Боталов Борис Евгеньевич

Материал из Воршуда
Перейти к навигацииПерейти к поиску
The printable version is no longer supported and may have rendering errors. Please update your browser bookmarks and please use the default browser print function instead.

Кык малпан но парлы пар

Боталов Б. Е.

Дышетӥсьёслэн нуналзы азьын кема кенешим: кинэ данъяно таяз номерамы? Конкурсэ пыриськыса, 1 миллион манет утэм школалэсь кивалтӥсьсэ-а, 100 сюрс манет басьтэм дышетӥсез-а? Одӥгзэ гожтӥм ке, уз куатаськы-а мукетыз?

Мон кемалась синмаськыса учкисько ни Завьял ёросысь Пероггуртысь Боталовъёслэн семьязы шоры. Борис Евгеньевич но Надежда Прохоровна дышетскемын Удмурт кун университетысь удмурт филологияя люкетын. Туннэ нуналлы соос нылпиосты гинэ ӧвӧл, мукет дышетӥсьёсты но дышето. Борис Евгеньевич школаын дышетэ, Надежда Прохоровна «Ӟеч-а, бур-а, удмурт кыл!» учебникъёслэн авторзы луэ. Соосты тодо, гажало анай кылмес азинтон бордын ужасьёс, адӟем каро егитъёс. Но паймоно кадь, та дырозь соослэн нокыӵе дано нимъёссы ӧвӧл.

- Борис Евгеньевич, Надежда Прохоровна, тӥ понна мар со данъян-дунъян?

Надежда Прохоровна: - Данъямон адямиосты данъяно, дыр. Со адямилы аслыз уката бадӟым оскон сётэ, соин валче кыл кутон но будэ кадь. Но ми асьмеос сярысь ум вераське. Мон понна тужгес бадӟым данъян-дунъян - со дышетэм нылпиосылэн валамзы, тау карон кылъёссы. Шумпотоно, соос тонэ ортчо, калыке пото ке. Дышетэм нылпиосы табере асьсэос кемалась семьяосын уло ни, троссэ уг тодмаськы, но городэтӥ ортчыку вазё, дугдо, мылкыд шуна. Мыным сьӧлык ӝожтӥськыны: школаын дыръям завучын ужай туж ӟеч директорен - Василий Петрович Ложкинэн. Одӥг пол но пыкылэмез ӧвӧл, ужме ӟечен гинэ пусъе вал.

Дышетон удысын национальной ужпумъёсты эскеронъя институтын 8 ар ужатозям кык пол данъян грамотаен пусйизы ни. Кылылэме-адӟеме вань, кызьы адямиос дан курыса ветло, мон сыӵеосты уг валаськы. Ӟеч ке ужад, адӟозы кадь потэ. Ӧз ке, мар карод…

Борис Евгеньевич: - Мынам трос грамотаосы общественной уже пыриськеме понна. Нош школа ужъя ке… Тодмоосы шуо, кылыд, пе, укыр меӵ…

- Берло кык арзэ дышетӥсьёслэн луонлыксы вань конкурсэ пыриськыса «узырмыны». Тӥледды но соос радысь адӟем потэ вал.

Надежда Прохоровна: - Мон весь кузпалэлы верасько, тон кутскысалыд ке, шуисько, котькыӵе конкурсын вормысалыд, но малы ке уг басьтӥськы. Нош кун ласянь сыӵе дунъетлы шумпотӥсько - ато дышетӥсь тырше-тырше, нош улэ ёрмыса. Ярам ай, али коть уждунзэс уг ӝегато ни. Кыӵе вакытъёс вал - тодэ ик ваем уг поты. Борис Евгеньевич: - Котькуд конкурслэн аслаз куронъёсыз. Таяз но ваньмыз пыриськыны уг быгато. Кылсярысь, мынам кивалтоно классэ ӧвӧл.

- Нош дышетон часъёсты вань на-а? Город вӧзысь школаын удмурт кыллы дышетыны капчи ӧвӧл, дыр?

- Соиз озьы. Али школаямы куинь гинэ удмурт класс на, соин часъёсы но ставка тыр уг люкасько. Но монэ со гинэ уг кышкаты. Кышкатэ кивалтӥсьёслэн, дышетӥсьёслэн, асьсэды интеллигенция нимасьёслэн удмурт кыл шоры учконзы. Тани чаклалэ ай: кин вераське, удмурт классъёс усьтоно шуыса? Нош кин отчы нылпиоссэ сётэ? Огшорыгес анай-атайёс, нош асьсэос дышетӥсьёс-кивалтӥсьёс пиналъёссэс вылӥ рейтинген лицейёсы-гимназиосы нуо. Туж умой, удмурт кылэз кун кылэн ялӥзы. Но ӧз каре, шуыны луоз. Предмет чотын со школаын уг нуиськы ук, нош сотэк, мон малпасько, азинскон уз луы. Котькуд культуралэн, калыклэн валтӥсь тодметэз, нырысь ик - кыл.

- Борис Евгеньевич, сыӵе учыръёсы тӥ ӟучомись удмуртъёс пӧлын кызьы валэктон уж нуиськоды?

- Котькудӥныз нимаз вераськытэк уг луы. Куддыр чурыт но верасько, возьытэ но уськытӥсько, сотэк кызьы? Надежда Прохоровна: - Мыным потэ, таӵе ужын валтӥсез луэ «югдытӥсьлэн» аслаз кыӵе луэмез. Борис Евгеньевич визьмо, йӧно, ассэ гажаны быгатӥсь. Тани ульчаын но солы ваньмыз удмурт сямен вазё, ӟечбуръясько. Пичиез но, бадӟымез но солэсь визь-кенеш юа. Маке валантэм ке, шуо, юалэ Боталовлэсь, со - энциклопедия. Вина со уг юы, уг кыскы, котыр ласянь юн сямо, кызьы солэсь адӟем уд кары?

- Сомында ар ӵоже школаын ужатозяды нылпиос огпол но юмоке ӧз вуттылэ шат?

Борис Евгеньевич:- Выризы огпол. Огез шаплы пияш мадиськон сётӥз.

Нырысь кылзӥ но гольтрес потӥз. Ас поннам малпасько: та монэ куриканы ӧдъя ук. Озьы ик вылэм. Шонер валэктон ӧй сёты кадь, но коть юмоке ӧй шедьы. Надежда Прохоровна: - Монэн озьы выремзы ӧвӧл кадь. Пиналъёс яратылӥзы. Чик чеберъяськытэк верасько: одӥг пинал шоры но огпол но кесяськылэме ӧвӧл. Куарае пичи, соин, дыр. Но малпасько, туала пиналъёсын куддыр чурытгес но луыны быгатоно. Пӧлазы котькыӵеез вань ук. Атайтэк будӥсь, яке шуг семьяосысь пиналъёсын секыт ужаны. Соосын каньыл гинэ вераськем потэ, косъяськытэк - доразы но вешамез-яратэмез уг адӟыло бере, но пинал лул сӧремын ни. Шумпотымон, милям школаямы вань ай пиосмурт дышетӥсьёс. Дас витё ар талэсь азьвыл соос 17 кузя вал! Борис Евгеньевичлэн нылпиосын вераськемез мыным кельше: со уг но тышкаськы кадь, но сыӵе вера - ваньмыз валамон луэ.

- Надежда Прохоровна, кӧня ке ар талэсь азьло тӥ ужан удыстэс чутрак воштӥды. Кин яке мар «донгиз» сыӵе ӟеч вамыше?

- Чутрак воштӥськон шуыны уг луы, малы ке шуоно уже герӟаськемын дышетонэн ик, мон дышетӥсьес, пиналъёс понна книга гожъясько ук. Азьвыл школаысь кошкон сярысь мынам йырам но ӧз лыктылы. Туж секыт вакытъёсы но кызьы ке ужаськиз, ӟечезлы оскыса. Вылаз ик мон висъяськыны яратӥсьтэмгес адями. Но кылдэмлэсь уд ортчы, шуо. Озьыен, мынам вал на та улонын мукет быдэстоно уже. Данъяськисько, со герӟаськемын анай кылыным. Школаын ужакум, мон адӟылӥ: анай кылзэс тодӥсьтэм пиналъёс удмурт классэ лыкто но дышетскыны туж шугъясько. Программа секыт: учебникъёс чакламын ас кылынызы вераськисьёслы яке сое ляб тодӥсьёслы. Нош чик тодӥсьтэмъёс мар карыны кулэ? Соин валче кыллы тунсыксы быре, выльысь ӟучъяськыны кутско. Мон, югдурысь кызьы ке потон вылысь, покчиосты ас шӧдэмея дышетыны ӧдъяй. Кунгожсьӧр кылъёсты дышетон методикаез уже кутыса, чылкак выль программа дасяй.

Борис Евгеньевич: - Ӵап со вие элькунысьтымы Дышетон удысын национальной ужпумъёсты эскеронъя институтлэн кивалтӥсез Зоя Витальевна Суворова мыным учебникъёс дасян бордын ужаны ӵектӥз. Со понна ужез воштоно вал. Нырысь мыным со ӵектон туж тунсыко потӥз, воксё ӝуалски, собере воргорон визьмы вормиз: книга гожъян - со творчество, мон тып-тыпгес, музъем вылтӥ ветлӥсьгес адями. Уждунэз но школаын сярысь ӧжытгес, маин семьяез сюдод? Соку йырам чилектӥз: книга гожъясь вӧзам ук! Ӵектӥ кузпалме.

Надежда Прохоровна: - Сыӵе вамыш лэсьтэмысьтым огпол но ӧй жаля на. Мыным школаын но кельшылӥз, но таиз уже выль бурдъёс кузьмаз кадь. Кивалтӥсьёс но, азьвыл ужасьёс но монэ умой пумитазы, оскемзэс соку ик шӧдӥ. Кык ар ортчыса, 1-тӥ классын дышетскись покчиослы «Ӟеч-а, бур-а, удмурт кыл!» учебнике потӥз. Со мылкыдэз маин ӵошатыны паймод. Кӧня ке улыса, кисьмазы 2-тӥ, 3-тӥ классъёслы книгаосы. Али ужасько 4-тӥ класслы учебник дасян бордын.

- Нош мар карыны кулэ 5-тӥ-10-тӥ классэ ветлӥсьёс? Яке со вакытлы удмурт кылзэс соос чылкыт тодыны кулэ ни?

- Тросэз ужме дыртыто. Мон валасько, дышетӥсь одӥг программая ужаны кутскиз бере, соя ик азинскыны но умойгес, но уг вутскиськы, лэся. Оскисько, мыло-кыдо дышетӥсьёс шедьтозы амал нылпиоссэс дышетыны, мукетъёсыз но методикаос вань ук. Собере, зэмзэ но озьы мед луоз вылэм, куинь-ньыль ар дышетскемез бере пиналлэн маке-маке тодонэз мед луоз ни. Сотэк малы курадӟонэз?

- Надежда Прохоровна, тӥляд институтады трос авторъёс ужало. Ватонэз ӧвӧл, ваньзэ учебникъёсты огкадь ӟеч уг дунъяло, луыло газет-журнал пыр но меӵак пыкылонъёс. Сыӵе дыръя асьтэды кызьы шӧдӥськоды?

- Шуг вераны. Бен, туннэ мынэсьтым ужме ушъяло кадь. Удмуртиын сяна, вылӥ дунъяло финн-угор дуннеын, соос мынэсьтым программаме асэсто ни. Но кин тодэ, кыӵе учкон луоз, кӧня ке ар ортчыса. Соин ик кудзэ ке эшмес тышканы ӧдъяло ке, мон шуисько: ми сое ӵош лэсьтӥм. Монэ ушъяло ке, озьы ик пусйыны вырисько: мон сое огнам ӧй лэсьты. Коллективамы ог-огмес валан вань кадь потэ.

- Книгады потон азьын куалекъяськоды-а?

- Туж зол. Тодӥсько но кадь: ваньмыз дас пол эскеремын ни, озьы ке но шугъяськон кыле потытозяз но, потэмез бере но. Институтмылэсь книга дасян шоры учконзэ мон умоен пусйысал - учебникез вань школаосын уже кутытозь, ми сое кӧня ке классын эскериськом. Ар дышетэм бере тупатъянъёс пыртӥськом, мазэ ке куштӥськом, маке ватсаськом.

- Маин тӥляд книгаосты висъясько мукетъёслэсь?

- Созэ дышетӥсьёс вераны кулэ, дыр. Мон тыршисько пиналэз яркыт суред пыр дышетыны - кыл тодаз мед кылёз адӟыса, соку со уг вунэты ни. Палэнсконо шуг кылъёслэсь - дышетскыны кутскисез со кышкатэ. Ваньмыз огшоры, валамон мед луоз.

- Кандидат диссертациды но, валамон, удмурт кылэз дышетонлы сӥземын луоз?

- Озьы, но ай ужез туж трос на. Кивалтӥсе - Москваысь профессор Г. Никольская.

- Борис Евгеньевич, кузпалды тӥледыз «лёгаса» уг кошкы на-а?

- Озьы луыса кошке ни. Азьвыл сое Боталовлэн кышноез шуо вал, табере монэ - Боталовалэн картэз (серекъя).

Надежда Прохоровна: - Борис Евгеньевичез уд лёга. Со укыр визьмо. Жаль, аслэсьтыз визьзэ но быгатонлыкъёссэ ваньзэ уже уг куты. Мон шуисько, мынам тынад мында визьмы луысал ке, соку зэмзэ но ворекъясал ни. Солэн сомында визьмо, тунсыко малпанъёсыз! Ӝуалске, ӝутске но малы ке ӝог кысэ. Солы каньылгес кинлы ке юрттыны, ассэ малы ке палэнэ кельтэ, оло мыдлань валамзылэсь кышка, оло мар. Собере со милям укыр яратэ зэмлык понна нюръяськыны, куддыр со но люкетэ, дыр. Бадӟым уж ке лэсьтоно, бордын валась муртъёс луыны кулэ ук. Удалтон но улонын луыны кулэ, дыр. Мыным жаль, со ас вакытаз аспирантураын дышетскон мылкыдзэ уретӥз шуыса, усто учёной луысал кадь. Но али тани Борис Евгеньевич но учебникъёс дасян бордын ужа - ми соин ӵош лэсьтӥськом 5-тӥ класслы лыдӟон книга. Мыным со туж юрттэ, угось удмурт литературая солэн пиналъёсын ужан опытэз данаклы узыргес. Нош учебник гожъяны кулэ, мон малпасько, ачиз школаын ужам мурт гинэ.

- Улон шоры учконъёсты тупало-а?

- Воксё уг. Ми туж-туж пӧртэмесь. Солэн учконэз одӥг ке, мынам мукет. Озьы калыклы вераськом но, туж паймо. Но со уг люкеты ог-огмес гажаса-валаса улыны. Ми котьку быгатӥськом одӥг кылэ вуыны.

- Ог-огдэс кытын пумитады?

Надежда Прохоровна: - «Чипчирганын». Дышетскыкумы кыкмы ик отчы ветлӥм. Мон Борисэз соку ик синйылтӥ, со ваньмыз пӧлысь висъяськылӥз визьмо, йӧно луэменыз.

- Куарады но.

- Озьы. Школаын дышетыкумы, Пётр Даниловен ӵош (али «Айкай» театрлэн кивалтӥсез) куиньнамы концертъёс сётыса ветлӥськом вал. Гуртоос туж шуныт пумиталлязы. Котыр гуртъёсысь ӟучъёслэн но со вакытэ удмурт кыл шоры учконзы воштӥськиз, милесьтым юалляськыны, тунсыкъяськыны ӧдъязы. Пероггуртамы соку удмурт кыллэн зарни вакытэз вал, шуиськом ас поннамы. Школаенымы кивалтыны кутскиз удмурт воргорон Василий Петрович Ложкин (али Италмасысь школаен кивалтэ). Сыӵе удмуртъёс тросгес мед луысалзы: трос уг вера, уг ушъяськы, кыштыр лэсьтэ. Коллективамы но со вакытэ удмурт кылэз дышетоно-а, ӧвӧл-а шуыса вераськонъёс ӧз поталэ. Кызьы директор шуиз, озьы ик луоз.

- Борис Евгеньевич, тӥ, литератураен сяна, тунсыкъяськиськоды историен, шаертодонэн. Пытьыды кылемын Лудорвайысь «инбам улын».

- Бен, мон отын инбам улысь музей кылдытӥсьёс пӧлысь. Нырысь арзэ отысь ужъёсын кивалтӥ. Косъяськыса гинэ ӧй улы, ачим ӵуписьки но, арбериос но люкай-радъяй. Со уж туж сюлэмъям вал. Но «донгаськисьёсын» артэ мынам ужаме уг поты. Кылдӥзы кивалтыны золгес мылкыд карисьёс.

- Тӥ та дырозь трос адямиосты дышетӥды ни, нош асьтэлэн Дышетӥсеныды кинэ лыдъяськоды?

Борис Евгеньевич: - Нырысь ик, Георгий Архипович Архиповез. Туж дунъясько профессоръёсты Валентин Кельмакович Кельмаковез но Владимир Емельянович Владыкинэз.

Надежда Прохоровна: - Мон синпелет пуктысал ваньмызлы удмурт кылъя дышетӥсьёслы. Котыр ласянь синмаськисько Глафира Николаевна Никольскаялы. Нош улонам, уж дурам монэн артэ котьку ӵош вамышъя эше Юлия Тихоновна Байтерякова.

Источник:

Боталов Б. Е. Кык малпан но парлы пар / Б. Е. Боталов, Н. П. Боталова ; записала З. Рябинина // Удмурт дунне. - 2007. - 5 окт. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"