Ушаков Анатолий Алексеевич

Материал из Воршуда
Перейти к навигацииПерейти к поиску

Асьмеос та улонын – куноос[править]

Ушаков А. А.

Азьланьтӥськом шаерысьтымы сӥё-дано артистъёслэн семьяенызы тодматсконмес. Кылемаз пятница номерын кенешим Галина Иосифовна Платоноваен, нош туннэ кыл сётӥськом Анатолий Алексеевич Ушаковлы.

- Анатолий Алексеевич, сцена вылын тӥ маскаръяськиськоды ке но, улонын туж йӧно, кызьы шуо – серьёзной адӟиськиськоды.

- Зэмзэ но, улонын мон серьёзной адями. Сценаен ӵошатоно ке, пӧртэмлыкез туж бадӟым. Улонын мон ӧжыт вераськисько семья куспын но, эшъёсын но. Тросгес выемын ас малпанъёсы пушкы, уж сярысь, юморескаос, гожъяськон сярысь малпаськисько. Чакласько калыклэсь выросъёссэ, вераськон манерзэ. Озьы ас ужад мар ке но выльзэ шедьтӥськод. Трос кузя люкаськонъёс дыръя учкысагес пукисько.

- Маскарчи шуыса шулдыртэмдэс, серекъятэмдэс возьмало, дыр, ук?

- Анекдотъёс но, серемес тостъёс но, кырӟанъёс но возьмало. Но мон берло дыре жадисько калыклэсь. Гастрольёсы май толэзьысен потыса, августлэн кутсконаз гинэ куддыр ваньмиськом. Со вискын кӧня концертъёс возьматоно луэ на. Трос калыкен пумиськоно, трос вераськоно. Гастрольёсы потыса, кузёосын гинэ уд пумиськылӥськы, огшоры учкисьлэн но вераськемез потэ. Шаерысьтымы котькуд гуртэ вуылыса, асьсэлэн кадь каро ини. Искусство сярысь гинэ тодэмзы уг поты, улон-вылон сярысь, семья сярысь юаллясько. Концертлэсь азьло но, концерт бере но ваньмыны уг луы, уката ик мӧйы калык мон котыре няняське.

- Маин валэктысалды сое? Оло, гуртоослы сюлэмзэс нокинлы усьтыны, кылзӥсьёсыз соосты ӧвӧл?

- Соиз но вань, дыр. Малпасько, тодмо адямиен вераськемзы потэ. Сцена вылысь учкыса валало, кыӵе адями мон. Небыт, лачмыт сям адӟиське, шӧдске. Тон соослы шуныт энергидэ сётӥськод бере, соос но нокыӵе керпотытэк лыкто. Кудӥз сиён-юон, йӧл, варення, чечы ваё.

- Юморескаосады трос серекъяськоды юисьёсты. Чепыльтэм выллем луэмзэ шӧдӥськоды-а?

- Юон сярысь трос юморескаос лыдӟи, но чик уг шӧдӥськы умой пала воштӥськемзэ, пайдазэ. Шумпотыса кылзо кадь. Кытӥяз озьы но потэ: калыкез юыны дышетӥськом. Акыльтэ со, али кулэ выль проблемной юмор. Нош со чик ӧвӧл. Но пусйысал Анатолий Перевозчиковлэсь «Киы но, пыды но интыяз, йыр но круглой, быгылес кылиз…» юморесказэ. Совето власть вакытэз возьматэмын ке но, со туннэ нуналэн шока. Пинал калык валатэкгес кылзэ ке, мӧйыослы со туж кельше. Шонер верад, Ушаков, шуо.

- Озьыен, удмурт юмор чутэ шуим ке, ум янгышалэ, дыр.

- Гожъясь ӧвӧл бере, озьы ик со вань. Юморескаос, монологъёс гожъян понна кулэ быгатӥсь, эстрада драматургиез валась мурт, нош соос асьмелэн ӧвӧл. Юмормы юон, эротика, секс котыр берга. Зэмос удмурт маскарчиос но ӧвӧл. Та жанр туж секыт шуысал, со понна нимысьтыз быгатонлык-талант луыны кулэ. Шуом, кырӟасьлэн куараез пӧлыпум быдӟа ке но вань, сое сцена вылэ поттыны луоз ни. Али сыӵе техника, компьютеръёс, микрофон – бадӟым коньдон гинэ медло. Улэп куараен кырӟаны кулэлыкез но ӧвӧл. Чебер дӥся, вӧзаз эктӥсьёс пукты на - котькуд нылэз, пиез кырӟась карод. Нош вераськон жанрын артист потэ одӥгназ. Маскаръяськыны быгатонлыкед ӧвӧл ке, коть миллион манет тыр, маскарчи уд луы, нокыӵе крезьгур но уз юртты. Шуом, адямилэн пушказ куать сиез ке, маскарчи куатеныз ик шудыны кулэ. Нош кырӟась кык-куиненыз но тырмытэ. Вераськись муртлы учкисез валэз сямен кыткыса возьыны кулэ. Сцена вылын тон одӥгнад, ваньмыз шорад мед учкозы, кылзозы.

- Зэмос артист луон понна дышетскыны кулэ. Тӥледлы со ласянь удалтӥз, шуыны луоз.

- Мон инмарлы тау карисько со вакыт понна. Куинь пол Ленинградэ стажировкае ветлӥ. Али нокытын озьы уг дышето, тодон-валандэ будэтон понна, бадӟым коньдон кулэ. Нош мон тани арен-арен дышетски бадӟым педагогъёс дорын. Бурдъяськыса бертӥськод вал. Педагог тонэныд заниматься кариське, юморист юморескаос гожтэ. Режиссёр кие сёто на.

- Анатолий Алексеевич, нош маскаръяськон сюрес вылэ кызьы вуиды?

- Туж кема шудӥ Алнашысь калык театрын. Со вакытэ ик агитбригадалэн кивалтӥсез вал, сценарийёс ачим гожъяй. Агитбригада – со сыӵе ик КВН шуысал. Туннэ мае адӟиськод, ӵуказе вераны кулэ ини. Быдэс Алнаш районэз озьы ортчи. Ӵукна султӥськод но доре вуиськод ни уин куинь часкын. Агитбригадаямы вить адями вал. Кизён кутскыса, картофкаез мурӝолэ пыртытозь котыръямы районэз. Нокыӵе ялонъёс кулэ ӧй вал калыкез люкан понна. Автобусмес адӟо но, пичиез но, бадӟымез но лыкто ини. Отысен ик тӥни маскаръяськон борды но басьтӥськи.

Бадӟым сцена вылын нырысь ик лыдӟи Григорий Даниловлэсь «Эн куаличке» юморесказэ. Машиностроительёслэн дворецазы смотр вал. Лыдӟемме кылӥзы филармониын ужасьёс, Николай Зубков. Нуизы Перме, отын луи лауреат. Кӧня ке дыр ортчыса, республикаысьтымы Культурая министерство ялӥз кылбур лыдӟисьёс пӧлын конкурс. Нош ик лауреат ним басьтӥ. Таяз учыре ини ыстӥзы Уфае Всероссийской ӵошатсконэ. Нош ик нырысетӥ интые потӥ. Собере кутскиз «Театральной тулыс» фестиваль. Калык театре ветлӥсько вал бере, «Батрак» спектаклез отын возьматӥм, мон шудӥ батракез. Республикаямы вормисе потыса, Башкириын улосъёс пӧлын ӵошатсконэ пыриським. Нош ик нырысетӥ инты милям. Келязы Москвае. Озьы Метростройлэн дворецаз батракез шудӥ. Лауреат ним басьтӥ. Россиысь Культурая министерство сю манет коньдон премия висъяз на.

Вань та вормонъёсме синйылтыса возем филармонилэн директорез Николай Зубков. Одӥг нуналэ Алнаше жингыртэ. Дася, пе, Ушаков, котомкадэ, ми тонэ Ленинградэ келяськом. Музыкальной училищеез йылпумъяса, ньылез нылъёс кошкизы ни, тонэ соос отын возьмало, шуэ. Со вал 1975-тӥ арын. Чемоданме, котомкаме кутыса, кошки Ленконцертысь эстрадая студие. Отысен ик кутскиз будон сюресэ.

Самодеятельной но профессиональной сцена туж висъясько. Асьме артистъёс сое валаны уггес тыршо. Дышетскемын ӧвӧл угось. Со шӧдӥське артистлэн ассэ кулиса сьӧрын воземез бордысь но. Профессиональной артист, дэремзэ концерт кутскон азьын трослы вазьгес дӥсяса но, уг пуксьылы ни. Со дышыны кулэ костюмезлы. Концерт бырытозь, со ас пушказ, ас творчествояз выйыны кулэ, калыкен медаз вераськы ни. Сцена вылэ солы, оло, ӝыны час, час, кык час улыса потоно. Нош кырӟалоз куинь минут ӵоже. Мед гинэ кин ке погмаськем пыдесъёсын потоз сцена вылэ - улляло. Ӟучъёс юнме уг шуо, дыр, дӥсезъя пумитало, визьмызъя келяло. Сцена – со храм. Котьку чебер луыны, чебер дӥсяськыны кулэ.

- Пинал дыр малпанды но сценаен герӟаськемын вал-а?

- Пичи дыръям уг маскаръяськиськы вал, но 1-тӥ-3-тӥ классъёсын дышетскыкум, малпасько вал эктӥсь луыны. Ира апаеным весь дарманьтӥськом вал эктыны. Нэнэмы шуылӥз, мынэ ыж гидэ потэ но отын дышетске. Пыд медаз нӧды шуыса, ыж гидмес атаймы тротуар кадь лэсьтӥз. Озьы ыжъёс азьын Ира апаеным эктӥськом но, кырӟаськом но. Асме мон гуртысьтымы самой умой эктӥсен лыдъясько ни вал, но эктӥсь луон мылкыдме одӥг учыр куашкатӥз.

Анай-атайёсты школае кенеше ӧтизы, нош ми соослы концерт пуктыны дасям. Нэнэе мыным вуриз горд дэрем, сьӧд сатинлэсь штани. Пыдъёсам тӧдьы носки, сьӧд калоша дӥсяй. Сыӵе чебер аслым потӥсько. Урам кузя горд флаг кадь вамышъясько. Мед адӟозы шуыса, котькуд корка вадьсын сылӥсько. Быдэс гуртэз озьы ортчи.

Эшъёсыным сцена вылын тямысэн потаса эктонэз возьматӥськом. Мон потӥсько ке, калык гурак серектэ. Э-эх! сюлмысьтым ик тэтчыса, выльысь потӥсько. Нош ик калык серекъя. Концерт йылпумъяськем бере нэнэе дорам лыктӥз но шуэ: «Штанияд резинкаез ляб-а, мар-а, пие? Котькуд тэтчемед бере штанидэ ӝутӥськод». Нош мон ӧй но шӧдылы куашкамзэ. Быдэс зал серекъям бере аслым шуи, ноку уг экты ни.

- Маскаръяськонын со нырысетӥ вамышты вылэм ни, шӧдске.

- Озьы но, дыр. Но мон соку ӝоже уси. Эктонъёсы уг ветлы шуи ке но, ӧй чида, эктон кыскиз ас бордаз. Алнашысь культура юртын ужакум, бальной эктонъёсы ветлӥ. Берло со мыным юрттӥз ритмикаез валаны. Нош эктонэн юмоке усеме бере басьтӥськи маскара кылбуръёс лыдӟон борды. Милям гуртысьтымы потэмын Анатолий Уваров, Яков Майков. Пичи ке но вал, соосын эшъяськылӥ. Уваровлэсь «Лашман Петыр» кылбурзэ нырысьсэ лыдӟи 5-тӥ классын дышетскыкум, собере вал «Вуом али». 7-тӥ-8-тӥ классъёсын дыръям Майков кузьмаз выль кылбуръёссэ: «Кильтро Насьта», «Кузьма скал возьма». Отӥяз Анатолий Уваровлэсь но Яков Майковлэсь вань серемес кылбуръёссэс наизусть тодӥсько вал ини. Соин ӧз тырмы, басьтӥ Аркадий Райкинлэсь кык пластинказэ. Отысь но ваньзэ дышетӥ. Райкин кадь мон ноку уг луы, но со мынам кумире вал. Юморескаоссэс лыдӟылӥ Василий Садовниковлэсь, Григорий Даниловлэсь, Пётр Кубашевлэсь. Одӥг ӝыт куспын кык печатлам страницаез наизусть дышетӥсько вал. Киын гожтэмын яке печатламын – тодӥсько, кытын кыӵе кыл, запятой, двоеточие сылэ. Лыдӟисько, шуом, сцена вылысен кыӵе ке но выль текстэз, нош син азям гожтэмез пуксе. Ленинградысь дышетӥсьёс но паймо вал со быгатонлыкелы. Отын ӟуч текстъёсын трос ужано луиз. Кызьы верай ини, Ленинградын мынам аслам авторъёсы вал. Со Игорь Виноградский, Семён Альтов, Юрий Погорельский, Рабсель Константинов но мукетъёсыз. Ӟуч юморескаосы мынам али ке но вань, но шер ужасько соосын. Ӟуч репертуаре быдэс папка, вить концертлы тырмымон. Соос гожтэмын нимысьтыз мон понна, нокин мукетыз сое лыдӟыны, печатланы уг быгаты. Со монологъёслэн, юморескаослэн авторъёссылы филармония коньдон тыриз.

- «Шыкысты» узыр шуиськоды, быгатӥсь артистъёсты вань. Иське, ӟуч учкисьлы но «Шулдыр ӝыт» матэ кариськыны быгатоз.

- Таяз арын 8-тӥ Мартэ ӟуч концерт сётӥм ни. Программамы нимаськиз «100 минут смеха и песни на бис». Азьланяз но со концертъёсмы луозы, удмурт учкисьёсты озьы ик ӧтиськом сое адӟыны.

Вераны кулэ, берло дыре милемды пӧртэм организациосы, предприятиосы, заводъёсы ӧтчаны ӧдъязы. Калык пайме, кытысь, пе, тӥ потэмын, кыӵе-сыӵе тодмотэм коллектив. Удмурт сямен ужаськом бере, ӟуч калык уг тоды вал милемды. Пельысь пеле кылӥськыса, трос куронъёс вуыны кутскизы. Ужамъя йыре визь шукке вылэм, озьы басьтӥським выль программа лэсьтон борды.

- Удмурт калыкез ӟучъёс азьын данъян но луэ тӥляд со ужды.

- Конечно. Филармониысь кивалтӥсьёс но шумпото. Шуом, Челябинскысь, Кировысь концерт куризы ке, милям ӟуч программамы вань. Со пушкы кык-куинь удмурт кырӟан одно ик пыртом на. Азьланяз малпаськом концертъёсын Урал улосэтӥ ортчыны.

- Анатолий Алексеевич, асьтэлы кивоштӥсьёс будэтон ласянь нош мар шуысалды?

- Та юанэз учкисьёс но, корреспондентъёс но весь сёто. Та дырлы сыӵе адямиез мон уг адӟиськы. Юмористъёсмы вань, соосты будэтон бордын мон ужасько. «Шулдыр ӝытын» али аслэсьтыз юморескаоссэ лыдӟе Вячеслав Цветной (Иванов). Лыдӟиськыны выро Вячеслав Байков, Анатолий Григорьев, Кибъялась Рома Николаев. Чылкак профессионалъёс соос ӧвӧл, нош конферансьеез уката ик шуг шедьтыны. Концерт нуонлэн аслаз куронъёсыз. Конферансье творческой адями луыны кулэ – вераськем сяна, быгатоно гожъяськыны но, кырӟаны но, маин ке шудыны но. Концерт мыныку, со пӧртэм учыръёсысь потыны мед быгатоз. Артист дӥськутсэ воштыса ӧз вутты, сое воштэ конферансье. Артистлэн нокыӵе шугъяськонэз медаз луы, учкись доры со чиляса кадь потыны кулэ.

Пусйыны луысал Алнашысь Владимир Соловьёвез. Но со концерт нуись ӧвӧлгес, киыз но пыдыз пӧртэм ӝытъёсты, шоуосты, презентациосты нуыны.

- Ноку ӧд малпаськылэ-а дышетон борды басьтӥськыны?

- Вань сыӵе мылкыд. Аслэсьтыд тодэм-валамдэ кинлы ке но кельтоно. Пиналъёсты синйылтыса возёно ни шузи-мази дыръязы, 7-тӥ классын дышетскыкузы. Шуом, филармониын ик кылдытыны луысал миниатюраосъя театр. Но кин ужалоз со бордын? Кулэ нимаз педагогъёс, режиссёръёс, но нырысь ик астэ возьматыны кулэ, театрлэсь ужамзэ. Нош коньдонтэк та уж борды уд басьтӥськы.

Но быгатэмея мон али но адямиослы сцена вылэ потыны юрттӥсько. 25 ар ӵоже кӧня адями мон пыр потӥз. Вячеслав Цветноен ик кӧня ужано луиз. Лыктыкуз со туж еж вал ай.

- Кивалтон ужады пӧртэм шуг-секытъёс пумиськыло. Ансамблез сомында аръёс возён понна, трос кужым но быгатонлык кулэ?

- «Шулдыр ӝыт» ансамбль ӧй улысал, вӧзам ӧй ке луысал Галина Платонова. Музыкальной репертуар бордын со педагог интыын ужа. Выль репертуар кылдытон, выль артистэн ужан – ваньмыз со вылын. Тазалык ӧвӧл, пельпуме кыӵе ке шуг-секытъёс зӥбисько – нош ик со вӧзам. Галина Иосифовна ансамбльлэн анаез. Мон доры вазиськыны уггес ке дӥсьто, со доры мыно.

- Уд малпаське-а, Галина Иосифовна аслаз классической куараеныз операын ӝутскыны быгатысал шуыса? Оло, лэзёно вал бордысьтыды?

- Уг, уг малпаськы. Кӧня мон тодӥсько операын кырӟась удмуртъёсты, кизилиозь ӧз ӝутӥське. Удмуртъёс палэнэгес кылё, операя театрын трос палэнысь лыктэм кырӟасьёс.

Ленинградын дышетскыкуз, Платоноваез Ленконцертэ кельтыны туртто вал, туж шер куара эстрадаез, пе, узырмытоз. Культурая министерство но, филармония но пумит луизы, ми, пе, дышетӥм, костюмъёс вурим, табере асьтэлы кариськоды. Малпасько, та улонын мон ӧй янгыша.

- Анатолий Алексеевич, лыдӟисьёс тӥлесьтыд возьмало на йылпумъян кыл.

- Сценатэк, учкисьёстэк маке уг тырмы кадь та улонын, арня ке но уг потӥськы ни, мӧзмыны кутсконо. Со кыӵе ке висён выллем, сценаен азэм, шуод-а, мар-а. Артист учкисьлы ас кужымзэ, энергетиказэ сётэ, нош сцена сое выльысь берыктэ. Улонлы уг яра ӝожтӥськыны. Кызьы шуо удмуртъёс, асьмеос та улонын – куноос. Соин ик ортчытоно сое яркыт, шулдыр мылкыдын, ог-огедлы юрттыса.

Источник:

Ушаков А. А. Асьмеос та улонын – куноос / А. А. Ушаков ; записала Лия Малых // Удмурт дунне. - 2002. - 16 авг. - С. 6, 11. - (Удмурт кизилиос).


За предоставление материала выражаем огромную благодарность редакции газеты "Удмурт дунне"