Алексеев Анатолий Валентинович

Материал из Воршуда
Версия от 14:42, 6 февраля 2015; Admin (обсуждение | вклад) (1 версия импортирована)
(разн.) ← Предыдущая | Текущая версия (разн.) | Следующая → (разн.)
Перейти к навигацииПерейти к поиску

Интыяд пукид ке - гынмод[править]

Алексеев.jpg

Удмурт Элькунамы эмчи сузэръёсты но фельдшеръёсты Можга, Иж, Вотка, Сарапул, Глаз каръёсысь медучилищеос дасяло. Арлы быдэ адямиез эмъян удысэ тодон-валан басьтыны лыкто нылъёс но пиос. Та училищеос пӧлысь одӥгеныз, Сарапулысь медучилищеен, кивалтэ удмурт воргорон Анатолий Валентинович Алексеев. Дышетскон заведенилэн азинскемез но отысь коллектив сярысь трос ӟеч кылъёс вераз элькунысьтымы тазалыкез утёнъя министрлэн воштӥсез Владимир Александрович Гаврилов. Малпасько, тодматсконо удмурт кивалтӥсен. Анатолий Валентинович удмуртлык понна нюръяськись адями. Коллектив но студентъёс сярысь сюлмаськись мурт. Оло, семьяезлэсь но вылӥгес пуктэ ужзэ. Училищеын ортчись котькуд ужез ачиз радъя но нуэ. Сотэк ужрадъёс но мӧзмыт ортчо, шуо дышетӥсьёс но дышетскисьёс. Анатолий Валентинович ачиз ик угось артист но, бальной эктонъёсъя усточи но, со ик кивалтӥсь, со ик спортсмен… А. В. Алексеев ассэ номыр ласянь калыклэсь вылӥе уз пукты, йырзэ уз ӝуты.

Азинсконъёс - ог-огдэ валанысь

- Анатолий Валентинович, кыӵе ёрос меда тӥледыз Сарапул городлы кузьым дасям?

- Мон вордски но будӥ Пичи Пурга ёросысь Яган-Докья гуртын. Школамы удмурто-ӟучо вал. Сизьыметӥ классозь шоро-куспогес дышетски. Туж кельшылӥзы астрономия но физика. Собере биологиен но химиен дышетӥсе Флюра Садыковна Гусманова аслэсьтыз предметъёссэ яратон мылкыд пыӵатӥз. Аслым но та урокъёс кельшыны кутскизы, пӧртэм опытъёс лэсьтылӥ, ӵемысь олимпиадаосы ветлӥ, нырысетӥ интыос басьтылӥ. Одӥгаз радиоприёмник но сётӥзы. Озьы ик Барнаулын ортчись всесоюзной слётэ вуылыны шуд усиз. Пичи дырысеным туж синмаськыса учкылӥ гуртысьтымы вертолётэн лобась пияш шоры. Котьку со кадь луэме потылӥз. Дас классэз йылпумъякум, малпанэ воштӥськиз: мединститутэ мыноно кариськи.

- Дышетскондэс йылпумъяса, врач луыны мылкыдды ӧй вал шат? Кызьы тӥ та училищее шедиды?

- Ньылетӥ курсын мынам малпанэ вал ини: дышетӥсь луо. Биохимияя кафедраын дышетскисьёс азьын формулаосты, циклъёсты вераськод, опытъёс лэсьтӥськод. Со уж мыным кельшыны кутскиз. Мылкыды туж-туж луысал ке, мединститутэ но дышетӥсе кыльыны быгатысал. Сарапулысь медучилищее шедьыса, туж шумпотӥ, та городын угось со вакытэ мынам кыкез апае улэ но ужа вал ини.

- Кызьы меда оскизы соку гинэ пыд йылаз султӥсь егит муртлы кивалтон серметэз?

- Та пумысен мон ачим но туж пайми. Куинь ар терапия предметэз нуыса вуттӥ но, монэ, удмурт пияшез, ӟуч коллективен кивалтыны, директорлэн интыяз пуксьыны ӵектӥзы. Татын соку туж зол ужаз партийной организация. Гужемзэ кык группаез стройотрядэн Молдавие помидор бичаны нуллӥ. Нырысетӥ инты басьтыса бертӥмы. Егит вал ай, олокыӵе но ужрадъёс ортчытъяй. Ужаны быгатэмме синйылтӥллям, лэся. Кивалтон удыс нырысь-валысь шурдыт ик потӥз. Котьма ласянь коллектив туж зол лыдъяськылӥз. Рос-прос малпаськи: ӧй ке оскысалзы, малы сыӵе ужез мыным дэмласалзы меда? Нокин но тыбырзэ ӧз возьматы, мӧйы дышетӥсьёс трос юрттэт сётӥзы. Уката ик удмурт нылкышно Глафира Дмитриевна Володина. Табере та удысын 25 ар ужасько ини.

- Собыдӟа коллектив, сомында студентъёс… Училищелэн вань улонэз тӥ пыртӥ потэ. Огшоры выж миськисен но, дышетӥсен но одӥг кадь вераськыны быгатоно.

- Мыным сыӵе быгатонлык Инмар сётэм, шуод-а, мар-а. Нокинэ вӧсь кареме уг поты. Ваньмыныз сюлмысь кенешыны тыршисько, сюлэмвисёнзэс валаны турттӥсько. Адямиез вӧсь карон берен ас вылад усе.

- Таӵе огыр-бугыр вакытэ секыт ӧвӧл-а кивалтон удысэз кыскыны?

- Секытэз трос. Но мукет ласянь кытӥ-отӥ капчи но. Табере троссэ шуг-секытъёсты кивалтӥсь ачиз быгатэ сэрттыны-пертчыны.

- Нош тӥ асьтэос толон гинэ парта сьӧрысь вуэм студентлы табыдӟа креслодэс оскыны быгатысалды меда?

- Со сярысь малпаськылӥсько ини. Мон, мукетыз, куинетӥез со ӵектэм муртлы юрттӥм ке, малы уд оскы. Мыным соку ик кизэс сётӥзы азьвыл директормы Виталий Астафьевич Пушин но парторганизацилэн секретарез Михаил Степанович Зырянов. Туж бадӟым тау карем потэ соослы.

- Коллективады воргоронъёсты уно-а?

- Милям соос ноку но трос ӧй вал. Вить-куать кузя лыдъясько ик, но туж золэсь дышетӥсьёс. Шонерзэ вераса, коллективмы ушъямон, ог-огмес валаса, тупаса ужаны быгатӥськомы.

- Шорады кырыж учкисьёс ӧвӧл-а? Вылаз ик, воспитание ужъя нырысетӥ юрттӥсьты - кузпалды Людмила Леонидовна?

- Азьвылгес Людмилалэсь вань янгышъёссэ кенешъёсын шара вераны тыршылӥ. Коллективлэн медаз луы малпанэз: от, вайиз татчы палэнысь муртэ, эшшо ке юрттӥсе пуктӥз на. Ужаны кутскем дырысеныз ик Люда ассэ ӟеч ласянь гинэ возьматӥз. Со лыктэм бере городысьтымы училищеос пӧлын ӵошатсконъёсын кыкетӥ но куинетӥ интыос басьяны кутскимы, отчыозь сыӵе азинсконъёсмы ӧй вал.

- Тулыс вуэмлэсь ик кышкаськоды, дыр, кадь потэ: училищее пырон экзаменъёс, анай-атайёс, тодмоос ёртыны кутско.

- Кызьы сотэк? Мон котькуд вазиськись адямиез валасько. Уката ик анай-атайёсты, ваньмызлэн потэ ук пиналзэ интыямез. Аслам вордскем ёросысьтым вазисько ке, эшшо но шумпотӥсько.

- Араз кӧня дышетскисьёсты кутӥськоды, трос-а соос пӧлын удмуртъёс?

- 9-тӥ но, 11-тӥ класс бере но быдэн 50 адямиез кутӥськомы. Конкурсмы арлы быдэ бадӟым луэ: одӥг интые - ньыль адями. Дышетскыны мылкыд карисьёс трос. Мон шуысал, удмуртэз но, ӟучез но огкадьгес вуо. Трос лыкто Башкортостанысь, Каракулино, Пичи Пурга, Кияса ёросъёсысь. Жаляса верано, городысь пиналъёсын ӵошатыса, гуртысь вуэмъёслэн тодон-валанзы лябгес ик. Азьло аръёсы дышетскисьёсмы ӝыныез городысь, ӝыныез гуртъёсысь ке вал, табере городын дышетскемъёс институтъёсыгес кыстӥсько ини. Шумпотыса кутӥськомы армия бере вуэм пиосты.

- Нош улон сэрег ласянь кызьы?

- Улон инты ласянь шуг-секытъёсмы ӧвӧл, асьмелэн бадӟым общежитимы вань. Отчы ик интыяськомы егит специалистъёсты но. Ваньмыз 386 дышетскись лыдъяське.

- Улон воштӥськемъя, тӥляд училищеды но удыссэ уксё вылэ выжтэ ни, луоз?

- 1994-тӥ арысен уксёен дышетон понна нимысьтыз группаос кылдытэмын. Валамон ини, татчы гуртысь пиналъёс тросгес пыроно луо. Соослэн сыӵе ик программазы: дунтэк тодон-валан басьтӥсьёс сямен ик, ньыль ар дышетско. Соизлы шумпотоно: ӝынызэ студентъёсмес дышетыны быгатӥськомы на, коньдон басьтытэк. Туала вакытэ адями туж секыт югдуре сюремын: араз 35-40 сюрс манет тыроно луэ. Уждун ӧжыт луэмен, со лыдпус та дыре 25-27 сюрсозь кулэстэмын.

- Нош училищеез йылпумъяса, ваньмызлы уж инты шеде-а?

- Та юан анай-атайёсты но, дышетскись пиналъёсты но сюлэмшугъяськытэ. Эмсузэръёслэн но фельдшеръёслэн ужзы туж секыт, нош уждунзы укыр ӧжыт. Та уже шумпотыса ик уг интыясько, малпасько. Тросэз, училищезэс йылпумъяса, музон интые дышетскыны мыно, куд-огез медакадемие пырыны тырше. Дышетскон ар йылпумъяськыку, егит специалистъёсты курыса, шер ке но, дорамы пӧртэм больницаосысь валтӥсь врачъёс вазиськыло ик. Ужан интыос тросгес Ижын луо. Дышетскисьёсмы сярысь сюлмаськыса, ми нырысетӥ аръёсаз ик ивор сётӥськомы пӧртэм интыосы.

- Вить медучилище пӧлын ортчыло-а кыӵе ке ӵошатсконъёс?

- Одно ик. Милемлы ваньмылы сётӥське госзаказ: араз кӧня дышетскись кутоно, ӟеч амалъёсъя дышетоно, ваньзэ дышетскисьёсты чакласа возёно. Элькун ӵошатсконъёсы, олимпиадаосы пыриськылӥськомы. Тани туэ ӟуч кылъя олимпиадаын студентъёсмы, кыкетӥ но куинетӥ инты басьтыса, бертӥзы. Котькуд аре кудаз ке но училищеын республикая конференция ортчытӥське. Туэ Воткае ветлӥмы, нош вуоно арын со ужрадэз ми дорын ортчытыны чакламын. Шумпотӥсько, коллективамы егит, визьмо но котькыӵе уж борды шаплы кутскись дышетӥсьёс ужало. Вань пӧламы кема аръёс ӵоже ужам дано дышетӥсьёсмы: Валентина Михайловна Пушина, Елена Валентиновна Мурина, Татьяна Михайловна Черемушина, Светлана Константиновна Сухоплюева.

Льӧмпуысь васькем шуд

- Семьяысь кык кивалтӥсьлы, кык визьмо адямилы секыт ӧвӧл-а ӵош вамышъяны?

- Мон малпасько, капчигес, дыр, озьы улыны но, ужаны но. Гуртын ик луэ ог-огеныд кенешыны, споръяськыны, сюлэмшугъяськытӥсь югдурез ӵошен сэрттыны-пертчыны. Кылсярысь, кузпалъёс пӧлысь одӥгез трос тодэ, со вера но вера малпанъёссэ, нош тодӥсьтэмез, мольк-мольк шораз учкыса, ву ӟузем сямен, вӧзаз пуке. Кельшоз-а сыӵе адямиен улыны? Ваче кенешеммес кылыса, лэся, школаын дышетскись нылмы училищеысь вань улонэз тодэ ини. Нырысь-валысь котьма ласянь туж зол споръяськылӥмы. Милям улон шоры учконмы чылкак мукет. Мон - химик, Люда - филолог. Арлыдмес лыдэ басьтыса но, нэнэез дэймылӥз: ма, кызьы-озьы тӥ улоды? Нош эшъёсыз шуылӥзы: кыӵе, пе, паймымон адямиен улӥськод. Котьма ласянь вераськон потты, Толяед ваньмаз пыриськыны быгатоз, ӟеч вала литератураез, историез, крезьгурез.

- Нош кызьы тӥ шедьтӥды ог-огдэс?

- Улонын ваньмыз малпамъя уг пӧрмы, озьы ик семья кусыпъёсын но. Люда мынам кыкетӥ кышное, кык нылмы будэ - пичиез алигес гинэ вордӥськиз. Ӵош луэммы бере ини кузпалы мадиз аслэсьтыз синмаськемзэ. Студент дыръям городэ кошкыны автобусэ потӥсько ке, Люда котьку но монэ келяны лыктэ вылэм: автобус дугдылон вӧзын будӥсь льӧмпу йылэ пуксе но, кошкытозям учкыса пуке. Дышетӥсьёслэсь но умоен верамъёссэс пеляз понылэм: Алексеев, пе, спортэн эшъяське, пӧртэм олимпиадаосы пыриськылэ, табере тӥни враче дышетске. Институт бере ужаны Сарапулэ кошки. Льӧмпу пересьмыса ланьырскиз, Люда, быдэ вуыса, дышетӥсь луиз. Кечол школаын кык арзэ ужам но атаез ик индылэм: мын ай, пе, нылы, Сарапулысь медучилищее ветлыса оскалты, отын асьме Яган пи Алексеев Толя ужа, оло, уже кутоз. Кызьы адӟиськоды, солэн пичи дырысеныз йыромем шудэз сьӧраз ветлэ вылэм. Нырысь-валысь Люда кепырасагес ик кутскиз мытэм ужез борды. Табере солэн ваньмыз пӧрме.

- Оскиськоды-а яратонлы?

- Мыным потэ, яратон - со ог-огедлы оскон. Но та юан мон понна али ке но йылаз-пумаз усьтэмын ӧвӧл на. Озьы ке но валасько: ог-огдэ яратон но гажан адямилы кужым сётэ уж дурын, семьяын но ӟечсэ гинэ вае.

- Ваньмон дырды луэ-а? Кузпалды Людмила Леонидовна ӝожтӥське, чик но, пе, дорын ӧй пукысал, луонлык сётысалзы ке, училищеяз ик кӧласал но, дыр.

- Шонер со. Мон дырме тросгес уж дорын ортчытӥсько. Уйвӧтъёсам но ӵемысь сое адӟылӥсько. Тани коркаме дас ар ӵоже ӝутыны вырисько ини. Семьяелэн отчы пыремез потыса, чиданэз бырон калэ вуэмын. Нош мынам дыртытэк, пичиен-пичиен ке но, ваньзэ ас мылкыдъям, ас киосыным лэсьтэме потэ. Дышетскон ар быре ке, огдырлы ваньмон дыр луэ ини. Ӵош ужась эшъёсын но нылпиосынымы кык-куинь нуналлы мынӥськомы шутэтскон базае яке Нечкино турбазае. Асьмеос ик чорыг кутӥськомы, ӝытазезэ шур дурын чорыг лым сииськомы. Ну, нылпиос шумпото ук! Мӧйыос волейболэн шудо. Дышетскон ар ӵоже но тэк улон дырмы ӧвӧл. Вазь ӵукна кошкыса, бер ӝытозь училищеын дырмы ортче. Ялан мар ке но малпано, выльзэ лэсьтоно, ас интыяд пукид ке, гынмод ук. Студентъёсын ӵош ачид но арлы быдэ егитгес но егитгес луиськод кадь. Семьяенымы, лымшор пала ветлыса, ум улӥське, асьме дорын но инкуазь туж умой ук. Ӵемысь Кам дуре потаськомы. Кыӵе чебересь отын интыос! Маин зарезь ӧвӧл. Кӧня мылыд потэ, сомында пыласькы. Гужемзэ сад-бакчаямы тыршиськом, мунчое пыриськом. Яратоно «Волга» машинаеным (та маркаен машинаез гажасько) бертылӥськом вордскем палъёсамы.

- Ярам ай, туннэ ӵапак дорады тупаллямды...

- Уж интыысьтым но монэ шедьтод меда озьы гинэ? Я Иже кошкисько, я музон интые. Дышетон удыс сяна, училищелы оломар но кулэ ук. Куашкамзэ выльдоно, лэсьтӥськон материал понна бызьылоно, ваньзэ утчано. Дасьсэ нокин вайыса уз сёты. Туннэ тани суббота нуналэ анай-атайёсын кенешон ортчытӥмы, соингес доре вазь вуи вал.

Пинал дыры лоба самолётын

- Тӥледыз тустыя удмурт уд шуы. Но тӥ нокытын но удмурт луэмдэс уд ватӥське.

- Вакытэз, лэся, сыӵе вал: нырысетӥ аръёссэ удмурт кылын вазьыны кепыралляй. Азьло дыръя институтын но удмурт сямен ӧз вераськылэ. Табере мон гуртысь лыктэм калыкен ас кылыным вераськисько.

- Сарапулэз ӟуч город шуыны туртто ке но, уно удмуртъёс уло татын. Мылкыдды ӧвӧл-а соосын кивалтыны?

- Зэмзэ но, удмуртъёс татын трос уло. Сюлэм висе соос понна. Тужгес но секыт удысын соос ужало ук. Удмуртъёсты огазеяны мылкыд вань вылэм - номырлы дыр уг тырмы. Асьме ёросысь ик тросэз удмуртъёс городын кивалтон удысын тыршо, нимысьтыз Пурга землячество но кылдытыны луысал. Бадӟымез Катя апае судья луыса ужа. Сарапул город администрациын кивалтон удысын кема аръёс ӵоже тыршиз Яганысь ик воргорон Николай Андреевич Халявин.

- Мар сӥзьысалды удмурт калыклы?

- Нырысь ик - чидан. Асьме калык котьку но ужез яратӥз. Удмуртъёс пӧлын тросгес дышетскем адямиосмы мед луозы вылэм. Асьмелэн туж ӧжыт бадӟым кивалтӥсьёсмы. Сюлэмшугъяськытэ ужтэк кылем гурт калыклэн улонэз.

- Политикае пыриськыны мылкыдды ӧвӧл-а? Али ваньмыз, пӧрмыто-а, уг-а, депутат луыны туртто.

- От угось, ваньмызлэн отчы донгиськемез потэ. Нош мон маин калыклы юрттом? Мынам тракторе но, уксёе но ӧвӧл. Кыл вылын гинэ, олокыӵе но амалъёс утчаса, мынам уг поты адямиез алдаме. Сюрес но, тыл но лэсьтыны кулэ ук. Кӧня куронъёс отын!

- Улондэс воштоно луысалды ке…

- Ой, мон татчы сюлмыным бурмемын ини. Мукет интылы ведь нош ик дышыны кулэ. Нылпиосты но малы интыысьтызы вырӟытъянэз? Нош лётчик луон сярысь мылкыды али ке но сюлэмме бугыръя, инметӥ лобись самолётэз адӟыса, соку ик пичи дыры тодам лыктэ. Самолётлэн штурвал сьӧраз мон ачим пукисько кадь. Нош нэнэелэн монэ воксё но вӧзысьтыз лэземез уг поты вал. Школаез йылпумъямед бере трактористын ужад ке, пырак интыяз, пе, луысалыд, пие, шуылӥз. Угось тятя вазь кулӥз, мон соку кыкетӥ классэ гинэ ветлӥсько вал ай. Сузэр-апайёс бызьыса палэнэ кошкизы. Нош гуртын кӧня уж: пудо сюдоно, турнано, бакчаез октоно-калтоно, пу корано, ваёно – ваньзэ медъяса уд улы ук. Но мынам Инмарен гожтэм сюресэ мукет вылэм…

Источник:

Алексеев А. В. Интыяд пукид ке - гынмод / А. В. Алексеев ; записала Л. Тихонова // Удмурт дунне. - 2009. - 19 июня. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"