нюрошур шуыса нималлям. Но мон Игнашлэсь агай-вынъёссэ романам ӧй пырты ни, соосты уже кутысал ке, пумтэм-йылтэм вераны луысал. Выжымы бадӟым ке но, ми ог-огмес ум тодӥське ни, кин кытчы пазьгиськемын.

- Тӥ нылкышноос пӧлын нырысетӥез роман гожтӥсь.

— Озьы луиз, тазалыке лябен ужысь пенсие потэмлэсь вазь кошконо луи. Вылаз ик, гожъяськонэ трос люкаськиз. Калыкын юнме уг верало ук: Инмар адямилэсь марзэ ке басьтэ, шуом, тазалыксэ, нош мукет ласянь, мае ке сётэ. Кылсярысь, гожъяськыны быгатонлык. Мынам но озьыгес луиз кадь. Тазалыке лябӟиз, нош гожъяськыны материал тырмыт люкаськиз. Озьы пукси «Игнаш сайкемын» романме кылдытон борды. Ачим но ӧй вала, кызьы со быдӟа произведение пӧрмиз. «Кенеш» журналын, 2004-тӥ арысен кутскыса, 2008-тӥ арозь печатлазы.

- Нош нимаз книгаен поттэмды уг поты-а та романдэс?

— «Удмуртия» издательстволэн кивалтӥсез шуэ: со быдӟа романэз поттӥм ке (40 авторской лист), милям коньдонмы уз кыльы ни мукет изданиосты печатланы. Соин ик цифровой вариантэн книга потоз, дыр. Угось али сыӵе амалэн трос книгаос вӧлмо.

Кинлэн лыдӟемез потэ со романэз, шедьтыны луоз Национальной библиотекалэн сайтысьтыз. «Кенеш» журналлэсь берло аръёсы потэм номеръёссэ ваньзэ цифровать каро. Собере, мон соослы аслэсьтым рукописьме сётӥ, сое Национальной библиотекалэн сайтаз пыртӥзы.

- Кылысь кылэ берыкъясьын ужамдылэн пытьыез шӧдскымон кылем — удмурт кылэ берыкъяськоды мукет выжы калыкъёслэсь гожъямъёссэс.

— Озьы. Трос берыктэм ужъёсы вал ни. Коми-пермяк, ӟуч, фин, эстон, пор но чуваш кылъёсысь произведениосты асьме лыдӟись доры вуттыны тырши.

- Асьтэлэн но ужъёсты музон азьын печатласькемын. Огшоры гинэ ӧвӧл — куд-огез вылӥ премиен пусъемын.

— Веросъёсме но повестьёсме берыктӥзы ӟуч, чуваш но пор кылъёсы. Чувашиысь «Вучах» газетын «Кӧтӝож»» но «Ческыт зыно сяськаос» веросъёсме печатлазы. Пайми, соосты чувашъёс сокем вылӥ дунъяллям, эсьмаса, Алексей Талвир нимо премиен пусйизы. Писатель Роза Шевлеби, шӧдске, туж умой соосты берыктэм.

- Котькыӵе арлыдлэн аслаз чеберез. Мар верасалды 60 лыдпус сярысь?

— 60 арес — со бадӟым арлыд. Кызьы шуиз кылбурчи Кутянова Людмила Дмитриевна, мар ке лэсьтӥ — лэсьтӥ, ӧй ке — уг ни. Та быдӟа арлыдын кыӵе ке бадӟым арбериос гожто на шуыса, уг малпаськиськы ни. Но улон азинске, мылкыд гинэ медаз пуксьы.


Источник

Игнатьева Р. С. Игнаш выжылэн нюжаез / Р. С. Игнатьева; записала Любовь Тихонова // Удмурт дунне. - 2015. - 28 авг. - С. 9. - (Тодмо нимъёс)

За предоставление материала выражаем огромную благодарность редакции газеты "Удмурт дунне"