Ермолаева Жанна Михайловна

Материал из Воршуда
Перейти к навигацииПерейти к поиску
The printable version is no longer supported and may have rendering errors. Please update your browser bookmarks and please use the default browser print function instead.

Гань-гань улыны уг чида

Ермолаева.jpg

Шаркан ёросысь Быгы гуртысь удмурт лулчеберетъя йӧскалык центрез шаерамы тодӥсьтэмез ӧвӧл, дыр. Соин 10 аръёс ӵоже ни кивалтэ Жанна Михайловна Ермолаева. Гань-гань улонэз тодӥсьтэм, етӥз кышномурт пусъемын Кун Кенешлэн но Лулчеберетъя но туризмъя министерстволэн Данъян грамотаосынызы.

Сьӧд коӵыш ӧз люкеты

Быгыысь удмурт культурая центрын резь-куаж потто. Сиён-юонлы сӥзем музейын лэсьтӥсько, сцена вылын кырӟало, пиналъёс солань-талань ветло, кытысь ке тапыртэм куара но шуккиське. Клубын дасясько выль сезонлы.

– Ӵукна 8 часлы тубисько клубе, ӝыт 5 часын пичизэ пиналме кутӥсько садикысь, бызьса-бызьса сиён пӧрасько но коллективеным, машинаям пуксьыса, 6 часлы шонтӥськом ёросысьтымы клубъёсы концерт сётыны, – вера Жанна Ермолаева. – Берен вуиськом ӝытазе 10-11 часъёсы гинэ. Весь шуисько: эн потталэ ни монэ сцена вылэ – документъёсын вырыны уг вуиськы! Но ачим уг чида ук. Венгрие вуылыкум, абдрай вал: вот уло адямиос – гань-гань. Ми озьы ум быгатэ. Улон мӧзмыт медаз поты шуыса, ужрад вылысь ужрад малпаськом.

Школаын ик мон аслым туж активной потӥсько вал ни, котькыӵе кружокъёсы пыриськи: эктӥ но, кырӟай но. Шаркан ёросысь Ляльшур школаын соос трос вал. Но клубе ужаны лыктыны малпанэ ӧй валы. Яратӥсько вуриськыны, керттӥськыны, пужыятскыны. Бабае Руфима Стрелкова доры мынӥсько но ёртӥсько вал: «Баба, дышеты!» Солэн бадӟым шкафаз кыӵе гинэ бугор ӧй вал, но ваньмыз тугаськемын. Мон, соосты биняса, тупатъяса, пукисько, шкафез утялтэмын, чылкыт мед луоз шуыса.

9-тӥ класс бере медӥсько вал мыныны Ярысь педучилищее, трудэн дышетӥсь луо шуыса. Мама шуиз, туж, пе, кыдёкын, ойдо оскалтом Ижысь культурая училищее пырыны, отын вань киужен герӟаськем специальность. Суредаськонъя экзаменэ мыныкум, сюрес вамен сьӧд-сьӧд коӵыш потӥз. Экзаменын азям натюрморт пуктӥзы, суредаськыны пукси. Школаын талы ӧз дышетэ бере, толыке ӧз тырмы, суредаме ӧз луы. Асме янгыше ӧй уськыты ни, сьӧд коӵыш ортчиз бере, соин ик, пӧй, ӧй быгаты! Собеседование ӧтизы. Аттестат чебер, «витьёс», математикаен, физикаен «ньыльёс» вал. Дышетӥсь Надежда Семёновна Полякова шуэ, ойдо, пе, ӵуказе лыкты на мукет экзаменэ, кырӟан, эктон дася, учком. Мон, пичи востэм нылаш, я, шуисько, оскалтом. Кырӟаны-эктыны быгатӥсько, фольклорной кружоке ветлӥсько. Ортчи-а, ӧй-а кырӟанъя экзаменме – быдэс гужем тодытэк улӥ. Сӥзьылпал вуэ гожтэт: 31-тӥ гудырикошконэ ужан дӥськутэн училищее ӧд лыктэ ке, тӥ отчислить каремын луоды.

Инмар адӟе, лэся, кытчы мыноно, кытчы ӧвӧл. Мама но валам, кытчы монэ ыстоно. Мон уга шумпотӥ вал ни, школаысь кошкисько, фольклорной кружоке уг ветлы, гуртъёсы концертъёсын уг пота ни шуыса. Акыльтӥз вал, лэся, улонам мукетсэ оскалтэме потӥз. Но али весь аслым шуисько: удалтӥз, мон училищее со аре сюри шуыса. Ӵапак соку фольклоръя отделение усьтӥськиз, кылдӥз «Инву гур» ансамбль, соин ӵош кунгож сьӧры потаны кылдӥз: Швейцарие, Турцие, Венгрие. Дышетӥсьёс туж трос милемлы сётӥзы эктон но кырӟан удысъёсын, тужгес но – хоровой искусствоын, крезьгуро инструментъёсын шудыны дышетскимы: арганэн но, крезен но, балалайкаен но. Фольклорен мон пичи дырысен пыӵатэмын ук. Али но тодам вайисько, кызьы дедое вашкала кырӟанъёсты кырӟаса пукиз. Малы мон соосты гожъяса ӧй кельты?

Быгы быгатэ

– 4-тӥ курсысен Быгы гуртысь культурая юртлэн кивалтӥсез Нина Григорьевна Беляева училищее лыктӥз, тӥляд, пе, кыӵе ке но Жанна Стрелковады вань, туэ дышетсконзэ быдтэ. Ӧтиз практикае, соглаш луи. Уг быгатӥськы валэктыны малы, но пинал дырысеным ик мынам потэ вал ни Быгые лыктэме, татчы улыны кылеме. 3-тӥ курсын дышетскыкум, Быгыысь культурая юртсэс усьтыкузы, юри ветлӥ ужрадазы. Туж яраз! Практика бӧрсьы Нина Григорьевна монэ ужаны ӧтиз, ярай, лэся. Озьы 1996-тӥ арын гудырикошкон толэзьысен мон ӧй люкиськылы ни Быгы клубен.

Училище бере лыктэм специалист борды кулэ зол наставник, кудӥз валэктоз, кытчы вамыштоно. Мынам сыӵе адямие вал Нина Григорьевна Беляева, али со Быгы муниципал кылдытэтлэн йырыз луэ. Коллектив но туж эшлыко, юрттӥськись. Соку ик ӝытъёсы репетициосы люкаськылӥськом, гуртъёсы, ёросъёсы, юбилейёсы, сюанъёсы весь концертъёсын потамы. Шуи ке, Шаркан ёросын соку Быгы клуб гинэ гастрольёсын потаз, уг янгыша. Валан вал ни, клуб ачиз аслыз коньдон поттыны кулэ шуыса. Коньдон нокин уг висъя, нош укноосты вошъяно, выжъёсты маин ке буяно, аппаратура басьтоно, костюмъёс вуроно, – шуэ Быгыысь удмурт культурая центрен кивалтӥсь.

Жанна Михайловнаез нырысетӥ нуналъёсысен ик пуктӥзы чеберлыкъя кивалтӥсе. Со кивалтыны кутскиз «Апайёс» ансамблен, кылдытӥз «Премьера» (али со «Зоринча» шуыса нимаське) вокальной ансамбль, пиналъёслы фольклоръя «Чингыли» (али – «Питран») ансамбль. 2006-тӥ арысен, ваньзэ лач-лач валаса, Жанна Ермолаева луиз Быгы культурая юртлэн директорез. Со дырысен кыӵе гинэ ужрадъёс радъямын, кыӵе гинэ вормонъёс басьтэмын ӧвӧл.

«Две звезды» телевизионной проектлэсь адӟем карыса, Быгыын та амалъя конкурс радъяны кутскизы. «Ой, ма тӥляд пӧрмоз» выллем вераськонъёслы ӧч карыса кадь, люкаськиз 15 пар. Мукет культурая юртъёсысь ужасьёс нырысь жюри чот вуылӥзы, собере, ужрадлэсь положенизэ курыса, асьсэос но доразы таӵе концертъёс лэсьтыны кутскизы. Нош быгыос со дыре люкало вал ни семьяосты: паръёс кылдылӥзы дедоослэсь, бабаослэсь, нунокъёслэсь, анайёс-атайёслэсь...

– Кылем арын школаен ӵош кутским лэсьтыны «Битва хоров». Туж тунсыко, – азьланьтэ Жанна Михайловна. – Нырысетӥ турез сӥземын вал Атыкай музъемез утисьёслэн нуналзылы. Кырӟазы быдэс классэн, нылпиос бордын – папаоссы. Мар со вал! Клубе ӝытсэ атайёс репетировать карыны лыкто. Пушкын данъяськон уртче! Кыкетӥ тур сӥземын вал 8-тӥ Мартлы, чузъяськизы яратон, тулыс сярысь кырӟанъёс. Таяз рад нылпиос бордын мамаоссы вал, асьсэлы костюмъёс но вурылӥзы.

Сюрес усьтӥське мынӥсьлы, шуо. Аръёс ортчемъя тодон-валан но люкаське. Шумпотымон, калыкен, клубъёсын, Шаркан ёросысь культурая но туризмъя управлениен валче ужаськомы. Туж потэ на ёросын «Куара. Нылпиос» конкурс радъяме. Лэсьтоно ке, зол лэсьтоно, быдэс ёросысь кужмо куараен нылпиос мед пыриськозы. Шарканын ортчыло та выллем вожвылъяськонъёс. Но мар соос сёто пиналлы? Та конкурс трос пайда вайыны, азинлык сётыны кулэ. Милям потэ сое мукет сямен лэсьтэммы. Ух! вот сыӵе, – киыныз ик шоналтыса, вера Жанна Ермолаева.

Кин, ми ке ӧм!

Жанна Михайловна трос тырше удмурт культураез утён но азинтон бордын. Кылем арысен Быгы культурая юрт луиз Шаркан ёросысь удмурт культурая центр. Библиотекаын сылэ суредасьлэн Валентин Белыхлэн ужез. Отын суредамын коръёслэсь пуктэм юртъёсын, кеносъёсын азбар.

– Та милям льӧль малпанмы, – суред шоры возьматыса, вера Жанна Михайловна. – Кылдытыны туала куа. Азбар шорын – валтӥсь юрт, отын ортчылозы сӥё-дано ужрадъёс. Палэнынгес сыло кунокуаос. Соос дорысь валтӥсь юртэ нуэ шуныт переход. Отын интыяськоз галерея. Нош валтӥсь юрт сьӧрын – удмурт сиён-юонъёслы сӥзем музей.

Малпанэз быдэстыны секыт ке но, со дорозь трос вамышъёс лэсьтэмын ни. Быгы 2014-тӥ арын фин-угор лулчеберетъя нырысетӥез шоркар луиз. Та нимез нуллон понна нюръяськизы быдэс фин-угор дуннеысь 8 гуртъёс. Та программа улсын быгыос ортчытӥзы 12 бадӟым ужрад, тросэз соос пӧлысь сям-йылоллы пӧрмиз ни. Кылсярысь, сиён-юонъёслы сӥзем «Быг-быг» фестиваль. Нош туэ кылдытэмын удмурт сиён-юонъёслы сӥзем интерактивной музей.

– Улон азьлань мынэ, туризмез но азинтыны кулэ. Туэ музеймес йылаз-пумаз вуттыны малпаськомы. Со интыяськемын школалэн вуж столовояз, кема аръёс ӵоже со тырттэм улӥз, укноосыз но пильылэмын вал ни, нош коръёсыз юнэсь ай. Туж секыт, конечно, йӧтэ ни. Вань поттэм коньдонмы отчы кошке – 400 сюрс манетэз музей «сииз» ни. Со сяна, юрттӥське на Быгы муниципал кылдытэт, гуртысьтымы «Восход» возёс. Одӥг комнатаяз корка котырысь арбериос утиськозы – таиз но туж кулэ, уго пиналъёс уг тодо ни, ма со аръян шуккон вышкы, Баба-Ягалэн ступаез, шуо. Мукет висъетъёсаз пӧраськыны но, пӧрамез оскалтыны но луоз.

2015-тӥ арын ветлӥмы Эстониысь сетуос доры. Соослэн гуртсы фин-угор культурая шоркар луиз вал. Паймим: быдэс гурт люкаськемын, лач-лач калык дӥсьёсын, чыртывесьёсын. Сыӵе чебересь, бадӟымесь.

Туэ гудырикошкон пумын ёросын ортчытӥм Выль шулдыръяськон. Люкам арлыдоосты, экскурсия возьматӥм. Шаркан пал шортдэремен тодматыку, сюлэмез вӧсь кариз таӵе югдур: асьме арлыдо адямиос уг быгато дӥсяны асьме ёрос шортдэреммес. Шаркан палъёсын шортдэрем нуллон вунэмын вал ни, шумпотӥськом, ми бордысь но тросэз потэ, югдур воштӥськыны ӧдъяз шуыса. Элькун ужрадэ мынӥськом ке вал, ёрос администрация азьвыл куаретылӥз: мар сыӵе бездыт, шушань дэремъёсын ветлӥськоды, чеберъялэ! Ма, кызьы ми сое чеберъялом, сыӵе дэремъёсын ветло ке вал асьме апайёсмы (песянайёсмы), озьы ми дӥсьлэсь вань чеберзэ быдтом. Ум чеберъялэ, шуиськом! Милям со, кыӵе вань, сыӵе! Кин сямъёсты возёз на, ми ке ӧм, Шаркан ёросысь удмурт культурая центрысь ужасьёс!

Куддыр сыӵе мӧзмыт малпанъёс йыре лыкто. Европаетӥ ветлӥськом но адӟиськом: куд-ог интыосын ӧвӧл клубъёссы, Венгриын, кылсярысь. Милям но пичи клубъёсты быдтозы, дыр, малпасько, сопала улон коже ни. Кылёзы золъёсыз, кудъёсыз мар ке но карыны выро, пайда ваё, тэк уг пуко. Ёросамы сыӵеосыз трос ӧвӧл ке но, сюлэм висе. Али, клубъёслэсь сезонзэс усьтыса, ветлӥськом – программаямы ёросысьтымы вань клуб коллективъёс пыртэмын. Номеръёсъя адӟыны луэ ни, кызьы ужало клубъёс. Шумпотоно, тросэз дӥсьто, кыстӥсько золъёсыз сьӧры.

Нош гуртлы клуб кулэ! Пиналъёс но тани, урокъёс быро но, клубе дымбыр-шалтыр пыро ни. Школа матынэн, оло? Но мукет ласянь, пиналъёсты уд пӧя ук, соослы тунсыко ӧвӧл ке, клубе гозыен уд кыскы. Озьыен, быгато асьмелэн специалистъёсмы ужаны. Милям ужа 29 кружок, 14-ез соос пӧлысь пиналъёслы. Тросэз кружокъёс киужлы дышето – пужыятскыны, бисерен вырыны, басма юдэсъёслэсь вуриськыны, суредаськыны. Кышноос ужзы бере ӝытазе вуриськыны мылысь-кыдысь потало, шортдэремъёс пӧрмытъяло. Алёна Савельева кышноос понна нуэ на аэробикаез. Шегъянысь но, Быгы починкаысь но кышноос ас доразы мугорзэс куасалляло ни. Клубмы ӝытсэ пась луэ, егитъёс теннисэн шудо. Пиналъёслы ӝытсэ кыӵе ке кружок малпано на.

Шутэтске мумиз-бубиз бордын

– А. Волков, президентэ нырысьсэ бырйиськыкуз, дорамы вуылӥз вал. Ӝожтӥськиськом, школамы вуж ни шуыса. Со, мон шоры учкыса, юа: кӧня пинал вайыны малпаськод? Куинь, шуисько. Куиньзэ вайид ке, соку пуктом, пе. Дыр ортчыса, нош гуртамы вуылӥз. Вот, шуисько, мон куинь пинал вайи, школамы, тау, вань ни, клубмы аппаратуралы туж ёрме. Кузьмаз.

Пиналъёсы но ачим кадь ик активноесь. Пичи дыръязы шуо вал, клубе ужаны мыном, директор луом. Бадӟым будэмъязы визьмасько ни. Ой... гинэ шуо на. 3 нылы, кулэ дыръя туж юрттӥсько, сиён пӧрало. Бадӟымез, Вера, 10-тӥ классэ мынӥз, 9-тӥ классэ горд аттестатэн йылпумъяз. Эктонъя «Ерпечкаос» коллективе ветлэ. Уг тоды на кытчы мыныны, берпуметӥ малпанэз: биологиен но химиен герӟаськем ӧр. Шоретӥез, Ирина, кырӟаны туж яратэ, кык пол «Пичи уӵыпи» элькун конкурсэ пыриськылӥм, кырӟанъёсыз диске шедизы. Пичиезлы, Варваралы, 5 арес, садике ветлэ, туж кырӟамез потэ. Микрофонэн ветлэ ни: «Моя Удмуртия» ТРК-ысь журналист Оля Ардашева али вазиськиз, кырӟан, пе, дасялэ, клип лэсьтыны лыктом.

Туж юрттэ кузпалы Павел, сотэк пукысал гуртын пытсаськыса. Со эктэ но, кырӟа но, театре но ветлылӥз. Кылзӥське рок крезьгурез. Туэ «Улетай» фестивале вуылӥм – воксё мукет омыр. Азьвыл сое но весь ӝутъясько вал, Герберын «Шудо семья» конкурсэ но пыриськеммы вань. Али сое уд потты ни – кин ке но гуртын но луыны кулэ ук, пиналъёс бордын. Ачим йӧнала шутэтскыны но уг валаськы бере.

Шутэтскон нунал кемдэ ке, гуртысь нокытчы но уг потаськы. Утялскисько. Туж яратӥсько анае-атае доры Ляльшуре бертылыны. Отын мон лулпушеным шутэтскисько.

Источник:

Векшина, М. М. Гань-гань улыны уг чида / Мария Векшина // Удмурт дунне. - 2016. - 16 сент. - С. 10, 15 : фот. - (Тӧр шорын).

За предоставление материала выражаем огромную благодарность редакции газеты "Удмурт дунне"