Журавлёв Михаил Павлович

Материал из Воршуда
Перейти к навигацииПерейти к поиску

Шайгуэ но арганэн мынысал[править]

Журавлев М. П.

Кудӥз анай-атай нылпизэ кужмысь донгыны выре крезьгуръя яке суреданъя кружоке. Но со дышетскемъёс пӧлысь тросэз ӵакмо, азьлане сюрессэс адӟемысь дугдо но ваньбур поттон удысэ выжо.

Завьял ёросысь Тяма (Мартьяны) гуртын вордскем Михаил Павлович Журавлёвез йӧн-йӧн дышетӥсь ӧй вал. Быдэс улонзэ со ортчытэ машина руль но арган сьӧрын. Но 1998-тӥ арын Михаил Павлович басьтӥз Удмурт Элькунысь культура удысысь дано ужась ним.

- Али гинэ Дэри ёросысь Тяма гуртысь бусыостӥ пастухаса ветлӥськоды вал кадь. Михаил Павлович, мар кыскиз тӥледыз Иже? Пудо-животъёстылэсь уд-а мӧзмиське?

- Со дырысен трос ву бызиз ини. Городэ выжемелэсь мугзэ али ке но рос-прос уг тодӥськы. Но мынам огпол но, Иже каръяськи шуыса, жаляме ӧвӧл. Пастухын ветлэмме, фермаын кыед донгамме одӥг-ог тодам вайылӥсько ик. Котькуд скаллэсь кыллён интызэ сузясько вал. Адямиез кадь утялтэм потылӥз. Уйёсы но асме ӧй жаля. Трактор ӧвӧлысь кыед ворттоно луиз валэн. Со аръёсты малпасько ке, али кыкетӥ улонме улӥсько кадь потӥсько.

- Ойдолэ даурдылэн нырысетӥ люкетаз берыктӥськом. Вить нылпи пӧлысь тӥ тужгес покчиез вал. Апай-агайёсты тыш ӧз-а сюдылэ?

- Мон ачим мултэс етӥз вал. Кушем нимы ик Пӧсекчи. Ӝӧк сьӧрын гинэ но алякъяськытэк пукыны ӧй быгаты. Чупыргы луэме понна кымысам ӵемысь сюрылӥз бадӟым пу пуньыен. Лыз-вож ветлэмме ноку уг вунэты. Ма, школаын но шаплые ӧз кулэсмы. Ваньмаз ик сэрегъёсын сылыса утчай кадь.

- Анай-атайдылы тӥледын верантэм секыт йӧтиз, дыр…

- Озьы, но, музонъёссэ сярысь, монэ ик тужгес юн эркияло вал.

- Иж дурысь гуртын будэм экеез вылӥ дышетсконниос малы бордазы ӧз кыске? Яке, шаплыеныды олокытчы сюремысьтыды курдаса, тӥледыз гуртады думылыса возизы-а?

- Сое секыт вераны. Ми туж начар улӥмы. Вылаз ик, куатетӥ классын дышетскыкум, атайме пытсэт сьӧры ворсазы. Уката урод луиз. Со вакытэ пыдкук гинэ но калыклэн кадь ӧз сюры. Нош школае дышетскыны Дэри черкогуртэ ветлоно. Шонерак пыдын сюрес вить иськем кузьда. Эшъёсы гын сапеген, мон - кутэн. Талэсь кепыр вайыса ик, дышетсконме куштӥ, лэся.

- Бадӟым семьядэс сюдон понна сыӵе пичи дырысен колхозады ужаны куриськиды, вылды.

- Ужасьёс монтэк но вал. Но улӥськод бере, тэк уд пукы ук. Азьвыл нокин но омырез ӵыжаса ӧз ветлы. Тэшкылилэсь гинэ но киоссэ думылӥзы. Мон фермае интыяськи. Ужлэсь ноку ӧй кышка. Тыршемме адӟыса ик, колхоз монэ шофёре дышетскыны ыстӥз. Та удысын люкам тодон-валанме ас гуртам возьматӥ.

- Удмуртъёс пӧлын машина басьтонын тӥ нырысетӥ радын сылӥды, шуо. Маин сокем кыскиз сюлэмдэс корт вал? Тӥляд кырӟась но, артист но луыны быгатонлыкты тырмысал.

- Кӧня асме тодӥсько, вань малпанэ артист луонэн герӟаськемын вал. Дас укмыс арес дыръям «Италмас» ансамбле пыроно кариськи. Конкурс пыр но потӥ. Жюриос юало: малы, пе, йырсиед ӵышкемын. Армие дасяло, шуи. Ми, пе, службалэсь мозмытыны ум быгатӥське, берытскиды ке, лыктоды. Нош монэ куинь арме армилы сётэме бере нылъёс шымыртӥзы. Кышнояськоно луи. Йырме ыштэмен сэрен «Италмасэ» ӧй сюры ни.

Кызьы 1959-тӥ арысен руль сьӧры пукси, озьы ӧй султылы на. Дышетскыны ӧй пишмыты но машинаен герӟаськи шуыса, огпол но кайгыреме ӧвол. Монэ мукетыз шунтэ: мӧйымыса ке но, сцена вылэ потӥ на.

- Семьяяды кин ке крезьгурен выре вал-а? Яке асьтэос-а мырӟиськиды кырӟан удысэ?

- Арганэз яратыны дышетӥз Александр агае. Войнаысь бертэмез бере монэ но лӧпкытыны выриз. Мыным соку вить арес сяна ӧй на вал. Мылкыды бугыртӥськиз.

- Туж пӧртэм удысъёс ук со – крезьгурчи но шофёр. Кудӥзтэк улондэс уд адӟиське?

- Соиз но, таиз но уг люкето ог-огзылы. «Ижнефтьын» шофёр луыса ужакум, арганме сьӧрысьтым уг кельтӥськы вал. Багажникам нуллӥ. Ма, больницае арганэтэк эмсестраос пырыны ик ӧз лэзе. 1998-тӥ ар вал со. Ӝушеным курадӟи. Кызь одӥг нунал ӵоже шулдыртӥ висисьёслэсь улонзэс. Гур кылзыса ик, уноез бурмылӥзы кадь дырызлэзь вазь. Ачим но бурдъяськи. Выль но выль гуръёс кылдытъяме потыны кутскиз.

- Вань саклыкты сценалы сётэмын. Кузпалды уг вожа-а?

- Олокыӵе но дыръёс луо. Машинаме но уг вунэтӥськы. Со нылмурт кадь: маяллямез кулэ каре. Соин котыраз бергатэк уг луы. Со понна сӧриськыса сылэмез ӧвӧл. Кузпалы но руль сьӧры пуксьысал, дыр, корт валмы быдэн луысал ке. Уго концертъёсы машинаен шонтыкум, кышное автобусэн ветлоно луэ.

- Егит ныллы али йырдэс ыштымон синмаськысалды ке, ваньзэ куштыса, сьӧраз мынысалды-а?

- Ӧй. Зэм, одӥг арлыдо кышномуртлэн мыным шуэмез вань: синъёсыд чиляло, тачак дусымъёс возид, дыр. Пумитаз вазьыны кыл шедьтӥ ик: кыӵе арганчи нылъёсты уз яраты? Соос понна гур кисьтӥськод. Но данъяськыса шараяме потэ: кузпалыным мон выльысь сяськаяськон вакытэ выжи кадь. Арлыдо даурамы кыкнамы гинэ, нокин люкетытэк улӥськом. Мон понна со котьку тужгес чеберез вал. Ми вуоно кышноеным одӥг ульчаын будӥм. Куспамы кык-куинь корка. Сизьыметӥ классын дышетскыкуз ик, мон сое синйылтӥ ни. Эшъяським. Тямыс ар ӵоже сӥньысмес ӧм чигтэ. Армиысь бертэме бере кузпалъяським. Зэм, «Инвожо» ансамблям сое кыскыны мон ӧй пӧрмыты. Со эмъясь.

- Асьтэлы бен кин сюрес усьтӥз «Инвожое»?

- Со вал 1987-тӥ арын. «Октябрь» культура юртэ Николай Свиньин кивалтэм улсын люкаськылӥзы Ижысь арганчиос. Кылдӥсь ансамбльлэн кивалтӥсез Николай Возисов монэ нырысетӥ концерт бере ик синйылтэм. Ӧтисько, пе, дорам. Мыно, шуи, кытын люкаськылӥськоды? Инты ӧвӧлэн, пе - квартираям.

Ӵап со вакытэ Боржомие путёвка сётӥзы мыным. Поездысен, питран йыгаськем улсын, йырам выль гур кылдӥз. Арганме вить арескысен кыскасько ке но, соку нырысьсэ кырӟан нерге гожтӥ. Бертэме бере Николай Романовичлы возьматӥ. Яраз, пе. Вордэм нуныкаелы со ӵуказеяз ик кылъёслэсь дӥсь шедьтӥз ни. Кырӟанмес «Инвожо» нимамы. Коллективен кенешыса, ансамбльмес но та нимен ик герӟано кариським.

- Озьыен, тӥ кутскон сётӥды выль огазеяськонлы, шуыны луоз.

- Мон но Николай Возисов. Собере кин ке дэмламъя кырӟанме сётӥзы «Молот» (али «Кенеш») журналэ. Соку отын Пётр Кубашев ужа на вал. Вить-куать кузя кылзӥськемзы бере Пётр Николаевич шуиз: та кырӟанэд, пе, Чехиез, Венгриез, Финляндиез, Америкаез адӟоз. Лӧптӥ. Со дырысен мон куамын кык гур кылдытӥ ни.

- Крезьгуръёстылы кылъёс но оло малпамды вань?

- Мынэсьтым поэт уз пишмы ни, татчыозь бугорскымтэ бере. Кылъёсты мон музонъёслэсь капыртӥсько. Но татын ини мылкыдыя: ӝож, чырсамын ке, мӧзмылэс чуръёс утчасько. Кисьтӥськись гур куддыръя уг витьы кыӵе ке бугыръяськемез - ёркам сюлэм куриське кыре. Сыӵе дыръя вамыштӥсько кылбурет удысысь усточиос доры.

- Пиеныды кенды но «Инвожоын» тодматскиллям, лэся.

- Пие нырысь-валысь ветлэ вал ансамбле. Но, жаляса верано, со анаез выжые мынэмын: эктэмез-кырӟамез уг луы. Дышетскемезъя инженер. Но аслам сузэре туннэ но «Инвожоын», вӧзам. Кенэ но татын. Коллективмылы дас укмысэтӥ ар мынэ ни. Кызь одӥг адями мон вылын возиське. Мон ке ӧй луысал, «Инвожо» куашкасал.

- Шаерлэн кыӵе сэргаз тужгес кельшиз тӥледлы? Кытын улысалды кадь?

- Котькытын чебер. Эстониын, кылсярысь, калык паймымон чылкыт улэ. Сюрес урдсысь одӥг жуг-жагез но уд адӟы. Ульча шорын уг юо. Нылъёс тамак пурккетыса уг ветло. Синмаськыса быри. Удмуртъёсты но татын асьсэ выжызэс кадь пумитазы. Келякузы автобус укноосты йыгало, бӧрдо, эшшо лыктыны куро. Ансамблен ветлӥм Башкирие, Пермь областе, Москвае. Мыным шуд усиз адӟыны Казахстанэз, Грузиез, Украинаез, Белоруссиез, Латвиез, Литваез. Асьме калык котькуд ласянь, оло, синмаськымон ӧвӧл ке но, мон ас гуртам ик улысал, нокытчы ӧй кошкысал. Гогые бурмемын. Секыт пыртӥ потонъёс шумпотонэз шӧдыны дышетӥзы. Ноку ӧй малпа, гажано адями луо шуыса. Асьме республикаын монэ тодӥсьтэмез ик ӧвӧл, дыр.

- Тросэз уггес валало кадь асьме культураез, уггес дунъяло. Малы тӥ сое ӝутоно кариськиды?

- Шонер верады. Мынам пичи дырысен ик вирам кырӟанэз-эктонэз яратон пыӵамын. Мон сотэк уг быгатӥськы ни, куасьмыны кутскисько. Тазалыке куашкатозь возьмато на калыклы удмуртлыкмес. 209 номеро нылпи садын пиналъёсты удмурт фольклорлы дышетӥ. Со ужрадме азьланьтӥсько тодмо удмурт тодосчиен Роза Кузнецоваен ӵош 20-тӥ школаын. Тэшкылиос монэ анай-атайзэс выллем возьманы кутскизы. Талы луыса ик мынам удмурт культураысь кошкеме уг поты.

- Геннадий Заволокинлэн «Шуд, арганэ!» передачаяз но сюрылӥды шуыса, кылӥськылӥз…

- Выль даурлэн кутсконэз удалтӥз ай. Геннадий сямен ик, Анастасия но Захар Заволокинъёс синмаськизы ансамбльмылы. Удмурт шаерамы вуыса, кытчы гинэ уг быдэтско, Настя шуэ: «Инвожотэк» ум потэ.

- Тӥ асьтэдыз шудоен лыдъяськоды-а?

- Туж шудо. Кытӥяз курдасько: оло, такем вылӥ шумпотон мыным кин ке сётӥз отӥяз адэ кыскон вылысь? Но рае ик шедеме потэ. Ас даурам мон калыклы пичи но уродзэ ӧй лэсьты. Кӧня асме тодӥсько, одӥг кивалтӥсьлэн но шорам лек ваземез ӧвӧл. Котьку дунъязы. Мар со тушмон шуыса юады ке, мон валэктыны уг быгаты, вылды. Ӧз кылды мырӟиськылыны олокыӵе но сьӧсьёсын.

Пичи дырысьтым льӧль малпанэ но улонэ пыӵаз. Шуд ӧвӧл шат со? Мыным сизьым-тямыс арес вал, агае армиысь бертыку. Учкисько, погонъёсаз танк суредамын. ӝуатски танкист луон малпанэн. Озьы ик кылдӥз. Белоруссие сюри. Огзэ уг вунэты: монэ ас ёзъёсыным ӵош ӧз басьтэ, кыӵе ке висёнме шедьтӥзы. Армие уз кутэ ни, зэмос пиосмурт уг луы, кожай. Шаермес утьыны кошки туж шумпотса.

- Дунне бырон вуысал ке, мае нырысь ик сьӧрады кутысалды?

- Нырысь ик кузпалме но нылпиосме, собере – арганме. Тодам ай нылылы алигес вераме: кулӥ ке, ньыль арганэ пӧлысь огзэ одно сьӧрам келялэ. Кыӵе но учыре ӧй сюрылы мон! Погратозям юылэме вань-а? Гуртам кык-куинь арганчи. Сюан, армие келян, вордскем нуналъёс… Шулдыртоно. Нош арганчи котьку азьпалан. Юылӥськиз. Али кык ар ӵоже ымам одӥг грамм но ӟуземе ӧвӧл. Нылашъёс крезьгурчи доры нырысь ик лыкто аракыен. Юытэк выремысь, кӧнязэ кисьтазы чырты сьӧрам! Соослы ма – шуд, эн дугдылы. Сямы небытэн но юмоке усьылӥськиз.

- Тӥледлы куатьтон вить арес. Ӧд жаде на-а?

- Мон егит на. Семьяелы гинэ ӧвӧл, калыкелы кулэ ай. Ӟигар вань дыръя выльысь но выльысь ӝуто на удмурт культурамес.

За предоставление материала выражаем огромную благодарность редакции газеты "Удмурт дунне"


Источник:

Журавлев М. П. Шайгуэ но арганэн мынысал / М. П. Журавлев ; записала Е. Сараматова // Удмурт дунне. - 2006. - 17 февр. - С. 6, 11. - (Удмурт кизилиос).