Байсарова Юлия Павловна

Материал из Воршуда
Перейти к навигацииПерейти к поиску

Шуд курыны ӧй вутты[править]

Байсарова Ю. П.

Юлия Павловна Байсарова – Удмуртиысь кун премилэн лауреатэз, К. Герд нимо национальной премилэн лауреатэз, Удмуртиысь калыкез дышетон удысысь дано ужась, отличник.

Юлия Байсарова вордӥськиз 1942-тӥ арын Можга ёросысь Бальӟашур гуртын. Бобья-Учаысь сизьым классъем школаез йылпумъям бераз дышетскиз Можга педучилищеын. 1961-тӥ арын ужаны кутскиз Завьял ёросысь Пойвай начальной школаын, собере – Пичи Пурга ёросысь Бурановоын, 1972 арысен – Завьял ёросысь Ожмосын.

Дышетӥсь кылбуръёсыныз ньыль книга поттӥз: «Егор но Бугор», «Чиманы тыныд черод», «Огдырлы ке но…», «Буд, пичи адямие». Со луэ 1-тӥ-4-тӥ классъёсын ӟучомем пиналъёсты дышетыны «Анай кыл» учебниклэн одӥгез авторез.

- Юлия Павловна, вераськонмес кылбуреныды кутскем потэ.

Мар гинэ ӧвӧл та сюлэмам,

Туж бадӟым сандык кадь со мынам.

Вань отын пичи дыры,

Нош отысь – вань эшъёсы.

Вань мемие, дядие,

Бӧляке но родняе,

Вордӥськем интыосы,

Ӵош шудылэм эшъёсы.

Соослэн шумпотонзы,

Малпанзы, куректонзы

Пыремын та сюлэмам,

Пыӵамын вань улонам.

- Гуртты бадӟым вал-а?

- Бальӟашурмы 54 коркаё вал. Одӥг семья кадь, ог-огмылы юрттыса улӥмы. Секыт война вакытэ вордӥськемын ке но, сиеммы но, юэммы но потыса ӧм ветлэ. Таӵе кылбуре вань:

Кыӵе со сием потон?

Мар-о сыӵе сием потон?

Ёрмонлэсь но со ёрмон,

Кулонлы матын улон.

Сиемзы потэмен курадӟыса ветлӥсь кураськисьёсты трос адӟоно луиз угось.

- Мемей-дядяйды кинъёс вал?

- Огшоры крестьянъёс. Ми соослэн ньыль нылпизы вал. Ваньмы гуртысьтымы лобӟим, Удмуртилэн пӧртэм палъёсаз улӥськом.

- Тӥ пичиысен ик таӵе кибашлы вал-а?

- Ой, ӧй вал! Ужаны косо ке, ваньзэ лэсьтыны турттӥсько вал. Но ӧйгес пӧрмытылы. Кытӥяз серем но карылӥзы. Сыӵе дыръя аслым ачим шуылӥ: будӥ ке, возьмато ай, кыӵе адями мон. Ӧйтӧд, оломалы мон сыӵе вал: керттӥськыны но, чильпаськыны но ӧй дышы. Мемие монэ туж яратэ вал. Солэн яратэмез ик, лэся, луш-пушкам мур пыриз но собере кылбурен потӥз.

- Иське, мемиды тӥледыз мукет нылпиосызлэсь висъягес вал?

- Ма, мон пичиез вал ук. Нуныяса будэтэмен ик номыр карыны ӧй дышы. Дядимы войнае кошкыкуз, мон мемиелэн кӧтаз кылиськем. «Мар каром, Пужей, секытэн кылисько ук», - юам дядиелэсь мемей. «Вай, Одотья, - шуэм дядие. – Астэ утись луоз». Озьы ик луиз: мемие кулытозяз дорамы улӥз. Дядие войнаысь улэп вуиз. Мыным сизьым арес тырмиз но, мукет кышномурт доры кошкиз. Озьы ке но мон сое уг курласькы, мемиелы войнае кошкон азяз верам кылъёсыз понна гинэ но яратӥ.

Мемиелэн киыз котьмалы мынӥз: куас-салазки но лэсьтоз, сапег но гындоз. Вань пиосмурт ужъёс вылаз усизы угось. Собере агайёсы быдэ вуизы но мемейлы капчигес луиз ни.

- Бальӟашурады бертылӥськоды на-а?

- Калыкез эмъяны кутскем берам одӥг пол аслым ачим шуи: малы мон гурт калыкме вунэтӥсько? Арня ӵоже гуртам улӥ. Кысык гужем нуналъёсы быдэс гурт ужамысь дугдӥз. Троссэ эмъяны быгатӥ. Али ке но тау каро на. Тужгес но дуноез соиз: гурт калык мыным оскиз. Кыӵе шумпотон со!

- Школаын ужась мурт, кызьы тӥ калыкез эмъяны басьтӥськиды?

- Пинал дырысь мынам калыкез эмъяны мылыкыды вал. Со туж тунсыко маке. Мон ведь аслам лул кужыменым адямиез эмъясько. Сыӵе дыръя быгатыны кулэ вылэм астэ но утьыны. Мон сое ӧй тоды. Ачим висьыны кутски.

- Эмъяны дышетскемды сярысь тӥляд дипломды но вань ук. Отын гожтэмын: «Джуналэн амалэныз биоэнергетикаез тупатӥсь – калык эмъясь».

- Мынам эмъян амалэ аслам. Отысь трос ик ӧй басьты.

Мон мукетъёслы адӟымтэзэ куддыр адӟылӥсько. Одӥг учырез вераме потэ. Кылем гужем нош ик вордӥськем гуртам бертылӥ. Акаршурын ӵапак Михаил Коновалов писательлэн вордӥськемез дырысен 100 ар тырмонэз пусъё вылэм. Милям Бальӟашурмы Акаршурэсь иськем но ӝыны гинэ. Ми но со шулдыръяськонэ мынӥмы. Адӟисько: Михаил Коновалов аслыз пуктэм памятник дораз сыӵе шумпотыса эктэ ук! Эктыны быгатысал ке, пыд выретэмъёссэ ик возьматысал. Собере скамья вылэ пуксиз но калыклэсь шулдыръяськемзэ учкыны кутскиз. Со интыын нокыӵе скамья пуктэмын ӧй вал.

- Иське, лул уг кулы, музъем вылын улэ, калык пӧлын ветлэ?

- Уг, уг кулы. Ӵуказеяз Бальӟашур гуртмылэн праздникез вал. Нош ик адӟисько: шулдыръськон ортчытон интыын калыкез тачак. Ма кытысь, малпасько, татчы тамында калык васькыны вуттэм. Матазы лыктӥ но, монэ нокин уг адӟы, понназы кырӟало-экто. Собере гинэ валай ини: гуртсылэн праздниказ вань кулэмъёс бертӥллям ук!

- Мукет интыосысь но маке-со адӟылӥськоды-а?

- Адӟылӥсько. Одӥг пол бусыетӥ мынӥсько но, инбамысь таӵе ик яркыт адӟисько Инмар Анайлэсь мудорзэ. Сыӵе чебер, ворпо буёло! Мар меда кароно шуыса малпасько. Нылпиосылы, ӵыжы-выжыосылы шуд курыса вуттӥ, аслым ӧй вуы – Инмар Анай сылмиз-быриз.

- Тӥ, язычникъёс сямен, инкуазьлы но, писпулы но, музъемлы но вазиськиськоды, соослэсь но шудбур, тазалык куриськоды. Озьы ик вӧсяськиськоды христиан святойёслы но. Но ведь черкын ужасьёслэн язычникъёсты ултӥямзы потэ.

- Инмар одӥг. Котькыӵе оскон шонер, ӟечлы. Инкуазь но, святойёс но – люконтэмесь.

- Калыкез эмъяны быгатондэс ку-о шӧдыны кутскиды?

- Джунаос но со выллем экстрасенсъёсты тодэме бере Инмарлы вазиськи: сёт бадӟым кужымдэ, мынам но адямиосты эмъяме потэ! Одӥгзэ, кыксэ эмъясько, йӧн луэ соослы. Собере олокытысь но тросэн ветлыны кутскизы. Ваньзылы юрттэме потӥз. Шумпотӥсько: дышетон классысьтым пичиосме кӧнязэ эмъяны быгатӥ! Пеклязы висисьёссэ но, уйвӧтын ветлӥсьёссэ но. Табере соос бадӟымесь ини, асьсэлэн нылпиоссы вань. Но мыным тау карыны уг вунэто.

- Школаын тӥ 40 ар пала ужады. Мӧзмиськоды-а нылпиослэсь?

- Туж мӧзмисько. Классэ пырыса ӟечбуръяськисько но партаос вискытӥ ортчисько вал. Котькуд пиналэн маке-со вераськисько, йырзэс маялтӥсько. Озьы кусыпмы чаляк тупалляз. Тон ляб дышетскиськод шуыса, пиналэз ноку ӧз тышкаськылы, сое нылпиос азьын ӧй ултӥялля. Мар карод, адями дунне вылэ огкадь уг вордӥськы бере. Ляб валасезлэсь маке мукет быгатонлыкъёссэ усьтыны тыршылӥ. Нылпиосме бусые, нюлэскы поттылӥсько вал. Отын шундыен, писпуэн, будосъёсын, музъемен ӟечбуръяськиськом, вераськиськом. Кыӵе тон чебер, синмаськымон, ми тонэ яратӥськом, шуиськом. Инкуазь пунэме уг кыльы – кужым сётэ. Нылпиос мӧйыос сярысь инкуазез трослы золгес шӧдо-валало.

- Вунонтэм кылиз «Вордскем кыл» журналлэсь 5 арзэ пусъён ӝыт. Тӥ соку нылпиосыныды быдэс автобус вуиды. Калыкез арганэн шудэменыды, асьтэ кырӟанъёсыныды, кылбуръёсыныды паймытӥды. Кӧня-о нылпиосыз арганчи кариды?

- Ог 30 мындазэ. Али но сооссыз котькудзэ нимын-тулын вераны быгатӥсько, кытын мар каремзэс но тодӥсько.

- Нош кырӟанъёсты кӧня люкаськизы ни?

- 50 пала. Туж жаль: висьыны кутскеменым, соосты школаосы вӧлмытыса ӧй вутты. Ваньмыз ведь соос сюлмысь потэмын. Куд-огзэ кылзӥсько но, синкылиосы пото. Паймисько: ма, мон ик-а соосты гожтыны быгатӥ?

- Ожмос школаын нылпиослы тӥ сямен удмуртлык пыӵатӥсьёс вань на-а?

- Ӧвӧл. Нылпиос ӟучомыса кошко ни.

- Кылбураны малы кутскиды?

- Сое мон одӥг кылбуреным валэкто:

Мар кужымез кадь кылбурлэн,

Мар ужез кылбурчилэн?

Бӧтьыртэ, нош кин кылэ?

Кинлы со кылбур кулэ?

Со кулэ жадем муртлы,

Со кулэ бӧрдӥсезлы,

Йыромем, ышем муртлы,

Со кулэ сюлэммылы.

Кылбуръёсы кытысь ке инсьӧрысь асьсэос лыктылӥзы кадь, гожтӥськыны куриськылӥзы. Озьы ик крезьгуръёсы но. Сыӵе шудо вакытэ вал 1997-тӥ-2000-тӥ аръёсы. Туж жаль: чаляк тӧлӟиз Инмарен сётэм ӝутскем мылкыды, вань малпанъёсме вераса ӧй вутты.

- Мӧйыослы сӥзем кылбуръёсты тросэз ӝож мылкыдэз бугырто.

- Улон секытэн со. Улон радъямын ӧвӧл. Вылӥысен улӥозяз. Семьяос тросэз куашкало. Юон, калгон, вордэм нылпиосыз вунэтон кузёяськыны кутскизы. Мар вите асьмемыз азьланьын? Нылпиос керетэмез, ёрмонэз гинэ адӟыса будӥзы ке, кытчы асьмеос вуомы? Ваньмылы та сярысь мур-мур малпаськоно. Кылбуръёсы ачим сярысь гинэ ӧвӧл ведь, соос, оло, кинлэн ке пеляз кылӥськоз, сюлмаз пыроз шуыса гожтэмын.

- Мар понна эшшо сюлэмды висе на?

- Радио но телевидение пыр удмуртъёсты туж ӧжыт возьматыны кутскизы. Быдэс гуртмылэн вожзы потӥз «Ингурез» быдтэмысь. Табере радио езъёсты но вандылӥзы ни. Кин сыӵе «визьмо» ужа, ӧйтӧд. Востэменымы удмуртлыкмес ыштӥськом ни.

- Сопал дуннелы оскиськоды-а?

- Оскисько. Быдэс улонме син азям пуктӥсько но шуисько: та берло аръёсам мон одӥг сьӧлык но лэсьтыны кулэ ӧвӧл ни. Вӧсяськыса гинэ улоно на.

- Мӧйымыса адями азьзэ-берзэ чакласькисьгес луэ.

- Котькуд нунал изьыны выдӥсько но малпасько: туннэ мар ке ӟечсэ лэсьтӥ-а?

- Тӥляд мушъёсты но трос вал кадь, садды но бадӟым, чебер.

- Мушъёсмы быризы. Саклык ӧжытгес висъямы, лэся. Садэн картэгес выре. Кылем арын садамы куинь груша мерттӥ. Шоразы учкыса котыртӥзы ветлӥсько но сыӵе шумпотӥсько.

- Дышетӥсь, кылбурчи, крезьгурчи, эмъясь, анай, кузпал. Кудӥзлы тросгес сюлэм шуныттэс сётӥды?

- Пичи классын дышетскись нылпиослы. Дышетэм сяна, соосты ведь мон эмъясько но вал.

- Асьтэ нылпиостылэсь шумпотон басьтӥськоды-а?

- Удалтӥзы кадь потэ пиналъёсы. Огез нылы школаын дышетэ, мукетыз дизайнере дышетскиз, пие врач.

- Инмар Анайлэсь шуд курыны малпаськоды вал бере, асьтэлы шудтэм потӥськоды-а?

- Шудо но, шудтэм но нуналъёсы вал. Сотэк кызьы-о? Инмар Анаен пумиськон вакытам висьыны кутски ни вал. Тазалык курыса вуттӥ, нош шуд ӧй вутты тӥни.

- Быдэс улондэс нылпиослы сётӥды. Мар сӥземды потэ али будӥсь пиналъёслы?

- Сӥзёнме кылбуреным вераме потэ:

- Апае, коть вера тон,

Кыӵе луэ яратон?

- Ай будӥд ке, тодматскод,

Малы сокем дыртӥськод?

- Оло со вӧзам сылэ,

Оло со вӧзам ветлэ.

- Буд ай дас куатёзь,

Яратон тонэ витёз.

Со бадӟым, туж бадӟым.

- Гурезь кадь-а?

- Со туж пӧсь.

- Шунды кадь-а?

- Со мусо.

- Меми кадь-а?

- Со кужмо.

- Дяди кадь-а?

- Нош кыӵе-о тусбуез?

- Солэсь ӧвӧл чеберез.

- Нош кыӵе-о синъёсыз?

- Вӧямын кадь синъёсыз.

- Ой, уг пот ни возьмаме,

Туж потэ яратэме!

Музъеммы асьмелэн одӥг. Дунне вылысь ваньзэ яратыны кулэ. Соку тон но ваньмызлы мусо луод.


Источник:

Байсарова Ю. П. Шуд курыны ӧй вутты / Ю. П. Байсарова ; записала Г. Романова // Удмурт дунне. - 2006. - 28 июля. - С. 6, 11. - (Удмурт кизилиос).


За предоставление материала выражаем огромную благодарность редакции газеты "Удмурт дунне"