Шибанов Виктор Леонидович

Материал из Воршуда
Перейти к навигацииПерейти к поиску

Керемет но сётэ берекет[править]

В. Л. Шибанов


Туннэ героймы - Виктор Леонидович Шибанов - Удмурт университетысь тодосчи, кылбурчи. Эскере удмурт но ӟуч литератураез. Ужъёсыз асьме шаерын сяна, тодмо Россиын, Эстониын, Финляндиын, Америкаын.


Мыным шуд усиз Виктор Леонидович дорын дышетскыны, солы диплом уж гожъяны. Студентъёс сое ӟуч литератураез ӟеч тодэмез понна гинэ уг, кыӵе ке но аспӧртэмлыко луэмез понна гажало: со ноку но уг кышкаты, уг ултӥя, уг косы. Со туж огшоры но синмаськымон маде ХХ даурысь литературалэн ӧръёсыз сярысь.

Данъяське удмурт литератураен но. Сое эскеронлы сӥзе статьяоссэ, книгаоссэ. Туннэ нуналлы Виктор Леонидовичлэн укмыстонлэсь ятыр статьяез но вить книгаез потэмын. (Куинез - аслаз кылбуръёсыныз.) Ӝоген потыны кулэ эшшо кык книгаез: “Удмурт литература” антология но “Кытысь пушъе кылбур” эскерон книга.

Вордӥськемын Виктор Леонидович Глаз ёросысь Котгуртын. Школазэ йылпумъямез бере дышетскемын Удмурт университетын (Ленинской стипендиат) но Ленинградысь университетын.

Студентъёс Виктор Шибановез нырысь ик дышетӥсен лыдъяло, кылбурен тунсыкъяськисьёс - кылбурчиен, гожъяськисьёс - критикен, асэныз тунсыкъяськисьёс - философен но тунсыко эшен. Тӥни сыӵе турлы адями. Тодматском-а?

- Виктор Леонидович, туннэ вераськонмес сётӥськом “Удмурт кизилиос” рубрика улын...

- Валасько юандэс. Мон дан сьӧры уг уиськиськы. Аслэсьтым нимме ачим пӧсяса-тыршыса лэсьтӥсько. Но сое тросэз уг валало. Висъяськись муртъёсты (кизилиосты-а) удмуртъёс уг ярато уго, вожъясько, йыркуръясько.

Нош пичи дыръям мынам туж потылӥз кизили луэме. Ма, 11-12 арескам со “кизили висёнэн” виси но, соин, дыр, али та висён мыным кышкыт ӧвӧл ни.

- Мар вал соку?

- Великен ворттылыкум пыдме чигтыса, туж кема больницаын кылли. Тӥни соку мар карыны паймемысьтым суредаськыны, кылбур гожъяны кутски. Нош бурмеме бере Глазовысь юнкоръёслэн слётазы мон Владимир Романовлы тетрадьме мычи. Отын вал кык сю пала кылбур, дас поэма но выжыкыл. Со бере кылбуръёсы “Дась лу!”-ын но “Молот” журналын потаны кутскизы. Ачиз Флор Васильев мыным гожтэтъёс ысъялляз, ушъялляз. Мон соку туж шудо вал! Вылаз ик газетъёсысь гонорар басьялляй, ачим выль велосипед басьтыны быгатӥ. Озьы, 7-тӥ классын дышетскыкум, мон тодӥсько ни вал, поэт луо шуыса.

- Сыӵе йӧспӧртэм пиналъёсты гуртын уг ярато кадь...

- Ма, мон номырин но сокем ӧй висъяськылы, гурт котырысь ужез агайёсыным ӵош быдэсъяй. Быгатӥсько турнаны но, пу но пильылыны.

- Со гинэ ӧвӧл, армие но ветлӥды, озьы-а?

- Бен. Шеди мон отчы, Ленинградын аспирантураын дышетскыкум. Военкоматын алдазы, ракетной часте басьтом, компьютерен ужаны дышод шуыса. Мон оски ни вал, туж дыраз “буйгатӥз” Сергей Флорович Васильев. Эн оскы, пе, аспирантъёслы одӥг сюрес - стройбатэ. Озьы ик луиз. Ар но ӝыны мон Уфа котырын горд сюез гудӥ, нош ӝытъёссэ комсорглэсь ужзэ быдэсъяй, газет поттылӥ. Кивалтӥсьёс монэ ӧз яратэ (огаз кенешын юаны шедьтӥ уга, малы коньдон кык ведомостья сётъяло шуыса). Со понна монэ “гажаллязы” (вӧсь ӧз карылэ) “зэкъёс”, соос ротаямы ӧжыт ӧй вал. Армиез улонлэн школаез шуо ке но, малпасько, аспирантлэн интыез институтын ик. Но али мон номыр сярысь уг жаляськы, чидамон вал, шуом. Армиын дыръям ик потӥз кылбур книгае.

- Ма, соку тӥ туж егит вал, дыр, ук ай?

- Егит, таиз книгае кыкетӥез ни луиз. Нырысетӥез потӥз кызь арескам (рукописе дась вал, нырысетӥ курсын дышетскыкум ик). Книгае понна мон 500 (!) манет гонорар басьтӥ. Со вакытэ бадӟым коньдон.

- Зол. Эшъёсты вожъяськизы, дыр. Тӥледлы, вождэс эн вае, ноку но кушем ним ӧз сётъялэ-а?

- Сётъязы. Кушем ним сётонлы паймонэз ӧвӧл. Со быдэс теория. Сыӵе ним сётыло мукетъёслэсь маин ке висъяськись муртлы, берен “уллёе” берыктон вылысь: вылэ тубисьсэ уськытоно, улысьсэ - ӝутоно.

- Ми но дышетскыкумы тӥледлы ним сётъям. Но гажаса, аспӧртэмлыктэс пусйыса, В.Шукшинлэн героезъя “Чудик” шуылӥм. Асьтэос уд шӧдӥське-а студентъёс тӥледды золгес гажало, нош предметтэс ӟечгес валало шуыса? Малы шуом, экзаменъёсады “уг лушкасько”?

- Хм, тунсыко. Нош малы “уг лушкасько”? Кулэез ӧвӧл. Адями текстэз лыдӟемын ке, мар солы сюлмаськонэз? Нош ӧвӧл ке, котькӧня мед лушкаськоз, мон шӧдо. Собере, филфакын дышетскыса, литератураез лыдӟытэк возьыт луыны кулэ.

- Малы ке мыным потэ, литературалы мода ортче шуыса. Азьвыл тани поэтъёс кыӵе ке аспӧртэм “экстрасенъёслы “ пӧрмылӥзы - калык соос пала кыстӥськылӥз, выль кылбуръёсын тунсыкъяськылӥз.

- Кызьы шуод ай. Литература матысь дыре уз быры, угось солэн шорсюлмыз - кыл. Кылэз номырин но уд вошты! Зэм, со луоз мукетгес.

- Тӥ ӵем кунгож сьӧры потаськоды, палэнысен астэ дунъяны умойгес, дыр. Вань-а интыез удмурт литературалэн огъя дунне литератураын?

- Мон шумпотӥсько: огаз конгрессын финнъёсты но американецъёсты оскытыны быгатӥ, туала удмурт литература огъя дунне ӧрлэсь улӥын ӧвӧл шуыса. Со туж секыт уж. Но со понна США-ын семиотикъёслэн огаз антологиязы англи кылын удмурт этнофутуризм сярысь статьяе печатласькиз.

Мар со этнофутуризм? Со кык бурдъем тылобурдо выллем. Нырысетӥ бурдэз вашкала фольклор ке, кыкетӥез - туала модернизм но постмодернизм; озьы ик толон но ӵуказе, гурт но город... Этнофутуристъёс туала дуннеез йырин-чукин кымаськем мае ке кадь возьмато (абсурд).

Кыкетӥ тодметэз - интертекст - пӧртэм-пӧртэм гожъямъёсты яке пӧртэм-пӧртэм муртъёслэсь верамъёссэс аспӧртэмлыко огазеяса сётон. Кылсярысь, кыӵе ке чеберлыко произведениын табере артэ сылыны быгатозы олокыӵе но формулаос, таблицаос, пӧртэм философъёслэн гожъямъёссы, уката ик “туалаосызлэн” (Фрейд, Ницше, Юнг, Фромм но мукет). Герой огвакытэ ик оскыны быгатоз Христослы но, Буддалы но, нош ас пушказ язычник луэменыз данъяськоз.

Куинетӥез тодмет - текстъёсысь геройлэн но аслаз текстэз кылдытӥсьлэн йӧспортэм, мудрон луэмзы.

- Кыӵе удмурт этнофутуристъёслэн нимъёссы шедизы со статьяе? Шумпотӥзы-а удмурт писательёс таӵе иворез тодэмзы бере?

- Туала авторъёс пӧлысь висъяй Н. Самсоновез, Л. Нянькинаез, О. Четкарёвез, С. Матвеевез, А. Кузнецоваез, М. Федотовез, Э. Батуевез, Р. Миннекузинэз, В. Ар-Сергиез. Шумпотӥзы кадь, но сур ӧз пуктэ.

- Сур сярысь кылпум потӥз бере, таӵе юан. Тросэз таланто адямиос юон пӧлы выё, адямиослэн валамтэзы вылэ чӧлско. Тӥледды нокинлэн но, нокытысь но юэмен адӟылэмез ӧвӧл. Ӧз сӧры общагаын кема дыр ӵоже улон но?

- Ӵапак общага ик возиз, дыр. Мон 19 ар ӵоже ялан студентъёс пӧлын улӥ. Чик веръятэк улыны уг луы, конечно. Но адями эсэпсэ валаса юыны кулэ.

- Сергей Васильевен ӵош гожтэм “Зэрпаллэн вужераз” книгаяды нимысьтыз глава сӥземын асьсэды быдтӥсьёслы...

- Ваньмыз кутскиз удмурт литератураез эскерон бордысен. Но малпаськон ӧрмы пыдлогес пыремен, мукет удысъёсы но выжоно луим (социологие, психологие, философие). Та уж сярысь умой вера Германиысь Смирнов профессор “Человек человеку - философ” книгаяз.

Вакчияк ке, малы бен удмуртъёс асьсэды асьсэос быдто? Шӧдӥське Удмуртилэн интыяськемез но, калык сямъёслэн цивилизацилы пумитъяськемез но, постколониализм югдур но, ментальностьмылэн мифъёслы матын луэмез но.

- Ма тӥ одӥг пельпум вылады куинь-ньыль воз нуиськоды кадь.

- Сизьым: университетын доцент но деканлэн наука ласянь юрттӥсез луыса ужасько; 6-тӥ но 9-тӥ классъёслы дышетскон книгаос, Финляндиысь проектъя удмурт литературая антология дасясько; вуоно финн-угор конгресслы дасяськисько; “Дунне кизилиос” радиоверанъёс лэсьтӥсько (туннэлы 95 передача ни), студентъёслэн диплом уженызы кивалтӥсько, кылбур гожъясько...

Мон юромо тыршисько огдыре кӧня ке ужен вырыны (сыӵе амалэз “теория осьминога” шуо). Туннэ маи ке уг пӧрмы яке вожъяськись муртъёс “пыдзэс пукто” ке, мон мукетыз уже борды басьтӥськисько.

- Нормальной адями сомында ужаны уз чида. Тӥледлы шайтан юрттэ, дыр?

- Ноку возьмамтэ юан! Но тӧлтэк писпу уг выры шуэм музэн, верамад зэмез вань, дыр.

Зэмзэ но, 38 аресозь огъяулонниын чидаса улыкум, мыным тросгес кужым сётылӥз шайтан-керемет. Инмар озьы ӧй курадӟытысал ук. Укмыстонэтӥ аръёсы мон кылбуръёсам гожъяй вал

...Соин ик котьку Инмарен артэ

Мед Керемет сылоз. Мынам соин

Куддыр сюлмысь вераськеме потэ.

...Со ватсасал: “Куштӥз бере Инмар,

Мынам но юрттэме тыныд уг лу.

Герӟаськемын ми - мур выжы но куар,

Нош огазьын кылдытӥськом писпу.

(“Пож ву” сузьетысь)

Валаськод-а, Ижын сыӵе кужым борды ӧд кыстӥськы ке, адями радэ уд пот. Ижевск - постколониализмлэн шорсюлмыз. Таӵе югдурын инмарлэн гожтэм куронъёсыз - удмуртъёсты берлань колониализме кыскись кужым. (Лыдӟе “Ижын улӟе шайтан выжы гинэ” кылбурме.)

- Но инмарды но копак ӧз кушты кадь...

- Квартира басьтэмме вераськод, дыр? Ой, тодэ вал, макем дуно усиз мыным со пичи сэрег. Общагаын улыны мон нокызьы ӧй быгаты ни, нош квартира сётыны ӧз ик малпаськылэ. Мылкыдме шӧдыса, юрттыны выриз висись анае. Со, ӝоген улонысь кошконзэ шӧдыса (ракен курадӟиз) мыным кыӵе ке амалъёс утчаны косӥз, университетысь кошкыны ӵектӥз.

Мон озьы ик кари. Но аслыд “дун пуктон” номыр ӧз вайы. Укмыс толэзь чидай кивалтӥсьёслэн валамтэенызы нюръяськыны. Ӧй чидасал, ӵош ужась эшъёсы ӧй юрттысалзы ке. Тау А. С. Зуевалы (кафедраелэн кивалтӥсезлы) но А. В. Ишмуратовлы. Соос асьсэлэсь кылзэс веразы, дурбасьтӥзы. Лулсэр быдтэм вӧзы мон быдэс ар ужам коньдонме понӥ на, озьы гинэ ордер басьтӥ. Зэм, квартиралы документъёсы али но ӧвӧл на.

- Ну, табере тӥ узыр адями. Кышнояськыны но луоно ни, дыр.

- Анаелэн кулэмез дырысен ар уй ортчиз ке, одно ик вераськом. Зэм, кылбуръёсыя тодӥськод, дыр, яратонэн мыным ноку ӧз удалтылы. Нош яратонтэк, тонэ валаны быгатӥсьтэк... Малы кулэ сыӵе семья?

- Малы ке но тӥляд туж начар фотоальбомды.

- Уг яратӥськы фотое пуксьыны. Маин сое валэктоно, уг тодӥськы.

- Мар сярысь ӧй юа на?

- Шахматэн тунсыкъяськемме, тани али вузъёс куспын турнире пыриськисько. Яратоно сиён-юонъёсме...

- О-о, ма, тӥ зэмзэ но огшоры! - Бен, Туж яратӥсько жарить карем картошез но пельнянез, ошмес вуэз но югыт сурез.

Источник:

Шибанов В. Л. Керемет но сётэ берекет / В. Л. Шибанов ; записала Зинаида Рябинина // Удмурт дунне. - 2001. - 2 февр. - С. 6, 11. - (Удмурт кизилиос).

'За предоставление материала выражаем огромную благодарность редакции газеты "Удмурт дунне"'