Редактирование: Емельянов Константин

'''Константин Васильевич Емельянов''' (1926-тӥ арын 23-тӥ куарусёнэ, Эгра ёрос, Мазьги (Лонки-Ворцы) гурт - 2016-тӥ арын 22-тӥ куарусёнэ, Эгра ёрос, Мазьги (Лонки-Ворцы) гурт) - удмурт гожъяськись-прозаик.
[[Файл:Emel.jpg|thumb|right|]]
=Улон сюресэз=

Емельянов Константин Васильевич вордӥськиз Эгра ёросысь Мазьги (Лонки-Ворцы) гуртын '''1926'''-тӥ арын 23-тӥ куарусёнэ. <ref name="поздеев7"> Поздеев П. Константин Емельянов (1926) // Писатели и литературоведы Удмуртии : биобиблиогр. справ. / сост. А. Н. Уваров. – Ижевск, 2006. – С. 147–148. </ref>

Костя пичи дырысен ик книга-газет лыдӟыны яратылӥз. Атаез но оже кошкыкуз дышетскыны косӥз. Туж дышетӥсь луэмез потэ вал. Сизьым классэз йылпумъяса, эшеныз ӵош Якшур-Бодьялась педучилищее мынӥзы. Кыкназэс ик экзаментэк кутӥзы – ушъян грамотаоссы вал. Ньыльдон иськемъем сюресэз мынытозязы, кутъёссы пӧсьтылӥзы. Нырысетӥ арняяз ик нюлэскы нин дуре ветлоно луиз. Кутанэз ноку но адӟылымтэ мурт аслыз пыдкук пӧраз. Ярано коть, эшез та ужлы чырткем вылэм. Огназ ке луысал, оло, гольык пыд бертыны кыльысал. Кызьы но озьы Октябрь праздникъёс дорозь дышетскизы. Отӥяз эшез чутрак пумит кариськиз Бӧдьяла мыныны. Педучилищезэс аналтӥзы. Берен Эграла – тямысэтӥ классэ – вамыштӥзы. <ref name="кутузова5"> Кутузова В. Гур вылысь Емельян // Удмурт кизилиос : очерки, зарисовки, интервью (2001-2007). – Ижевск, 2007. – С. 222-223. </ref>

Быдӟым Отечественной война пуромем бере ик, бубиз фронтэ кошкемен, бубазы пересьмыса но висьыса кынартэм луэмен но, семьяысьтызы нылпизэс сюдыны-сектаны, дӥсяны-кутчаны шуг-секытъёс кылдэмен но трудодень поттонзы мумызы вылэ гинэ кылемен, Костя — Емельяновъёслэн бадӟымез пизы — '''1943'''-тӥ арын Эгралась шор ёзо школаысь 9-тӥ классэ ветлэмысь дугдӥз но колхозын ужаны кутскиз. <ref name="поздеев6"> Поздеев П. «Буйгатсконэз тодӥсьтэм адями…» : Константин Емельяновлы – 75 // Кенеш. – 2001. – № 9. – С. 54–55. </ref>
Кӧня ке нунал гинэ ортчиз но солы Эгралась ноку витьымтэ ивор вуттӥзы: партилэн райкомаз кыкетӥ секретарь доры отё, пе. Ӧтиллям бере, ӵуказеяз ик мынӥз ини. Кыкетӥ секретарь чырткемъяськыны вуэмзылэсь азьло ик Костялы шуак ӵектӥз:
— Тыныд МТС-э мыноно луоз, трактористьёсты дасян курсэ.
Костя озьы но, тазьы но пумитъяськыны турттэ вал: «Сыӵе кырсь уже!» Пияш пыкиськыны шӧтам вал, но секретарь нокыӵе кариськытэк вазиз – ӧд ке, пе, мын, ми тонэ дезертирен лыдъялом... Кин но мар со – «дезертир» – Костя туж ӟеч тодэ вал ини… <ref name="емельянов1"> Емельянов К. Со шурмыт аръёсы… // Кенеш. – 1995. – № 5. – С. 36-48. </ref>

Урод мылкыдзэ шӧдыса, вылды, трактористлэн удысэз пайдаё шуыса, гочатӥзы: трудоденьлы быдэ куинь кило ю тысь но манетэн ӝыныен коньдон сӥзизы. Школаын ӟеч дышетскиз вал бере, куд-ог тодмоосыз серем но карыны выризы: таиз, пе, география яке математика ӧвӧл – трактор. Бӧрысьгес аслыз пичильтык трактор но сӧзназ. Гуртын кӧня ужез быдэсъяны юрттӥз. <ref name="кутузова5" />

Тракторист ӧнерлы — специальностьлы — Костя Эгра МТС-ын дышетскиз. Кален гань-гань ужа вал ини. Повестка вуиз: ӵукна военкоматэ, пе, мыноно. Нош Константинлэн пинал дырысь пельыз секыт вал. Озьы ке но комиссар шуиз: кулэ луиз ке, шедьтом, пе, кытчы ыстыны. Но со вакыт трактористъёслы бронь сётэмын вал ини. <ref name="кутузова5" /> 

'''1943'''-тӥ арысен кутскыса пенсие потытозяз, вордӥськем палъёсаз «Лонки-Ворцы» — «Рассвет» колхозаз ужаз: музъемез гыриз-кизиз, ю-нянь октӥз-калтӥз. Нырысь трактористын, берло аръёссэ — механизаторъёслэн бригадаенызы кивалтӥсьын.  Тыршыса ужамез трос данъян грамотаосын, медальёсын пусъемын. <ref name="константин3">[http://elibrary.unatlib.org.ru/handle/123456789/5157 Константин Емельяновлы – 85 // Кенеш. – 2011. – № 9. – С. 13.] </ref>
Вань та дыр ӵоже Константин Васильевич ужамез ласянь но, сямъёсызъя но, семья пӧлаз но, юртьерзэ утемез-вордэмезъя но ассэ котькинлы синмаськымон чебер возьматӥз. Озьы, кызьы со ачиз вераз [[Перевощиков Юрий Семенович|Юрий Семёнович Перевощиков]] — Эгра МТС-ын огдыре дышетскем эшез-тодмоез но али дыре нимо-дано тодосчи, профессор но академик сярысь, «Кенеш» журналын  печатлам «Со шурмыт аръёс...» <ref name="емельянов1" /> тодэ ваёнъёсаз. <ref name="поздеев6" />

Вань улонзэ гуртын ортчытэмын ке но, солэн нимыз удмурт лыдӟисьёслы ӟеч тодмо. Серемес веросъёсыз, повестьёсыз мылкыдэз бурдъяло, улыны дышето. <ref name="емельянова2">[http://elibrary.unatlib.org.ru/handle/123456789/9851 Емельянова В. Тыпылэсь меда, бадярлэсь меда… // Удмурт дунне. - 2011. – 23 сент. – С. 13.] </ref>

К. В. Емельянов улонысь кошкиз 2016-тӥ арын 22-тӥ куарусёнэ Эгра ёросысь Мазьги гуртын.<ref>Емельянова, В. Шудо вал... // Удмурт дунне. - 2016. - 23 сент. - С. 21.</ref>

=Гожъямъёсыз сярысь=

«Гожъяськыны кызьы кутскиды?», – шуыса юнлы, Константин Емельянов вера: 
- Таиз сярысь монэ ӵемысь юало. Ачим но сое уг валаськы. Инкуазен сётэм мылкыд-а, мар-а со. Пичиысен лыдӟиськыны яратӥсько вал, со-а, мар-а гожъяськыны мылкыдме ӝутӥз. Кыкетӥ классын премия чотын «Дась лу!» газетлы гожтӥзы. Макем бадӟым шумпотон вал! Одӥг чурзэ но лыдӟытэк ӧй кельтылы. Туж вожъяськылӥ отчы гожъясь ёзъёсылы. Мынам но мылкыды вал, нош кызьы, ма бордысен кутскыны амалы ӧвӧл. Дышетӥсьёслы вазиськыны дӥсьтонэ ӧз тырмы - укыр керпотӥ. Сизьыметӥ классэз быдтытозям, номыри но ӧз пишмы. <ref name="кутузова5" /> 
 
Костялэн нырысетӥ гожтэмез потӥз '''1942'''-тӥ арын «Сталин сюрес» ёрос газетын. '''1947'''-тӥ арын сӥё-дано механизаторзы Анастасия Малых сярысь гожтэмзэ «Советской Удмуртия» газетэ ыстӥз. Поттӥзы. Кык-куинь толэзь ортчыса, эшез Андрей Емельянов солэсь юа: газетэ номыр ӧд-а гожъя, пе? Гонорарзэ солы ыстӥллям. Отчыозь гожъяськись ӧз но тодылы, гожъяськонэн узырмыны луэ шуыса. Ёрмон дыръёсы со туж юрттылӥз. Налог тырыны но тырмылӥз. '''1960'''-тӥ арын гуртысьтызы со нырысетӥез Иж-49 мото басьтыны быгатӥз. Гожъяськон мылкыдыз туж бадӟым вал уго. <ref name="кутузова5" /> 

Собере веросъёс гожъяны дӥсьтонэз ӝутскиз. «Ветлӥ меда, ӧй меда» нырысетӥ веросэз '''1965'''-тӥ арын «Молот» журналын потэм бере гожъяськон удысэз ӧръяськыса кошкиз. «Молот» («Кенеш») журнал повестьёссэ но веросъёссэ трос пол премиосын пусйылӥз. <ref name="константин3" />
Константин Емельяновлэсь гожъяськон мылкыдзэ Писательёслэн огазеяськоназы шӧдӥллям. Арлы одӥг пол егит гожъясьёслы семинаръёс радъяллязы. Солэсь арлыдзэ ӧз учке, егитъёсын ӵош дышетскыны ӧтьылӥзы, гожъямъёссэ эскерылӥзы.
Одӥг пол таӵе ужрадысен, Фома Ермаков тодосчиен кенешыса сылыкузы, веросъёссэ книгаен поттон сярысь малпан чилектӥз. Со ик Геннадий Красильниковен вераськыны косӥз. Пумиськемзы так ӧз луы: веросъёссэ люкаса вайыны косӥз. Надежда Кралина тодосчи соосты учкиз но поттоно шуиз. <ref name="кутузова5" />   

Писательлэн «Ветлӥ меда, ӧй меда» веросъёсын нырысетӥ бичетэз «Удмуртия» книгапоттонниын '''1971'''-тӥ арын потӥз, «Бускельёс» бичетэз — '''1975'''-тӥ арын, «Эшъёсы-юлтошъёсы» бичетэз — '''1978'''-тӥ арын, повестен но веросъёсын «Пилиськем горшок» бичетэз — '''1989'''-тӥ арын, «Капка сьӧрын» – '''1995'''-тӥ арын. <ref name="константин3" /> 

Ю-нянь кизёно бусыоссэ сямен ик, Костя Емельянов егит-егит дырысеныз ни мур но веськыт бугыръяса пужалъя тодэм калыкезлэсь улон-вылон луд-выръёссэ — проза, чеберлыко произведениос гожъя, бумага вылэ кылдӥсь чуръёсызлэсь секталазэс но, шӧмзэс но, пӧсьсэс-кезьытсэс но, кыӵе буёлъёсын чилямзэс но, макем жингырамзэс но ӟеч-ӟеч чакласа-эскерыса. Вань даурзэ вордскем палъёсаз улэ-ужа бере, произведениосызлы шӧм но аспал вераськонысьтызгес ик басьтэ. Огъя литературной кылмес узыргес каре, гожъяськон кылмылы выльдӥськыны, кыршамлэсь, вужмемлэсь утиськыны юрттэ. <ref name="поздеев6" />

Константин Емельяновлэн «Капка сьӧрын» (1995) повестезлы вылӥ дунъет сётэ Надежда Петровна Кралина. Та книга шуг-секытъёслы, шумпотонъёслы, геройёслэн оломар сярысь но малпанъёссылы, осконъёссылы гинэ сӥземын ӧвӧл. Отын суредамын огшоры, асьме вӧзын ик улӥсь адямиос. Автор вордскем музъеммес гажано, инкуазез но калыклэсь лул-сюлэм узырлыксэ утёно шуыса уг дышеты, уг нодъя. Со огшоры гинэ возьматыны быгатэм Удмурт шаермылэсь, инкуазьлэсь, адямиослэсь чеберзэс. <ref name="кралина4"> Кралина Н. Капка сьӧрысь сюрес // Ӟечбур! – 1995. – 17 авг. – С. 2. </ref>

- Вань веросъёсты лякытэн лыдӟисько, кытысь сыӵе узыр кыл шедьтӥськоды? – юанлы вера:
- Номыр но мултэссэ малпаса уг улӥськы, асьме вераськон кылъёсын гожъяськисько. Ручка кутӥськод ке, кылъёс асьсэос радызъя пуксё кадь. Ма, мон кема улэмын пересь бубаосын. Соослэн вераськон манеръёссы мыным пыӵазы. <ref name="кутузова5" />  
  
Жаляса верано, выльдӥськон кутскемен, тросэзлэн писательёслэн сямен ик, Константин Емельяновлэн но гожъямъёсыз нимаз книгаосын потэмысь дугдӥзы. Повестен но веросъёсын «Яратонэз уд алда» рукописез «Удмуртия» книгапоттонниын кема аръёс ӵоже кылле ини. <ref name="константин3" />

2017-тӥ арын Константин Васильевичлэн та чебер но тунсыко книгаез лыдӟись доры вуиз ик.

=Библиография=

==Книгаосыз==

[http://elibrary.unatlib.org.ru/handle/123456789/7469 Ветлӥ меда ӧй меда? : веросъёс. – Ижевск : Удмуртия, 1971. – 62 бам.]

[http://elibrary.unatlib.org.ru/handle/123456789/7465 Бускельёс : серемес веросъёс. – Ижевск : Удмуртия, 1975. – 56 бам.]
 
[http://elibrary.unatlib.org.ru/handle/123456789/7709 Эшъёсы-юлтошъёсы : веросъёс. – Ижевск : Удмуртия, 1978. – 52 бам.]

[http://elibrary.unatlib.org.ru/handle/123456789/7679 Пилиськем горшок : повесть но серемес веросъёс. – Ижевск : Удмуртия, 1989. – 126 бам.]

[http://elibrary.unatlib.org.ru/handle/123456789/7707 Капка сьӧрын : повестьёс / К. Емельянов. Ӟукыртэ, ӝуштэ сюрес / И. Гусев. – Ижевск : Удмуртия, 1995. – 118 бам.] 

Яратонэз уд пӧя: Веросъёс. - Ижевск: Удмуртия, 2017. - 176 бам.

==Статьяосыз==

[http://elibrary.unatlib.org.ru/handle/123456789/3727 Бака тымет вылын : серемес верос // Вакыт. – Игра, 2005. – 15 июля ; Кенеш. – 2005. – № 4. – С. 102–103.]

Ӝыт куно : верос // Ашальчи. – 2005. – № 2. – С. 32–34 ; Вакыт. – Игра, 2008. – 25 янв., 1 февр.

Кузьым : юмореска // Удмурт дунне. – 2006. – 3 февр. – С. 15.

[http://elibrary.unatlib.org.ru/handle/123456789/5364 Кулак кен : кузьмадёс // Кенеш. – 2012. – № 1. – С. 10–35 ; № 2. – С. 10–32 ; № 3. – С. 10–35 ; № 4. – С. 8–22.]

[http://elibrary.unatlib.org.ru/handle/123456789/9701 Кулак кен : повестьысь люкет // Удмурт дунне. – 2010. – 15 сент. – С. 6–7 ; 21 сент. – С. 6–7.]

Кучапи : верос // Покчи эше : 1–2-тӥ классъёсын ватсаса лыдӟон книга. – Ижевск, 2006. – С. 100–102.

Кыктоос : верос // Ашальчи. – 2005. – № 4. – С. 28–30 ; № 5. – С. 32–33 ; № 6. – С. 38–41.

[http://elibrary.unatlib.org.ru/handle/123456789/9872 Лобась тэркы : верос // Удмурт дунне. – 2011. – 15 нояб. – С. 6.]

[http://elibrary.unatlib.org.ru/handle/123456789/4702 Октос : верос // Вакыт. – Игра, 2007. – 30 марта, 6, 13, 20 апр. ; Кенеш. – 2007. – № 5/6. – С. 3–13.]

[http://elibrary.unatlib.org.ru/handle/123456789/9852 Пая : верос // Удмурт дунне. – 2011. – 27 сент. – С. 7.]

Сьӧдпель : верос // Азвесь кышетэн толэзь : веросъёс : семьяын лыдӟон книга. – Ижевск, 2007. – С. 40–41.

[http://elibrary.unatlib.org.ru/handle/123456789/5158 Узы : верос // Кенеш. – 2011. – № 9. – С. 12–15.]

Шудон ; Ваня Вотинцев : веросъёс // Покчи эше : 1–2-тӥ классъёсын ватсаса лыдӟон книга. – Ижевск, 2006. – С. 93–95, 131–133.


'''Татчы 2005-тӥ арысен потэм чеберлыко статьяос гинэ пыртэмын, кылемъёсыныз тодматскыны быгатӥськоды [http://unatlib.org.ru/index.php?option=com_content&view=article&id=474&Itemid=319 Удмурт Элькунысь йӧскалык библиотекалэн электрон каталогъёсызъя].'''

=Уже кутэм литература=

<references />

[[Категория:Современные удмуртские писатели|Емельянов Константин]]