Редактирование: Абросимова Валентина Викторовна

== Зарни чорыг кулэ ӧвӧл! ==

[[Файл:Абросимова.jpg|thumb|left|Абросимова В.В.]]
Валентина Викторовна Абросимова Якшур-Бӧдья ёросысь Мукши школаысь покчи классъёсы ветлӥсьёсты визьнода. Урокъёслы конспектъёссэ тужгес умоен лыдъяз шаерамы потӥсь «Новое образование» журнал, та понна дипломен пусйиз. 

Вылӥ категориен дышетӥсь, Дышетон удысысь отличник…  Туэ солы нош ик шуизы: мае кизид, сое ик ара. Та нуналъёсы Валентина Викторовнаез сӥлы кариз Президент Александр Волков, Удмуртиысь дышетон удысысь дано ужась ним сётӥз. Нош Дышетонъя но наукая министерство ивортӥз «Дышетон» нацпроект чотын радъяськись конкурсын вормемез сярысь.

'''- Валентина Викторовна, кӧня аръёс ӵоже люкано луиды сомында вормонъёстэс?'''

- Арлыдме ватыса гинэ возьысал. Кытчы ке но ньыльдон-витьтон аресъёсы вискы кугӟамын кадь потӥсько. Пенсие потон дыры вуэмын. Но ужтэк пукон сярысь малпаме ик уг поты! Уг валаськы, кызьы мон книга уг усьты, киям ручка-тетрадь уг куты. Кызьы пель сьӧрам нылпи куараос уз чузъяське…

Ужан стаже куамын куать ар люкаськиз ни. Но котькуд 1-тӥ сентябрез пушкы тырыса кадь возьмасько. Гужем куспын нылпиос макем нуйтӥсько – тодманы луонтэм воштӥсько. Дышетӥсько покчи классъёсы ветлӥсьёсты, но бурдъяса лэзем нылъёсме но пиосме чакласа возисько. Кылем арын 11-тӥ классэз йылпумъязы дышетэм пиналъёсы. Туж возиськыны выри, синкылиосы медаз потэ шуыса. Асме ӧй вормы – пушкы сокем тыриз шумпотонэн. Тэтэ карыса лыктӥзы вал нырысетӥ классэ, табере учкелэ: йӧн-йӧнэсь! Классэн кивалтӥсьсы шуиз: дисциплиназы юн та пиналъёслэн. Нош мынам мукетсэ вераме потӥз. Ӵапак та нылпиосын туж курадӟи, шуисько, нырысетӥ классын дыръязы нунал но ӧз ортчылы, куспазы керетытэк-жугиськытэк.

Зэмен но, озьы вал. Нылпиос нуныямын, асьсэды олокин кожало. Котькудӥныз нимаз-нимаз вераськоно луылӥз. Одӥгзэ ӟыгыртӥ но шуисько: школаын анаед – мон. Асьмелэн татын лушкем вераськонъёсмы, секретъёсмы, луыны быгатозы. Марысь мар ке, мон тонэ ушъяны но, тышкаськыны но быгато. Укылтэмъяськемдэ шӧдӥ ке, шорад учко, ачид ваньзэ валалод. Озьы урокын маке йыртэманы кутске ке, шорам кырыжак учкылэ ни вал.

Огвакытэ нылпи садын заведующий вал. Воспитательмы нуны ваёно, куалекъяса лыктэ дорам. Одӥгез пияш солэсь шубазэ выж вылэ куштэм но вылаз вожомыса тэтча, пе. Таиныз но пиналэн ӟыгыртӥськыса вераськоно луиз. Син шорад пукты ай, шуисько, анаедлэсь шубазэ озьы лёгало. Мамаедлы вӧсь уз луы-а? Луоз. Воспитательлы но озьы ик вӧсь.

Дышетӥсь вань нылпиосты аслэсьтызъёссэ кадь яратыны кулэ. Соосын нырысь ик вераськыны, огкыл шедьтыны мед быгатоз. Нылпиос шоры куараме будэтыны уг яратӥськы. Аслам нылъёсы шуыло: мама, тынад лекен ваземед луэ-а? Маке умойтэм лэсьтӥськом ке, кырыжак учкемедъя, пе, валаськом мылкыддэ.

'''- Но школаын котьма луэ, «2»-ёс но пуктылоно.'''

- Ту-уж уг яратӥськы быжо отметкаосты. Тетрадьын янгышъёс трос ке, ӵемысь «смотрено» гинэ пуктӥсько. Но пиналъёс шуо: «смотрено» – со «2». Валэктоно луэ: янгышъёс трос, но тӥ соосты тупатъяны быгатӥськоды на. Но урод отметка пуктылоно луэ, тыршемзы ке уг поты. Одӥгез пияшмы анаезлы шуэ, пе: гуртэ ужме лэсьтоно, ато Валентина Викторовна нош ик ӝыны тетрадь быдӟа «2» суредалоз…

'''- Тӥ пичиысен ик дышетӥсь луон сярысь малпалляды, дыр.'''

- Вордски Эгра ёросысь Гыбдам Шорни гуртын. Семьяямы вить пинал вал, мон – кыкетӥез. Анаймы быдэс улонзэ фермаын ужаз: кунян, парсь сюдӥз, скал кыскиз. Дояркаос черодэн уйлы возьмаськисе но кыльыло вылэм. Ӵапак тупам: мон вордскыны дасяськисько – анае уж дурын. Отысь сое доре келяллям ни, гогыяны но, пе, кыедэсь лопата сяна, номыр ӧвӧл. Гуртысь акушерка дорамы пырем – мон вордскемын ни.

Атаймы тракторист вал. Ой, яратылӥ вӧзаз ворттылыны! Гырыны-кизьыны сьӧраз туж ӵем куриськылӥ. Трактор гыре – музъем курень-пурысь кисьтаське. Макем чебер! Куатетӥ классын сочинение гожтӥ, будӥ ке, тракторист одно луо шуыса.

Туж умой тодӥсько, ку кылдӥз Чайковский город – 1962-тӥ арын. Мон покчи классъёсы ветлыку, дышетӥсьмы кошкиз. Картсэ выль пуксись городэ ужаны келяллям, таиз – сьӧраз. Озьы Евдокия Терентьевна Воронцова кык классэз – нырысетӥ но куинетӥ – огназ нуоно луиз. Нылпиос трос вал, капчи ӧз йӧтылы солы. Милемыз, 3-тӥ классэ ветлӥсьёсты, покчиослы юрттӥськыны курылӥз. Со шоры учкыса, дышетӥсь луон мылкыды пуромыны ӧдъяз. Школаме йылпумъяме бере, солань-талань кыстаськытэк, вамыштӥ Дэбесысь педучилищее.

Куд-огезлэн верамез потэ, та училище ляб дышетӥсьёсты поттэ шуыса. Таӵе дыръя туж воже потэ. Кыӵе специалист луоз – адями бордысь потэ. Училищеын туж золэсь дышетӥсьёсмы вал. Серафима Никитична Загребина, математикаен визьнодась, мыным котьку шуылӥз: эн возьма эшъёстэ, задачаосты лэсьтыса, азьлань мын, но пал пельыныд кылзы милемыз но – кин ке могӟиз ке, тонэ юало. Куинетӥ курсын вал ни, дышетӥсе куриз худграфе нырысетӥ курсэ лыктэм пиослы юрттӥськыны. Выль темаосты соослы валэктылӥ, контрольнойёслы дасялляй. Али но задача уг лэсьяськы ке, кӧты сюмам кадь луисько.

Историен дышетӥсьмы, Тамара Степановна Широбокова, монэ историклы дася вал: докладъёс гожъятъяз, эшъёсы азьын лекциос лыдӟытъяз. Мон понна та зол урок луиз – калык азьын вераськыны егитысен дышетски. Ма, химиен дышетӥсьмы, Анфиса Константиновна Мальгинова, мон химик луо шуыса, малпа вал. Туж трос тодон-валанзэ, быгатонлыксэ сётӥз технологиен дышетӥсь Владимир Яковлевич Корепанов. Киужлы солэсь дышетски, ачим но технологиен урокъёсты школаын нуи. Пиналъёсын али но куроен но, сулэн но ужаськом. Туж яратӥсько керттӥськыны. Мынам сыӵе сямы вань на: ачим марлы ке дышисько ке, мукетъёссэ но солы визьнодано. Али выль манеръя тапочки керттыны йӧндыри. Арня пала пуки – пӧрмытӥ. Табере школаысь дышетӥсьёсмылы но возьматӥ ни. Куд-огез, керттӥськон веньзэс кутыса, дорам ветлӥзы ни.
'''
- Валентина Викторовна, дышетӥсьёсты шӧдо вылэм, тӥлесьтыд пӧртэм предметъёсъя ӟеч визьнодась пӧрмоз шуыса. Но тӥ малы ке бырйиллямды покчи классъёсты.'''

- Дэбес педучилище бере ик школаын ужано кариськи. Толэзь пала ужаса вуттӥ Сарапулысь одӥгаз школаын. Отын куинетӥ классэз оскизы вал. Но семья кылдытоно кариськемысьтым, кошки Шаркан ёросысь Суронэ. Картэ отысь. Та гуртысь школаын инты ӧй вал ни, ыстӥзы артысь Петыргуртэ. Нош ик покчи классъёсын дышетӥсь луи.

Но бадӟым классъёсын но ӧжыт ӧй ужа. Педучилищеез йылпумъян аре ик пыроно кариськи Удмурт кун университетэ. Кин тодэ, оло, химиен дышетӥсь луысал, но та факультетлэн заочной отделениез ӧй вал. Нош мынам ужаса дышетскеме потӥз ни. Соин ик бырйи математикаез. Экзаменъёс сётыса но курадӟонэз ӧй вал, дипломе горд вал бере, собеседованиез гинэ ортчи.

Петыргуртын ужакум ни, Суронын математикаен дышетӥсь кулэ луиз но – отчы мынӥ. Пиналъёсы пичиесь дыръя продлённой группаосты но нуи, вожатойын но ужалляй. Суронын директормы ас интыяз одӥг пол гинэ ӧз кельтылы. Школалэн музъемез 1 гектар вал – нылпиосын сое утялтыса возьылӥм. Производственной бригадаен 7 гектар вылын йыр быдӟа сяртчы будэтылӥм. Соин йырин отпускъёсты адӟоно ӧй вал. Со понна ужмес районын котьку но ӟечен пусйылӥзы.

Али но ганяк кариськыны возьыт кадь. Куд-огезлэн верамез потэ: гуртын дышетӥсьёслы пудо вордыны уг яра! Урокъёслы дасяськоз-а, скал кыскоз-а, пе. Но скал кыскыку, йыр сай-сай луэ. Таӵе дыръя ортчем нуналэдлы йылпумъянъёс лэсьтыны, ӵуказе нунал сярысь малпаськыны туж умой. Пудо утялтыкум но, йырам бергатӥсько: конкурс дасяно, таизлы пиналлы визитка лэсьтыны юрттоно… Ужъёс ӧжыт шат? Шутэтскон нуналъёсты но аслыд гинэ сӥзем нокызьы уг луы. Картэ пайме мыным: дорез, пе, я мастерской, я клуб кариськод. Тросэз анай-атайёс ну-назе вакыт ужало уга, школае лыктыны дырзы ӧвӧл. Нош классын радъяськись пӧртэм ужрадъёсы соосты но кыскиськом. Озьы соослы дасяськоно ке – ӝыт дорам ӧтисько. Нырысь аръёсаз та пумысен картэным куспамы валамтэос но кылдылӥзы. Али шорам киыныз шонтӥз ни кадь. Валаз ук: мынам сюлмы куре озьы улыны.

'''- Ӧжытак валантэм: кызьы Суронысь Мукшие вуиды?'''

- Суронын школа быроз, шуизы, коркамы вужгес вал ини. Анаелэн выныз Мукшиын улэ вал. Доразы куное ветлӥм – гуртсы яраз. Колхозын специалистъёслы улон инты но сёто. Озьы мон школае, уж юаса, ӧй ик пыра, колхозлэн нылпи садэныз кивалтӥсь кариськи. Ноку садикын ужаме ӧй вал ке но, дэмлазы но, мон басьтӥськи. Но туж бадӟым опыт люкай – вылӥ кивалтӥсьёс дӥне куалекъятэк пыраны кутски. Удмурт кылэз ӝутон-азинтон борды зол-зол басьтӥським. Удмуртлыклы сӥзем туж трос ужрадъёс ортчытъям. Соку ик тодматски тросэныз удмурт азьветлӥсьёсын, пыриськи удмуртъёслэн съездазы, трос ветлӥ семинаръёстӥ-конференциостӥ.

Нылпи садэн кивалтыны басьтӥськыкум, мыным 32 арес вал. Отын 6 группа ужаз,  коллективын ог 30 мурт. Сизьым ар ужай та удысын, собере школае ӧтизы но, сюлмы отчы кыскиз.

'''- Ӧд-а кышкалэ егитысен басьтыны кивалтон серметэз?'''

- Выль ужъёс борды басьтӥськыкум, малы ке но ноку кышканэ уг кылды. Со ужлы тунсыке гинэ пуроме. Малпасько, выль удыс ӵекто ке, солэсь ноку кышкано  ӧвӧл. Адями озьы кыда гинэ. Собере, мынам котьку но возьматэме потылӥз: удмурт кышноос лябесь, нодтэмесь ӧвӧл. Со сяна, удмуртъёс кык кылын шалтыр верасько – иське, соос вылӥынгес но ай.

Вордскем гуртэ ӟучо-удмурто. Бускель кышномуртмы – ӟуч. Дӥнямы ӵем пыралляз. Песянаенымы вераськыса пуко вал. Мон одӥгезлэн ымаз учкисько, мукетыз шоры долкасько – одӥгез удмуртъёсты серем каре, мукетыз соин соглаш луэ. Бабуше ӟуч гуртэ бызьылэмын вал, со гольык йыр, гольык пыд ветлылӥз – удмуртъёс сыӵеесь ӧй вал, ӝикыт возиськизы.

Школаямы удмурт кылъя урокъёс ӧз нуиське – соин ик анай кылэз мон дышетымтэ. Озьы ке но асьме котьку удмурт шуылӥ. Улонам тросэз вормонъёсы но герӟаськемын, малпасько, удмуртъёсты возьматон мылкыдыным.

'''- Кудӥз вормонды тужгес но секытэн сётӥськиз?'''

- Дэбес педучилищее пырыкум, удмурт сямен но вольыт уг вераськиськы вал, ӟуч сямен но уг пӧрмытӥськы. Ударениос интыяз уг пуксё, кылпумъёс сиисько. Мынэ математикая урок. Мон доска дорын задача лэсьтӥсько. Капчиен пӧрмытӥ. Дышетӥсе очкизэ ныр вылысьтыз ӝутӥз но шуиз: Гаврилова (ныл фамилиея), задачку очень хорошо решила, но только никаких лошадей я тут не видела. Плошадей, шуисько пумитаз. Площадь кылэз озьы вераны уг пӧрмытӥськы вал. Соку мыным сыӵе возьыт луиз, йыры берга, тани-тани пыд улысьтым выж кошкоз кадь. Али но гордэктэмме уг вунэтӥськы. Озьы туж секытэн сётӥськиз мон понна кылъёсты шонер, калык радъя вераны дышетскон.

'''- Валентина Викторовна, али покчи классъёсты визьнодасьёсты воштӥськонъёс витё. Озьыен, нош ик соосты вормон понна нюръяськоно луоды?'''

- Лачак семинаръёсы, курсъёсы ветлӥм ни – соосты кылем толалтэ ик ортчытъяны кутскизы. Табере, пе, пиналэз сыӵе югдуре пуктоно, тодон-валан басьтон понна со ачиз но мед малпаськоз. Но со выль куронъёсъя ми кемалась ужаськом ни, дыр куре выльдӥськемез. Куд-ог урокъёсме нырысь ик эскерисько картэ вылын. Ортчиськом А. Пушкинлэсь зарни чорыг сярысь выжыкылзэ. Песятай лэзе зарни чорыгез, бертэ, нош пересь кышноез сое сизьдыны кутске, тусьмы но пилиськемын ни, пе – текстэз татчыозь лыдӟисько. Володяелы шуисько, та пичи люкетысь шедьты кӧня ке проблемазэ. Со шоналтӥське гинэ: пиналъёс тодозы ай.  Нош нылпиос мар но уг верало: песянай – лек, пересьёс огназы гинэ уло,  нылпиоссы луысалзы ке, сыӵе сюлмаськонъёссы ӧй кылдысалзы. Мар кароно югдурез тупатон понна? Куашкам корказэс кесяно, плот лэсьтоно но шур кузя калык пӧлы потоно. Нош отын, оло, пенсия но басьтыны кутскозы, соос ведь 33 ар ужамын… Визьмо верасько ук! Нош выжыкылэз быдэсак лыдӟеммы бере тодӥськоды-а, кыӵе йылпумъян лэсьтӥзы пиналъёс? Ваньмыз понна, пе, янгыш песятай, со отрицательной герой луиз милям. Малы? Ӧжытак ке но воргорон шӧмъем, пе, мед луоз. Малы сое кышноез зӥбыса возе, ачиз со кузё луыны кулэ!

'''- Иське, семьяяды кузё – кузпалды?'''

- Котькыӵе ужъёс борды ачим ик чырмытгес басьтӥськисько кадь. Но одӥг ужпумез но огнам уг кутӥськы. Володялэсь мылкыдзэ одно юасько. Калыкын юнме верамын ӧвӧл: воргорон – йыр, нылкышно – чырты. Воргоронлы ас малпанъёстэ, каньылак, кужмысь карытэк, ӵектоно. Дышетӥсь, кузпал, анай – ваньмыз та пушкам, вирам сураськемын кадь. Нимаз-нимаз та валатонъёсты ӧй люкысал. Котькуд нырысетӥ сентябре выль дӥсен пӧрмыны турттӥсько. Дышетӥсьлы син шоры йӧтымон луоно – со шоры учке калык, со кадь луэмзы потэ нылпиослэн.

'''Источник:'''

[Беляева, Нина Григорьевна. Гуртлэн режиссёрез : [беседа с главой миниципального образования "Быгинское" Шарканского района о работе с населением, о проблемах и заботах сельчан, о жизненном пути, о семье] / Н. Г. Беляева ; записала Л. Малых // Удмурт дунне. - 2013. - 3 мая.- С. 10, 15 : фот. - (Тӧр шорын).].

'''За предоставление материала выражаем огромную благодарность редакции газеты
[http://www.udmdunne.ru/ "Удмурт дунне"]'''

[[Категория:Удмуртские звезды]]