Ардашева Ольга Витальевна
«Мынам Удмуртие» телеканалысь «Шудон корка» передача эфире нырысьсэ потэм дырысен туэ 15 ар тырме. Та дыр куспын со бадӟым проектозь будӥз ни: пиналъёс пӧлын гинэ ӧвӧл, нылпи садъёс куспын пӧртэм ужрадъёс ортчытъя. Россиын ортчись «Спасти и сохранить» конкурсын пусъемын «Нылпиослы тужгес усто передача» нимын, Евразийской телефорумысь дипломез вань. Кенешиськом «Шудон коркаез» кылдытӥсен, «Мынам Удмуртие» телерадиокомпаниысь журналистэн Ольга АРДАШЕВАЕН (ФАРХУТДИНОВАЕН).
— Тӥледлы удалтэм: покчиослы передача бордын ужаса, пичи дырды, котьмалы шумпотон вакытты азинтӥське кадь потэ, вылды. Но мукет ласянь учконо ке, котькуд нылпиен огкыл шедьтыны, сое маин ке тунсыкъяськытыны, видеокамера азьын вераськытыны капчи ик ӧвӧл. Эшшо ке удмурт кылын…
— Пиналъёсын ужаны туж кельше. Макем соос мусоесь, тунсыкоесь, паймытӥсесь! Соосын ужаса, зэм но, улыны кужым басьтӥськод. Малпасько, кыл вылын уд валэкты, кызьы нылпиен огкыл шедьтоно. Со ваньмыз кытысь ке сюлмысь-шӧдонъёсысь потэ, кызьы тазэ, созэ тэшкылиез маин ке тунсыкъяськытоно, солэсь покчи дуннезэ усьтоно. Удмурт кыл ласянь ке… Мон 2 ар ӵоже аслам нылыным декретын пуки, ужаны потӥ но, воксё пайми: азьвыл аръёсын ӵошатыса, удмурт кылын вераськись нылпиез шедьтыны эшшо но секытгес луэм. Чылк-чылк удмурт гуртъёсысь нылпи садъёсы жингыртӥськод но пумитад вазё: удмуртэн вераськись нылпиосмы группаын 2 кузя гинэ.
Куд-ог анай-атайёс воксё абдрато. Уло-выло удмурт гуртын, урамын бызьылӥсь пиналзылэсь юаськод, кӧня арес, соос пумитад «щемь» шуыса вазё. Маке эшшо юаськод — нош ик икыр-кукыр ӟуч кыл. Мумы-бубызы киыныз шонтэ: малы соослы удмурт кыл, ойдо ӟучсэ мед тодозы. Но соку дышеты ук тон сое ӟуч кылын рос-прос вераськыны! Озьы луыса кошке ни: удмурт кылэз но уг тодо, ӟученыз но шенгыль-пенгыль вераськемъясько. Кытысь-марысь анай-атайёслэн йыразы удмуртэз кулэтэм шуыса «нумыр» пыриз? Аслэсьтым анай-атайме малпасько: соос огпол но йырзэс ӧз тӥялэ, вылды, пиналзэс кыӵе кыллы дышетон сярысь — ми вераськиськом удмурт кылын, пиналъёсмы но вераськозы ми сямен. Асме учкисько: удмурт кыл пушкын будыса, ӟучсэ но тодытэк ӧй кыльы кадь, улонын асме шедьтыны но анай кылы ноку ӧз люкеты.
Озьы тӥни, «Шудон коркаез» эфирлы дасяку, «ворттылӥськом» одӥгъёсыз пиналъёс вылынгес. Тужгес но али, куке возьматӥськом одӥг мунёез, со вӧзы пуктӥськом одӥг пиналэз. Мыло-кыдо пырисько, кылсярысь, Ижысь 112 номеро нылпи садысь Даша Михайлова, Ангелина Иванова, К. Герд нылпи садысь Артём Сараматов. Соос туж чебер верасько анай кылын. Передачалы герой шедьтыны шугомисько ке, мар карод, таослы нош ик вазиськисько ни. Эшшо ке ваньзэ, дышетэмъя-бумагая уг, асьсэ кылынызы верало. Туж мусо кылӥське вераськемзы.
— Нош асьтэлэн пичи дырды кытын ортчиз?
— Вордскемын но будэмын мон уйпалан — Кез ёросысь Сьӧдбамгуртын. Солэн котыраз гурезьёс, тулыс вуэмъя лымы шуна но гурезьлэн бамалаз сьӧд сюй потэ — соин гуртмес озьы нималлям. Со милям бадӟым ик ӧвӧл, 58 коркаен. Ярам, азинскись гурт хозяйствомы вань но, гуртмы возиське на. Гуртын бен кытын ортче покчи дыр? Урамын бызьылыса. Шудыны потӥськод но малпаса гинэ улӥськод — доре гинэ медам ӧте вал, ужаны косозы ук. Семьяямы ми 3 нылпиос, мон шоретӥез. Вань Жанна апае но Сергей выны. Нылпи садэ мон чик но ветлэмын ӧвӧл, будэмын бабу вӧзын. Со вӧзын туж тунсыко вал мыным. Мае но ӧз мадьылы. Калык веранъёс, чакланъёс, выжыкылъёс — соос вылын будӥ. Ижын улӥсь пиез доры куное вуылыкуз, монэ но сьӧраз кутылӥз. Мыным, пыдлось гуртын вордскем нылашлы, со зэмос праздник кадь луылӥз. Макем паймытэ вал бадӟым город!
Анае магазинын вуз карисьын тыршиз. Но солэн ужез мыным мӧзмыт потылӥз. Эх, малпасько, кыӵе удалтэм эшъёсылы — анайёссы фермае скал кыскыны ветло, кыӵе тунсыко! Соос сьӧры мон но калъяськылӥ. Школае мынэме бере сочинениям бадӟым букваосын гожтӥ: доярка луэме потэ. Визь пыремъя малпанэ, конешно, воштӥськиз. Синмаськыса учкылыны кутски дышетӥсьлэн ужез шоры.
Сюлмылы тужгес но матын луизы удмурт кылъя но литературая урокъёс. Дышетӥсьмы Нина Витальевна Лекомцева, тунсыкъяськемме шӧдыса, мыным фольклор кружоке пыриськыны ӵектӥз. Ветлӥмы коркась корка мӧйыос дортӥ, удмурт кырӟанъёсты, мадёсъёсты гожъяса-люкаса. Школаын ортчись ужрадъёсы одӥгаз но пыриськытэк ӧй кыльы, сцена вылысь воксё ӧй васькалля кадь. Кылбур-верос гожъян борды но басьтӥськи. «Пӧрамъёсы» печатласькизы «Ӟечбур!» (соку «Дась лу!») газетын. Газет бамысь печатлам ужме адӟыса, мылкыд макем зол бурдъяськылӥз! Аслыд ачид золгес оскыны кутскиськод, эшшо мар ке выльзэ, усьтымтэзэ тодэм потэ, конкурсъёсы, визьсынанъёсы пыриськыны мылкыд пуроме. Тае тодам возьыса ик, съёмкаосы пыдлось гуртъёсысь пиналъёс доры но вуылыны тыршисько. Асьсэды бадӟым экранысь адӟыса, мылкыдзы мед ӝутскоз, анай кылынызы данъяськонзы мед йылоз.
