Бадретдинова Люза

Материал из Воршуда
Версия от 11:44, 30 августа 2018; Ladamiri (обсуждение | вклад)
(разн.) ← Предыдущая | Текущая версия (разн.) | Следующая → (разн.)
Перейти к навигацииПерейти к поиску

Люза Геннадьевна Бадретдинова - удмурт гожъяськись, Удмурт Элькунысь сӥё-дано журналист.

Люза Бадретдинова

Улон сюресэз[править]

Люза Бадретдинова вордскиз Башкортостанысь Бурай ёросысь Алтау (Алтаево) гуртын 1965-тӥ арын 16 толсуре. [1]

Люза Бадретдинова вордскиз колхозникъёслэн семьяязы. Атаез, Геннадий, 18 ар ужаз колхозын бригадир луыса. Нош анаез, Таслима, 14 арескысен доярка луыса тыршиз. Соос ӵошен вить нылпи будэтӥллям но пыд вылазы султытӥллям. Люза – бадӟымез нылпизы. [2]

«Вордӥськи мон Алтаево гуртын. Туж чебер интые пуксемын со: котырак гурезьёс, уно ошмесъёс, бакча бертӥмы ик Кышеды шур бызе, гуртмылэсь палэнынгес Танып шур визыла. Вань улонэ вордӥськеме дырысен инкуазен герӟаськемын вал: узыяй-борыяй, ошмес ву нуллӥ, турын дасяллямы, бакчаын ужамы… Эшъёсын гужем ӵоже вань емышъёсты, эмъюм турын-куаръёсты бичаса вуттӥськомы вал. Вӧзамы вал пересьёс: песяе, солэн сузэрез,ӵыжы-выжыосмы. Ог-огзы доры ветлыса, азьло ортчемзэ вераса пукыны ярато вал. Ужез яратонэ но, вашкалаез борды кыстӥськонэ но та бордысен кутске. Али ке но тау карисько дырыз дыръя ужаны но, кылзӥськыны но вашкалазэ гажаны дышетэмзы понна»,– вера Люза Геннадьевна.

9-тӥ классын дышетскыкуз, Люзаез Ижкаре семинаре ӧтизы. Отын В. В. Романовлэн секцияз ужаз. «Аслым трос выльзэ басьтӥ, уката но шумпотоно вал газет пыр гинэ тодэм юнкоръёсты адӟыны. Та семинарысен тодӥ ни: дышетскыны лыкто Удмурт университетэ, филология факультетысь удмурт отделение».

1983-тӥ арын Кузбаевской шор ёзо школаез йылпумъяса, пыре дышетскыны Удмурт кун университетысь филология факультетлэн удмурт отделенияз.

«Книгаосты лыдӟыны школаын ик туж яратӥсько вал, ӵапак интыяз сюри. Ӟуч, удмурт, зарубежной литература, литературоведение, история – ваньмыз со мыным туж сюлэмъям вал».

1987-тӥ арын 5-тӥ курсын дышетскись студентка кутске ужаны «Дась лу!» газетын номер поттӥсь редактор но корреспондент луыса.

«Нырысетӥ ужан аръёсы «Дась лу!» газетын ортчизы. Коллективмы ӟеч вал, ӝыт вуыса но дорамы бертэммы уг поты на вал, ваньмыз туж тунсыко потылӥз. Газет туж яраз. Командировкаосы потаса, эшшо но бурдъяськылӥм. Дышетскисьёс но дышетӥсьёс но, калык но мыло-кыдо пумиталляз».

1991-тӥ арысен «Кизили» журналын кыл кутӥсь секретарь луыса ужа. [1]

«Кызь арлэсь кема та ужын ужаса, вань шаермес, дыр, котыръяй. Котькудӥз ёрос аспӧртэм. Кытын туж ӟеч возиллям куиськонэз, кытын ке пужыятскыны ярато. Нош огъя ваньзэ люкано ке – калыклэн огъя дуно ваньбурез луэ. Синмаськыса учкисько усточиосмылэсь киужъёссэс. Филология факультетэз ке ӧй бырйысал, бырйысал, дыр, этнографиез. Со мыным тунсыко но матын потэ».

Гожъямъёсыз сярысь[править]

Люза школаын дышетскон вакытаз гожъяськыны яратӥсьёсты бордаз люказ-биниз Ульфат Шайхутдинович Бадретдинов. Пиналъёсты со пӧртэм ужрадъёсы пыриськыны ӧтьылӥз. Люза Бадретдинова нырысетӥ кылбурзэ гожтӥз 5 классын дышетскыкуз. [2]

«Нырысетӥ кылбур чуръёсме ӟуч кылъя но литературая дышетӥсе Фания Ильтимировна Байметова гожтытӥз. Башкортостанлы сӥзем ужрад дасякумы шуиз: оло, асьтэос, пе, утчалоды кылбур гожтыса, дасьсэ гинэ ум вералэ. Мынам ньыль чуръем кылбур пӧрмиз. Со чуръёсме ушъязы, школьной линейка азьын но лыдӟытӥзы вал. ».[3]

«Дась лу!» газет арняяз кык пол дорамы вуэ вал – вторнике но четверге. Отчы гожъяськон вакытам со нуналъёс самой яратоноосыз луизы. Тодам ваисько на куд-ог гожтэм заметкаосме. Одӥгез тазьы кылдӥз. Анае дояркаын ужаз. Гужем скалъёсты лагерьын, Танып шур сьӧрын возизы. Дояркаос отын быдэс нуналэн черодэн дежурить карылӥзы. Сыӵе нуналъёсы мон но юрттӥськыны ветлӥ. Одгӥ пол озьы мынон дыръям, тыысь гордалэс чорыг кадь макеосты адӟи. Таӵеоссэ мынам ноку но адӟылэме ӧвӧл! Уг но кышкало, лагерь коркась банка шедьтыса, кӧнязэ ке отчы интыяй. Пастухъёс вуизы но чапкиськизы: кин, пе, татчы бака пӧрмонъёсты кутылэм? Та учырме «Дась лу!» газетэ гожтыса ыстӥ. Котькуд гужем «Дась лу!» газет «Вунонтэм гужем» конкурс ортчытъяз. Мынам со самой яратоно конкурсэ вал. Трос пол кылбуръёс отчы ысъялляй. Уно пол вормисьёс радэ сюрылӥ.

Нош 10-тӥ классын дышетскыкуз Люзалэн ужъёсыз печатласькизы «Йыр вадьсын инбам» бичетын. Со дырысен трос гинэ кылбуръёсыз печатласькизы удмурт газетъёсын но журналъёсын: «Дась лу!», «Удмурт дунне», «Кизили», «Инвожо», «Кенеш», «Ашальчи» но «Луч».

Л. Бадретдиновалэн куд-ог кылбуръёсыз кырӟан луизы.

Но 2006-тӥ арын гинэ «Сюлэм пужыос» нырысетӥ кылбур бичетэз потӥз.

Югыт. Чылкыт. Шуныт. Улонмес чебер но йӧно карыны быгатӥсь та куинь валанъёслэсь берло дыре мӧзмоно... Люзалэн чуръёсаз сыӵе мылкыдъёс шараясько, кудъёсыз адямиез уг чепыльто, уг кышкато, уг ултӥяло – яратон-гажан тулкымъёсын йӧнатыны тыршо: [4]

Badr2.jpg

Кыӵе кадь ваньмыз огшоры:

Киосмес кырмыса, «ӟечбуресь» шуыны,

Ог-огмес валаса, улонэз шӧдыны

Синъёсы учкыса, шунытэз шӧдыны.

Кыӵе кадь ваньмыз огшоры,

Но… уг тырмы дырмы.

«Сюлэмын туккетӥсь крезьгур вера: югыт дунне вылын вань Яратон. Со кужмо но сайкыт – вӧзад ке валасед но шунтӥсед вань, со ляб но ватӥськись - ӧвӧл ке ӝутӥсед но бурдъясед. Сыӵе мылкыдын улэ Люза Бадретдиновалэн лирической героиняез» - гожтэмын бичетэз валэктӥсь чуръёсын.[5]

Люза Бадретдинова туала удмурт литератураысь туж яркыт, зэмос, кыллэн пуштрос сӥньысъёсыныз чильпаськись кылбурчи. Со сокем усто – тунаса кадь – аслаз кыл гочатӥсь чебереныз но шӧдон визылъёсыныз лыдӟисьсэ синмаськытэ, со ачиз синмаське но сюлэмзэ усьтэ… Мон дурыстэм кышкасько огшоры гожтыны, котькуд авторлы огвыллем сямъёс суреданы. Люза Бадретдиновалэн кылбуретэз сярысь малраськисько ке, сюлэмын кык пӧртэм оскон ӝуатске. Одӥгез осконэ – яратонлы но синмаськонлы, гажанлэн шунытлыкезлы, нош мукетыз осконэ – адӟонлэн яратонэз тӧлӟытӥсь-кысӥсь кужымезлы, улонлэн лек «учконъёсызлы»… [6]

Люзалэсь кылбуръёссэ лыдӟыса, малпан кылдэ: та нылкышно гожъясьмылы но кин ке но, мар ке но юрттэ, дыр. Мон шуысал, дор палъёссэ, выжы калыксэ, анай кылзэ яратэмез но гажамез, калык кылосысь сӥльвираз пыӵам мылкыдъёс но кылбуран амалъёс юртто. Зэм но, кылбуръёсыз солэн капчиен лыдӟисько, ас кожазы вордӥськемын кадь йӧто. [4]

Та кудыям

Быдэс гужем:

Лызгырлыос,

Ӵыжыт узы,

Нап омырлэн

Тузь шокамез,

Лыз инбамъёс,

Ӟоз куараос.

Шунды но

Пыдэсаз пырем –

Мае меда

Отысь шедьтэм?

Та нылкышнолэсь кылбуран пӧртэмлыксэ чильпаськон ужен ӵошатысал: чильпаськыку сямен бӧрсьысь бӧрсе пужы пуктэ но синмаськымон арбери кылдытэ, кожалод… Озьыен, кылбуран уж – со чеберлык кылдытон: сюлэмдэ малпан-а вырӟытоз, мылкыддэ-а бугыртоз, котькудӥзлы тупась пужы шедьтоно но сое вольыт, ӝикыт чильпаны быгатоно. 2008-тӥ арын фин-угор калыкъёслы юрттон программая Эстониын ньыль (удмурт, ӟуч, эстон но англи) кылын «Мынам сюресэ – сюлэме» кылбуръёсыныз бичет потӥз. Та бичетэз пумысен эстон гожъясь Арво Валтон таӵе мылкыдзэ вера: «Люзалэн кылбуръёсыз огшоры кадь гожтэмын, но мур образъёсын. Вакчи, шуак но аспӧртэм йылпумъяськисьчуръёс сюлмысь потэмын – утчамын ӧвӧл».[7]

Наградаосыз но премиосыз[править]

Печатья но ивортодэтъя министерстволэн почётной грамотаез, 1996.

Эстониысь ӵыжы-выжы калыкъёслэн литературной премизылэн лауреатэз, 2010.


Библиография[править]

Книгаосыз[править]

Minu tee viib südamesse = Мынам сюресэ - сюлэмэ = Дорога в сердце = My wayis to the heart. - Tallinn : Kirjastuskeskus, 2008. - 62 lk.

Сюлэм пужыос : кылбуръёс / оформ. Байковой Д. В. - Ижевск : Удмуртия, 2006. - 78 с.

Статьяосыз[править]

Анай тусо ; Яратӥ ; Бичасько но кузьмасько ; Зор пыры но синкыли ; Ӵок ; Яратонэ // Удмурт дунне. – 2006. – 19 сент. – С. 7.

Бубыли ке возь вылын : кылбур // Кизили. – 2012. – № 5/6. – С. 2.

Буёло карандашъёс : пичи суредъёсын верос // Кизили. – 2013. – № 4. – С. 8-9 : ил.

"Вӧлак усьто ай укноме..." ; "Юсь ыштэ ке гажанзэ..." ; "Валатэк. Пӧяськонлэсь шӧмзэ..." ; "Эн кекаты монэ, мӧзмон..." ; Потӥ тон пумитэ... ; Куинь сюлэмъёс ; Луэ тонтэк но улэме ; Ненокин но уз кыл ; Куриськон ; Герӟаське вылэм ; Гужемлэн тусыз : кылбуръёс // Инвожо. - 2013. - № 8/9. - С. 122-123.

"Кин мон?" // Кизили. – 2010. – № 11/12. – С. 10–11 : фот. ; цв. ил.

Коньывуон // Кизили. – 2007. – № 10. – С. 2 обл.

Коркакузё но перепеч : сценка / иллюстрациез Марина Гузаевалэн // Кизили. – 2012. – № 7. – С. 10-11 : рис.

Кыӵе тон чебер, тулыс! : кылбур / иллюстрациез Марина Гузаевалэн // Кизили. – 2013. – № 5/6. – С. 2 : ил.

"Кыӵе умой – тон вань..." ; "Узы-а бичалом..." ; "Мон Тӥледлы..." ; "Яратонэ – Писпу..." = "Kui hea, et oled olemas..." = "Kui hea, et oled olemas..." = "Kas korjame nuud maasikaid..." = "Ma Taile..." // Kuum ӧӧ : suome-ugri ranvaste tanapaeva luulet. – Tallinn, 2006. – С. 430–435. – На удмурт. и эст. яз.

"Нош соку со лымы..." ; "До, ре, фа –..." ; "Ворпоё-ворпоё сӥньысъёс бырйи..." ; "Тӥляд мертэтты – вормонъя" // Удмурт нылкышно кылбуретлэн тулкымъёсыз / Л. П. Федорова. – Ижевск, 2007. – С. 343–345.

Мынам сюресэ – сюлэме // Удмурт дунне. – 2011. – 22 марта. – С. 7.

Ойдолэ лыдъяськоме, чиньосын шудоме // Зарни дэремен шунды : семьяын лыдӟон книга. – Ижевск, 2006. – С. 12–13.

"Ортчиз, тӧлӟиз куректонэ..." ; "Яра вань тон..." ; "Кыӵе умой – тон вань..." ; "Яратонэ..." ; Кин тон? ; "Толэзен шунды..." ; "Та гуртын уг вузы кезьыт тӧл..." ; "Льӧмпу сяськаед но..." ; "Тӧдьы листок вылам..." ; "Кинлы – чильым..." ; " Муш-кышномурт мон..." ; "Дуннелы – куараме..." // Инвожо. – 2007. – № 5/6. – С. 114–115 : фот.

Питранъёс : комиксы / иллюстрациосыз Марина Гузаевалэн // Кизили. – 2013. – № 2. – С. 8-9.

Пыдэ пононъёс : выжыкыл / иллюстрациосыз В. Мустаевлэн // Кизили. – 2008. – № 4. – С. 10.

"Та гуртын уг вузы кезьыт тӧл..." : кылбур // Инвожо : спец. вып. газ. "Известия Удмурт. Респ." и журн. "Инвожо". – 2011. – № 9/10. – С. 36. – (Удмуртский ПЕН-клуб. Поэтическая площадка)

Тузь омыр кадь ; "Асьме вискын – алӥсь кылъёс..." ; "Яра, вань тон..." ; "Вождэс эн ваелэ мыным..." // Удмурт дунне. – 2007. – 14 февр. – С. 7.

Ӵушъял но кешыр / иллюстрациез В. Мустаевлэн // Кизили. – 2009. – № 9. – С. 11.

Ӵушъял но робот : выжыкыл / суредъёсыз Марина Гузаевалэн // Кизили. – 2011. – № 7. – С. 14 : цв. ил.

Чуваш ныллы // Кизили. – 2010. – № 7. – С. 15.

Кырӟанъёсыз[править]

Гуртын но меда : кылбур-кырӟан / Люза Бадретдинова ; крезьгурез Ульфат Бадретдиновлэн // Кенеш. – 2005. – N 9. – С. 20.

Кузнецов П. Н. Яратӥ : "Малы синмаськи..." // Кенеш. – 2006. – № 8. – С. 109–111.

Шкляева Р. И. Вождэс эн ваелэ мыным : "Вождэс эн ваелэ мыным..." // Удмурт дунне. – 2009. – 21 янв. – С. 6. – (Шудэлэ тӥ, серектэ).

Берыктэмъёсыз[править]

Вошъяськон : коми-пермяк выжыкыл // Кизили. – 2006. – № 5/6. – С. 11.

Кечтака но Така : бигер калык выжыкыл // Кизили. – 2007. – № 8. – С. 6–7 : рис.

Кык Тол бабайёс : ӟуч калык выжыкыл / иллюстрациез Н. Быковлэн // Кизили. – 2008. – № 9. – С. 6–7 : рис.


Татчы 2006-тӥ арысен потэм чеберлыко статьяос гинэ пыртэмын, кылемъёсыныз тодматскыны быгатӥськоды Удмурт Элькунысь йӧскалык библиотекалэн электрон каталогъёсызъя.

Уже кутэм литература[править]