Владыкин Владимир

Материал из Воршуда
Перейти к навигацииПерейти к поиску

Владимир Емельянович Владыкин – удмурт кылбурчи, история наукаосъя доктор, профессор, Россиысь гожъяськисьёслэн огазеяськонзылэн ёзчиез.

Вячеслав Ар-Серги

Улон сюресэз[править]

Владимир Владыкин вордӥськиз Можга карын 1943-тӥ арын 20-тӥ южтолэзе. [1] Бубиз, ожын сӧсырмем офицер, Можгалан военной пулемётной училищеын курсантъёсты дышетӥз. [2]

Берло атайзы, Емельян Аркадьевич, Кез каргуртысь (посёлок) банкен кивалтӥз. Но Финн но Быдӟым Отечественной ож сюресъёсты ортчем мурт 1948-тӥ арын улонысь кошкиз. Озьы анайзы, Анастасия Алексеевна, ньыль пиосыныз (бадӟымезлы дас арес, пичиез соку гинэ вордӥськемын) огназ кылиз. Озьы ке но, сабыр, визьмо удмурт нылкышно вань пиосызлы умой сямъёс но ас калыктэ гажан мылкыд пыӵатыны быгатӥз. Ваньзы соос вылӥ образование басьтӥзы но дано адямиос луизы. [2]

Пиос пичиысен ас вылазы валазы но шӧдӥзы улонлэсь шуг-секытсэ. Володя семьяын кыкетӥ нылпи. Тулысысен бер сӥзьылозь пиос толы дасяськизы: пудо-живот утялтоно, бакча гудоно-мерттоно, чорыгано, губи яке узы-боры бичано-куасьтоно. Анастасия Алексеевна – удмурт нылкышноос пӧлын технической образованиен нырысетӥосыз пӧлысь одӥгез вал. Со 1930-тӥ аръёсы Ржев карын дышетскиз. [3]

Семьялэн улоназ «Кез» вакытсы туж секыт сётӥськиз. 1957-тӥ арын отличник Володя йылпумъяз семилеткаез. Берытскиз вордскем Можгаяз, капчиен пыриз дышетскыны педучилище, удмурт «Царскосельской лицее» (кызьы берлогес нимаз сое Владимир Емельянович Владыкин). Нырысь-валысь педучилище но, дышетскон но солы ӧз кельше. 14 аресъем пияш, нырысьсэ дорысьтыз кыдёке кошкем маке, туж мӧзмыса улӥз. Тужгес но курадӟиз суредаськонъя но чебер гожъяськонъя урокъёсын. «Ми соин куинь ар ӵоже «нажим – волосок» карыса вырим», – шуэ али Владимир Емельянович. [4]

Татын пияш общественной уже но пыриськиз, художественной самодеятельносте но ветлӥз – туж чебер куараен кырӟаз. Училище билиотекаысь вань чеберлыко книгаосты лыдӟыса быдтэм бераз, городысь лыдӟиськонниосы шонтӥз. Бератаз но эшъёссэ, коллегаоссэ тодонлыкъёсыныз ӵемысь паймытъяз. Володя физкультураен но эшъяськиз: ӝог бызьылӥз, волейболэн шудӥз. Гожъяськыны но татын йӧндырыны кутскиз. Нош котьма ке но, самой трос дырзэ но кужымзэ Володя дышетсконлы сётӥз. [2]

Педучилищеез Володя 1961-тӥ арын горд дипломен йылпумъяз. Малпа вал Удмурт пединститутэ пырыны. Нош дышетӥсьёсыз воксё шуэрскизы – только Москвае, пе, тыныд сюрес. Володя малпаськиз-малпаськиз но МГУ-е мыноно кариськиз. Нош отчы вуиз но абдраз: одӥг интые 18 адями!.. Экзаменъёссэ «витьлы» сётӥз… Но студент луон понна одӥг ар ке но стаж кулэ вылэм. Заочно ёзэтэ выжыса, Володя вуиз Кезаз. Ужаны пыриз школа-интернатэ, дышетӥсь, воспитатель, вожатой луыса ужаз. Татын но моганъёстэк ӧз ортчы. Ӟеч дышетӥсез ыштэмзы потымтэен, ӵош ужась эшъёсыз сессие ӧтён бумагаосты «адресат выбыл» шуыса, берен Москвае келяллям. Соин ик студентлы гужем сессие Москвае мыныса, тол экзаменъёсты но сётоно луиз. Одӥг толэзь куспын 12 экзамен но 16 зачёт сётӥз – ваньзэ «витьлы». Собере сое очной ёзэ выжтӥзы. [4]

Общежитие ГДР-ысь лыктэм студентэн ӵош интыязы. Соин эшъяськыса, студент Володя Емельянов немец кылын ӝог вераськыны дышиз. Со сяна, университетлэн программаезъя англи кылэз но дышетӥз. Москваын стипендиен гинэ улыны шуг. Ленин нимо стипендия ке но басьтылӥз, ужаса но уксё поттылоно луиз на: кулэяськисьёслы ӟуч но англи кылъёсын урокъёс сётылӥз. Чебер кырӟаны быгатэмез но яраз. Сцена вылэ потэм понна 14 манет тырылӥзы. [2]

«Кызьы тӥ этнографие вуиды? Мукет сюресъёс син азяды ӧй вал-а?» – шуыса юамъёслы, Владимир Емельянович али вера: вал, пе, кызьы ӧй вал. «Огвакытэ асме литераторен но адӟисько вал, малпалляй артистэ но мыныны: Инмар мыным куара сётэм вылэм. Вал мылкыды лингвист, переводчик луыны. Но улон ас сяиныз кузёяськиз – луи историк-этнограф». [4]

Кышноеныз Татьяна Григорьевнаен

1966-тӥ арын университетэз но В. Владыкин горд дипломен йылпумъяз. Университет бере ни — аспирантура. Отын гожтӥз диссертация удмуртъёслэн кызетӥ даурлэсь азьвыл улэм-вылэмзы сярысь. Кафедраысь кивалтӥсьёслэн туж уг поты вал та темаез юнматэмзы. Солы ӵектӥзы Африкая ужаны, кафедралы угось африканист туж кулэ вылэм. Пияш дӥсьтӥз аслэсьтыз малпанзэ вераны: Африкая ужась монтэк но, пе, шедёз, нош кин выроз мынам удмуртъёсыным, мон ке ӧй? Вылаз ик, удмурт этнограф одӥг но ӧй вал на. Ӝыны ар пала нюръяськиз но, темазэ юнматӥзы. Ӝоген, 1969-тӥ арын, (дыраз, куинь ар ортчыса) луиз история наукаосъя кандидат. Нош 1991-тӥ арын – доктор. [4]

Дышетсконзэ йылпумъякуз, англи кылэз тодэменыз, В. Владыкинлы ООН-ын переводчикын ужаны но ӵектӥзы. Тросэз таӵе ӧтёнлы шумпотысалзы, дыр: со уго мукет кунъёсы, ветлыны, бадӟым дуннеез адӟыны луонлык сётэ. Нош В. Владыкин малпаськиз но Удмуртиын, вордскем шаераз, ужаны мылкыд кариз. Малпаз тазьы: «ООН-ын ужасьёс шедёзы, нош удмурт калыклэн дышетскем муртъёсыз сокем трос ӧвӧл. Монэ удмурт калык быдэстӥз, дышетӥз. Табере пунэмзэ берыктоно, ас калыкелы ужано». [2] 19691973-тӥ аръёсы ужаз Удмурт научно-исследовательской институтын. Со тырысен тырше Удмурт кун университетын. [5]

1975-1976-тӥ дышетскон арез со ортчытӥз ГДР-ын: УдГУ отчы стажировкае лэзьылӥз. Архивъёсын но библиотекаосын ужаз, Берлин университетысь студентъёслы но дышетӥсьёслы лекциос лыдӟиз. Европаысь профессоръёс сак кылзӥзы кыдёкысь, оло, ноку кылылымтэ Удмуртиысь докторез (соослэн кандидат учёной степеньзы ӧвӧл). Умой мылкыдын отысь бертыса, В. Владыкин Удмурт университетын ужзэ азьланьтӥз. Арысь аре экспедициосын котыръяз удмурт улосэз. Кытын гинэ асьме калык уг улы — Киров, Пермь, Свердловск областьёсын, Татар, Башкир, Мари республикаосын, Сибирьын — ваньмаз вуылӥз. [2]

Трос секытэз но, шурдыт учырез но вормоно луиз Владимир Емельянович та улонын. Но ваньзэ вормыса, луиз со доктор но, профессор но. Дышетӥсьёсызлэсь оскемзэс ӧз алда, быдэстӥз. Вань дипломъёсыз пӧлысь самой дуноосыз, аслаз верамезъя, университетэз быдтэм поннаез но наукаосъя докторлэнэз — таосыз тужгес но секытэн сётӥськизы. Но со вормиз. Bӧзаз оскымон юрттӥсез — кузпалыз Татьяна Григорьевна. Со фольклорист. Этнография но фольклористика ог-огзылы матысь наукаос. Этнограф но фольклорист ӵошен тыршыса, ог-огзылы юрттыса бадӟымесь азинсконъёс басьто. [2]

Удмурт шаерамы Владимир Емельяновичез тросэз тодэ. Пӧртэм юанъёслы валэктонъёс курыса, солы вазиськыло культура учреждениосысь, школаосысь, министерствоосысь, правительствоысь, Вылӥ Советысь но мукет интыосысь. [3] Отчы но татчы лекция лыдӟыны ӧтчало. Лекциез умой лыдӟемез-верамез понна тау каро но куддыръя ӟучъёс паймемзэс ватытэк, «Зэм-а тӥ удмурт?» шуыса юало, пе. Таӵе учыръёс сое ӝоже уськыто. «Озьы юасьёс, — шуэ со, — мыным ӟеч (комплимент) вераськом кожало. Соослэн йыразы но уг лыкты, макем вӧсь каро соос монэ, ултӥяло удмурт калыкез. Озьы юамысьтызы адӟиське оскымтэзы, удмурт калыклэн визьмо муртъёсыз луыны уз быгатэ шуыса малпамзы». [2]

Владимир Емельянович Владыкинлэн 200-лэсь трос научной публикациосыз. Тросэз соос берыктэмын но поттэмын немец, англи, финн, венгер, эстон, коми но пор кылъёсын. Солэн ужъёсыз вань Бадӟым Советской но Исторической энциклопедиосын, «Вопросы истории», «Народы России», «Народы и религии мира», «Советская этнография» но трос мукет изданиосын. [5] Пичи гожтэмын та бадӟым адямилэсь лэсьтэм ужъёссэ шуг вераса быдтыны. Но мар гинэ уг лэсьты улоназ Владимир Емельянович – ваньмыз со удмурт калыкез понна лэсьтэмын но лэсьтӥське.

Гожъямъёсыз сярысь[править]

Гожъяськыны Володя Владыкин кутскиз Можга педучилищеын дышетскыкуз. Куд-ог ужъёссэ ёрос газетын но печатлазы. Огпол веросъёссэ но кылбуръёссэ пырак аслыз С. Я. Маршаклы келяз. Пумитаз туж шуныт гожтэт басьтӥз. Со пияшез уката бурдъяз. [2] Соос ай Можгаысен тодматскизы вал. Бӧрысьгес, В. Владыкин Москваын улыкуз ини, Самуил Яковлевич удмурт пияшез тодматӥз аслаз эшъёсыныз но – Твардовскиен, Свиридовен. [5]

«Москваын улыкум ӧй гожъяськы, шуыны луоз. Мон зыми столичной улонэ. Пайми мон азе усьтӥськем луонлыкъёслы. Тырши асме тодон-валанэн тырмытыны, тодматски калыкъёсын, ветлылӥ театръёсы, суредасъкисьёслэн адӟытонъёсазы», – вера Владимир Емельянович. [6]

Научной ужъёсыз огез бӧрсьы мукетыз пото огъя бичетъёсын но нимысь книгаосын: «История этнографии удмуртов» (1984), «Очерк этнографии удмуртов» (1984), «Этнография удмуртов» (1991, 1997), «Религиозно-мифологическая картина мира удмуртов» (1994), «Удмурты» (2008) но трос мукет ужъёсыз, статьяосыз. «Религиозно-мифологическая картина удмуртов» книгаез понна 1995-тӥ арын В. Е. Владыкин Удмурт Элькунысь Кун премилэн лауреатэз луэ.

Пинал кылбурчилэн ужъёсыз печатласькыны кутско элькунысьтымы газет-журналъёсын но огъя бичетъёсын. Кылбуръёсыз солэн философской пуштросъемесь луо. Поэтиказы ласянь но аспӧртэмесь. Кылбуръёсыз гожтэмын верлибрен. [7]

1980-тӥ арын кылбуръёсын «Марлы кырӟа тюрагай» удмурт но ӟуч кылын нырысетӥ бичетэз потӥз. Собере «Калыкын верало» (1998), таиз но кык кылын. 1992-тӥ арын В. Владыкин удмурт литератураын нырысез «Йыбырскон» удмурт но ӟуч кылын книга-эссе поттӥз. Со сӥземын вал асьме удмурт классикъёсмылы – Кузебай Гердлы, Ашальчи Окилы, Кедра Митрейлы, Г. Красильниковлы, Ф. Васильевлы но мукетъёсызлы. [1]

Vladykin1.jpg

В. Владыкинлы поэзиын ужанэзлэсь туж дуно луэмзэ тырмыт валаны дыраз но быгатыса юрттӥз Флор Васильев. Соин ик та кылбурчилы В. Владыкин сӥзиз таӵе чуръёссэ:

Быдӟым поэтьёс

Асьме пӧлын кема уг уло...

Соос ӝуаса ксшко...

Нош ӝуаса уг кысо,

Азьпалан яркыт пишто!..

Малы та кылбурчиос огъя кыл сокем ӝог шедьтӥзы? Кыксы но соос ӟырдыт ярато калыкез, солэсь ӟеч сямъёссэ, вераськон кылзэ но даурысь дауре вужмытэк улӥсь кыл устолыксэ. Ма, собере гожъяськон сямзыя но соос ог-огзылэсь олокыӵе кыдёкынэсь ӧвӧл. [8]

В. Владыкин, Ф. Васильев сямен ик, быгатыса улӟытэ фольклорысь традиционной жанръёсы пыӵам буёлъёсты. Калыкын кылдэм образъёс вӧзы со султытэ выльёссэ, соослы выль кужым но улон сётэ, соосты уката мургес но чебергес каре. Калыкысь тодмо легендая озьы кылдытэмын «Вашкала книга» кылбур. Вылез та кылбурын луэ, азьлозэ тодыса, вуоноез сярысь малпаськыны отён: [8]

Map карод,

кытчы ке но ышем со вуж книга,

но кылиллям солэн вунонтэм

кылъёсыз.

Котькыӵе адямилэн сюлэмаз

улэ одӥг ке но сыӵе кыл,

шедьтыны гинэ сое кулэ.

Нош собере со кылъёсысь

кылдытыны выль,

вунонтэм,

сюлэмез шунтӥсь лыдӟет.

1995-тӥ арын Будапештын мадьяръёс ортчытӥзы Владимир Владыкинлэн творчествоезлы сӥзем пумиськон. «Туж сюлмаськи, тулкымъяськи. Ведь Удмуртия понна таӵе ужрад нырысьсэ ортчытӥськиз», – вера Владимир Емельянович. [6] Со тырысь Владимир Емельянович поттӥз ни уно книгаоссэ «Ми удмуртъёс. Ӟечась-а?» (1996, 2007); очеркъёсын, эссеосын, интервьюосын «Мон» (2003) но мукетъёссэ.

Премиосыз[править]

Венгриысь Наукаосъя Академилэн Этнографияя Огазеяськонлэн дано иностранной ёзчиез, 1985.

Удмурт Элькунысь наука удысын дано ужась, 1989.

Финляндиысь Финно-угорской Огазеяськонлэн дано иностранной ёзчиез, 1991.

Финляндиысь Финской Литературной Огазеяськонлэн дано иностранной ёзчиез, 1992.

Россиысь писательёслэн огазеяськонзылэн ёзчиез, 1993.

Удмурт Элькунысь Кун премилэн лауреатэз («Религиозно-мифологическая картина мира удмуртов» книгаез понна), 1995.

Финляндиысь Фольклорной Огазеяськонлэн дано иностранной ёзчиез, 1995.

Росси Федерациысь Вылӥ партийной школалэн дано ужасез, 1998.

Кузебай Герд нимо премилэн лауреатэз, 2002.

Эшъяськон орден, 20002003-тӥ аръёсы Россиысь одӥгез валтӥсь тодосчи луыса РАН-ысь Государственной научной стипендия сётӥзы.

Библиография[править]

Книгаосыз[править]

В народе говорят... : стихи. – Ижевск : Изд-во "Известия Удмурт. Респ.", 2011. – 39 с.

Калыкын верало = В народе говорят. – Ижевск : Удмуртия, 1998. – 197 с.

Отчего поет тюрагай = Марлы кырӟа тюрагай : стихи, притчи, афоризмы. – Ижевск : Удмуртия, 1980. – С. 146.

Ajaloo nägu. – Tallin : Kirjastuskeskus, 2009. – 62 lk.

Статьяосыз[править]

Без Кедра Митрея нет удмуртской литературы : [эссе : посвящ. 115-летию со дня рождения писателя] // Байгурезь (Дебесы). – 2007. – 21 сент.

"В деревне хлеб уж не пекут..." : стихотворения // На переломе эпох : Союзу писателей Удмуртии 70 лет, 1934–2004 : ст., стихотворения, прозаич. произведения, док. – Ижевск, 2006. – С. 212.

Великая книга ; "Пришел Хам..." ; Море Балатон ; Васильки Бертольда Брехта : стихи // Арт. – Сыктывкар, 2005. – № 4. – С. 79–86.

Версдорф блокнотысь = Из Версдорфского блокнота ; Поэзилэн садэз ; В картинной галерее ; Бухенвальд = Бухенвальд : стихи // Инвожо = Каталог удмуртского ПЕН-клуба. – 2005. – № 9 (сент.–окт.). – С. 28–31.

"Гуртъёсын табере нянь уг пыжо..." : кылбур // Вордскем кыл = Родное слово. – 2009. – № 2. – С. 25.

Дуно лыдӟет : калык мадемъя : поэма // Инвожо. - 2013. - № 8/9. - С. 110-112.

"Есть три великих цвета..." ; Отчего поет тюрагай : стихи // Удмурты. – М., 2005. – С. 252–253.

"Жизнь – это мгновенная вечность..." = "La vie est une eternite instantanee..." ; "Грустно танцуют..." = "Les feuilles d'automne..." ; "Зачем мне чужой рай..." = "A quoi bon me servirait-il un paradis etranger..." ; "Мой маленький народ..." = "Mon petit peuple..." ; "Жизнь мой жизни..." = "La vie de ma vie..." ; Море Балатон = La mer Balaton ; Ель = Le Sapin ; Липы = Tilleuls ; Ольха = Aune ; Дуб = Chene : стихотворения / пер. с удмурт. Л. Пушина // Инвожо. – 2008. – № 5/6. – С. 128–130.

Заклинания // Удмурты. – М., 2005. – С. 107–108. – Содерж.: I. Человек – Инмару, веруя ; II. Инмар – человеку, веруя ; III. Человек – человечеству, веруя. "Когда на небе нет луны..." ; "В деревне хлеб уж не пекут..." ; "Мои далекие предки верили..." ; "Есть три великих вечных цвета..." ; Великому лесу : стихи // Италмас. – 2008. – № 2. – С. 82–83.

"Кыдёкысь кыдёке, Сибире..." : кылбур // Кизили. – 2005. – № 8. – С. 2.

Марлы адямилы сётэмын лул? = Milleks inimesele jn antud hing? ; "Хам вуиз..." = Tuli johkur. ; Версдорф блокнотысь = Versdorfi markmikust ; "Орган ке кутске шудыны..." = Kui orel mängu alustab... ; "Дирижёр пештырскем бадӟым сиӟь кадь..." = Dirigent seal toksib sagris rähnina... ; "Ваньзэ, ваньзэ тае мон адӟи кадь куке..." = Ma kõike, kõike seda oleks nagu näind... : кылбуръёс // Kuum ӧӧ : suome-ugri ranvaste tanapaeva luulet. – Tallinn, 2006. – С. 354–361.

"На Бородинском поле..." ; "Может быть, где-то в равнодушно далеком будущем..." ; Бухенвальд ; "Самое страшное открытие..." : [стихи // Италмас. – 2010. – № 2. – С. 26.]

Поэзилэн садэз = "Очень далеко, в Германии..." : стихи / пер. А. Арзамазова // Инвожо = Каталог удмуртского ПЕН-клуба. – 2005. – № 9 (сент.–окт.). – С. 59–60.

Шунды-мумы ; Инву-мумы ; Куинь бадӟым именникъёс // Кык гондыръёс : литературной выжыкылъёс. – Ижевск, 2010. – С. 33–37.

"Kauno sema chuzhid ilmasa?." ; "Eike, kassa ke keddo vujonas..." ; "Mono jurtam – mono ojmam..." ; Kelaparan ajda : стихотворения // Инвожо. – 2009. – № 5/6. – С. 50.


Татчы 2005-тӥ арысен потэм чеберлыко статьяос гинэ пыртэмын, кылемъёсыныз тодматскыны быгатӥськоды Удмурт Элькунысь йӧскалык библиотекалэн электрон каталогъёсызъя.

Уже кутэм литература[править]

  1. 1,0 1,1 Богомолова З. Владимир Владыкин (1943) // Писатели и литературоведы Удмуртии : биобиблиогр. справ. / Сост. А. Н. Уваров. – Ижевск, 2006. – С. 32-33.
  2. 2,0 2,1 2,2 2,3 2,4 2,5 2,6 2,7 2,8 Христолюбова Л. «Ас калыкелы ужано…» // Вордскем кыл. – 1993. – № 2. – С. 45–48.
  3. 3,0 3,1 Шепталин А. Профессор В. Е. Владыкин: очевидный и невероятный // Этнос. Культура. Человек : материалы междунар. науч. конф. : к 60-летию д-ра ист. наук, проф. В. Е. Владыкина. – Ижевск, 2003. – С. 8–17.
  4. 4,0 4,1 4,2 4,3 Коряков Г. И Африка мне не нужна // Удмурт кизилиос : очерки, зарисовки, интервью (2001-2007). – Ижевск, 2007. – С. 54-55.
  5. 5,0 5,1 5,2 Коряков Г. Лэсьты ваньзэ, марлы кужымед тырме // Мон. О себе и других, о народах и Человеках, и… / В. Владыкин. – Ижевск, 2003. – С. 384–397.
  6. 6,0 6,1 Владыкин В. Автобиография // Мон. О себе и других, о народах и Человеках, и… / В. Владыкин. – Ижевск, 2003. – С. 5–6.
  7. Поздеев П. «Молотын» - выль ним // Молот. – 1978. – № 2. – С. 45.
  8. 8,0 8,1 Богомолова З. «Нош кин ке вераз вал мыным…» // Молот. – 1981. – № 11. – С. 54.