Тронина Ольга

Материал из Воршуда
Перейти к: навигация, поиск

Ольга Алексеевна Тронина – егит удмурт кылбурчи.

Ольга Тронина

Улон сюресэз

Ольга Тронина вордӥськиз Эгра ёросысь Сеп гуртын 1989-тӥ арын 31 толсуре.

Оля ассэ шудо адями, шуэ, будыны но, пе, туж лякыт вал. Солэн кык бадӟым апайёсыз. Соос пичи сузэрзэс туж нуныяса возизы. Семьяязы тупаса, ог-огзэс гажаса будӥзы. Нылъёс пичи дыръязы концерт пуктыло вал, анай-атайзы – учкисьёс. Бадӟым апаез нылпи садын ужа, солы аслыз ик сценарийёс но гожъяны кулэ луылэ, творчество солы но матын. Нош шоретӥез – бухгалтер. Со инметӥ поръясьёсты уггес вала. [1]

Котьмаин тунсыкъяськон сям Олялы пыӵам школаын дышетскыкуз ик. Школаысен нылаш мылысь-кыдысь басьтӥськиз интыысь радиоын передачаос кылдытъян борды. Эшъёсыныз ӵош тунсыко адямиос, школа улон, егитъёслэн улэм-вылэмзы сярысь передачаос дасяллязы. Та уж Оляез дӥсьтӥсьгес луыны дышетӥз. Меӵак эфир дыръя юмоке шедёнъёс но вал. Одӥг пол вераськон висказы кыӵе ке кыл борды кугӟазы, нокызьы но шонер верамзы уг луы. Нылашъёс серекъянзэс возьыны ӧз быгатэ - горыны кутскизы. Бӧрысь кырӟан пуктыны йыразы шуккиз ик. Солы кельше на вашкала шыкысын бугыръяськыны – школа музеязы экскурсовод луыса тыршиз. Татын ужакуз ик, нырысьсэ Москвае но вуылӥз. [2] Оля яратыса фольклоръя, эктонъя группаосы пыриськылӥз, куроен выронъя кружоке ветлӥз, пужыятске вал.

Школазэ йылпумъяса, 2007-тӥ арын Оля Тронина Удмурт кун университетлэн удмурт филологияя факультетаз дышетскыны пыриз.[1]

Ижкаре вуыса, кема паймыса ӧз улы. Мылысь-кыдысь пыриськиз факультетлэн ужрадъёсаз.

Городысь егитъёслэн дышетскон, ужан но шутэтскон ласянь луонлыкъёссы бадӟымесь. Кылсярысь. УдГУ-ын кылдытэмын «Неофолк», «Вуюись» студиос. Вань «Чипчирган» ансамбль. Оля ар пала «Чипчирганэ» мынон сярысь малпаськиз. Кепыран сямзэ вормиз. Табере ансамблен ӵош кыӵе но городъёсы ӧз вуылы ни: Кингисепп, Петрозаводск, Нижний Новгород... Трос концертъёс пуктӥзы Ижын, ёросъёсын. Мукет вормонэз - «Неофолк» студие пыриськемез. [2]

Оля тунсыкъяське наукаен (пӧртэм конференциосы пыриськылӥз), яратэ пӧртэм выль интыосы вуылыны (Россиысь трос каръёсы вуылӥз ни, озьы ик кунгож сьӧры но). [1] Финн-угор университетъёслэн ассоциацизы школьной терминологияя пӧртэм удыслыкъёсын кыллюкамъёс поттыны программа чаклаз. Удмурт университет но пыриськиз со ужрадлыке. Оля Тронина дасяз «Огъядышетсконъя шорёзо школаослы удмурт кылын обществознание удыслыкъёсын кыллюкам» (2011) но «Огъядышетсконъя шорёзо школаослы удмурт кылын химия удыслыкъёсын кыллюкам» (2011).

Школаын Оля «Шундыкар» лагере ветлӥз. Со бӧрсьы ик та огазеяськон нылашлы матын луиз. Ижкаре лыктэм бераз, мылысь-кыдысь пыриськыны ӧдъяз «Шундылэн» ужаз. «Шунды сАлянка» программаен ёросъёсы потаз ни, «Шудо семья» фестивалез дасяны но нуыны юрттӥськиз. 2009-тӥ но 2010-тӥ аръёсы «ЭРУ» Элькун праздникез радъяз но нуиз. Мукет ужрадъёсы но пыриськыны тырше. [1] О. Тронина пӧртэм ужрадъёсы, ӵошатсконъёсы пыриське ке но, дышетсконзэ котьку нырысетӥ интые пуктэ. Анай-атайзэ витьёсын гинэ шумпоттэ. [2] 2012-тӥ арын тулыспалэ Оля Тронина быръемын вал «Шундые» кивалтӥсе. Олялэн та огазеяськонлэн ужрадъёсызъя трос малпанъёсыз. Ваньзэ соосты со улонэ пыӵатыны малпа.

Со 2008-тӥ арысен «Ӟечбур!» газетын ужа, но 2011-тӥ арысен 97-тӥ номеро школаын пиналъёслы удмурт кылъя урокъёс нуэ. [1]

Гожъямъёсыз сярысь

Сизьыметӥ классысен Оля Тронина «Ӟечбур!» газетэн эшъяськиз. Соку отын Выль ар кылбуръёслы конкурс ялэмын вал. Кужымзэ эскериз, нырысетӥ инты басьтӥз. Эсьмаса, ӟечбуръёс, кузьым вайыса, асьсэос вуизы Сепе. Вормон нылашез бурдъяз, гожъяськон мылкыдзэ уката пуромытӥз. [2]

2007-тӥ арын школазэ йылпумъякуз, кылбуръёсыз нимысьтыз бичетэн поттымон люкаськиз. «Ӟечбур!» газет юрттэмен, «Кытын мынам ошмесэ?» нырысетӥ книгаез потӥз. Олялэн кылбуретэзлэн валтӥсь нюжаез – яратон. Лирической героез яратонэн улэ, шока, яратонэн мерта азьлане сюрессэ, зарезьлэсь мурдалазэ. Яратон сое эрико тӧдьы юсьлы пӧрмытэ, шуръёслы пумит уяны кужым сётэ.

2008-тӥ арын 28-тӥ коньывуонэ та книгаезлы презентация ортчытэмын вал. Асьсэлэсь малпанъёссэс, мылкыдзэс но ӟеч сюрес сӥзьыса вераськизы тодмо гожъяськисьёс, тодосчиос В. Л. Шибанов, В. М. Ванюшев. Ӵош дышетскись эшъёсыз кылбуръёссэ лыдӟизы. [3]

Нош 2012 арын Олялэн нош ик шумпотыны но данъяськыны мугез вал: печатьысь потӥз «Йыромем йыртэмась» выль книгаез. [1]

Олялэн аслаз верамезъя, кылбуръёс со гожъя пӧртэм адями кусыпъёсты чакласа. Кыкетӥ бичетын лирической героиня эрико – соин со быгатэ улонын вамыш лэсьтыны, быгатэ йыромыны но йыртэманы. Со матын – бускель комнатаысь тодмо нылашка кадь. Кылбуръёсын шӧдӥське огшоры улон, быт, лирической героиня отын яратэ, вожа, курадӟе но мӧзме… Со – пӧртэм. [4]

Мон – апельсин.

Гурт кузя

гын сапег дӥсяса

вамышъясь апельсин…

Городын каблукен

пыдкутчан золтыса,

луисько огшоры

Олокин…

Пызьыртэм

апельсин…

Оля ваче пумит пуктэ бадӟым карез но гуртэз. Гуртысь потэм муртлэн со ноку но ортчонтэм мӧзмонэз. Яратонын но со татысь, музъем вылысь, мурт. Эрико – но со понна сьӧлыко. Вань лулыныз но мугорыныз яратӥсь кышномурт. [4]

Зундэсыд чиньыдэ пӧсятэ,

Ымдурыд мугорме ӝуатэ,

Инмарлэсь ватӥським акшанэ…

Оло шуд тон, оло бӧрдонэ.

Ольга Трониналэн кылбуръёсыз вакчиесь – со юрттэ капчигес шӧдыны-валаны кылбурчилэсь малпанзэ, син азе пуктыны кылбурысь суредэз – со ик возьматэ кылбурчилэсь будэмзэ.[4]

2005-тӥ арын нырысьсэ Г. Ходырев нимо премия кылдытэмын вал. «Дэмен» огазеяськонлэн правлениез кема кенешемез бере огкылэ вуиз. Эшъёсыз пӧлын Оля Тронина но, 10-тӥ классын дышетскись нылаш, та премилэн лауреатэз луиз. [5]

Наградаосыз но премиосыз

Герман Ходырев нимо премилэн лауреатэз, 2005

Библиография

Книгаосыз

Кытын мынам ошмесэ? : кылбуръёс. – Ижевск : Ред. газ. "Ӟечбур!", 2007. – 26 с.

Статьяосыз

"Берытскытэк уд кошкы..." ; "Гижыосме буяй пиштӥсь лакен..." ; "Вождэ эн потты – яратӥ..." : кылбуръёс // Вакыт (Игра). – 2010. – 26 февр. – (Жильыртэ "Кедра ошмес").

Город сииз гуртысь нылашез ; Сюан шудӥ мон... ; Вунэтӥ ке ӟыгыртыны : кылбуръёс // Ӟечбур! – 2012. – 1 марта. – С. 5.

Инвуэз юэм потэ кӧттыр : кылбуръёс // Кенеш. – 2013. – № 7. – С. 3-6 : фот. – Пуштросэз : "Йыроми..." ; "Инмын лобан - одӥг гинэ вамыш..." ; "Кагаз вылын одӥг гинэ пусэн..." ; "Тынад куараед..." ; "Вождэ эн потты - яратӥ..." ; "Кудӟыты но пурӟы..." ; "Уг яратӥськы ке но, вожасько..." ; "Лемлет дэрем кузьмад..." ; "Кыдыра синвуэ - сэрттӥське мылкыды..." ; "Шелеп, лэся, мон луиськем..." ; "Шӧдысал ке сюлмы танэсьтыд малпандэ..." ; "Бӧрӟытыны ке но тыршид...". - Вакчияк авторез сярысь гожтэмын

Кулэ ӧвӧл ; Уг, уг... ; Ошмес ; "Пыдъёсы ке сьӧлтасько..." ; "Акшан лэзькиз музъем вылэ..." : кылбуръёс // Кенеш. – 2006. – № 11/12. – С. 57–58.

«Мон – апельсин…» // Первые строки : поэт. творчество студентов Удмурт. гос. ун-та . – Ижевск, 2009. – С. 40.

Ойдо, ӵок, улон куазь ке зороз! // Вакыт (Игра). – 2007. – 27 марта. – (Жильыртэ "Кедра ошмес").

"Пиртэшо-пиртэшо вужеред но тынад..." ; "Кыдыра синвуэ – сэрттӥське мылкыды..." : кылбуръёс // Ӟечбур! – 2010. – 11 февр. – С. 3.

Поэт в поисках нового смысла // Известия Удмуртской Республики. – 2010. – 16 апр. – С. 3. – (Приговские чтения). – В содерж.: "Шӧдӥскод ке монэ..." : кылбур/ Ольга Тронина.

"Пыдчиньыосы ӟыгыръязы пыдчиньыостэ..." ; "Тыршиськод мукет луыны..." ; "Йӧтӥськы, кудӟыты..." ; "Сылалтэм кияр – закуска, пе..." ; "Яратон утчай..." ; "Город сииз гуртысь нылашез..." ; "Ӟукыртэ лазег валес..." ; "Чупамдэ возьмаса..." ; "Шулдыр луиз, шулдыр луиз..." : кылбуръёс // Удмурт дунне. – 2011. – 16 февр. – С. 5. – (Dart : удмурт егитъёслэн газетсы ; № 2).

"Сылаллэсь кузьытсэ чидало..." ; "Ӟезьыны курадӟи выль кильтро дэремме..." ; "Тодӥсько..." ; "Уг яратӥськы ке но, вожасько..." ; "Лемлет дэрем кузьмад..." ; "Кагаз вылын – одӥг гинэ пусэз..." ; "Берытскытэк уд кошкы..." ; "Яна потӥд..." ; "Шелеп, лэся мон луиськем..." ; "Кыдыра синвуэ – сэрттӥське мылкыды..." : кылбуръёс // Инвожо. – 2009. – № 5/6. – С. 132–133.

"Сюан шудӥ мон..." ; "Зоре туннэ шузимыса..." ; "Тон кошкид ке, зар бӧрдо, дыр..." ; "Кечат-вамат..." ; "Бӧрӟытыны ке тон тыршид..." ; "Мӧзмемъяськи..." ; "Чиданэ мынам – пыдэстэм дунне..." ; "Кут лоба. Акыльтӥз. Вожпотэ..." ; "Сьӧд очки дӥсяса..." ; "Лемлет дэрем кузьмад..." ; "Мята..." ; "Берытскытэк уд кошкы..." ; "Кагаз вылын – одӥг гинэ пусэз..." : кылбуръёс // Инвожо. – 2008. – № 9/10. – С. 40–41.

Тонтэк улыны уг дыш : кылбуръёс // Кенеш. – 2009. – № 7. – С. 35–36. – Пуштросэз: "Шӧдысал ке сюлмы тынэсьтыд малпандэ?." ; "Улмо усем музъем вылэ..." ; "Пиртэшо-пиртэшо вужеред но тынад..." ; "Сьӧд очки поныса..." ; "Мон – апельсин..." ; "Нош ӧй шӧды – киултӥд шудме..." ; "Гажамедлэсь ӧй шӧд кулэлыксэ..." ; "Визнаны васькалляд Яратон шур дуре...".

Удмурт Инмарен вераськон ; Малпаськон ; Сыӵе яратон : кылбуръёс // Инвожо. – 2006. – № 2/3. – С. 3.

Уйвӧтам : кылбур // Удмурт дунне. – 2005. – 12 окт. – С. 6.

Берыктэмъёсыз

Арыслан, чипей но адями : (ӟуч калык выжыкыл) // Сюлэм куараос : альманах. – Ижкар, 2009. – С. 94.

Носов Н. Кампет : (верос) // Сюлэм куараос : альманах. – Ижкар, 2009. – С. 93–94.

Носов Н. Кияръёс : верос // Ӟечбур! – 2010. – 15 июля. – С. 4.

Носов Н. Кышъет : верос // Ӟечбур! – 2010. – 18 марта. – С. 4.

Носов Н. Лёгетъёс : верос // Ӟечбур! – 2010. – 25 февр. – С. 7.

Носов Н. Мишалэн ӝукез : (верос) // Сюлэм куараос : альманах. – Ижкар, 2009. – С. 86–93.

Носов Н. Сяртчы : верос // Ӟечбур! – 2011. – 26 мая. – С. 8 ; 2 июня. – С. 8 ; 9 июня. – С. 4.


Татчы 2005-тӥ арысен потэм чеберлыко статьяос гинэ пыртэмын, кылемъёсыныз тодматскыны быгатӥськоды Удмурт Элькунысь йӧскалык библиотекалэн электрон каталогъёсызъя.

Уже кутэм литература