Тимирзянова Ирина Федоровна

Материал из Воршуда
Перейти к: навигация, поиск

Улонэ уженым пӧлэстӥське

Тимирзянова.jpg

Ирина Тимирзянова – Россиысь огъя дышетон удысысь дано ужась, Удмурт Элькунысь дано журналист, 1-тӥ-4-тӥ классъёслы выль куронъёсъя дасям «Лыдӟон книга» учебникъёслэн одӥгез авторзы. «Вордскем кыл» журналын кыл кутэ покчи но шор ёзо школаын йӧскалык дышетон понна, Дышетонэз азинтонъя элькун институтысь педагогика мастерствоя центрысь методист.

– Кин луон сярысь малпан йыре пичиысен ик лыктэ. Тӥ асьтэдыз кыӵе удысысь адӟылӥды?

– Вордӥськи Дэри ёросысь Лудӟи гуртын. Пичи дырысеным дышетӥсьлэсь ужзэ адӟыса, будӥ. Мамае Алевтина Ивановна Семёнова Совхоз школаын алгебралы но геометрилы дышетӥз. Адӟисько вал, макем со жадьыса бертэ. Вылысьтыз вылаз педсоветъёс, олокыӵе но ужрадъёс. Сыӵе уг кельшы вал тетрадьёсын пукемез, планъёс гожъямез. Озьы ке но дышетон удыс маиныз ке но кыскиз бордаз – пичиысен ик малпалляй, дышетӥсь луо шуыса.

Атае Фёдор Степанович Семёнов гуртамы фельдшер вал, 49 аресказ выйыны шедиз. Ужзэ туж яратӥз, та удысэн герӟаськем 7-8 газет-журнал басьтэ вал. Ижысь эшъёсыз, диагноз пуктыны шугъяськыкузы, куддыръя солы вазиськылӥзы. Соку фельдшеръёс туж ӵем дышетскылӥзы (яке мыным-а озьы потэ вал). Городысь бертэ но милемлы апаеным олома но тунсыкозэ маде вал. Нылпиосты туж яратӥз, нылпи враче дышетскемез потэ вылэм, ёрмысагес улэмысьтызы малпанэз быдэсмытэк кылем. Ми сюрессэ азьланьтом шуыса, оскыса улӥз. Нош нылъёсыз УдГУ-ысь филологияя факультетэз бырйизы. Отчы дышетскыны пыремме тодыса, атае быдэс арня вераськытэк улӥз – сыӵе кӧтыз ӝож луэм.

– Мамады – математик, атайды – фельдшер. Нош тӥ но апайды – Ольга Бородина, «Кенеш» журналысь кылкутӥсь секретарь – гуманитарийёс. Кытысь тӥляд со?

– Кыкнамы но «Дась лу!» газетэ гожъяським. Удмурт кылъя дышетӥсьмылэн Римма Васильевна Шкляевалэн но шӧдскымон пытьыез вань отын, ас палаз кыскыны быгатӥз.

Шумпотӥсько сюлэмыя кельшем ужын тыршемелы. Вань улытозям, журналистлэн но дышетӥсьлэн ужзы пӧлэстӥськыса выллем кошко. 3-тӥ курсын дышетскыкум, журналистика специализация усьтӥськиз, кивалтӥз соин Александр Шкляев. Распределение дыръя Дэбес ёросысь «Новый путь» газетлэн соку редакторез Илья Байметов университетэ лыктӥз но милемды Алексей Тимирзяновен дораз ӧтиз – Башкортостанысь ас палъёссэ котыраз люкамез потӥз, вылды.

– Кузпалды Алексей Хабибзянович али – Удмурт Элькунысь Тӧролэн но Правительстволэн пресс-службазылэн кивалтӥсезлэн воштӥсез. Тодэмея, тӥ соин университетын одӥг группаын дышетскиды.

– Кузпалъяським 5-тӥ курсысен. 27-тӥ июне кун экзамен сётӥм, мукет нуналаз сюанмы вал. Кемдӥз Горбачёв кивалтон вакыт, вина юыны уг яра – сухой закон, пе. Быдэс гужем куазь туж кӧс, пӧсь улӥз. Нош сюан нуналамы кисьтӥз ке кисьтӥз. Ижысь загсын гожтӥським, табере эшъёсынымы, мынам ӵыжы-выжыосыным ӵош Башкириысь Калтасы ёросысь Бадӟым Тугынӥ гуртэ мыноно. Мар ке муген Удмуртиез но Башкириез герӟась Буй шур вамен чугун сюрес выж тӥяськем, поездмы 4 час ӵоже сылӥз. Вань сиён-юонмы поездын ик сииськиз. Ижысь лымшор бере потыса, гуртэ 5 часын ӵукна гинэ вуимы. Алексейлэн ӵош дышетскем эшъёсыз, ӵыжы-выжыосыз асьсэ коже шулдыръяськиллям ни. Анаймы али ке но жаль потэ, сомында сюлмаськем. Сюанчиосты, выль кензэ асьсэ йылолъёссыя выж лёгетъёсын пумитаны ӧдъя вылэм. Поездысь автобусэн мыноно на вал, нош автобус зор бере гуртэ пырыны ӧз быгаты. Ми, нӧдэз коласа, быдэс иськемез мыноно луим. Азбаре пырим но, пиос соку ик флягаез адӟизы, отысь пожаськем вуэн ботинкаоссэс миськыны кутскизы. Нош отын сур вылэм! Ӵош улэммылы туэ 31 ар тырмиз. Сюан нуналмес Сочиысь Роза Хуторын пусйимы, канат сюрес кузя 2 сюрс 300 метре гурезе тубамы. Кузпалъяськеммес пиналъёсмы но, эшъёсмы но вунэтыны уг сёто.

Дэбесын 2 толэзь ужаса, Алёшаез армие басьтӥзы. Мон, декретэ потыса, мамае доры кошки. Бӧрысь ни кыкнамы но ужамы «Новый путь» ёрос газетын. Алексей – гурт удысъя отделын, мон – кыл кутӥсь секретарь. Кӧня ке ужаме бере Валерий Нуриахметов шуиз, ойдо, пе, удмурт кылын «Байгурезь» газет поттом. Соглаш кариськи.

Туж умой вакыт вал 1980-тӥ аръёсы. Редакциысь коллективенымы люкаськыса, ӝытъёсы колхозын ужасьёс доры концертъёсын потамы. Люкаськем калыклы ёросысь, элькунысь выль иворъёс вераськом, собере концерт возьматӥськом вал. Машинаын ик репетиция ортчытӥськом. Со вакытэ улон огыр-бугыр пӧзиз, егитъёс мӧзмыса ӧз улэ. Ваньмылэн пиналъёсмы вань. Алёшаен ӵош ужамы бере, пиосмес нокытчы кельтыны вал, ӝыт репетициосы сьӧрамы редакцие ик басьтылӥм. Ми концерт возьматӥськом, соос пукон вылын изё.

Дэбесэ шедеммылы али но шумпотӥсько, пиналъёсты кышкатэк шудыны лэзиськод вал, дышетскизы но одӥг сменаен. Соин но пиосмы гань-гань будӥзы кадь потэ. Удмурт кылэз школаын дышетӥзы. Бадӟымез Ванямы «Аспэк» огазеяськонын ужа. Дима налоговой инспекциын тырше.

– Дэбес педучилищее кызьы сюрес шедьтӥды?

– Журналист луыса 8 ар пала ужай. Одӥг пол газетын ялэм конкурслы культурая юртын йылпумъянъёс лэсьтӥм, соку монэ синйылтэм педучилищелэн директорез Виталий Викторович Чирков. Ӵектӥз доразы ужаны. Мынӥ. Педучилище мынам доре кадь потылӥз. Татын ужам аръёс но одӥг нунал кадь ортчизы. Редакциен кусып тупатӥмы, студентъёслэн ужъёсынызы «Байгурезь» газетын бам поттӥськом вал. Ваньзы сямен ӟеч дышетскизы. Соос али тросэз ужало нылпи садъёсын, школаосын, пӧлазы вань директор но, завучъёс но. Журналистикаез бырйизы Светлана Поторочина, Ольга Ардашева, Светлана Добрякова.

Эшшо педучилищеын кылдӥз «Шунды» огазеяськонлэн «Тылси» ёзэз. Удмурт театрысь артист но режиссёр Алексей Ложкин ӝыны ар пала ми дорын дышетскиз, Татьяна Осотоваен соос та ёзэз кылдытӥсьёс луизы.

– Студентъёсын ужан вуттӥз дышетӥсьёс дорозь?

– «Вордскем кыл» журналын ужаны педучилищеын дышетэм аръёсы туж юртто. Дышетӥсьёслэсь тодон-валанзэс будэтонъя институтэ но педучилище пыр шеди, шуыны луоз. Педучилищеын берло аккредитация ортчытыку, студентъёслэсь удмурт кылъя тодон-валанзэс эскерыны Рудольф Березин вуылӥз, со соку Дышетӥсьёслэсь тодон-валанзэс будэтонъя институтысь удмурт кылъя кафедраен кивалтӥз. Бадӟым комиссия вуэмысь, нырысь куалектӥ, угось мыным группаын диктант ортчытоно. Пыр-поч дасяськи: текстэз кыӵе куараен лыдӟоно, кӧня люкетлы предложениез люконо, кӧня пауза лэсьтоно. Занятиын диктовать карисько но шӧдӥсько: куарае дырекъя. Урок бере малпасько: коть нуназеяны мед кошкоз вал та Рудольф Фёдорович, туж строгой потӥз уго. Нош со азям ик пуксиз но, тетрадьёсты эскеремме учкыса, пуке. «3» но, «4» но пуктӥсько, вылды. Собере, тетрадез басьтыса, выльысь учке мынэсьтым эскертэмме. Бератаз, калык кылбурчилы Степан Широбоковлы сӥзьыса, внеклассной ужрад возьматӥм на. Нылъёс гитараен шудо, кылбуръёс лыдӟо. Степан Павловичлы сӥзем музейын экскурсия радъямы. Иже улыны лыктыса, «Вордскем кыл» журналэ интыяськи. Кык нунал ортчиз но, Р. Березин жингыртэ, айда, пе, институтэ, яраз кызьы ужамед.

– Иже лыктон – со будон луиз-а?

– Будон-а, мар-а, шуод. 2004-тӥ арын семьяенымы Иже вуим. «Вордскем кыл» журналлэн валтӥсь редакторез Илья Байметов мыло-кыдо пумитаз. Но нырысь нуналъёсаз редакциын туж мӧзмыт потӥз. Угось студентъёс котырын ӧвӧл, юр-яр нокин уг кары, урокысь гырлы уг жингырты. Озьы мӧзмыт мылкыдын малпаськонъям, ӵапак дыраз луиз институтэ ужаны ӧтён. Пумен отчы-татчы ветлыса, ӧраз пыри, дыр но тырмемысь дугдӥз. Но 1-тӥ сентябрь вуэ ке, сюлэм бугыръяськыны кутске. Кык-куинь арзэ нырысетӥ дышетскон нуналэз бӧрдэме потыса пумиталляй.

Студентъёслэсь мӧзмон озьы ик ӧз кысы сюлмысьтым. Пумиськонъёс дыръя оломае но тодамы вайиськом. Берлояз адӟиськыкумы, серемме поттӥзы. Тӥ, пе, доска вылэ мар ке гожъяськоды но, ми пала берытскыса, шуиськоды вал: кыӵе мон яратӥсько аслэсьтым ужме.

Соиз но, таиз но уже нош ик ог-огенызы герӟаськемын. Удмуртлыкен, шаертодонэн герӟаськем ужпумъёсъя дышетӥсьёсын курсъёс ортчытъяськом, семинаръёс, конференциос радъяськом. Та ужрадъёс дыръя быръем ужъёссэс «Вордскем кыл» журналэ но поттӥськом. Адӟисько, кин кыӵегес ужа, кинэн кусып тупатоно.

Та дуннеын ваньмыз, ог-огеныз пӧлэстӥськыса, кошке. Педучилищеын ужакум, кельше вал художественнографической отделениын дышетскисьёслэсь пленэр ужъёссэс учкылыны, суредаськонъя дышетӥсьёслэсь лекциоссэс кылзыны. Тунсыкъяськонэ пайдатэм ӧз ортчы. Удмурт литературая учебникъёсы суредасьёслэсь репродукциоссэс пыртэмен, дышетӥсьёс, соос сярысь материал курыса, вазиськылыны кутскизы. Озьы ми валтӥсь удмурт художникъёс но соослэн ужъёссы сярысь быдэс номер поттӥм, институтын художникъёслы сӥзем курсъёс но радъяй. Со дунын ке но вал, дышетӥсьёс пӧлын тунсыкъяськисьёс трос шедизы. Пумиськонъёсы вуылӥзы Пётр Ёлкин, Семён Виноградов, Вячеслав Михайлов, Василий Мустаев. Валентин Белыхлэн мастерскояз поталлямы, Василий Морозов доры искусствоосъя школае ветлӥмы. Тазьы ужаммылэн емышез но кылдӥз, покчи но шор ёзо классъёсын ужаны «Кыллэн но буёллэн дуннеязы» но «Буёлэн суредаса» методической пособиос поттӥ.

Вал сыӵе но учыр. Курсъёсы лыктэм 30 кузя дышетӥсьёсын шаерысьтымы Суредан искусствоосъя музее мынӥськом. Отын соку Пётр Ёлкинлэн адӟытонэз радъямын вал. Вераськимы, суредась ачиз отын луоз шуыса. Но кыӵе ке мугъёсъя Пётр Васильевич лыктыны ӧз быгаты. Музейын ужасьёсын кусыпъёсмы ӟечесь вал бере, соос адӟытонэз нуыны мыным оскизы. Часлэсь кема ми картинаос дортӥ ветлӥм. Оло шонер верай, оло маке йылтӥ, но дышетӥсьёс тау карыса кошкизы, аслым но кельшиз гинэ (серекъя).

Институтын ужан вакытысьтым туала писательёсъя учебной фильмъёс лэсьтон бордын ужаммы тодам лыктэ. Ми соосты кафедраен кивалтӥсен Андрей Клементьевен дасям. Соослэн ӟечлыксы туж вылӥын уд шуы, но дышетӥсьёслы ужазы со туж дыраз луиз.

Институтын ужаса, трос адямиосты усьтӥськод. Соос курсъёс, конференциос, открытой урокъёс дыръя яркыт шараясько. Озьы аттестация комиссиын эксперт луыса урокъёсы потакум, аслым выль нимъёс усьтылӥ. Тодматски тунсыко дышетӥсьёсын Людмила Семёновна Кузнецоваен но Валентина Ивановна Беловаен (Дэри ёрос, Вылӥ Женвай школа), Юлия Николаевна Софроноваен (Вавож ёрос, Кионгурт школа) но мукет. Пумен соос журналэн эшъяськизы, быгатэмзэс конференциосын, мастер-классъёсын возьматъяны кутскизы. Куд-ог дышетӥсьёс пумен ӵыжы-выжыос кадь потыны кутско ни. Кыӵе ке материаллы шугъяськиськод ке, тодӥськод ни кинлы вазиськыны. Трос соос, но нимысьтыз пусйысал С. Малининаез, Н. Голубинаез (Шаркан ёрос), Г Мамонтоваез, Н. Кабановаез (Дэри ёрос), Л. Решетниковаез (Сьӧлта ёрос), Л. Широбоковаез (Якшур-Бӧдья), Л. Агаеваез (Ува ёрос), М. Долгановаез Пичи Пурга ёрос), В. Абросимоваез (Якшур-Бӧдья ёрос), В. Широбоковаез (Кузебай Герд нимо гимназия). Трос аръёс ӵоже журналлэн оскымон эшъёсыз луо Н. Ермокина, М. Захарова (Пичи Пурга ёрос).

– Ирина Фёдоровна, ужды дышетон удысэн герӟаськемын бере, туала технологиослы но саклык висъяськоды, дыр?

– Бен, выль дышетон технологиослы ми журналамы бадӟым саклык висъяны тыршиськом, таин герӟаськем статьяосты но дышетӥсьёслэсь уроклы конспектъёссэс печатласьком. Угось удмурт кылъя дышетӥсь, татысь сяна, нокытысь таӵе материалэз уз шедьты ни. Нош институтын, та технологиослы сӥзьыса ик, курсъёс радъяськом. Кӧня ке ар талэсь азьвыл выль куронъёсъя 5-тӥ-9-тӥ классъёслы удмурт литературая урокъёслы конспектъёсын сборникъёс поттӥм. Со дышетӥсьёслы шӧдскымон юрттэт луиз, малпасько. Туэ удмурт кылъя сыӵе бичетъёс поттыны дасяськиськом.

– Можга педколледжысь дышетӥсен Татьяна Ивановаен ӵош 1-тӥ-4-тӥ классъёсын дышетскисьёс понна «Удмурт лыдӟон» учебникъёс поттон борды но басьтӥськиды.

– Дышетонъя но наукая министерстволэн куремезъя мон кӧня ке ар ӵоже покчи классъёслы выль учебникъёслы, ужан тетрадьёслы рецензиос гожъяй. Дышетонэ выль стандартъёс пыӵамен, «Лыдӟон книга» учебникъёсты но выльдоно луиз. Та уж борды басьтӥськыны мыным но ӵектӥзы. Озьы Татьяна Сергеевнаен ӵош (со азьвыл учебникъёслэн одӥгез авторзы) уж борды басьтӥським. Учебникъёс потӥзы Дышетон удысысь йӧскалык ужпумъёсты тодон-эскеронъя элькун институт пыр.

Татьяна Сергеевнаен скайп, Интернет пыр кусып возим. Огпол ог-огмылы материал келян куспамы ужмылэн бадӟым люкетэз ышиз. Нош ужмес сётоно ни. Вот соку пӧсекъям ке пӧсекъям ми. Оглом вераса, туж емышо аръёс вал со. Учебникъёс, методикая пособиос дасян, «Удмуртия» издательствоен ӵош ужан трос тунсыкозэ, тодмотэмзэ усьтӥз.

– Секыт вакытэ мар-о буйгатэ сюлэмдэс?

– Тунсыко уж. Жадён дыръёс луо ке но, кытчы ке ишкалтӥськыса кошкон мылкыды уг кылды. Вань пыдлон сюлмам пукись малпанъёсы но. Пичи дыръям туж потэ вал эктэме, университетэ но пыри, эктонъя «Надежда» ансамбле ветло шуыса. Искусствоосъя школа пыр потэмъёсты гинэ, пе, кутӥськом. Куке но одно дышетско ай, малпасько. Кырӟаны яратэме вуттӥз университетысь «Чипчирган» ансамбле. Кӧня ке дыр ортчыса, кивалтӥсьмы Розита Анкудинова огнаме кырӟаны куриз. Нош мон возьдаськисько, куарае ляб. Озьы возьдаськеменым ансамбле ветлэмысь дугдӥ. Но хорын али но кырӟасал, педучилищеын дыръя кадь. Сюлэмам озьы ик гома походъёсы ветлон мылкыд. Пичи дыръям ми Таня эшеным ялан малпаськылӥм трос нуналъем походэ потаны, дуннеез адӟыны. Малпанмес быдэстыса ӧм вуттэ, пичи дырмы тӧлӟиз. Нош малпан йыре кылиз. Будо куинь внучкаосы: бадӟымезлы 3 арес, покчиосызлы 1 арес тырмиз. Тӥни кинъёсын дуннеез котыръяны луоно.

Мон шӧдыны кутски: аръёс ӝоггес но ӝоггес ортчыны ӧдъязы, нуналъёс лобӟо, минутъёс ву кадь кошко. Туж жаль, матысь эшен сюлмысь, дыртытэк лабыртыны-кенешыны дыр уг тырмы. Нош сюлмысь потэм вераськонлэсь номыр но дуноезгес ӧвӧл кадь потэ мыным.

Источник:

Тимирзянова, И. Ф. Улонэ уженым пӧлэстӥське / И. Ф. Тимирзянова ; записала Л. Малых // Удмурт дунне. - 2016. - 12 авг. - С. 10, 15 : фот. - (Тӧр шорын).

За предоставление материала выражаем огромную благодарность редакции газеты "Удмурт дунне"