Чураков Олег Николаевич

Материал из Воршуда
Перейти к: навигация, поиск

Вералоз, лэсьтоз, сьӧраз валтоз...

Churakov.jpg

Эгра ёросысь Герейгуртысь Олег Чураков 19-тӥ арзэ югдурез утён удысын тырше. Нырысь ик патрулья но постъя службаысь инспекторлэсь ужзэ быдэсъяз, та вакытэ МВД-лэн Эгра ёросъя отделысьтыз оперативной дежурнойлэн юрттӥсез луэ. Адӟем карымон кузпал но атай. Семьяеныз ӵош гуртсылэсь данзэ ӝутыны юрттэ ёросазы но шаерамы ортчылӥсь пӧртэм ужрадъёсын.

Комбайнэн ворттылысал

– Вордскем Герейгуртэлэсь кыдёке ӧй кошкылы на, – ачиз сярысь веранзэ мытӥз Олег Чураков. – Бадӟым семьяын будэмын: 2 нылъёс но 5 пиос. Пиос пӧлысь мон шоретӥез. Нырысь ик дышетски гуртысьтымы начальной школаын, собере йылпумъяй артысь Шоргуртысь 8 классъем школаез. Дышетсконэ капчиен сётӥське вал ке но, эшъёсылэсь мултэс висъяськыны ӧй дӥсьтылы. Классысьтымы куд-ог етӥз пиос синмамы ик верало вал, мар, пе, нылъёс кадь умой дышетскыны выриськоды. Нош мынам ваньзэ тодэме потылӥз. Умой отметкаос басьямысьтым ик, лэся, дышетӥсьёс 10-тӥ классэз йылпумъяны косылӥзы, нош мон аслэсьтым кари но 8-тӥ класс бере пыри Эграысь соку гинэ усьтӥськем училищее.

Анай-атае колхозын ужазы. Атаймы механизатор вал, гужемзэ комбайнэн ужаз. Агайёсыным ӵош вожмаськыса кадь сьӧраз ветлӥмы, юрттӥськыны вырыса. Братъёсылы руль сьӧрын асьсэ понназы ужаны кылдӥз ке, мыным сыӵе шуд ӧз усьы – пичи каризы. Нош кыӵе синмаськыса учкылӥ колхоз гаражын сылӥсь техника шоры, озьы механизаторе дышетскыны мынӥ.

Эграысь училищеез йылпумъяса, вордскем колхозам берытски. Гусеничной но колёсной тракторъёсын ужаны кутски гинэ, армие басьтӥзы. 2 ар ортчыса, нош ик вордскем гуртам берытски. Таяз но учыре колхозын кема ужаны ӧз кылды, вань малпанъёсты сураз-пожаз выльдӥськон вакыт. Со аръёс туннэ но сюлэме кылемын. Луонлык кылдӥз но, аслым пичи трактор басьтӥ, нош комбайн сьӧрын ворттылон сярысь малпанъёсы али но йырме поромыто.

Армиысь бертыса, кузпалъяськи колхозамы ужась егит ветеринарен. Со вал Шоргуртысь одӥгез кужмоез спортсмен Валентина Корепанова.

Парзэ пар шедьтэ

– Олеген ми кӧня ке арзэ Шоргуртысь школаын дышетскимы, – мужикез борды итӥське Валентина Арефьевна. – Герейысь пиос физкультура уроклы дасяськытэк ветлӥзы. Формазы ӧвӧлысь дышетӥсьмы соосты ялан визьманы выриз: уроклы быдэ школа котыртӥ бызьылытӥз.

Нош мыным спортэз яратон мылкыд физкультураен дышетӥсьмы Вениамин Иванович Ефремов пыӵатыны быгатӥз. Ваньмыз кутскиз «Пионерская правда» газетлэн призэз понна куасэн бызьылонъя ӵошатскон бордысен. Отын вормеме бере шаермылэн сборнояз кутӥзы. Ялан сборъёсы я ӵошатсконъёсы потаменым, толалтэзэ школаын трос дышетскыны ик ӧз кылдылы. Школаез йылпумъяса, УдГУ-ысь спортфаке пыро, кожазы вал, нош мон бырйи историяя факультетэз. Экзаменъёсме урод ӧй сёты ке но, баллъёсы тырмыт ӧз люкаське.

Школа бӧрсьы кытчы мыныны паймемысьтым, тренере ӵектӥз Можгаысь ветеринаръёсты дасянъя техникуме вамыштыны. Отчы монэ экзаменъёстэк кутӥзы ни. Уг ваты, татын но дышетсконме коридор пыр ортчи, шуыны луоз. Парта сьӧрын пукемелэсь тросгес бызьылоно луиз. Одӥг командаын вал Можга ёросысь Зинаида Поликарпова, Сьӧлта ёросысь Надежда Шудегова, Шарканысь Зинаида Шкляева, Воткаысь Елена Соколова, Сюмсиысь Татьяна Рябова (ваньзы ныл фамилиоссыя гожтэмын). Трос пол кылдылӥз Удмуртилэсь данзэ утьыны. Одӥгаз ӵошатсконын 2 секундэ ӧз окмы спортъя мастерлэсь куронзэ быдэстыны. Со дырысен ялан «кандидатын» ветлӥсько.

Улонын озьы луиз, тросэз эшъёсы азьпал сюрессэс спортэн герӟазы. Соосын пумиськылыны кылдэ шаерысьтымы гурт спортсменъёслэн ӵошатсконъёсазы. Мон но ветеринарын ӝыны ар сяна ужаса ӧй вутты, отӥяз семья кылдытӥ, пинал вордӥ, нош спортэн эшъяськонэлэсь ӧй куштӥськы. Мон ӵошатсконъёсы ветлӥ, нош Олег юрт котырын бергаз, нылпиосын пукиз. Семьяын монэ пыкылыны выризы ке но, аслэсьтым кари. Угось спортъя ӵошатсконъёсысь котьку но бурдъяськыса вуылӥ. Картэлэн мадемъёсме кылзыны сюлмыз ӧз чида – кыкетӥ араз сьӧрам бызьылыны потӥз.

– Толалтэзэ куазь вазь пеймыт луэ, Валялы юлтош кулэ шуыса, сьӧраз ветлӥ. Со ик луиз, лэся, куас вылэ султэме, – шуэ Олег Николаевич. – Уг ваты, нырысь 2 арзэ Валя сьӧры мырдэм бызьылӥ. Отӥяз спортэн эшъяськон мынэсьтым но мылкыдме бугыртӥз.

Скал интые куас

– Герейгуртын ужакумы, ваньмыз умой вал, – веранзэ азьланьтэ Олег Николаевич.

– Нимаз юртын улӥмы, гид тыр пудо вордӥмы. Нош отӥяз Эграе ветлыса ужаны кутскимы, дорамы бертон азьын дугдылӥськомы вал «Радуга» спорткомплексэ. Соку ини малпаськоно луиз: пудо вордоно ке, оло, спортэн эшьяськемысь дугдоно. Пудо сиён ми котьку дэмен дасяллямы, вань ӵыжы-выжыосын люкаськыса. Тодмоосмы бусые трактор-машинаосын мыно ке, ми – бызьыса. Огкутскемен кык кечез кутылӥмы: пудо сиён но дасямы, мугормес но кыдатӥмы.

Озьы ке но гужемъёсты сокем ӧм яратылэ. Сменаен ужаку, дорысь вазь кошконо, бер бертоно, нош милям пудо пыртӥсь-поттӥсьмы ӧвӧл. Озьы скал вордонлэсь куштӥськимы. Сое вузаса, куас сюрес лёгыны «Буран» но выль куасъёс басьтӥмы.

Бадӟымезлы пимылы 5 арес тырмыса, семьяен ӵошатсконъёсы пыриськыны кутскимы. Нырысетӥ араз ик районысь эшъёсмес вормимы но, милемлы сюрес усьтӥськись Гурт шудонъёсы мыныны. Семьяен вожвылъяськонъёсы нырысь Сашикен, собере Ильяен ветлӥмы. Отӥяз Андрей пимы вордскиз. Соин но ӵошатсконъёсы пыриськиськомы.

Кемалы вунонтэм кылёз Гурт шудонъёсы нырысьсэ ветлэммы. 1998-тӥ арын Красногорскын ортчем гужем ӵошатсконъёс дыръя Сашикмы тужгес пичиез пинал вал ке но, троссэ азьпалтыны быгатӥмы. Нош 2005-тӥ арын Можгаын ортчем гужем шудонъёсы 3 пиосынымы ветлӥмы: Ильямы бызьылӥз, Сашикмы ӝыны аресъем Андреенымы утиськиз. Семьяослэн ӵошатсконъёсазы сокугес гинэ ӝӧк выл теннис, шашки, дартс шудонъёсты ватсазы. Со аре Ильямылэн йырыз гинэ теннис ӝӧк сьӧрысь адске вал ай. Ӵошатсконъёс тунсыкогес луизы, нош кӧня дасяськонэз солы! Соин ик доре теннис ӝӧк лэсьтӥ. Ваньмон дыръямы быдэс семьяен шудӥськомы.

– Камбаркаын Гурт шудонъёсын семьяен вормеммы бере милемлы дан усиз вал Ижын ортчоно Россиысь Гурт тол шудонъёсы пыриськыны, – вера Валентина Чуракова. – Нош монэ ёросысь нылъёслэн командазы понна бызьылыны куризы. Семьяме командаен воштэмысьтым, туннэ ке но дорын монэ пыкыло на. Угось соку мон Россилэн чемпионэз луи, нош семьяен ӵошатсконэ пыриськытэк кылимы.

Дэмен басьтэм вормонъёсмы лыдъяса быдтонтэм. Кык пол цветной телевизор, пылесос но мукет дуно арбериос утӥмы. 2003-тӥ арын Камбаркаысен чибориё телевизор кузьмазы, сое учкыны, оло, быдэс гурт калык дорамы вуылӥз. Табере бадӟым пиосмы Ижевскын уло, одӥгез ужа ни, мукетыз ИжГТУ-ын дышетске. Соослы но улоназы спортэн эшъяськемзы юрттэ. Озьы ик семьямы крезьгурез яратэ, Сашамы гитараен но арганэн шудэ, нош ми кырӟаськомы.

Милиционер Чураков

– Колхозысь кошкыса, ог 5 ар пала чугун сюрес вылын тырши, собере милицие лыктӥ, – вера Олег Чураков. – Югдурез утён удысын ужасьлэсь удыссэ армиын дыръя шӧмъяны кылдӥз. Службаме ортчи Москваын 1989-тӥ-1991-тӥ аръёсы. 1991-тӥ арын тулыс пал отпуске лэзьыны медо вал, август толэзе путч ортчемен, нокинэ доразы ӧз лэзе. Гужем шорын шутэтскон нуналъёсы Москва городэ потаны лэзизы ик, но солдат дӥсен ветлӥсьёс шоры куд-ог адямиос фашистъёс шуыса вазьылӥзы. Отӥяз нокинэ но казармаысь потаны ӧз лэзе ни, быдэс частез резерве пуктӥзы. Июнь-июль толэзьёсы нимысьтыз дышетсконъёс ортчытъязы, нош августэ дӥськутъёсын но автоматъёсын кӧламы. Умой соиз: калыкез буйгатыны милемлы потаны ӧз кылды.

Югдурез утён удысэ вуыса, дасо ар пала патрулья но постъя службаын ужай. Нырысь 3 арзэ Эгра каргуртын тырши, нуналлы быдэ ульчаостӥ пыдын ветлылӥмы. Отӥяз милемлы машина сётӥзы, нош монэ водителе юнматӥзы. Соку ини быдэс ёросэз котыръямы, нош 2007-тӥ арысен дежурной часте пуктӥзы.

Ужан нуналъёсмы арня шорын тупало ке, соос чусгес ортчо, нош шутэтскон нуналъёсы ма гинэ уг луы! Юрттэт курыса жингыръясьёслэн лыдзы уг сины, нуналаз шорлыдын 20 вызове потаськомы, тужгес троссэ 40 пол ветлэммы вань. Тужгес ӵем ветлӥськомы кудӟем адямиосты, керетӥсь ӵыжы-выжыосты буйгатыны. Син медаз усьы, берло дыре секыт йыруж лэсьтӥсьёслэн лыдзы кулэсмиз. Азьвыл аръёсы лушкаськисьёс тачак вал, адӟисьёс медаз кыле шуыса, адямиосты но виылӥзы.

Курытэныз эшъяськись троссэ семьяосты нимын-тулын вераны тодӥськомы. Соосын ӝот-ӝот вераськыны луэ, жаляса верано, визьмаськисьёсыз ичи. Нош тодмотэм адресъя нырысьсэ потыкумы, бронежилетъёс дӥсяно луылэ. Уно аръёс ӵоже ужатозям, пӧртэм учыръёс вал. Пуртэн но, пыӵалэн но пумитасьёс шедьылӥзы. Соин ик юрттэт курыса вазиськисьёс доры мынытозямы, малпаськомы буйгатон кылъёсты но утиськон амалъёсты.

МВД-лэн спортъя ӵошатсконъёсаз но пыриськисько. Ёросысь командаен ӵош трос пол вормонъёс басьтылӥмы капчи атлетикая, куасэн бызьылонъя, ыбылӥськонъя но служебной биатлонъя вожвылъяськонъёсын. Ӟеч тыршеме пусъемын «За отличие в службе» III но II степенё медальёсын. Туэ Полициын ужасьёслэн нуналзы дыръя, 10-тӥ ноябре, I степенё медаль сётӥзы.

Гуртэз ӝутӥсь кузпалъёс

– Гуртэз шулдыртон сярысь но сюлмаськытэк уг луы, – вераськонамы нош итӥське Валентина Арефьевна. – Сад-школамы, клубмы, магазинмы артысь Кабачигуртэ интыяськемын. Гуртамы синмаськымон калык улэ, милям но, валче люкаськыса, шутэтскеммы потэ. Кыӵе ке ужрад ортчытоно ке, егитъёс но, арлыдоос но мыло-кыдо пырисько. 2014-тӥ арын муниципал кылдытэтамы пырись котькуд гурт ассэ возьматыны кулэ вал. Ужрадэ мынэммылэсь азьло, гуртысь активистъёсын люкаськыса, питранъёс вылын гур лэсьтон сярысь кенешимы.

Таиз ласянь кузпалы котьма карыны быгатэ: пуэз но вӧлэ, кортэз но вандылэ, гур но пуктэ. Таяз учыре но тракторезлэн пичи уробоез вылэ ӝыт куспын гур лэсьтӥз. Кот, куасьмымтэ гурмес сяськаосын чеберъямы но Кабачигуртэ ширтӥмы. Табань пыжыны одӥг ведра ыльнянь сьӧрамы кутӥмы. Табаньмес вузаса поттэм коньдонэн гуртмес шулдыртӥмы.

Кылем арын быдэс гуртэн нылпи площадка лэсьтон борды басьтӥськимы. Нюр интыез вакчи дыр куспын шутэтскон интылы пӧрмытӥмы. Колхоз 3-4 уробо песок вайиз, Кабачигуртысь ужбергатӥсь пиломатериалъёсын юрттӥз.

Ӟечыранъёс, шудон коркаос, гурезьёс, сӥльвирез кыдатон турникъёс син куспын кылдӥзы. Тулыс бакчаын мерттӥськем интые, нуналлы быдэ нылпи площадкаын ужамы. 1-тӥ июньлы – Нылпиосты утён нуналлы – ужмес йылпумъямы. Шудон интыез усьтонэ быдэс гурт люкаськиз кадь. Площадка сьӧрын ӵынатэм сӥль пыжылӥськомы. Шутэтскон интымес дэмен утялтыса возиськомы. Арлы 2 пол субботник ортчытӥськомы.

– Арлы быдэ февраль толэзе гуртмылэсь нуналзэ пусйиськомы, – шуэ Олег Чураков. – Та нуналэ 5-тӥ арзэ дорамы куасэн бызьылонъя «Герей сюрес» ӵошатскон ортчытӥськомы. Ужрадлэн кичӧлтӥсез Кабачигурт муниципал кылдытэт луэ. Нырысь ик куасэн бызьылонъя ӵошатсконъёсты Сьӧдпи гуртын ортчытъязы, нош табере гуртамы радъяськомы. Толлы быдэ гурт котыртӥ куас сюрес «Буранэн» лёгисько. Паськыт, вольыт интые, асьме калык сяна, ёросысь кужмо спортсменъёс но бызьылыны вуыло.

Огвакытэ спортэн эшъяськонлэсь куштӥськыны медӥськомы ни вал. Но табере пичиез пимы будӥз. Ёросын ортчылӥсь ӵошатсконъёсын нош ик муниципал кылдытэтлэсь данзэ семьяенымы утиськомы. Андрей пимы та вие Эграысь спортъя школаын мугорзэ кыдатэ бере, ми но сьӧраз кыстӥськиськомы. Арняяз 5 пол бызьылыны ветлӥсько. Чидатэк витиськомы толлэсь вуэмзэ. Соку асьме гурт котыртӥ куасэн нискыласькомы.

Туэ гужем кӧня ке нуналлы ветлӥмы Москваын улӥсь тодмоосмы доры. Бадӟым городын нунал куспын ик акыльтӥ, пичи Герейгуртам бертэме потыны кутскиз. Эшшо одӥг пол валай: вордскем гуртлэсь шулдырез номыр ӧвӧл. Ижевске но ветлӥсько ке, дорам бызьыса бертӥсько. Гуртмы шулдыр интые пуксемын. Бакчамы вӧзтӥ Болё пичи шур бызе. Мон сое ӵыпи но карасьёс лэзи. Ӟазег-ӵӧжъёслы но сиыны тырме, аслым но чорыганы кыле.

Источник:

Чураков, О. Н. Вералоз, лэсьтоз, сьӧраз валтоз... / Олег Чураков ; печатланы дасяз Валентина Емельянова // Удмурт дунне. - 2016. - 11 нояб. - С. 10, 15 : фот. - (Тӧр шорын).

За предоставление материала выражаем огромную благодарность редакции газеты "Удмурт дунне"