Виноградов Семён Николаевич

Материал из Воршуда
Версия от 14:41, 6 февраля 2015; Admin (обсуждение | вклад) (1 версия импортирована)
Перейти к навигацииПерейти к поиску

Одӥг-кык йырлы вылэгес ӝутсконо...

С. Н. Виноградов


Удмуртъёслэн алама сямзы вань: асьсэ радысь вылӥегес ӝутскыны ӧдъям адямиез пыд йылысьтыз погыртыны выро.

Алнаш ёросысь Шайтангуртын вордскем Семён Николаевич Виноградов тушмонъёсызлы ӧз сётскы. Атаез косэмысь Можга педучилищее вуэм пияш, ас сюрессэ утчаса, Казаньысь художественной училищее пыре. Сое йылпумъяса ини, ас быгатонлыксэ уте Москваысь В. И. Суриков нимо художественной институтын. 1973-тӥ арын сое куто СССР-ысь Художникъёслэн огазеяськоназы. Удмурт кун университетын кылдытэ живописья кафедра. Будэ профессорозь. Тужгес тодмо суредъёсыз утисько Удмурт Республикаысь Изобразительной искусствоя музейын. «Гудыри» картиназэ Россиысь Культурая министерство басьтэ. 11 суредзэ французъёс Тулуза городазы нуо. Китай, Америка, Саудовской Аравия но ӝоже кельтэмын ӧвӧл. Со сяна, Семён Виноградов трос тырше этнография бордын. Со кутскон сётӥз Удмурт вӧсез кылдытонлы. Али дасяське 70 аресъем юбилейзэ пусйыны.

- Семён Николаевич, Удмурт Республикалэн энциклопедияз тӥляд нимды ньыль пол сюремын, шуо…

- Отын мон художник шуыса одӥг-ог суредъёсыным ӵош сётэмын. Собере этнографияя ужъёсы пыремын. Удмурт вӧсь сярысь но кыл поттэмын. Удмурт лыдпусъёсыз утчанэ но улӟытонэ пыриськи вал. Но энциклопедиын верамын ӧвӧл, та удысын но мон маке-маке лэсьтӥ шуыса.

- Та удысъёс пӧлысь кудӥз тужгес матын тӥледлы?

- Суреданэн этнография вожмаськысагес мыно. Но суредан шорсюлэм луыны кулэ: со бордысен мон этнографие вуи. Кылсярысь, суредъёс оскымон мед пӧрмозы шуыса, удмурт дӥськутэз умой тодоно но дауръёсын ортчем сюрессэ шӧдоно вал. Пыдло ватскем буёлъёсты адӟонъям, этнографие мургес но мургес пыри. Ачим но валатэк кыли вашкала йылолъёсъя консультант мактал луэмме – огез, мукетыз юалляськыны кутскиз. «Акыльтӥ» но 1974-тӥ арын «Удмурт дӥськут» книга поттӥ. Мар тодӥсько, ваньзэ отчы пыртӥ. Та удысэн вырисьёс асьсэлы мар кулэ, созэ эшшо муромытозы, малпай. Бӧрысьгес, Ленинградысь тодосчиен Татьяна Александровна Крюковаен ӵош Киров улосэ экспедициосы ветлыкум, зэмос этнографлэсь нуналмысь ужамзэ адӟи. Со сьӧры монэ переводчик нерге карыса лэзизы вал ке но, аслым люкай пужыос ласянь тодон-валан. Унозэ со нимъёсыз асьме палан уг тодо ни вал. Пужыосты но суредай, нимъёссэс но гожъяй. Пусйылӥ, кин ивортӥз соос сярысь. Та люкам уженым ветлӥ Совето Союзысь тодосчиослэн конференциязы. Оскисьтэмъёсыз но сюризы: тон, пе, ачид соосты малпад. Но мон сьӧрам нуи вал асьме усточиосын лэсьтэм чалмаосыз, азькышетъёсыз, йыркерттэтъёсыз. Соку лыдӟем докладэлэн дуныз уката вылэ ӝутскиз. Оскизы, удмуртъёс туж усто пужыятӥськыны быгато вылэм шуыса. Докладме туж ушъязы но печатласа быдэс Союзэ вӧлмытӥзы.

- Художник адямилэсь лулпуш дуннезэ синйылтэ, шуо. Суредакуды кызьы адӟиськоды азяды пукись муртэ? Мазэ яркытгес пусйыны турттӥськоды?

- Вылтуссэ сяна, тужгес ик аслыз гинэ тупась сямзэ но монъяськон манерзэ. Тросгес сюлмаськисько мылкыдзэ усьтон сярысь. Пӧрме-а? Котьку уг. Художникъёслэн аспӧртэм законзы вань: сю одӥгетӥ ужед мед пӧрмоз шуыса, сюзэ лэсьты. 1856-тӥ-1910-тӥ аръёсы улэм Михаил Врубель уката сьӧраз ортчем, тазьы вераса: сюрсэз шудтэм, огез шудо. Озьы ке луэ, туж умой ни со.

- Суредады пуксьыны мылкыд карисьёс бӧрысь йырзэс кур ӧз карылэ-а?

- Вожпотэмзэс чутрак верамзы ӧвӧл. Одӥг пол Сьӧд зарезь дурысен тунсыко адямиез пумитай но суредай. Ассэ адӟыса шуиз: ымдуры аслам ӧвӧл. Нош меӵак вераса, ымдурыз аспӧртэмлыко адске, ӝыны тусыз соин герӟаськемын. Жаль, аслэсьтыз яркыт висъяськись гожзэ суред вылэ кельтыны соглаш ӧз лу, тупатыны куриз, ассэ лекос чебер возьматэмез потӥз. Ченгешыса-мараса одӥг кылэ вуим кадь: кыкетӥ суред гожтыны пукси. Соя тупатыса гинэ вуи, анай-атайёсыз кунэрскизы: котькытӥыз кельышлы, нош ымдурыз аслаз ӧвӧл.

- Малпаса-дасяськыса, но улонэ пыӵатыса вуттымтэ ужъёсты вань-а?

- Дано драматурген Василий Садовниковен мар луиз. Мон сое туж кема сюлвори: ку азям пуксёд ни, ку дыр шедьтод? Со шуэ: пенсие потӥ ке, ӵуказеяз ик дорад лыкто. 1975-тӥ арын шутэтскыны кошкиз, но кык-куинь нунал улыса, ивор вӧлмиз: кулэм. Озьы мон сое суредатэк кыли. Кыӵе аспӧртэмлыко адями вал! Можга педучилищеын дышетскыкум ик, сое синйылтӥ вал ни. «Улэм потэ» спектакльын Демиез туж яркыт возьматӥз вал.

- Кыӵе адямиосты капчигес суреданы?

- Мар веранэз ини, пересь но шуш муртэ каньылгес гожтыны, пиналзэ но чеберзэ – шуггес, таизъя одӥг-кык миллиметр но янгыш лэсьтыны уг лу, со чылкыт возьматэмез гинэ куре. Со понна котькуд гожез вольыт пуктоно. Трос кужым кошке, лулсэр но быре, ява.

- Тӥ семья понна вордскемын-а?

- Мон трос кузя будӥсь нылпиослы вожъяськылӥ. Ачим огнам кылӥ, агай-апайёсы, ветлыны кутскыкузы ик, кулыса быризы. Пиосы вордскем бере кужмы ик тросгес луиз кадь. Озьы ке но кышное дугдылытэк шуэ: тыныд семья чик кулэ ӧвӧл, малы кузпалъяськид? Тон олокин понна, пе, улӥськод ук, тыныд уксё но кулэ ӧвӧл, оломар но шедьтӥськод, удмуртъёс понна шуыса, бызьылӥськод. Зэм, калыклэн сюлэмшугъёсыз, висёнъёсыз, лэсьтымтэ ужъёсыз, маин ке бере кылемез понна мон аслым инты уг шедьтӥськы ни. Быгатэмея со удысъёсыз азьланьтыны турттӥсько. Азьло тани вашкала пужыятэм кубоос вал. Соосты чеберман искусство али быре. Книгаен поттымон материал дасяй ини, коньдон ӧвӧлэн ӝега сое печатлан. Вӧсяськон но бырыны кутскиз. Кытчы со вуттоз? Кыӵе ке калык ас инмаръёссэ палэнтэ ке, кылзэ но вунэтыны кутске, ачиз но быре. Вӧсяськон бордын вань йылолъёс возисько. Йылолъёс, вӧсяськон, кыл – ваньмыз одӥг герӟетын. Тӥни озьы республикаямы Удмурт вӧсь кылдытон бордын трос дырме быдтӥ. Черкезлы проект но лэсьтэмын. Котыраз библиотека, интернат кадьёс пуктыны чакламын. Но государство уксё уг висъя. Удмурт калык пӧлын узыръёс уз шеде. Соин ик малпам ужез улонэ матысь дыре пыӵатыны луоз шуыса, оскон ик ӧвӧл.

- Анай-атайды тӥледыз мусояса гинэ возизы, дыр. Яке трос тыш сииды-а?

- Нэнэелэсь огпол гинэ ӟыгыртыса вешамзэ тодӥсько. Песяе гинэ монэ учке вал. Атай войнаысь ӧз берта соку. Нэнэез я заводлы нюлэс кораны лэзё, я Балезиное чугун сюрес лэсьтонэ ысто. Гуртын дыръяз но я фермаын, я конной дворын. Соослы чик но монэн йырин ӧй вал.

- Озьы ке но дышетскыны быгатӥды.

- Начальной школаез но сизьым классэз ушъян грамотаосын быдтӥ, Можга педучилищее экзаментэк пыри. Вань шайтангуртъёс отын дышетско шуыса, атае косэмысь гинэ Можгала мынӥ, нош аслам художник луэме потэ. Куинетӥ курсэ вуыса, Казаньысь художественной училищее кӧчыны медӥ. Но аръёсме юнме быдтэме понна медаз пыкылэ шуыса, педучилищеез ик йылпумъяно кариськи. Отын нуналлы быдэ суредай ни. Общежитиын мон доры кыстӥськись черод уг бырылы вал.

- Урокъёс лэсьтэм интые суредаськыса пукемысьтыды дышетӥсьёс ӧз-а пыкылэ?

- Соос ӧз ик адӟылэ. Мон берло парта сьӧры пуксисько. Чиньыосме шеръяса син вадьсам карисько но суредаськисько. Тетрадьысьтым берпум бамъёсыз суредъёсын тырмылӥзы.

- Та удысын дышетӥсьты вал-а яке асьтэ коже-а кисьмады?

- Школаын дыръям ай атаелэн выныз механизацияя школаын дышетскиз. Фанера вылэ карандашен суредалляз. Пужыосыз котькуд нуналэ выльмо. Со адӟымтэ дыръя мон ужъёссэ аслам бумагаям выжтӥсько. Собере школаямы вуиз Туймыйыл гуртысь Наталья Горбунова. Со ик пурӟытӥз суредан мылкыдме. Тямыс аресъёс вал мыным. Егит дышетӥсьмы арнялы быдэ сямен классын ортчытъялляз выставкаос. Кинлэн суредэз умой, солы сётэ премия нерге – я карандаш, я тетрадь. Таоссэ туж шуг шедьтыны вал. Оло, соин но нуналысь нуналэ суреданы кутски.

- Ку нырысьсэ потӥды калык пӧлы?

- Педучилище бере кӧты тырытэк кошки Казаньысь художественной училищее. Отын дышетскыкум, Шайтангуртысь Насьтапайлэсь Роза нимо нылзэ суредай. Удмурт дӥсен ныл синучкон азьын кышетсэ керттэ. Сое дӥсьтӥ «Молот» (али «Кенеш») журналлэн редакцияз келяны. Со дырозь суредъёсме нокытын ӧй возьматъя на вал. Кӧня ке толэзь улыса, артысен адӟисько: журнал бамын печатлам уже борддоразы лякемын. Туж кельше, пе. Со вакытэ удмурт дӥсез ушъясь ӧйгес вал на.

- Кыӵе мылкыд косэ суредаськыны? Ӟечсэ курыса, оло, кыӵе ке инмаръёслы вазиськиськоды?

- Кырӟам потон яке йыркуръяськон. Астэ кужмысь золъяськод ке, ваньмыз со суред вылын шӧдӥськытэк уг кыльы. Висьыку гинэ но суред воштэ туссэ, учкисьлэсь но мылкыдзэ куашкатэ.

Инмаръёс сярысь тазьы мадьысал. Пичи дыръям нэнэен песяй куинь табань пыжо но, соосты гидкуазе поттыса, ӝӧк сьӧрын сиськиськод. Кытӥяз вордскем нуналэ но озьы ӝук вӧсято вал. Котьку дышетӥзы: мумыкор, пе, коркаез висъя кулэмъёслэн но улэпъёслэн дуннезылы. Ӧс пал – куяськон но кисьтон карон инты. Тае малпаса ик, оло, черк шоры кырыж учконэ вордӥськиз. Удмуртъёслэн улоназы черкез пыӵатыса, урод лэсьтӥллям кадь потэ. Сюлэм вирен пылаське. Кылсярысь, Стефан Пермский но солэн дышетскисьёсыз асьсэ вакытэ туж йӧнтэмъяськиллям, удмурт калыклэсь ас вӧсяськонзэ быдтон понна трос лэсьтӥллям, куалаосты сутылӥллям. Соосыз ик святое ӝутӥзы. Шонер шат та?

Кырыж учконэлэн музон палыз но вань на. Удмуртлэн ас вӧсяськонэз вань ке, со еврейёс доры мыныса уг косы ук соосты аслаз Инмарезлы йыбыртъяны, нош еврейёс ӟучез но ас палазы берыктӥллям ни. Табыдӟа Ӟуч государство ас черкъёсаз ӟуч историез уг мадьы – еврейлэсьсэ вера. Кызьы кун юнмалоз, солэн ас инмаръёсыз ӧвӧл ке? Вӧсяськем гинэ уг тырмы, асьмелэсьсэ выжытэм быдтэ ни. Озьы калык пумен валамысь но дугдоз, мар бордын улонлэн шорсюлмыз. Соин ик уг чидаськы.

Вӧсяськыкум мыным ачим но Инмар куспын нокин но кулэ ӧвӧл. Мон Инмарлы йыбырттӥсько – поплы но, Христослы но уг. Соосты мон юри малпаса кылдытэм адямиосын лыдъясько. Удмуртлэн Быдӟым, Мукылчин но Куазь Инмаръёсыз вань. Азьвыл сямъёсмес, йылолъёсмес вунэтоно ӧй вал.

- Тӥ учкемъя, удмуртъёс кыӵе умойтэм сямзылэсь куштӥськыны ӧз быгатэ?

- Кыӵеезлэсь ке мозмытскыны выризы меда? Мултэсгес трос кепыр ваёнзы. Мынам но вал. Тодон-валан ӧжыт дыръя со люкетылӥзгес ик. Визь люкаськод ке, возьдаськонлэсь палэнскыны луэ. Удмуртлы калык радэ потон понна та вакытын тодон-валан ласянь одӥг-а, кык-а йырлы вылынгес луыны кулэ. Соку гинэ тонэ зӥбыны уз быгатэ.

- Али кидэс ӵогысалзы ке, мар карысалды? Улондылэн азьпал сюресэз бырысал-а соин, яке асьтэдыз музон удысын утчасалды-а?

- Мынам дышетскиселэн Евгений Скобелевлэн озьы луиз. Машина донгыса, сое пери шуккиз. Бур киыз ужамысь дугдӥз. Со али озьы ик паллянэныз суреда.

- Тӥледыз нюлэс шоры сапкыса кельтысалзы ке, потыны вырысалды-а яке куше ик кыльысалды-а?

- Мон ас дуннеям улыны уг яратӥськы, но озьы улоно луылэ. Пичи дырысен тодӥсько на: Шайтангуртын капка азямы но, капка берамы но нюлэс вал. Оло, соин но, оген кыльыку, бокоосыз, жобъёсыз адӟыны кылдылӥз. Анай-атайёслэн кышкатъямъёсынызы сэрен но курдась луыса будӥ. Дышетскыны пырыса но, суредъёс бордын пукыкум, эшъёс нылъёсын ӟыгыръясько, нош мынам, соослы вожъяськыса, сюлэмы кортӵоген шырӟылӥське кадь. Ужме но лэсьтоно. Думем пуны но сокем уг кыстаськы, дыр. Чидатэк чидатӥськоно луэ. Соин мон сёровно нюлэскысен калык пӧлы ик потыны вырысал.

- Париже но асьтэдыз калык радын шӧдэмды потэмен ветлӥды-а?

- Таиз нимаз веран. Москвае Леонардо да Винчилэсь «Монна Лиза» портретсэ вуттӥллям. Отчы пырыны уг быгатӥськы. Кык иськем кузьда черод котыртӥ ветлӥ, но толыкез ӧй вал. Кошки Художникъёслэн огазеяськоназы юрттэт курыны. Отын шуизы: ми асьмеос но адӟыны уг быгатӥське, Францие мынэлэ но кӧт тырымонады учкелэ. Эн серекъялэ, шуисько, Ум, пе, шоккетӥське. 1975-тӥ ар вал соку. Париже дасяськисько. Мынон азям кышное шуиз: тон алигес Венгрие кыӵе ке конференцие ветлыса, мыным кунсьӧр шубалы тырмымон вить сю манетэз быдтӥд, Парижысь шубатэк эн ик берытскы.

Вуи Францие, ялэм программая ветлӥсько но ӝыт пал, группаелэсь нимаз висъяськыса, шуба утчаса калгисько. Котькуд городысь магазинъёсы пырасько. Соин сэрен гинэ Франциез туж умой адӟи. Уй бубылиослэн забастовкаязы но сюриськиз, ява. Отын мон ачиз усьяськись ӧс шоры нырысьсэ мырӟиськи. Леонардо да Винчилэн суредэз доры, группаез кельтыса, огнам мынӥ. Соин гинэ ӧз тырмы, солэн шайвылаз но вуылӥ.

- Алнашысь одӥгезлы суредан школалы тӥлесьтыд нимдэс сётон сярысь вераськонэз кылылӥ…

- Вераськон поталляз вал. Мыным со, валамон, шумпотон. Но мукет ласянь, юрттӥськоно, урокъёс сётъяно, дышетисьёсын ужано луоз. Нимме ӧз сётэ ке но, сюлмы шуг уз луы.

- Сизьымдон арескын буйганы но пересьмонэз гань-гань витьыны кулэ ни кадь. Мае лэсьтыны дыртӥськоды на?

- Трос удыслы кутскон сётӥ, соизлы шумпотӥсько. Мытэм ужез кин ке но азьланьтоз. Дасям рукописьёсы вань. Соосыз кызьы ке поттыны кулэ вал. Корка сигын кыллё уно альбом лэсьтымон суредъёсы. Соосты адӟисез ӧвӧл. Соин али кӧнязэ ке ужъёсме Алнаш музее кузьманы малпасько. Уж тырме.

Источник:

Виноградов С. Н. Одӥг-кык йырлы вылэгес ӝутсконо... / С. Н. Виноградов ; записала Е. Сараматова // Удмурт дунне. - 2006. - 13 янв. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"