Чушъялов Павел Васильевич

Материал из Воршуда
Перейти к навигацииПерейти к поиску

Мон гуртын улӥсько[править]

3-221x300.jpg

Павел Чушъялов Пичи Пурга ёросысь Яган-Докья черкогуртын вордскемын. Отын ик со улэ. Павел Васильевич республикаын тодмо ужбергатӥсь. «Радуга» огазеяськонэн кивалтэ, ньыль созыв ӵоже ини ёрос Кенешлэн депутатэз вал. Нош 14-тӥ октябре ортчем Кун Кенеш быръёнъёсын со коммунистъёслэн списоксыя депутатэ потӥз.

- Павел Васильевич, депутатэ потон понна кужымдэс зол быдтоно луиды, дыр?

— Кужым котькыӵе нюръяськонын быре. Со понна ик кужымдэ эскериськод ук. Нош мылкыд сярысь вазь на вераськыны. Мыным туж секыт но бадӟым ныпъетэз вормыны но нуыны кулэ луоз.

- Таин сэрен азьланезлы малпанъёсты бадӟымесь луизы, дыр?

— Мыным одӥг юан маза уг сёты: малы бюджет уксёез одӥг кадь уг люко? Ӵемысь со райцентре гинэ кыле. Гуртъёсын улӥсьёслэсь лыдзэс чакласа, люкылоно сое. Та пумысен ёрос депутатъёслэн сессиосазы но ченгешонъёс ӵемысь гинэ потало. Мон ёросэн кивалтӥсь луысал ке, аслам гуртэлы гинэ шат со уксёез висъясал?

Соиз но шугъяськытэ: Кун Думаысь депутатъёс законъёс куто, нош соос уг быдэсъясько. Кылсярысь, 131-тӥ закон. Соя чакламын гуртысь муниципал кылдытэтъёслэн бюджетазы коньдон висъяны. Нош со уксё ӵем дыръя уг вуы. Соин ик гуртын улӥсьёслэн азинсконъёссы уг шӧдӥсько. Кун Кенешын бюджетъя комиссиын ужасал, но кызьы пӧрмоз ини.

- Удыстэс умой бергатӥськоды. Анайдылэн-а, атайдылэн-а сыӵе быгатонлыкъёссы вылӥллям? Гуртэ улыны кылиды шуыса, уд жаляське-а?

— Монэ ноку но городэ ӧз кыскылы. Гурт улон мусо потэ. Сьӧрло кошкон сярысь ӧй ик малпалля. Школаын умой дышетски. Гуртэ улыны кылёнлы сӥзем ӟуч кылын сочинениосы али ке но школаын возисько на, шуо дышетӥсьёс. Атае Василий Матвеевич «10 лет УАССР» нимо совхозын тракторист луыса тыршиз, мамае Ираида Васильевна нянь пыжиз. Калыклэсь номырин ӧз висъяське — кыштыр улӥзы. Асьме гуртысь ик шор ёзо школаез йылпумъяй. Совхоз дэмламъя, солэн стипендиатэз луыса тодон-валан басьтӥ Ижысь механикая институтын. Бырйи инженерно-строительной факультетэз. Дышетсконме йылпумъяса, доре бертӥ, ужаны совхозэ интыяськи. Прораблэсь ужзэ быдэсъяй. Со вакытэ лэсьтӥськон материал ласянь туж секыт вал. Котьма ке но совхозмы республикаын валтӥсь интыосын ветлӥз. Озьы ке но вить ар тыршыса, ӵапак Москваын путч ортчон нуналэ — 19-тӥ августэ — мон совхозысь кошконо кариськи.

- Кужымдэс шӧдӥды, луоз?

— Кык-куинь толэзь ужтэк пуки. Улэмъям мар ке но выльзэ, аслэсьтымзэ утчаме потӥз. Улонэ сюбеггес кадь луыны кутскиз. Вить ар ужатозям, сберкнижкаям кӧня ке уксё люкаськиз. 5-6 пиосты, оскымон ӵыжы-выжыосме но эшъёсме дорам ӧтьыса, бригада кылдытӥ. Лэсьтӥськон уж борды басьтӥським. Асьме гуртын сяна, бускель гуртъёсын но объектъёс ӝутылӥмы. Та гинэ ӧжыт потӥз. Кухняе мебель лэсьтыны кутскимы. Соку магазинъёсын номыр ӧй вал, вузмес умой басьтылӥзы. Собере дорамы олокытысь но заказчикъёс вуылыны кутскизы. Отӥяз Сарапулысь кондитерской фабрикалы ящикъёс шуккылыны шӧтамы. Лэсьтэм арбериосмы интые соос милемлы сиён-юон сётъяллязы. Со вузэз интыян понна гуртамы пичи магазин ӝутӥмы. Сиён-юон вӧзы Нижний Новгородысь но Казаньысь магнитофонъёс, холодильникъёс, телевизоръёс ворттылӥм. Мыным удалтӥз: 1990-тӥ аръёсы кооператив усьтыны луонлыкъёс кылдӥзы. Малпай: кужымез эскероно. Мылкыд ӝутскемын. 1991-тӥ арын «Радуга» предприятиме усьтӥ. Соку пыд пуктылӥсьёс ӧй вал на — налоговой инспекция ӧз иса. 1993-тӥ арын ини пачкатъяны кутскизы. Но мон понна со кышкыт ӧй вал ни — пыд йылам ӝутӥськыса вуттӥ.

- Ужды паськытамъя шорады кырыж учкисьёс вал, дыр?

— Со нырысетӥ аръёсаз ик шӧдӥськиз. 5-6 арзэ пырак синъёсам ик вераллязы, мышкам вераськыса ветлӥсьёс сярысь поттылонэз ӧвӧл ни. Чидай. Со секытэз потыса, шӧдӥ: сыӵе учыръёс адямиез юнмато.

- Калыклэсь йыркурзэ маин буйгатӥды?

— Пичи дырысеным спортэз гажасько вал бере, гуртысьтымы нылпиослы хоккеен шудон площадка лэсьтӥмы. Покчиос отчы шумпотыса кыстӥськизы. 1998-тӥ арын ульчаосысьтымы сюресъёсты тупатъян борды басьтӥськи. Калык ӝог шӧдӥз ӟеч лэсьтэмме — монэ валаны кутскиз.

- Аръёс ортчемъя ёросысь тросаз гуртъёсын магазинъёс усьтӥды. Алигес тани Кечол каргуртын вуз каронъя центр кылдӥз.

— Туннэ ваньмаз сямен муниципал кылдытэтъёсын даслэсь трос магазинъёсы ужало ини. Пичи Пурга черкогуртэ гинэ секыт вал шедьыны: инты уг сёто. Ярам коть, бусые инты висъязы. Табере отын быдэс микрорайон ини.

Алигес Кечолын кык этажъем вуз каронъя центр ӝутӥмы. Калык отчы шумпотыса лыктэ. Со угось Ижысь Киясае мынӥсь сюрес вылын сылэ. Нырысетӥ этажаз кафе но магазин. Адямиос отын сюанъёссэс, юбилейёссэс ортчытъяло. Кыкетӥ этажын пинь эмъян кабинет, парикмахерской но магазинъёс ужало. Адямилы мар кулэ, ваньзэ одӥг интыысь шедьтыны быгатэ.

- Магазин усьтон понна гурт администрациен одӥг кыл шедьтоно, дыр?

— Ми соосын котькыӵе ужез ӵошен, валче кенешыса лэсьтӥськомы. Гуртысь кивалтӥсьёс куронъёс пукто, ми соосты быгатэммыя быдэсъяськом.

- Сомында магазин возьыны капчи ӧвӧл, дыр? Ужасьёсты кӧня?

— Секыт, конешно. Ваньмыз понна сюлмаськоно, сояз но, таяз но вутскыны тыршоно. Куддыръя малпаськыса умме ик усьыны уг луы. Но таӵе удысэз бырйи бере, аслым ачим чида шуисько. Ваньмыз-ӧвӧлэз 150 ужасьмы. Райцентрын соос вошъяськогес ик, нош гуртъёсын уж ӧвӧл ук, адямиос одӥг интыязыгес ужало.

Мон одӥг пол финъёслэсь юай: вань-а тӥляд колхозъёсты но совхозъёсты? Соос шуо: кемалась, пе, милям соос быремын ини. Калыксы ваньмыз сямен городэ улыны интыяськемын. Нош кытысь сиён-юон кариськоды, шуисько. Фермеръёслэсь, пе. Асьмеос но куке-соку сыӵе улонэ вуомы, потэ мыным. Али асьмеос финъёслэсь 50 арлы бере кылиськомы.

- Кытысь потэмын таӵ-таӵ удмурт фамилиды? Пичи дыръяды ӵушъял шуыса уг исало вал-а?

— Школаын дышетскыкум, оломар но луэ вал. Пиос ук ми, ог-огмылы пӧртэм кушем нимъёс лякылӥмы. Нош мыным нимысьтыз малпаны кулэ ӧй вал — ӵушъял но тӥни.

Быдэ вуэмъям фамилиеным данъяськыны кутски — иське, зэмос удмурт адями мон. Тросэз ӟучъёс паймо фамилиме кызьы гожтыны, паспортам угось со чурыт пусэн пусъемын. Фамилие мыным пересь выжыосылэсь кылемын. Атае вордскемын Пуро-Можга гуртын. Жаляса верано, со али улэп ӧвӧл ни. Вордскем палъёсаз таӵе фамилиез али но ӝыны гурт нуллэ. Атай Яган-Докьяын мамаме пумитам, татчы ик выжы лэзем. Кык пинал вайиллям. Коля вынылы кема улыны ӧз кылды. Мон огнам кыли.

- Гуртты ӟучъёсын сураськемын, озьы ке но удмуртлыкез ӟеч возьыны тыршиськоды. Тани алигес «Яган базар» ужрад ортчытӥды. Тӥ гуртоостылы, школалы трос гинэ юрттэт сётӥськоды.

— Гуртын удмурт кыллы но литературалы дышетӥсь Людмила Посадова кадь мыло-кыдо адямиосмы тросгес луысалзы ке, удмуртлыкез эшшо но золгес улӟытысалмы, дыр. Нылпиос вашкала сям-йылолъёсты тодыса мед будозы. Сыӵе адӟем карымон ужрадъёслы юрттэм но потэ. Сьӧрлон улӥсьёс но, юрттэт курыса, ӵемысь мыным вазиськыло. Но ваньмызлы шунды уд луы та улонын. Нылпи садъёс, школаос ӵемысь вазиськыло. Кызьы соослы пумит луод? Мон ке ӧй, мукет ужбергатӥсь ке ӧз, кин соослы юрттоз?

- Егит дыръяды спортэн люконтэм эшъёс вылӥллямды. Та дыре кызьы мугордэс юзматӥськоды?

— Егит дыръям яратӥсько вал куасэн бызьылыны, школаын дышетскыкум но, совхозын ужакум но пӧртэм ӵошатсконъёсы пыриськылӥ. Ёросысьтымы тужгес но золэсь Аксакшурысь, Кечолысь, Баграш-Биграысь но Брангуртысь сельсоветъёсысь командаосын кыӵе гинэ шудон-ӵошатсконъёс ӧм ортчытъялэ. Али дыр уг тырмы ни, лэся, куасъёс вылэ шергес султылӥсько. Нош концертъёсы котькыӵе куазен но сюрес вылэ потӥськом, Ижлэсь 35 иськемын гинэ улӥськом угось. Мӧзмиськом удмурт концертъёслэсь.

- Кузпалды удмурт ӧвӧл ук, кельшо-а солы кырӟанъёсмы? Кытысь сыӵе чебер нылкышноез шедьтӥды? Мукет выжыысь кузпал вайиськоды шуыса, анай-атайды пумит ӧз луэ-а?

— 28 ар талэсь азьло Надяез асьме гуртысь ик пумитай. Ижысь гурт удысъя институтын дышетскись нылаш эшез сьӧры Яган-Докьяе кунояны лыктэм. Адӟеме бере ик мон солы синмаськи. Надя удмурт но, ӟуч но вылымтэ. Пор выжыысь. Но яратон номырлэсь уг кышка вылэм. Сотэк улыны ӧй быгаты ни. Ар но ӝыны Надя сьӧры бызьылӥ. Собере чиданэ быриз: одӥг нуналэ ӵыжы-выжыосынымы но анай-атаеным кураны Каракулино ёросысь Ныргында гуртэ потӥм. Надя ӟеч семьяысь вылэм: мумиз-бубиз но, агай-вынъёсыз но синмаськымонэсь. Ёросазы но Пименовъёслэсь выжызэс гажало вылэм. Монэ соос соку ик асьсэлэн каризы, яратоно эмеспизы луи. Ньыль пиос пушкын Надя огназ ныл будэм. Али ке но Ныргындае шумпотыса ветлӥськомы. Интыоссы соослэн выжыкылын кадь чебересь, гурт вӧзтӥзы ик Кам шур визыла.

Надя табере удмурт кылэз но ӟеч вала ни. Шумпотыса удмурт концертъёсы ветлэ. «Удмурт дунне» газетэз кема аръёс ӵоже басьтӥськом ини, сое но со быгатэмезъя лыдӟыны выре.

Кузпалы совхозын кема ӧз ужа. Ужбергатон удысэ кутскеме бере мон доры выжиз, бухгалтерлэсь ужзэ мытӥз. Лыдъян-чотан ласянь мон пичи но уг сюлмаськиськы, оскымон но визьмо адямие вӧзам.

- Пиналъёсты но огшорыесь ӧвӧл. Анастасия но Ирина Чушъяловаослэн кырӟанъёссы нуналлы быдэ сямен «Мынам Удмуртие» радиоез кылзӥсьёсты шумпотто.

— Мон соослэсь кырӟанъёсын дисксэс нунал потэм машинаям нуллӥсько. Уй но нунал кырӟамзэс кылзӥськысал, пичи но соос уг акыльто. Настямы школазэ зарни медален йылпумъяз. Та вакытэ Москваын улэ. МГУ-эз пырпотыса, кылэз дышетонъя научно-исследовательной институтын ужа. Тани-тани кандидат ужзэ гожтыса быдтоз. Солэн со быдэсак фин-угор кылъёсын герӟаськемын. Настя озьы ик ӟеч тодэ фин кылэз. Со Иже быземын, фамилиезъя Соломенникова луиз. Пиналзы ӧвӧл на. Ирина Удмурт кун университетысь туризмъя менеджерлы дышетскиз. Кыкназы ик пичи дырысенызы кырӟаны ярато. Школаын дышетскыкузы но, пӧртэм ужрадъёсы мылысь-кыдысь пыриськылӥзы. Гуртысь культура юртын ортчисьёсаз но вутскылӥзы. Городэ кошкыса но, гурт калыкез шулдыртыны, концерт пуктыны шуыса, юри гуртэ бертылӥзы.

- Тӥляд будэ на шумес куръясьты — Антон Павловичты. Со но атаез сямен ик ужбергатӥсь луыны малпа, дыр?

— Ми сое семьяямы озьы ик шуиськомы — Антон Павлович Чушъялов-Чеховмы. Со милемлы эш но, муспотон нылпи но. Антон куатетӥ классэ ветлэ, солы али дас арес. Быдэсак компьютер борды бурмемын. Кин луоз пимы та улонын — ӧйтӧд. Малпанъёсыз олокӧня пӧртэм вошъяськозы, дыр, ай.

- Ужбергатӥсь Чушъялов кык квартираем коркалэн одӥг люкетаз улэ шуи ке, тросэз лыдӟисьёс уз оске. Мар ке люкетэ шат вӧл-вӧл юртын улыны?

— Мон котьку но шуисько: гурт калыклэсь висъяськоно ӧвӧл. Котькудӥзлэн гуртын улӥсь семьялэн улэм-вылэмез кырымпыдэсын кадь адӟиське. Быгатысал, конешно, маке быдӟа корка ӝутыны, дуно иномарка басьтыны. Но малы со кулэ? Таиз но машинамы нуллэ, улон сэрегмы тырме. Доре куиньнамы гинэ кылимы на ук, нылъёс табере ми доры куное гинэ бертыло на.

— Тӥ Брангурт муниципал кылдытэтын «Бурановские вести» газет поттыны юрттӥськоды. Сое лыдӟыса, малпан кылдэ: ёросысь куд-ог адямиосты сьӧдмаськоды кадь.

— Газет сярысь ке, отын умоез гинэ луыны кулэ ӧвӧл. Ёросын мар лэсьтӥське шара гожтыны ми ӧм дӥсьтэ ке, соку кин сое лэсьтоз? 5-6 ар талэсь азьло газетмы чакламын вал Брангурт муниципал кылдытэтысь решениосты печатланы. Гурт калык мед тодоз, мар отын ужасьёс малпало, дэмлало, чаклало. Но милемыз сессиосы ӧз ӧтчалэ. Сыӵе дыръя газет баме мае поттод? Ми асьмелэсь ужмес лэсьтыны кутскимы — тырмымтэосты шараяны.

- Нош Брангурт муниципал кылдытэтлы сӥзем книгады кие кутымон, синмаськымон пӧрмем.

— Гуртысьтымы лек оже ветлэм, мынам матысь ӵыжы-выжые Арсентий Ивашкин Брангурт сельсоветэ пырись гуртъёс но Яган-Докья черкогурт сярысь материал люканы быгатэм, трос архивъёсын бугыръяськем, гуртын вазен улэм адямиослэсь туспуктэмъёссэс шедьтэм. Улон со сыӵе маке ук, туннэ адями вань, ӵуказе ӧвӧл. Соин ик адямиез улэп дыръяз данъяны быгатоно. Арсентий Кириллович ёросэ но, сельсоветэ но, совхозэ но, юрттэт курыса, вазиськылэм, нокин кылэм карымтэ. Дас ар пала озьы кураськыса ветлэм. Мон со сярысь кылӥ но соку ик ветеранлы юрттыны соглаш луи. Шумпотӥсько, гуртмылэн такем дано книгаез вань шуыса. Яган-Докьяе кин ке лыктэ ке, ми сое данъяськыса кузьмаськомы.

Источник:

Чушъялов, П. В. Мон гуртын улӥсько! / П. В. Чушъялов ; записала Л. Яковлева // Удмурт дунне. - 2012. - 26 окт. - С. 6, 11 : фот. - (Удмурт кизилиос)

За предоставление материала выражаем огромную благодарность редакции газеты "Удмурт дунне"