Хайдаров Рашит Осипович

Материал из Воршуда
Перейти к навигацииПерейти к поиску

СО ШУЭ: «АЧИМ!»[править]

Хайдаров Р. О.

Рашит Осипович Хайдаров (Рашит Хайдар) – Удмурт Элькунысь дано журналист, Россиысь писательёслэн огазеяськонзылэн ёзчиез, юморист но сатирик, веросчи но кылбурчи… Маскаръяськыны яратэмез вираз ик пыӵамын кадь.

- Кылэме вань: тон, Рашит, школаын дышетскыкуд, Леонид Ильич Брежневлы но гожтэт гожтэмед. Вал-а сыӵе учыр? Вал ке, кызьы дӥсьтӥд бадӟым кивалтӥсьлы вазиськыны?

- «Москва. Кремль. Брежневу, Подгорному, Косыгину» – озьы гожтыса лэзи вал. Вуиз-а со отчы, уг тодӥськы. Гожтэтэ Уфаозь мынэм, лэся. Отысь Янаул райисполкоме ивортон ыстӥллям. Собере райисполкомын ужась адями мон доры ветлӥз… Кызьы дӥсьтӥ бадӟым кивалтӥсьлы гожтэт ыстыны, али валэктыны ик уг быгаты. Пичи дыръя кышкан сярысь малпаськон ӧй вал, дыр.

- Нош туала вакытэ В. В. Путинлы гожтэт лэзьысалыд-а? Солы кыӵе малпанъёстэ верасалыд?

- Ма, али уката ӟеч гожтэт пӧраны луысал. Мар ватонэз, асьмеос дан поттыны быгатӥськом. Нош улонмы азьпала мынэ меда? Отӥыз но кыля, татӥыз но. Берлань чукынэммес шӧдытэкгес ик кылиськом. Тужгес но гурт удысын. Мынам малпамея, гурт калык коммунизмын улӥз Л. И. Брежнев кивалтон вакытэ. Али гуртъёс векан калэ кельтэмын. Нош гожтэт гожтон пумысь ке, соиз токма дыр быдтон луоз.

- Тон – гуртын будэм адями. Отын тыршисьёслэсь сюлмаськонъёссэс ӟеч тодӥськод. Дор палад – Башкортостанысь Янаул ёросысь Шудеке но бертылӥськод, дыр.

- Кыӵе кузёез, сыӵе ик юртъерез, шуо калыкын. Азбаре пырыку ик адӟиське, кин татын улэ. Куд-огезлэн корка азяз вуытозяд, кытчы ке канжаськыса, усьыса, пыддэ но чигтод. Мукетызлэн ваньмыз ялтра, чылкыт ӵужемын, котырак чебересь сяськаос будо. Колхоз ужын но озьыгес ик луэ. Умой кузё котыре тросгес ӟеч адямиос люкасько, ужзы но огсыр мынэ.

Одӥг вакытэ тросэз бадӟымесь хозяйствоос кир-пазь каремын вал. Пичиесь СПК-ос, ООО-ос кылдылӥзы. Туала вакытэ пичиесь хозяйствоослы туж шуг йӧтэ. Соос одӥг йӧнала техника но басьтыны уг быгато. Кужым – огазеяськон бордын. Оскисько, визьмо кивалтӥсьёс сюрозы, бадӟымесь агрофирмаос одно ик кылдылозы… Вордӥськем гуртам ымнырме возьматъясько ик. Чылкак медаз вунэтэ шуыса, араз огпол. Оло мӧйымисько, оло азьтэмгес луисько, оло…

- Табере выжом журналистика, литература удысъёсы. Рашит, кызьы вуид гожъяськон удысэ?

- «Дась лу!» газет 1968-тӥ арын выльысь потыны ӧй кутскысал ке, асьме аресъемъёс туж тросэз литературае, газет уже сюрес ӧй шедьтысалзы. «Дась лу!»-ысь кыӵе ке но кылбур кельшиз вал. «Ма, мон но озьы гожтыны быгато ук!» – сыӵе малпанэн редакцие гожтэт гожтыны пукси. Собере нуналлы быдэ сямен отчы выль кылбуръёсын гожтэтъёс келялляны кутски (нош ачим рифма кадьёсыз но умой-умой уг валаськы на вал). Газет бамысь аслэсьтым нимме, чидатэк возьмалляй. Герман Ходыревлэсь гожтэт басьтӥ. «Заметкаос но гожъя, информациос но ыстылы», - курем со. Нош мар со заметка, информация уг валаськы. Литературно-творческой кружок сярысь но ӧм кылылэ, дышетӥсьмылэсь юалляськыны тодамы ӧз лыкты.

- Астэ тон журналистэн-а, писателен-а шӧдӥськод?

- Асме мон гожъяськись шуисько. Тани куд-огез вань улытозяз гожъяськыса гинэ кӧтсэ тыре… Мон, тямыс классэз йылпумъяса, колхозын ужай. Соку кӧтме тырон понна мешокъёс ӝуткано луи. Нош 1977-тӥ арысен кутскыса, мынам тужгес но секыт уже – ручка ӝуткан. Со – кӧтме тырон но, сайкыт я курыт малпанъёсме бумага вылэ вуттон но, сюлмаськонъёс но, шумпотонъёс но… Куддыръя кагазэз но адӟем уг поты, ручкаез но палэнэ сэрпалтысал. Озьы ке но кияд кутоно луиськод. Мылкыдъя гинэ гожъяськыса уд улы. Нош адямиослэсь гожъямзэс тупатъяса, волятыса кӧня дыр но кужым быре! «Герд» газетлэн редакторез но луисько бере, таиз но уно сюлмаськемез кулэ каре.

- Табере тынад гожъяськон удысэдлэсь куштӥськемед уг луы. Со тон борды висён выллем лякиськемын.

- Висён гинэ ӧвӧл со. Адями висе ке, бурмыны-йӧнаны быгатэ. Нош гожъяськон – со омыр интыын. Омыртэк кема улод шат?

- Тон кылбурчи, драматург, прозаик. Кудӥз удысэд секытгес йӧтэ?

- Ма, кызьы сое валэктом меда? Шуом, тыныд мешокен одӥг пуд йыды вайизы. Мукет мешокен – одӥг пуд сезьы тӧлбер. Кудзэ мешокез нуыны капчигес? Соку ик уд тоды. Гожъяськон удысын но озьыгес ик. Кыӵе жанр быръёд, произведение тынэсьтыд уз юа. Тани толон мон газетэ «Арган куара мар вера?» очерк гожтыны пукси вал. Кык бам мында гожтӥ но сое азьланьтэме ӧз луы ни. Озьыен, мон янгышаськем, умойтэм сюрес бырйиськем. Выльысь кутскыса, интервью карытэк ӧйлась… Тон «Кизили» журналад сценка курыса ёртӥськод. Веросъёслы со мында темаос но учыръёс вань, пуксьы но гожты вал. Соос пӧлысь огез но сценкалы уз тупа. Геройёслэсь шудэмзэс син азе пуктыса гинэ сценка гожтӥське. Тани «Ондӥ но Кондӥ» пичигес сценкаме кык толэзь гожтыны выри, геройёсме мырдэм но кызьы улэпен адӟыны быгатӥ.

Басьтом новелла жанрез. Сое кылдытон понна, кылтӥрлык туж узыр луыны кулэ. Куддыръя быдэс новелла одӥг предложение вылын возиськыны быгатэ. Со предложение произведенилы фундамент, кӧзоно выллем луэ.

Одӥг чурлэсь кылбур но кылдэ. Со чурын – кылбурлэн лулыз, кужымез. Мукетъёсыз чуръёс со котыре муш палэп кадь биниськемын медло.

- Геройёсыд тынад туж пӧртэмесь. Тросэз юмоке сюрыло, тунсыко выременызы серемез но потто. Озьы ке но соосты тон, Рашит, кӧня ке жаляськод кадь?

- Мон соосты гажасько, малы ке шуоно котькуд геройлэн кытын ке но улэп адямиез - прототипез - вань. Гожтон азьын кинэ ке но син азе пуктыны тыршиськод. Геройёсы мынам ӧжытак тупыттэмесь, отчы-татчы шонаськисесь. Озьы ке но котькудӥз герой ас понназ визьмо.

- Тынад «нылпиосыд», книгаосыд сярысь верасько, кӧня соос?

- Ӝыны даурскын адями одӥг ке но книга поттыны кулэ. Одӥг книга ке но мон гожтӥ, дыр, шуыса малпасько.

- Малы «дыр» шуиськод? Со кыл мултэс ни.

- Ма… «Ачим» книгае потӥз. Гожъяськись адями ачим шуыны быгатэ бере, со маке но лэсьтӥз ни. Азьланьын, оло, «Нош им ачим»-е потыса вуттоз. Со печатламын луысал ни, дыр. Ачид валаськод: туала вакытэ книгаез поттон понна гожъяськисьлы аслыз уксё утчано… «Вордскем кыл» журнал пыр покчи лыдӟисьёс доры дас книгаосы вуизы.

- Тынад «Салам» нимо книгаед но вань ук.

- А-а, соиз огъя липет улын книга. Юморескаосме, серемес веросъёсме нимаз книгаен поттыны «Удмуртия» издательство планаз пыртӥз вал. Собере олокызьы-мар мон борды кык авторъёсты лякизы на. Озьы тӥни куинь авторъёслэсь «Колӟо» пӧрмытӥзы.

- Ӟуч кылын но книга печатлад.

- Ма, кытысь тон ваньзэ тодӥськод? «Портрет с натуры» шуонэ потӥз. Гожъямъёсме Расил Сабиров ӟуч кылэ берыктӥз.

- Юбилееныд валче, Рашит, аслыд ачид мар сӥзьысалыд?

- О-о, аслым ачим-а? Кулытозям ик улыны мед кылдысал…

Источник:

Хайдаров Р. О. СО ШУЭ: «АЧИМ!» / Р. О. Хайдар ; записал Ульфат Бадретдинов // Удмурт дунне. - 2007. - 7 сент. - С. 6, 11. - (Удмурт кизилиос).


За предоставление материала выражаем огромную благодарность редакции газеты "Удмурт дунне"